Maria

A wo Yesu fɔmi he si

26 Elizabet si dami ɔ hlami ekpa mi pɛpɛɛpɛ ɔ, Mawu tsɔ bɔfo Gabriel nɛ ɔ nɔuu kɛ ho Galilea kɔpe ko nɛ a tsɛɛ ke Nazaret ɔ ya. 27 A tsɔ lɛ zangmayo ko nɛ li nyumu nɛ a tsɛɛ lɛ ke Maria a ngɔ. Maria nɛ ɔ, a bi e si ha Matsɛ David bibimibi ko nɛ a tsɛɛ lɛ ke Yosef ɔ.

28 Gabriel ya je e he kpo ngɔ tsɔɔ Maria nɛ e de lɛ ke, "Mo he manye, mo nɔ nɛ a dloo mo; Nutsɔ ɔ kɛ mo ngɛ."

30 Se bɔfo ɔ de lɛ ke, "Maria, o tsui nɛ ko po, Mawu to e yi mi kaa e maa jɔɔ mo ngɛ nyakpɛ blɔ pɔtɛɛ ko nɔ. 31 E be kɛe kulaa nɛ o maa da si, nɛ o ma fɔ binyumu. Biɛ nɛ o maa wo lɛ ji ‘Yesu.’ 32 Bi nɛ ɔ ma ba pee Nɔmlɔ ngua, nɛ a ma tsɛ lɛ Mawu Bi; nɛ Mawu ma wo lɛ ngɔ hi e nɛnɛkasowa David Matsɛ sɛ ɔ nɔ. 33 Nɛ lɛ nɛ e maa ye Israel nɛ ji Yakob we ɔ nɔ matsɛ kɛ ya neneene. Nɛ e matsɛ yemi ɔ se be poe ligbi ko."

Bimwɔyo ɔ fɔmi he si womi

18 Nɛ bɔ nɛ Yesu Kristo fɔmi ɔ ba ha ji, a bi Maria nɛ ji Yesu nyɛ ɔ si kɛ ha Yosef. Se Mumi Klɔuklɔu ɔ ha nɛ Maria na muklii benɛ e li nyumu.

46 Maria hu ha heto nɛ e de ke, "I ngɛ Mawu yi jee; 47 nɛ i na ye yi wami helɔ Mawu ɔ he bua jɔmi. 48 Ejakaa e hɛ ji e mawayo humi bi ɔ nɔ. Nɛ kɛ je be nɛ ɔ mi kɛ yaa a, yi nɔhi tsuo ma tsɛ mi ke nɔ nɛ Mawu jɔɔ lɛ. 49 Ejakaa Mawu Ope ɔ tsu ni nguahi ha mi. 50 E naa yi nɔ tsuaa yi nɔ bihi nɛ buu lɛ ɔ mɔbɔ.

51 E kɔni si wa, nɛ e gbɛɛ he nɔ woli kɛ pupuupu peeli ngɔ fiaa. 52 E kpa matsɛmɛ kɛ je a matsɛ sɛ ɔmɛ a nɔ nɛ e wo humi bimɛ a nɔ. 53 Nihi nɛ hwɔ ngɛ mɛ yee ɔ, e ha nɛ a tɔ kɛ ni kpakpahi, nɛ ni nali ɔmɛ ɔ e fie mɛ kɛ ho kɛ dɛ mi gu. 54 Moo hyɛ bɔ nɛ e ye kɛ bua e sɔmɔlɔ Israel ha; nɛ e hɛ ji si nɛ e wo kaa e maa na lɛ mɔbɔ ɔ nɔ. 55 Ejakaa e wo wa tsɛmɛ nɛ ji Abraham kɛ e bimɛ ɔmɛ si kaa e maa na mɛ mɔbɔ daa."

4 Akɛnɛ Yosef je Matsɛ David weku ɔ mi he je ɔ, e ba mi kaa e hia blɔ kɛ je Nazaret ngɛ Galilea kɛ ho Betlehem nɛ ji Matsɛ David ma a mi ya ngɛ Yudea nɛ e ya ngma e biɛ ngɛ lejɛ ɔ. 5 E kɛ Maria nɛ e bi e si nɛ e maa ngɔ, nɛ jamɛ a be ɔ mi e hɔ wa a nɛ a hia blɔ ɔ nɛ.

6 Benɛ a ngɛ Betlehem ɔ, Maria be su, 7 nɛ e fɔ e kekle binyumu; nɛ e wo tako kɛ blaa e he nɛ e wo lɛ ngɔ wluɔ lohwehi a niye ni nɔ́ mi, ejakaa a nɛ blɔ ngɛ nibwɔhi a to he ɔ.

19 Se Maria lɛɛ e wo munyu ɔmɛ kɛ wo e tsui mi nɛ e hii he susue.

34 Simeon gbaa fɔli ɔmɛ nɛ e de bi ɔ nyɛ ɔ ke, "A maa gbɔ o tsui mi ha nɛ o maa hao ngɛ o mumi mi tɔɔ ngɛ bi nɛ ɔ he. 35 Ejakaa nihi fuu ngɛ Israel ma kua lɛ, nɛ enɛ ɔ kɛ a hɛ mi kpatami maa ba. Se lɛ kɛ nɛ e ma ha nihi fuu hu ma na bua jɔmi nɛ pe kulaa. Nɛ kɛ gu e nɔ ɔ, tsui mi laami nihi fuu maa je kpo."

48 Nɛ e fɔli ɔmɛ na lɛ ɔ, a nya mi jɔ. E nyɛ ɔ bi lɛ ke, "Binyumu, kɛ o pee wɔ nɛ ɔ kɛɛ? I kɛ o tsɛ kpa he tsuaa he ngɛ mo hlae."

49 Ní nɛ e bi mɛ ji, "Nɛ mɛni hia kaa nyɛ hla mi? Nyɛ kai we kaa i ma hi hiɛmɛ nɛ ɔ ngɛ Sɔlemi We ɔ nɛ ji ye Tsɛ We ɔ lo?" 50 Se e fɔli ɔmɛ nui nɔ́ nɛ e de nɛ ɔ sisi.

51 Enɛ ɔ se ɔ, e kɛ mɛ kpale kɛ ho Nazaret ya, nɛ e ya ba e he si ha mɛ. Se e nyɛ ɔ wo sane nɛ ɔmɛ tsuo ngɔ to e yi mi.

3 Nɛ benɛ yo kpeemi wai ɔ ta a, Yesu nyɛ ba de lɛ ke, "A wai ɔ ta."

4 Yesu de lɛ ke, "Maa, i be nɔ́ ko nyɛɛ ma pee ha mo amlɔ nɛ ɔ, ye okadi peemi be ɔ sui lolo."

5 Se e nyɛ ɔ de e sɔmɔli ɔmɛ ke, "Nyɛɛ pee nɔ́ tsuaa nɔ nɛ e ma de nyɛ ke nyɛɛ pee ɔ."

25 Lɔ ɔ he je nɛ soja amɛ pee enɛ ɔ nɛ. Jamɛ a be ɔ mi ɔ, Yesu nyɛ kɛ e nyɛ ɔ nyɛmiyo kɛ Maria nɛ ji Klopa yo ɔ kɛ Maria Magdalena daa si ngɛ Yesu sɛumi tso ɔ he. 26 Benɛ Yesu na e nyɛ kɛ e kaselɔ ɔ nɛ e suɔ ɔ daa si ngɛ lejɛ ɔ, e de e nyɛ ɔ ke, "Maa, o binyumu ji nɛ ɔ nɛ."

27 Nɛ e de e kaselɔ ɔ hu ke, "O nyɛ ji nɛ ɔ nɛ." Nɛ kaselɔ ɔ kpaka e nyɛ ɔ kɛ ho lɛ nitsɛ e we mi ya.

31 Jamɛ a be ɔ mi ɔ, Yesu nyɛ kɛ e nyɛminyumu ɔmɛ ba su lejɛ ɔ nɛ a tsɔ ke a ya tsɛ Yesu ha mɛ. 32 Nihi fuu hii si kɛ bɔle Yesu, lɔ ɔ he je ɔ, a wo sɛ ɔ kɛ mane lɛ ke e nyɛ kɛ e nyɛminyumu ɔmɛ ngɛ lɛ hlae ngɛ agbo ɔ nya.

33 Kɛkɛ nɛ Yesu ha sɛ ɔ heto nɛ e bi ke, "Mɛnɔ ji ye nyɛ aloo ye nyɛminyumu ɔmɛ?" 34 Nɛ benɛ e po he nɛ e hyɛ nimli nɛ pue si kɛ bɔle lɛ ɔ, e de ke, "Ni nɛ ɔmɛ ji ye nyɛ kɛ ye nyɛminyumu ɔmɛ! 35 Ejakaa nɔ tsuaa nɔ nɛ buɔ Mawu tue nɛ e peeɔ Mawu suɔmi nya ni ɔ, jamɛ a nɔ ɔ ji ye nyɛ kɛ ye nyɛminyumu kɛ ye nyɛmiyo."

55 Anɛ tsa pi kapitɛ ɔ bi ɔ ji nɛ ɔ lo? Anɛ tsa pi e nyɛ nɛ a tsɛɛ ke Maria a kɛ e nyɛmimɛ nyumuhi Yakobo kɛ Yosef kɛ Simon kɛ Yuda a? 56 Nɛ e nyɛmiyi ɔmɛ, anɛ pi waa kɛ mɛ tsuo nɛ ngɛ hiɛ ɔ? Jije nɛ e ya na nile nɛ ɔ kɛ je mɔ?"

14 Nihi nɛ ngɛ lejɛ ɔ ji: Petro, Yohane, Yakobo, Andrea, Filipo, Toma, Bartolomeo, Mateo, Yakobo nɛ ji Alfeo bi ɔ kɛ Simon nɛ a tsɛɛ lɛ ke Zelote ɔ kɛ Yuda, Yakobo bi ɔ kɛ Yesu nyɛminyumu ɔmɛ. Yihi fuu nɛ Yesu nyɛ hu piɛ a he ɔ ngɛ lejɛ ɔ.