Marcos 3

1 Ligbi kpa ko ɔ, Yesu ya kpe he ɔ ekohu nɛ e ya na nyumu ko nɛ e nine kake gbo.

2 Kɛkɛ nɛ Yesu he nyɛli ɔmɛ bɔni lɛ huɔmi kaa e ma tsa hiɔtsɛ ɔ ngɛ Hejɔɔmi Ligbi ɔ nɔ lo, bɔ nɛ pee nɛ a na e he blɔ nɛ a nu lɛ. 3 Yesu tsɛ hiɔtsɛ ɔ nɛ e de lɛ ke e ba da si ngɛ asafo ɔ hɛ mi. 4 Kɛkɛ nɛ e plɛ e he nɛ e bi asafo ɔ ke, "Anɛ e da kaa a peeɔ kpakpa aloo a peeɔ yayami ngɛ Hejɔɔmi Ligbi ɔ nɔ? Anɛ e sa kaa a heɔ yi wami aloo a kpataa nɛ hɛ mi?" Se a ti nɔ ko pui e nya mi. 5 E po hɛ kɛ abofu nɛ e hyɛ a hɛ mi kɛ kpe, nɛ e hao, ejakaa e na kaa mɔbɔ nami be a mi. Kɛkɛ nɛ e de hiɔtsɛ ɔ ke, "Moo bɔle o nine ɔ!" Hiɔtsɛ ɔ bɔle e nine ɔ nɛ nɔuu ɔ, he wami ba nine ɔ mi.

6 Amlɔ ɔ nɔuu ɔ, Farisi bi ɔmɛ je kpo ngɛ kpe he ɔ nɛ a ho nɛ a kɛ Herode bi ɔmɛ ya susu bɔ nɛ a maa pee nɛ a nine maa su Yesu nɔ nɛ a kpata e hɛ mi he. 7 Enɛ ɔ se ɔ, Yesu kɛ e kaseli ɔmɛ je Kapernaum kɛ ho wo ɔ nya ya nɛ nihi fuu nyɛɛ e se kɛ je Galilea kɛ Yudea. 8 Nihi hu je Yerusalem kɛ Idumea kɛ Yordan se kɛ hehi tsitsaa kaa Tiro kɛ Zidon ba e ngɔ, ejakaa a nu nyakpɛ nihi nɛ e ngɛ pee ɔmɛ a he, nɛ nihi fuu ba konɛ mɛ nitsɛmɛ a ba na kɛ a hɛ ngmɛ.

9 Ni ɔmɛ a hiɛmi he je ɔ, e de e kaseli ɔmɛ ke a hla lɛ ko kɛ fɔ si ha lɛ bɔ nɛ pee nɛ ke ni ɔmɛ ma fifi lɛ tsɔ ɔ nɛ e sɛ mi kɛ ya pa a nɔ bɔɔ. 10 Ejakaa e tsa hiɔtsɛmɛ babauu jamɛ a ligbi ɔ, nɛ hiɔtsɛmɛ fuu ngɛ bae lolo nɛ a ngɛ e he blɔ hlae nɛ a ta e he nɛ e tsa mɛ.

11 Nɛ nihi nɛ mumi yayami ngɛ a mi ɔ lɛɛ ke a ke a naa lɛ pɛ kɛkɛ a wo a he kɛ ngɛ si fiae ngɛ e hɛ mi kɛ ngmlaa ke, "Mo ji Mawu Bi ɔ nɛ!" 12 Se Yesu hu bɔ mɛ kɔkɔ ke a ko tsɔɔ Nɔmlɔ mimi nɛ e hine.

Yesu kaseli nyɔngma kɛ enyɔ ɔmɛ a hlami

13 Enɛ ɔ se ɔ, Yesu ho yoku ɔ nɔ ya nɛ e tsɛ nihi nɛ e hla amɛ a ti ni komɛ ke a nyɛɛ e se, nɛ a kɛ lɛ ho. 14 E hla a kpɛti ni nyɔngma kɛ enyɔ ngɔ pee e kaseli nɛ e maa tsɔ nɛ a ya fiɛ; 15 nɛ e ha mɛ he wami nɛ a kɛ hia mumi yayamihi. 16 Nihi nyɔngma kɛ enyɔ ɔmɛ nɛ e hla a ji: Simon, nɔ nɛ Yesu wo lɛ "Petro" ɔ. 17 Yakobo kɛ Yohane nɛ ji Zebedeo bi ɔmɛ nɛ Yesu tsɛɛ mɛ ke, "Oslabai bimɛ" ɔ. 18 Ni nɛmɛ nɛ piɛ ɔ ji: Andrea kɛ Filipo kɛ Bartolomeo kɛ Mateo kɛ Toma kɛ Yakobo nɛ ji Alfeo bi ɔ, kɛ Tadeo kɛ Simon nɛ je Kana a, 19 kɛ Yuda Iskariot, nɔ nɛ pee se nɛ e tsɔɔ Yesu se blɔ ɔ. 20 Enɛ ɔ se ɔ, e kɛ e kaseli nɛ ɔmɛ ho we mi ya. Nɛ nihi fuu ba bu a nɔ ekohu bɔ nɛ a na we he blɔ nɛ a wo a nya mi nɔ ko po. 21 Se benɛ e huɛmɛ nu he ɔ, a ba nɛ a ba wo lɛ kɛ je ni ɔmɛ a kpɛti kɛ ho a we mi ya, ejakaa nihi ngɛ dee ke "e yi mi ngɛ puɛe."

Tɔmi nɛ a kɛ ki

22 Mlaa tsɔɔli ɔmɛ nɛ je Yerusalem kɛ ba a hu de ke Beelzebul nɛ ji Abosiamihi a tsɛ ɔ nɛ je lɛ, nɛ e he wami nya nɛ e nyɛ hiaa mumi yayami kpa amɛ ngɛ nihi a mi ɔ nɛ. 23 Kɛkɛ nɛ Yesu tsɛ mlaa tsɔɔli ɔmɛ nɛ e kɛ mɛ tu munyu ngɛ abɛ mi ke, "Kɛ maa pee kɛɛ nɛ Abosiami maa fie e he kɛɛ? 24 Ke ma ko te si kɛ wo lɛ nitsɛ e he nɛ e mi gba a, jamɛ a ma a maa ywia. 25 Nɛ ke we ko mi gba pɛ jamɛ a we ɔ maa ywia. 26 Nɛ ke Abosiami kɛ lɛ nitsɛ e he ngɛ ta hwue ɔ, lɛɛ tse e we ɔ be si dae mɔ, e maa gu. 27 Mɛnɔ nɛ e ma nyɛ ya sɛ katsɛ loo he walɔ ko we mi nɛ e muɔ e weto ni kulaa be mi nɛ e nui lɛ nɛ e fi lɛ kɛ fɔ si?

28 I ngɛ nyɛ dee anɔkuale mi ke, a ma wo nɔmlɔ adesa e yayami slɔɔto nɛ e peeɔ ɔ kulaa ngɔ ke lɛ, kɛ musu bɔmi munyu tsuaa musu bɔmi munyu nɛ e maa tu kɛ si Nɔmlɔ Bi ɔ; 29 se musu bɔmi munyu nɛ a maa tu kɛ si Mumi Klɔuklɔu ɔ, e ji tɔmi nɛ a be woe kɛ ke kɔkɔɔkɔ!" 30 Yesu de mɛ enɛ ɔ, ejakaa a ngɛ dee ke Abosiami he wami nya nɛ e ngɛ mumi yayami ɔmɛ hiae ngɛ. 31 Jamɛ a be ɔ mi ɔ, Yesu nyɛ kɛ e nyɛminyumu ɔmɛ ba su lejɛ ɔ nɛ a tsɔ ke a ya tsɛ Yesu ha mɛ. 32 Nihi fuu hii si kɛ bɔle Yesu, lɔ ɔ he je ɔ, a wo sɛ ɔ kɛ mane lɛ ke e nyɛ kɛ e nyɛminyumu ɔmɛ ngɛ lɛ hlae ngɛ agbo ɔ nya.

33 Kɛkɛ nɛ Yesu ha sɛ ɔ heto nɛ e bi ke, "Mɛnɔ ji ye nyɛ aloo ye nyɛminyumu ɔmɛ?" 34 Nɛ benɛ e po he nɛ e hyɛ nimli nɛ pue si kɛ bɔle lɛ ɔ, e de ke, "Ni nɛ ɔmɛ ji ye nyɛ kɛ ye nyɛminyumu ɔmɛ! 35 Ejakaa nɔ tsuaa nɔ nɛ buɔ Mawu tue nɛ e peeɔ Mawu suɔmi nya ni ɔ, jamɛ a nɔ ɔ ji ye nyɛ kɛ ye nyɛminyumu kɛ ye nyɛmiyo."