1 Ligbi kpa a, Yesu ya ngɛ ni tsɔɔe ekohu ngɛ wo ɔ nya nɛ nihi fuu ba nɛ a ba bu lɛ tue. Ngɛ ni ɔmɛ a hiɛmi he je ɔ, e ya sɛ lɛ mi loko ji e bɔni mɛ ni tsɔɔmi. 2 Nɛ e tsɔɔ mɛ nihi fuu kɛ gu abɛhi a mi nɛ e de ke,

3 "Nyɛɛ bu tue! Ligbi ko ɔ, ngmɔ hulɔ ko ho ni dumi ya. Benɛ e bɔni ni ɔ fiami ɔ, 4 wu ɔ ekomɛ ya pue blɔ he nɛ lohwe pɛlitsɛhi ba mii mɛ. 5 Wu ɔ ekomɛ ya pue tɛ sahi a nɔ he nɛ zu hiɛ́ ngɛ. Wu ɔmɛ puɛ nɛ a wa mlamlaamla, ejakaa zu ɔ mi kuɔ we. 6 Nɛ akɛnɛ zu ɔ mi kuɔ we he je ɔ, nɔ́ ɔmɛ na we sipoku kpakpa ko. Enɛ ɔ he je ɔ, nɛ pu ɔ nya bɔni wami bɔɔ pɛ kɛkɛ nɛ a ngla. 7 Wu ɔ ekomɛ ya pue miohi a mi, nɛ mio ɔmɛ gbe mɛ, ejakaa a na we he blɔ nɛ a wa nɛ a wo yiblii. 8 Se wu ɔ ekomɛ hu ya pue zugba kpakpa nɔ nɛ a puɛ, nɛ a wa nɛ a wo saminya, ekomɛ wo bɔ nɛ a du ɔ ngwɔ he nyingmi etɛ, ekomɛ ngwɔ he nyingmi ekpa, ekomɛ hu lafa." 9 Kɛkɛ nɛ Yesu de mɛ ke, "Nɔ nɛ ngɛ tue nɛ e kɛ maa nu ɔ, e nu."

10 Pee se benɛ e piɛ e kɛ e kaseli nyɔngma kɛ enyɔ ɔmɛ kɛ e kaseli kpa amɛ ɔ, a bi lɛ ke, "Kɛ ji abɛ ɔ sisi kɛɛ?"

11 Yesu ha mɛ heto nɛ e de ke, "Nyɛɛ lɛɛ a ha nyɛ he blɔ kaa nyɛɛ le Mawu Matsɛyemi ɔ mi laami sane ɔmɛ nɛ a ngɔ laa ni nɛmɛ nɛ ngɛ se nɛ a be Matsɛyemi ɔ mi ɔ; mɛɛ lɛɛ abɛ mi nɛ a maa tu mɛ munyu ngɛ. 12 ‘Konɛ a maa na lɛɛ se a be se kɔe; nɛ a ma na maa nu kɛ a tue se a be sisi nue; konɛ a ko kpale kɛ ba Mawu ngɔ nɛ e kɛ a he yayami ɔmɛ nɛ ke mɛ.’ 13 Nɛ ke nyɛ hu nyɛ nui abɛ nɛ ɔ sisi ɔ, kɛ maa pee kɛɛ nɛ nyɛ maa nu abɛ kpahi nɛ i bu ɔmɛ a sisi kɛɛ?

14 Ni dulɔ ɔ ji nɔ ko nɛ ya fiɛɔ Munyu ɔ kɛ haa ni kpahi. Nɛ Munyu ɔ ji wu ɔ nɛ ni dulɔ ya ngɛ fiae ɔ nɛ. 15 Blɔ he he nɛ wu ɔ ekomɛ ya pue ɔ daa si kɛ ha nihi nɛ nuɔ Mawu Munyu ɔ a ti nihi nɛ a tsui wa nɛ ke a nu Munyu ɔ, Abosiami baa nɛ e haa a hɛ jee Munyu ɔ nɔ nɔuu. 16 Tɛ sa nɔ he nɛ wu ɔ ekomɛ ya pue ɔ daa si kɛ ha nihi a tsui, ni nɛmɛ nɛ nuɔ Munyu ɔ nɛ a heɔ lɛ atuu kɛ bua jɔmi, 17 se e pi si ngɛ a mi. Lɔ ɔ he je ɔ, ke amanehlu te si aloo haomi ba a nɔ ngɛ Munyu ɔ he ɔ, kɛkɛ ɔ, a ngmɛɛ Munyu ɔ he nɔuu.

18 Mio zugba he nɛ wu ɔ ekomɛ ya pue ɔ daa si kɛ ha nihi a tsui, ni nɛmɛ nɛ buɔ Munyu ɔ tue nɛ a heɔ Munyu ɔ, 19 se e kɛ we nɛ je nɛ ɔ mi ngɔɔmi nihi kɛ sika suɔmi kɛ ni kpahi ba tsakaa a juɛmi nɛ a wui yiblii.

20 Se zugba kpakpa a tsɔɔ nihi nɛ nuɔ Mawu Munyu ɔ nɛ a pɛtɛɔ he anɔkuale mi, nɛ e waa ngɛ a mi nɛ a woɔ yiblii fuu kɛ bɔɔ he, ekomɛ ngwɔ he nyingmi etɛ, ekomɛ ngwɔ he nyingmi ekpa, nɛ ekomɛ hu ngwɔ he lafa." 21 Nɛ e ya nɔ nɛ e bi mɛ ke, "Mɛnɔ hu suɔ kane nɛ e woɔ nɔ́ ngɔ buɔ nɔ, aloo e tsitsɛɛɔ kaneɔ kɛ woɔ sa tso sisi? Tsa pi nɔ́ nɛ ya hiɔmi nɔ nɛ e kɛ maa konɛ e he nɛ ba se nami.

22 Nɔ́ ko be nɛ a pee ngɔ laa nɛ e be kpo jee ligbi ko. 23 Nɔ nɛ ngɛ tue nɛ e ma kɛ nu ɔ, e nu! 24 Nyɛɛ bu nihi nɛ nyɛ ngɛ nue nɛ ɔmɛ tue saminya nɛ nyɛ kɔ se. Susumi nɔ́ nɛ nyɛ ma kɛ susu nɔ́ kɛ ha ni kpahi ɔ, jamɛ a susumi nɔ́ ɔ nɔuu a ma kɛ susu kɛ ha nyɛ hu kɛ e nɔngmɛ. Si abɔ nɛ nyɛ ngɛ nɔ nɛ nyɛ nu ɔ he ni tsue ɔ, si abɔ nɛ nyɛ ngɛ sisi nue ji lɔ ɔ nɛ. Se ke nyɛ tsu we he ni ɔ, bɔbɔyoo ɔ nɛ nyɛ nu ɔ hu nyɛ hɛ maa je nɔ. 25 Nɔ nɛ ngɛ ní ko ɔ, a ma ha lɛ eko kɛ piɛ he; nɛ nɔ nɛ be eko o, bɔbɔyoo ɔ nɛ e ngɛ ɔ hu a ma he ngɛ e dɛ."

26 Nɛ e bu mɛ abɛ kpa ko hu nɛ e de ke, "Bɔ nɛ Mawu Matsɛyemi ɔ ngɛ ha ji nɛ ɔ nɛ. E ngɛ kaa bɔ nɛ ngmɔ hulɔ ya duɔ blɛfo ngɛ e ngmɔ mi, 27 nɛ e je e he ya hwɔɔ si. Be saii se ɔ, blɛfo ɔ puɛɛ nɛ e waa nɛ ngmɔ hulɔ ɔ li bɔ nɛ ni ɔ peeɔ kɛ waa ha. 28 Zugba a nɛ haa ni ɔmɛ waa a nɛ. Kekleekle ɔ, blɛfo ɔ puɛɛ nɛ e jeɔ ba; lɔ ɔ se ɔ, e kpaa bi nɛ e gbɔɔ. 29 Nɛ ke blɛfo ɔ gbli pɛ ngmɔtsɛ ɔ tsɔɔ e we bi kɛ yaa ngmɔ ɔ mi nɛ a ya kpɔɔ blɛfo ɔ, ejakaa ni kpami be ɔ su."

30 E pa bu mɛ abɛ kpa ko hu ngɛ Mawu Matsɛyemi ɔ he nɛ e bi mɛ ke, "Mɛni he nɛ wa ma wo Mawu Matsɛyemi ɔ kɛ to? 31 E ngɛ kaa wu ko nɛ a tsɛɛ ke sinapi wu. Wu nɛ ɔ ji wuhi a kpɛti wu nɛ klee we pe kulaa. 32 Se ke a du lɛ nɛ e puɛ ɔ, e peeɔ tso nɛ klee pe tsohi kulaa. Nɛ e jeɔ kɔnihi gagaaga nɛ lohwe pɛlitsɛhi ba peeɔ tsu ngɛ mi nɛ a naa hi he ngɛ lejɛ ɔ."

33 Abɛhi kaa enɛ ɔmɛ a mi nɛ Yesu tuɔ munyu ngɛ kɛ tsɔɔ ni ɔmɛ ni bɔ nɛ a maa nu sisi. 34 He nɛ ma kpe ngɛ ɔ, abɛ mi pɛ e tuɔ munyu ngɛ, se ke e piɛ e kɛ e kaseli ɔmɛ sɔuu ɔ, e jeɔ abɛ ɔmɛ a sisi haa mɛ.

35 Ligbi ɔ benɛ du bu ɔ, Yesu de e kaseli ɔmɛ ke a ho wo ɔ se ya. 36 Kɛkɛ nɛ a je ni ɔmɛ a kpɛti nɛ e kaseli ɔmɛ ngɔ lɛ kaa bɔ nɛ e ngɛ ngɛ lɛ ɔ mi ɔ. Nɛ lɛ tsɔwi kpa komɛ fie a se. 37 Se benɛ a yaa ngɛ wo ɔ nɔ saii pɛ nɛ kɔɔhiɔ ngua ko te. Kɔɔhiɔ ɔ bɔni nyu fiami kɛ lɛ ɔ mi womi nɛ lɛ ɔ maa ho mumi ya. 38 Jamɛ a be ɔ mi ɔ, Yesu hwɔɔ si nɛ e ngɔ e yi ngɔ fa sɔnue nɔ ngɛ lɛ ɔ se je blɔ nɛ e hwɔ mahe pɔpɔɔpɔ. Kɛkɛ nɛ e kaseli ɔmɛ wo tsui pomi kɛ he hiami ya tsiɛ lɛ nɛ a bi lɛ ke, "Nutsɔ, nɛ lɛ ɔ maa ho mumi ya nɛ ɔ nɛɛ, e pee we mo kɔmɔ ko kulaa lo?"

39 Nɛ Yesu te si nɛ e nga kɔɔhiɔ ɔ yi, nɛ e de wo ɔ ke, "Moo ngmɛ!" Amlɔ ɔ nɔuu ɔ, kɔɔhiɔ ɔ jɔɔ fiami, nɛ wo ɔ ngmɛ dii.

40 Nɛ e bi e kaseli ɔmɛ ke, "Mɛni he je nɛ nyɛ ye gbeye kikɛ ɔ? Anɛ nyɛ na we hemi kɛ yemi ngɛ ye mi kɛ sa lo?"

41 Kpaloko ji gbeye nu mɛ pe kekle ɔ, nɛ a bɔni a si bi bimi ke, "Nɔmlɔ mimi te nɛ ji enɛ ɔ, nɛ wo kɛ kɔɔhiɔ tete buɔ lɛ tue nɛ ɔ nɛɛ?"