1 Ehole e tɛkɛ e miɛmbɛ mi pɛ levile, ebeamaka Pasika, ebatamaka; 2 Bakondji ba banganga ba Ndjakomba na balehi ba mobeko bahombaka enɔeli ebowa Yesu, endolo babangaka bato.

3 Satana akweaka adi Yudasi, obeamaka Isikaliota. Yo adaka omɔti o batingami domi na babae. 4 Yudasi akɛkɛ aokana na bakondji ba banganga ba Ndjakomba na bakondji bakabane tepelo ta bohomba enoeli ebokaba Yesu. 5 Basepaka mɛnɛ ko bamodikanaka bamopa palanga. 6 Yudasi adimaka ko aimeaka bohomba enɔeli epele tine bokaba Yesu, tine bato badae pɛ bodjeba.

7 Aimeaka isu i tɛkɛ e miɛmbɛ mi pɛ bole, busa bowakabo bana ba bhata tine pasika; 8 Yesu alomaka Piɛlɛ ko Yoane. Abalaka na bu: «Kɛni alobɔngedjeni mia ma Pasika.» 9 Bamohɔdjɔkɔ: «Apalaka wɛ lokaebɔngedja djɔ?» 10 Abalaka na bu: «Ehole akweakeno ta ibonga, wasakanakeni na momi omɔti alwali mbola e madiba. Mokimanani mbunoko ta ndako akweake yo. 11 Balani na moswa ndako: "Molehi aohɔdjɔkɔ: Adi ekenge e ndako eboani na mbi boyaka mia ma Pasika na batingami djɔ?" 12 Yo ainedjakeni ta egbili, ekenge e ndako enɛnɛ ebɔngedja bo na leka losusu loboani oho diko. Edi oho wabɔngedjakeni mia ma pasika.» 13 Bakɛkɛ, bataneaka misusu oko elenge abalaka Yesu na bu ko babɔngedja mia ma Pasika.

14 Aimeaka ehole, Yesu adaka ta mesa na bapɔsɔlu ba nde. 15 Abalaka na bu: «Nadaki na posa nayake na nu mia ma Pasika boso bo enɔngi! 16 Tengasa, nabali na nu, nayaketebi naikina mbunoko bodua bo Bokumu bo Ndjakomba.» 17 Atombaka kɔbɔ, apaka Ndjakomba mɛlɛsi ko abalaka: «Tombani kɔbɔ ye ko ekabanani ta ndanda e bino; 18 Tengasa, nabali na nu, donga edɛdi namwɛtebi naikina mana ma vino ye mbunoko bodua bo Bokumu bo Ndjakomba.»

19 Ngɔngɔ atombaka mwɛmbɛ apaka Ndjakomba mɛlɛsi, alenakaka ko abapaka. Abalaka na bu: «Iye edi mokuku mo mbi mokabami tina e bino. Kɔkɔni bea tine bolɛdjɛni.» 20 Abapaka pongono kɔbɔ, ngɔngɔ i mia, abalaka: «Akɔkɔ oko moda momina mondumba mokɔ yo na kɔbɔ. Abalaka: Kɔbɔ ye edi bwela boyanie ta ndjea e makia ma mbi masopeake tina e bino. 21 Endolo endjani: mokabi o mbi adi ya, ayaka ta mesa engbanga emɔti na mbi! 22 Soti, Mwana o Moto agwake bokokana na mbuno e Ndjakomba; endolo ndjokwa na yona omokabi!» 23 Bapɔsɔlu baimeaka bosahɔdjɔnɔ tine bodjeba moto ndani ta ndanda e bobo oboani bokɔ modjɔ mo mina.

24 Bapɔsɔlu babomanaka kitɛ na ngulu tine bodjeba moto onɔi bina nde na bonɛnɛ. 25 Yesu abalaka na bu: «Bakondji ba ngondo bakangɔndje bato ba bobo ko badi na kpatsi adiko i bobo; bakapale bababeake bato bapele. 26 Endolo etada bea tina e bino. Onɔi na bonɛnɛ ta ndanda e bino atombe polo esuka; ko yona apalaka adae mokondji adae elenge mosali. 27 Tengasa yona onɔi na bonɛnɛ nda? Yona odi ta mesa kaoko yona akɔmedjaka? Editi yona odi ta mesa? Na bea, mbi nadi ta ndanda e bino elenge yona akɔmedjaka! 28 Ino odakani na mbi seko ta mameko. 29 Ndenge emɔti sange mbi apani Bokumu, mbi pongono nopakani Bokumu: 30 wayakeni ko wamwakeni mesa emɔti na mbi ta Bokumu bo mbi, ko odabini ta ngbɛndɛ tine bosambedja mabota domi na mabae ma Isalɛlɛ.»

31 «Simo, Simo! Oka: Satana ahombaka enɔeli tine aopupeni elenge akapupe bo mbuma i bule. 32 Endolo mbi nongɔni tine wɛ, tine boo edimeli e wɛ esakwa. Ko ehole asɔmbeakeni wɛ, pingedja bange i wɛ.» 33 Piɛlɛ abalaka na nde: «Kumu, nadi mbuti nakɛ na wɛ ta bɔlɔkɔ ko nagwɛ na wɛ.» 34 Yesu amosɔmbedjaka: «Nabali na wɛ, Piɛlɛ, boso bo kɔkɔ akɔkɔlɔ busa bu wainganeakeni mbala isato boo otadjebakani.»

35 Ngɔngɔ Yesu abalaka na bu: «Ehole eolomakani mbi elomu pɛ palanga, pɛ sɛki, pɛ sapato; otakakani eka?» «Bamosɔmbedjaka, ngasa loitakaka eka.» 36 Na bea abalaka na bu: «Endolo edɛdi, yona odi na palanga aetombe, moda momɔti na yona odi na sɛki; ko yona odi pɛ mopamba atɛke esendja e nde bɛngi asombe ekina. 37 Tengasa, nabali na nu, etungi ekokedjame ta mohelo mo mbi: "Adaka ta ndanda e motango mo baoweli ba bato babe" Na bea, na balaka na nu etungi misusu mikokedjakani*.» 38 Batingami babalaka: «Kumu, endja mipamba mibae imi.» Yesu asɔmbedjaka «Mikoki oko bea!»

39 Yesu aimaka ko akɛkɛ, elenge elamaka yo, ta ngomba e Olipa. Batingami ba nde bamokimanaka. 40 Ehole eimeaka yo ta polo emina, abalaka na bu: «Ongɔnɔni, osakwani ta bomekama.» 41 Na bea asasuaka na bu mo tɔtɔkɔ, akwaka magbundɔ ko aongɔnɔkɔ 42 na mibalo imi: «Sange mbi, okapala, dongedjani kɔbɔ ye e saya. Mokano mo mbi modae pɛ bokokedjama endolo mo wɛ.» 43 Na bea obwɛndji amoimaneaka donga ta busa amopingedjaka. 44 Adaka na saya enɛnɛ ta molema, aongɔnɔkɔ na bhingi mɛnɛ. Ipetola i nde imeaka elenge matanga ma makia makwaka ta kpɔtɔ*.

45 Ngɔngɔ i bongɔnɔ, angɔkɔ, ahulaka adi batingami ko abataneaka bawɛli, baembɛi na ndjokwa. 46 Abalaka na bu: «Owɛlini tina nda? Angɔni ko ongɔnɔni, osakakwani ta bomekama.»

47 Ehole edaka yo abala na emumu e bato eimeaka ko Yudasi, omɔti o batingami domi na babae, yo moto obadaledjaka. Abatamaka mbuti na Yesu bɛngi amobhimbe. 48 Endolo Yesu abalaka na nde: «Yudasi, edi na bobhimbani okabi Mwana o Moto?» 49 Ehole enɛkɛ batingami badalaka na Yesu modjɔ momina, bamohɔdjɔkɔ: «Kumu, loboani loane na mipamba?» 50 Ko omɔti o bobo alenaka mosali o nganga monɛnɛ o Ndjakomba itoi i ebɔ e bami. 51 Endolo Yesu abalaka: «Kinani, moboani oko bea!» Apeaka itoi i moto omina ko ahelaka.

52 Ngɔngɔ Yesu abalaka na bakondji ba banganga ba Ndjakomba, na bakondji bakabane tepelo na bakondji ba ibonga, ibaduaka abomopea: «Odoini na mipamba na mihukuku, elenge nadi moweli o moto? 53 Masu masusu, nadaka na nu ta tepelo ko oihombani bopeanini. Endolo ehole ye edi e bino ko na ngulu e modidi.»

54 Ibea bapeaka Yesu, bakɛkɛ na nde ngbandengba ta ndako e mokondji o banganga ba Ndjakomba. Piɛlɛ abakimanaka mo bohali. 55 Bayodjaka mosa ta ndalengando e bopango bomina ko Piɛlɛ adaka ndanda e bato ibadaka bahiki. 56 Mosali mwali omɔti, amoenɛkɛ mbuti na mosa; amotingeaka miso ko abalaka: «Moto yo pongono adaki na nde.» 57 Endolo Pielɛ ainganaka ko abalaka: «Natamodjebaka.» 58 Mo ehole mokɛkɛ ngɔngɔ, moto okina amoenɛkɛ abalaka: «Wɛ pongono, odi omɔti o bobo!» Endolo Piɛlɛ asɔmbedjaka: «Ngasa, te mbi.» 59 Ngɔngɔ i ehole emɔti, moto okina pongono apingedjaka bobala na ngulu: «Edi soti, moto iyo adalaki na nde, tengasa adi Mogalilea.» 60 Endolo Piɛlɛ asɔmbedjaka: «Natadjebaka meako mia mabalaka wɛ.» Oko ta ehole edaka yo abala, kɔkɔ akɔkɔlɔkɔ. 61 Kumu ahombanaka ko akokoledjaka Piɛlɛ. Na bea Piɛlɛ alɛnɛkɛ mibalo mibalaka Kumu na nde: «Boso bo kɔkɔ akɔkɔle busa bu, wainganeakeni mbala isato.» 62 Piɛlɛ aimi sokolu ayeaka na ndjokwa mɛnɛ.

63 Bato ibabaneaka Yesu, bamotaaka ko bamobomaka. 64 Bamodipaka boso ko bamohɔdjɔkɔ: «Obomi nda? Elɛ bonganga!» 65 Ko bamosingaka na kɔpi djinɛnɛ.

66 Ehole eya busa, bakumu ba Bayuda, na bakondji ba banganga ba Ndjakomba ko balehi ba mobeko babolamaka. Baduaka na Yesu ta boso bo ibolea inɛnɛ i basuku ba bayuda 67 ko bamohɔdjɔkɔ: «Lotɔndea, wɛ odi Kilito? » Abasɔmbedjaka: «Nakotɔndeani, otadimeakenini, 68 ko nakohɔdjɔni ihɔdjɔ, otasɔmbedjakenini. 69 Endolo donga edɛdi Mwana o Moto adabi ta ebɔ e bami e Ndjakomba onɔi na sueya*.» 70 Bato basusu bagamaka: «Wɛ mɛnɛ odi Mwana o Ndjakomba?» Abasɔmbedjaka: «Obalini.» 71 Na bea babalaka: «Loditi naikina na posa e batemo! Tengasa looki so bɛnɛ na monɔkɔ mo nde.»