1 Ehuma e busa bo eyenga, bali bakɛkɛ ta ikila, na misoloa miso e itindi imibɔngedjaka bo*. 2 Baenɛkɛ ibanga idipaka bo ta ikila balihilingodjaka; 3 bakweaka, endolo baitaneaka mokuku mo Kumu Yesu. 4 Elenge ayekama bo: bami babae balwaka bisendja bidaka bangɛsɛ babimaneaka. 5 Balumaka na bɔɔ mɛnɛ ko basuneaka maso ma bobo ta kpɔtɔ bami bamina babalaka na bu: «Tina ndani wahombakani ta ndanda e bago moto o bomɔ? 6 Aditi ya, asapusoi. Lɛdjɛni mibalo miobaleakani yo ehole edaka yo oho ta Galilea: 7 "Etungi Mwana o Moto akabame adi bato babe, abakame ta Ekulusu ko apusoe ta tei e bago ta isu i basato."» 8 Balɛdjɛkɛ mibalo mi Yesu. 9 Badongaka ta ikila ko bakɛkɛ atɔndɔ meako mi mina adi batingami domi na omɔti ko bato bakina. 10 Edaka Malia e Magadala, Yoana ko na Malia, nange e Djake. Bali bakina badaka na bu babalaka oko bea meako mimina adi bapɔsɔlu. 11 Endolo bapɔsɔlu balɛdjɛkɛ meako mibalaka bali bamina midongaka ta malɛno ma bobo bɛnɛ ko baimidimaka. 12 Oko ta ehole emina Piɛlɛ angɔkɔ akɛ ebango ta ikila; asunamaka ko aenɛkɛ oto bipasa bi bisendja. Ngɔngɔ ayanaka oho adakabo, eni akamoe meako imi minɔmɔkɔ.

13 Oko ta isu imina, batingami babae badaka bakɛ ta ibonga emɔti kombe Emausu. Bohali bo Emausu na Yelusalɛmɛ bodaka ba kilomɛtɛlɛ mbuti na domi na bibae. 14 Badaka basabaleane ta tina e meako misusu imi nɔmɔkɔ. 15 Ehole edaka bo basabaleana ko basabomeana kite, Yesu yo mɛnɛ abatamaka ko adalaka na bu engbanga. 16 Bamoenɛkɛ; endolo baimosipoaka. 17 Yesu abahɔdjɔkɔ: «Eka asabaleanakano wadaleni nde?» Baemaka, na ndjokwa esusu. 18 Omɔti o bobo, kombe Keopasi, abalaka na nde: «Bato basusu ba Yelusalɛmɛ badjebi meako manɔkɔ masu mi oko wɛ moto adaka pɛ bomidjeba?» 19 Abahɔdjɔkɔ: «modjɔ nda??» Bamosɔmbedjaka: «Imu mokɔmi na Yesu o Nasaleta! Adaka mbaeli o Ndjakomba o ngulu; aminedjaka na misala ko na mibalo mi nde ta boso bo Ndjakomba ko ta boso bo bato basusu. 20 Bakondji ba banganga ba Ndjakomba ko na basuku ba ibonga bamokaba bɛngi bamopɛ etumbo e bogwa ko bamobake ta ekulusu. 21 Lodaka na ndingo edi yo moto obwanaka bosikoa Isalɛlɛ. Endolo ta misusu mia, edi busa bu isu i basato donga akɔmi modjɔ mo mina. 22 Bakina bali ba engbanga e biso balokamodji. Bakɛkɛ nahindihindi ta ikila 23 endolo baitaneaka mokuku mo nde. Bahulaka ko balotɔndeaka boo babwɛndji basaenɛmedjaki na bu ko babatɔndeaki boo adi na bomɔ. 24 Bakina binasu bakɛkɛ ta ikila ko bataneaka misusu oko moda ebatɔndeaka bali, endolo yo, baimoenɛkɛ.» 25 Na bea Yesu abalaka na bu: «Bato bataka ebowɛi! Tina ndani milema mi bino te midime meako misusu mikotɔndeni Ba mbaeli ba Ndjakomba! 26 Eboanakiti boo Kilito anɔnge boso bo bokwea ta e kumu e nde?» 27 Ngɔngɔ abatingodjaka mibalo mikomama ta makomi, bobanga ta buku i Mose ko na buku isusu i ba mbaeli ba Ndjakomba.

28 Ehole ebatamaka bo na ibonga yena ekɛkɛ bo, Yesu akɔkɔ elenge bokimana ndjea ekɛkɛ yo. 29 Endolo bamosiaka babalaka: «Daa na su; busa boimei mɔkɔmɔkɔ ko bulu boimei.» Akweaka ko adaka na bu. 30 Ehole edaka yo na bu ta mesa, atombaka mwɛmbɛ ko apaka Ndjakomba mɛlɛsi; abukakaka mwɛmbɛ ko abapaka. 31 Na bea, miso ma bobo madipoamaka ko bamosipoa; endolo alɛmoaka. 32 Basabaleanaka: «Milema mi biso midaka na sepi ehole ebalaka yo na su ta ndjea ko elotingodjaka yo makomi?»

33 Na mbala emɔti basangɔdjɔkɔ ko basɔmbɔkɔ ta Yelusalɛmɛ. Bataneaka batingami domi na omɔti bato bakina badaka polo emɔti, 34 babalaka na bu: «Soti Kumu apusoi! Nasenɛmedji na Simo!» 35 Ibo pongono babatɔndeaka meako iminɔkɔ na bu na ndjea ko moda momosipoaka bo ehole ebukaka yo mwɛmbɛ.

36 Yana adakabo babala, Yesu asenɛmedjaka ta ndanda e bobo ko abalaka na bu: «Bogo bodae na nu!» 37 Balumaka na bɔɔ bonɛnɛ, tengasa balɛdjɛkɛ baeni edjo. 38 Endolo Yesu abalaka na bu: «Oyegebanini tina nda? Tina e kitɛ ta milema mi bino nda? 39 Endjani mɔmɔ na mako ma mbi: edi oko mbi! Bɛndjɛnini ko endjanini, tengasa edjo editi na muni na mokuwa, elenge enɛkɛno adi mbi.» 40 Ehole ebalaka yo kɔpi imina abainedjaka mɔmɔ na mako ma nde. 41 Badaka na sepi enɛnɛ iyena ekɔkɔ bo badae pɛ ko bodima ko balumaka na bakamoa, abahɔdjɔkɔ: «Odini na eka oboyaka?» 42 Bamopaka ekenge o moswi ekalangake. 43 Aetombaka ko aeyaka ta boso bo bobo. 44 Ngɔngɔ abalaka na bu: «Ehole edaka mbi na nu, endjani meako miotɔndeakani mbi: imikomama ta tina e mbi ta mobeko mo Mose, ta buku i Ba mbaeli ba Ndjakomba ko ta ndjembo, misusu mibwani mikokedjame.» 45 Na bea abadipoaka bowɛi bɛngi basipoe makomi, 46 ko abalaka na bu: «Endjani mikomama: Kilito atungi boka saya, ngɔngɔ apusoe ta tei e bago isu i basato,* 47 ko etungi balehe na kombe e nde ta mabota masusu, bobanga ta Yelusalɛmɛ; bo babwani bahombedje milema ko na bodiha boyɛmɛ bo mabe. 48 Odini batemo ba meako mimina. 49 Ko nalomake mbi mɛnɛ adi no yena eodikanani Sesa. Na bea no, dikani ta ibonga enɛnɛ mbunoko olumeni na ngulu adongake odiko.»

50 Ngɔngɔ Yesu abaimedjaka sokolu e ibonga enɛnɛ, mbuti na Betania, ko oho, angɔdjɔkɔ mɔmɔ abadjongoaka. 51 Ehole adakayo ebadjongoa, agbɔtɔkɔ na bu ko aiwea ta busa. 52 Endolo bo, bamokumedjaka ko basɔmbɔkɔ ta Yelusalɛmɛ, na mosepi monɛnɛ mɛnɛ. 53 Badaka bihole bisusu ta tepelo bakumedjaka Ndjakomba.