1 Enɛ ɔ se ɔ, a pue nɔ kɛ ya su Galilea Wo ɔ nya ngɛ Gerase bi ɔmɛ a zugba a nɔ. 2 Si nɛ lɛ ɔ ke e saa nɔuu nɛ Yesu ngɛ si kplee ɔ, kɛkɛ nɛ nyumu ko nɛ mumi yayami ngɛ e mi nɛ na lɛ ngɛ pa a nɔ lokoo ɔ wo fo kɛ je gɔ ɔ mi nɛ e kɛ lɛ ba kpe.

3 Nyumu nɛ ɔ godo ɔ nya wa saminya, nɛ lɔ ɔ he je ɔ, e hi we mi; gɔ mi ngɛ yɔkɔ ɔmɛ a kpɛti ji he nɛ e hii nɛ nɔ ko nyɛ we lɛ nɛ e nu. 4 Ke nine su e nɔ nɛ a bɔ lɛ pã nɛ a wo kɔsɔkɔsɔ titi kɛ wo lɛ po hu ɔ, e nyɛɔ nɛ e tsitslɔ kɔsɔkɔsɔ ɔ mi nɛ e tsɔɔ pã a kɛkɛ e je. Nɔ ko nɔ ko be nɛ ngɛ he wami kɛ lɛ sɔ nɛ ma nyɛ lɛ. 5 Nɛ nyɔ kɛ pia a, e hii ngmlaa kpae ngɛ gɔ ɔ mi kɛ yoku ɔmɛ a nɔ nɛ e woɔ tɛ ke hii e he poe.

6 Benɛ Yesu ngɛ lɛ ɔ mi kɛ ma ngɛ lokoo nɛ nyumu nɛ ɔ na lɛ, nɛ e tu fo ba nɔ si ngɛ e hlami.

7 Nɛ e kpa ngmlaa wawɛɛ nɛ e de ke, "Mɛni peemi i kɛ mo ngɛ, mo Yesu hiɔwe lokoo Mawu ɔ Bi? I na Mawu kaa o ko pee mi nɔ yeyee ko!" 8 E de enɛ ɔ, ejakaa benɛ e maa ho Yesu ngɔ sumi ya pɛ nɛ Yesu nga mumi yayami ɔ yi nɛ e de lɛ ke, "Mumi yayami, jee kpo ngɛ e mi!"

9 Nɛ Yesu bi nɔ ɔ ke, "Kɛ a tsɛɛ mo kɛɛ?" Nyumu ɔ ha heto nɛ e de Yesu ke, "A tsɛɛ mi ke Asafo, ejakaa wa he hiɛ."

10 Nɛ a kpa Yesu pee ke e ko fie mɛ kɛ je kpo ɔ mi lejɛ ɔ.

11 Se jamɛ a be ɔ mi ɔ kpotoo komɛ ngɛ ni yee ngɛ yoku ɔ he ngɛ pa a nya. 12 Nɛ mumi yayami ɔmɛ kpa Yesu pee ke e ha nɛ a ya sɛ kpotoo ɔmɛ a mi.

13 Nɛ Yesu ha mumi yayami ɔmɛ blɔ nɛ a hia kɛ je nyumu ɔ mi kɛ ya sɛ kpotoo ɔmɛ a mi. Kɛkɛ nɛ kpotoo maa pee akpe enyɔ ɔ kulaa wo fo kɛ ya sɛ pa a mi nɛ a hɛ mi kpata.

14 Benɛ kpotoo kpakali ɔmɛ na enɛ ɔ, a tu fo kɛ ho ma a mi ya nɛ a ya bɔ amaniɛ ngɛ kɔpe ɔmɛ tsuo a mi. Nihi bu kɛ je ma a mi kɛ ba nɛ mɛ nitsɛmɛ a ba hyɛ kɛ a hɛ ngmɛ. 15 A na nyumu ɔ kaa e hɛ mi tɛ nɛ e bu bo kɛ hii si kpoo. Nɛ a ye gbeye. 16 Nihi nɛ na nɔ́ nɛ ba a ngwɔhe ɔ, bɔ nihi nɛ je ma a mi kɛ ba a bɔ nɛ nɔ́ ɔ plɛ kɛ ba ha. 17 Se benɛ ma mi bi ɔmɛ nu munyu nɛ ɔ, a ye Yesu gbeye saminya nɛ a kpa lɛ pɛɛ nɛ e je a ma a mi. 18 Benɛ Yesu kpale ngɛ lɛ ɔ mi sɛe konɛ e je ɔ, kɛkɛ nɛ nyumu ɔ nɛ e hɛ mi tɛ ɔ kpa lɛ pɛɛ ke e kɛ lɛ maa ya. 19 Se Yesu kplɛɛ we lɛ. E de lɛ ke, "Moo ho o we mi ya ngɛ o wekuli a ngɔ, konɛ o ya bɔ mɛ nyakpɛ níhi kulaa nɛ Mawu tsu ha mo ɔ kɛ dloomi nɛ e dloo mo ɔ."

20 Nyumu ɔ ho nɛ e ya fiɛ nɔ́ nɛ Yesu tsu ha lɛ ɔ ngɛ Ma Nyɔngma amɛ tsuo a mi; nɛ munyu ɔ pee nihi kulaa nɛ nu ɔ nyakpɛ saminya.

21 Benɛ Yesu wo lɛ kɛ po pa a kɛ ba e se ɔ, nihi fuu ba bua wo e he ngɛ pa a nya.

22 E ngɛ pa a nya nɔuu nɛ lejɛ ɔ kpe he ɔ nikɔtɔma amɛ a ti nɔ kake nɛ a tsɛɛ le ke Yairo ɔ hu ba lejɛ ɔ nɛ e ba kpla si ngɛ e nane nya. 23 E kpa Yesu pɛɛ nɛ e de ke, "Ye biyo be he wami kulaa, nɛ lɔ ɔ ji kaa gbenɔ muɔ nya nɛ e fɔɔ si ngɛ. I kpa mo pɛɛ nɛ o ba nɛ o ba wo o nine kɛ ta e he nɛ e na he wami."

24 Benɛ Yesu nyɛɛ Yairo se kɛ yaa e we ɔ mi ɔ, nihi fuu bu fie e se. 25 Yo ko hu ngɛ ni ɔmɛ a kpɛti nɛ be he wami. Muɔ ngɛ bee ngɛ e he jeha nyɔngma kɛ enyɔ sɔuu ji nɛ. 26 E kpa tsopatsɛmɛ slɔɔtohi a nɔ, nɛ e puɛ e sika kulaa ta se hiɔ ɔ jɔɛ ha lɛ. 27 E nu nyakpɛ níhi nɛ Yesu tsu ɔmɛ a he, nɛ lɔ ɔ he je ɔ, lɛ hu e nyɛɛ e se nɛ e ya pɛtɛ Yesu tade ɔ he.

28 Ejakaa e susu nɛ e de ke, "Ke i ta e tade ɔ nya he kɛkɛ i ma na he wami." 29 Anɔkuale mi ɔ, Yesu tade ɔ he nɛ e ke e taa nɔuu pɛ nɛ muɔ ɔ jɔɔ bemi ngɛ e he, nɛ e nu he kaa e na he wami.

30 Kɛkɛ nɛ Yesu nu he ngɛ e mi jamɛ a be ɔ mi nɔuu kaa tsami he wami ko je e mi. Enɛ ɔ he je ɔ, e plɛ nɛ e bi ke, "Mɛnɔ ta ye he ɔ?"

31 E kaseli ɔmɛ bi lɛ ke, "Nutsɔ, mo nitsɛ o ngɛ hyɛe kaa ni ɔmɛ hiɛ nɛ a ngɛ mo fifie. Kɛ e peeɔ kɛɛ nɛ o biɔ ke mɛnɔ ta o he kɛɛ?"

32 Se Yesu ngɛ e he poe kɛ sa kaa e maa na nɔ nɛ ta e he ɔ lo. 33 Nɛ benɛ yo ɔ na nɔ́ nɛ a tsu ha lɛ ɔ, e wo gbeye kɛ he kpokpomi kɛ ya kpla si ngɛ e hlami nɛ e de lɛ anɔkuale ɔ kulaa. 34 Nɛ Yesu de yo ɔ ke, "Biyo, o hemi kɛ yemi tsa mo; moo ya ngɛ he jɔmi mi, nɛ o hiɔ ɔ nɛ jɔ ha mo."

35 Benɛ Yesu kɛ yo ɔ ngɛ munyu tue nɔuu ɔ, tsɔli je Yairo we ɔ mi kɛ ba ba de lɛ ke, "O biyo ɔ hiɔ ɔ puɛ, lɔ ɔ he je ɔ, mo ko hao tsɔɔlɔ ɔ hu." 36 Se Yesu ngɔɛ tsɔli ɔmɛ a munyu ɔ. E plɛ nɛ e de Yairo ke, "Koo ye gbeye. Moo lɛɛ mo na hemi kɛ yemi ngɛ ye mi kɛkɛ." 37 Enɛ ɔ se ɔ, e ha nɛ asafo ɔ ho da si nɛ e tsɛ Petro kɛ Yakobo kɛ Yohane kɛ piɛ e he nɛ e kɛ mɛ ho Yairo we ɔ mi ya. E ha we he blɔ nɛ nɔ kpa ko nɛ e nyɛɛ a se. 38 Benɛ a ya su ɔ, Yesu na kaa nihi fuu ba bua a he nya ngɛ ya foe nɛ lejɛ ɔ pee basabasa. 39 E sɛ we ɔ mi nɛ e bi ke, "Mɛni he je nɛ nyɛ ngɛ ya foe nɛ nyɛ ha hiɛ ɔ pee hoo kikɛ ɔ? Mahe kɛkɛ nɛ jokuɛ ɔ hwɔ, e gbo we!"

40 Se ni ɔmɛ muɔ lɛ saminya. Kɛkɛ nɛ e ha nɛ nɔ tsuaa nɔ je kpo kɛ je tsu ɔ mi nɛ e kɛ binyɛ kɛ bitsɛ ɔ kɛ e kaseli etɛ ɔmɛ nɛ piɛ e he ɔ sɛ tsu ɔ mi he nɛ jokuɛ ɔ hwɔɔ si ngɛ ɔ.

41 Yesu ya su sa a he nɛ e nu jokuɛ ɔ nine si nɛ e de ke, "Talita kuumi!" E sisi ji, "Biyo, moo te si!" 42 Yesu nya nɔɛ si nɛ jokuɛ yo nɛ ye jeha nyɔngma kɛ enyɔ ɔ te si da si nɛ e bɔni nyɛɛmi. Ni ɔmɛ a nya kpɛ a he nɛ a ye gbeye. 43 Yesu de mɛ veveeve ke a ko de nɔ ko nɔ́ nɛ e pee nɛ ɔ kulaa. Nɛ e de fɔli ɔmɛ ke a ha a bi ɔ nɔ́ ko nɛ e ye.