1 Kɛkɛ nɛ Yesu bu mɛ abɛ nɛ e de ke, "Nyumu ko pee wai ngmɔ nɛ e fia gbogbo kɛ wo he; e pee wai ngami he ngɛ mi nɛ e ma hwɔɔmi he hu ngɛ abɔɔ ɔ mi, nɛ e wo abɔɔ ɔ ngɔ wo apaatsɛmɛ a dɛ nɛ e hia blɔ. 2 Benɛ wai yiblii lami be ɔ su ɔ, ngmɔtsɛ ɔ tsɔ nɔ kɛ ho apaatsɛ ɔmɛ a ngɔ ya nɛ e ya he e blɔ fa mi nɔ́ ba ha lɛ. 3 Se apaatsɛ ɔmɛ nu tsɔlɔ ɔ nɛ a fiaa lɛ ni saminya nɛ a fie lɛ kɛ ho ngmɔtsɛ ɔ ngɔ ya kɛ e dɛ mi gu.

4 Ngmɔtsɛ ɔ pa tsɔ e tsɔli ɔmɛ a ti nɔ kpa kɛ ho apaatsɛ ɔmɛ a ngɔ ya. Se apaatsɛ ɔmɛ nu tsɔlɔ nɛ ɔ hu nɛ a fiaa lɛ ni saminya kaa kekle nɔ ɔ, se lɛɛ a ywia e yi nɛ a fie lɛ kɛ je kpo ngɛ ngmɔ ɔ mi. 5 Ngmɔtsɛ ɔ tsɔ nɔ nɛ ji etɛne kɛ ho apaatsɛ ɔmɛ a ngɔ ya; nɛ lɛɛ a gbe lɛ nɛ e gbo klanaa. Ngmɔtsɛ ɔ ya nɔ nɛ e tsɔ tsɔli kpahi kɛ ho apaatsɛ ɔmɛ a ngɔ ya, se ja a kɛ̃ nɛ a pee mɛ tsuo, a gbe a ti ni komɛ nɛ a fiaa ni komɛ hu ni. 6 E ba piɛ nɔ kake nɛ ji ngmɔtsɛ ɔ binyumu kake too. Kɛkɛ nɛ ngmɔtsɛ ɔ tsɔ lɛ kɛ ho apaatsɛ ɔmɛ a ngɔ ya. Nɔ nɛ e de e he ji, ‘Bɔ fɛɛ bɔ nɛ ji ɔ, lɛɛ a maa bu lɛ.’

7 Se benɛ apaatsɛ ɔmɛ na lɛ pɛ nɛ a de ke, ‘Nyɛ nɛ e ni yelɔ ɔ nɛ ma. Nyɛɛ ba nɛ waa gbe lɛ kɛkɛ ngmɔ ɔ maa pee wa ní!’ 8 Lɔ ɔ he je ɔ, a nu lɛ nɛ a gbe lɛ nɛ a wo lɛ kɛ je ngmɔ ɔ mi nɛ a ya sake e gbogboe ɔ ngɔ fɔ he."

9 Yesu bi mɛ ke, "Anɛ kɛ nyɛ susu kaa ngmɔtsɛ ɔ maa pee kɛɛ? E maa ba nɛ e ma ba gbe apaatsɛ ɔmɛ kulaa nɛ e ma wo ngmɔ ɔ kɛ ha apaatsɛ kpahi. 10 Anɛ nyɛ kane we Ngmami ɔ nɛ de ke, ‘Tɛ ɔ nɛ tsu fiali ɔmɛ sake ngɔ fɔ he ke e hí ɔ, e ba plɛ kɔ nya tɛ. 11 Nutsɔ ɔ ni tsumi ji enɛ ɔ nɛ, nɛ e ngɛ nyakpɛ kɛ gbeye ngɛ wa hɛ mi.’ "

12 Yuda bi ɔmɛ a nikɔtɔma amɛ na paa kaa a he abɛ nɛ e bu ɔ nɛ, nɛ lɔ ɔ he je ɔ, a bɔni e he blɔ hlami nɛ a nu lɛ; se a ya ye ma a gbeye nɛ a ngmɛɛ e he nɛ a je. 13 Kɛkɛ nɛ a ya tsɔ Farisi bi kɛ Herode bi ɔmɛ ekomɛ kɛ ya Yesu ngɔ nɛ a ya ka lɛ bɔ nɛ pee nɛ e de nɔ́ ko nɛ a da nɔ kɛ nu lɛ.

14 A ba nɛ a ba bi lɛ ke, "Tsɔɔlɔ, wa le mo kaa anɔkualetsɛ, o hlɛ nimli a mi nɛ o yi tue kpɛkpɛɛ sane hulɔ. Anɔkuale nɛ kɔɔ Mawu yi mi tomi kɛ ha nɔmlɔ ɔ pɛ nɛ o tsɔɔ. Mo de wɔ enɛ ɔ. Anɛ e da kaa wa woɔ lapoo kɛ haa Kaisare nɛ ji Roma Matsɛ ɔ aloo e dɛ? Waa wo aloo wa ko wo?"

15 Yesu na a juɛmi kɛ ga nɛ a to ɔ, mɛ ja a he je ɔ, e bi mɛ ke, "Mɛni he je nɛ nyɛ ba ngɛ mi klama tsɔe? Nyɛ ha mi sika a eko nɛ ma hyɛ ha."

16 Benɛ a wo sika a ba ha lɛ ɔ, e hyɛ sika a nɛ e bi mɛ ke, "Mɛnɔ yi kɛ hɛ mi nɛ a tɛni ngɛ sika a nɔ nɛ ɔ? Nɛ mɛnɔ biɛ nɛ a ngma ngɛ nɔ ɔ?" A ha lɛ heto ke, Roma Matsɛ ɔ nɔ́ i.

17 Kɛkɛ nɛ e de mɛ ke, "Ke Kaisare nɔ i ɔ, lɛɛ nyɛ wo Kaisare nɔ́ ngɔ ha Kaisare nɛ nyɛ wo nɔ́ nɛ ji Mawu nɔ́ ngɔ ha Mawu." A munyu ɔ heto ɔ ha Yesu he pee mɛ nyakpɛ nɛ a nya mi jɔ.

18 Kɛkɛ nɛ Saduki bi ɔmɛ hu ba Yesu ngɔ. Saduki bi ɔmɛ ji nihi nɛ mɛɛ a ke ke nɔmlɔ gbo ɔ kɛkɛ de e gbo hwɔɔ se gbogboehi a si temi ko be. Nɔ́ nɛ a ba bi lɛ ji,

19 "Tsɔɔlɔ, Mose wo wɔ mlaa ke, ke nyumu ko ngɔ yo se e kɛ lɛ fo we nɛ nyumu ɔ si je mi ɔ, e nyɛminyumu nɛ ngɔ yo ɔ nɛ e kɛ lɛ nɛ a fɔ ha nɔ nɛ si je mi ɔ. 20 E ba mi kaa nyɛmimɛ nyumuhi kpaago hi si. A Tɛte ɔ ngɔ yo se e kɛ lɛ fɔ we nɛ e gbo. 21 Tɛtɛ ɔ ngɔ yo ɔ, nɛ lɛ hu e kɛ lɛ fɔ we nɛ e si je mi. 22 Nyɛmimɛ kpaago ɔ kulaa kɛ yo ɔ hi si nɛ a ti nɔ ko kɛ yo ɔ fɔ we. Enɛ ɔ se ɔ, yo ɔ hu ba gbo.

23 Hwɔɔ se ngɛ gbogboehi a si temi ɔ mi ɔ, nyɛmimɛ nɛ ɔmɛ a ti mɛnɔ maa pee yo ɔ huno, akɛnɛ yo ɔ gba mɛ tsuo ɔ?"

24 Yesu de mɛ ke, "Nyɛ nui Ngmami ɔmɛ a sisi nɛ nyɛ li Mawu he wami ɔ hulɔ, nɛ lɔ ɔ he je nɛ nyɛ ngɛ tɔe ngɛ. 25 Ejakaa hwɔɔ se ke nyɛmimɛ kpaago ɔmɛ kɛ yo ɔ te si ngɛ gbogboehi a si temi ɔ mi ɔ, gbami kɛ yo ngɔmi ko be, mɛ tsuo a maa pee kaa Hiɔwe bɔfohi.

26 Nɛ kaa si temi ko ngɛ hwɔɔ se aloo si temi ko be ɔ, anɛ nyɛ kane we nɔ́ nɛ a ngma ngɛ Mose Womi nɛ ji enyɔ ɔ mi lo? Benɛ Mose na hue kpɔ ɔ nɛ ngɛ tsoe se e ngla we nɛ Mawu tsɛ lɛ kɛ je la a mi ɔ nɛɛ, kɛ Mawu de lɛ kɛɛ? E ke, ‘Ami ji Abraham Mawu, Isak Mawu kɛ Yakob Mawu ɔ nɛ.’

27 Mawu ɔ tsa pi ni gbogboehi a Mawu i, se mohu hɛ kali a Mawu i. Nyɛ ngɛ tɔe tsɔ."

28 Benɛ mlaa tsɔɔli ɔmɛ a ti nɔ kake nɛ ngɛ mɛ tue bue ɔ na bɔ nɛ Yesu plɛ kɛ ha ni ɔmɛ heto ha a, e bi Yesu ke, "Mlaa amɛ tsuo a kpɛti te nɔ́ nɛ he hia pe kulaa nɛɛ?"

29 Yesu ha lɛ heto nɛ e de ke, "Mlaa a nɔ nɛ deɔ ke, ‘Moo bu tue Israel, Nutsɔ wa Mawu ɔ, Mawu kake too i. 30 Nɛ e sa nɛ o suɔ lɛ kɛ o tsui kulaa kɛ o he wami kulaa kɛ o juɛmi kulaa kɛ o susuma kulaa.’

31 Nɛ mlaa nɛ ji enyɔ ɔ ke, ‘Moo suɔ o nyɛmi nɔmlɔ kaa bɔ nɛ o suɔ mo nitsɛ o he ɔ.’ Mlaa ko be nɛ kle pe enɛ ɔmɛ."

32 Mlaa Tsɔɔlɔ ɔ ha lɛ ayekoo nɛ e de ke, "Tsɔɔlɔ, munyu ngwɔhe nɛ o tu ɔ nɛ. Anɔkuale ji kaa Mawu kake too pɛ nɛ ngɛ, nɛ e se ɔ, Mawu kpa ko be hu. 33 Nɛ e ji anɔkuale kaa o suɔ lɛ kɛ o tsui kulaa kɛ o juɛmi kulaa kɛ o he wami kulaa kɛ o susuma kulaa, nɛ o suɔ o nyɛmi nɔmlɔ kaa bɔ nɛ o suɔ mo nitsɛ o he. Enɛ ɔmɛ a he hia kulaa pe afɔle sami mimi slɔɔto ɔmɛ tsuo ngɛ Sɔlemi We ɔ."

34 Benɛ Yesu na kaa nyumu ɔ ngɛ nɔ sisi numi ɔ, e de lɛ ke, "O kɛ Mawu Matsɛyemi ɔ kpɛti kɛ we." Nɛ enɛ ɔ se ɔ, nɔ ko nyɛ we nɛ e bi lɛ sane ko hu.

35 Pee se benɛ Yesu ngɛ ni ɔmɛ nɔ́ tsɔɔe ngɛ Sɔlemi We ɔ, e bi mɛ ke, "Mɛni he je nɛ mlaa tsɔɔli ɔmɛ deɔ ke Kristo ɔ David bibimibi ji lɛ ɔ? 36 Mɛni he je ɔ, Mawu Mumi ɔ ngɔ wo David nitsɛ nya nɛ e de ke, ‘Mawu ye Nutsɔ ɔ ke, moo hi si ngɛ ye hiɔ nine nɔ kɛ ya si be nɛ i ma wo o he nyɛli ɔmɛ ngɔ pee o nane sisi sɛ.’ 37 Ke David nitsɛ tsɛ lɛ ke Nutsɔ ɔ, kɛ e peeɔ kɛɛ nɛ jamɛatsɛ ɔ ba hineɔ David bi kɛɛ?" E munyu ɔ ngɔ nihi fuu a nya nɛ a bu lɛ tue kɛ bua jɔmi.

38 Nɛ e tsɔɔ mɛ ni nɛ e de ke, "Nyɛɛ hyɛ nyɛ he saminya ngɛ mlaa tsɔɔli ɔmɛ a he. A suɔ nɛ a wo tade wuyaa kaa sikatsɛmɛ kɛ hi si slaae ngɛ gbɛjegbɛ ɔmɛ kɛ jua amɛ a nɔ konɛ nihi nɛ na mɛ nɛ a nga mɛ. 39 A suɔ nɛ a hi nikɔtɔmahi a hi hehi ngɛ kpe he ɔmɛ kɛ okplɔɔ yi ngɛ niye ni he ɔmɛ. 40 Se a ji nihi nɛ kpɔɔ yalɔyihi a weto nihi ngɛ a dɛ, se ke a sɔle plaa, o ma de ke a nɔ nimli kpakpa be he ko hu. Anɔkuale ji kaa hwɔɔ se ɔ, a tue gblami maa kle."

41 Nɛ Yesu ho ya hi si ngɛ onia tsumi daka a kasa nya ngɛ Sɔlemi We ɔ nɛ e ngɛ sika nɛ yi ɔmɛ kɛ ba ngɛ daka a mi woe ɔ hyɛe. Sikatsɛ ɔmɛ wo sika saii nitsɛ kɛ ngɛ daka a mi woe. 42 Kɛkɛ nɛ yo ohiafo ko nɛ e huno gbo hu ba nɛ e ba wo kaplɛ enyɔ nɛ sui pɛsua tete kɛ wo daka a mi.

43 Nɛ Yesu tsɛ e kaseli ɔmɛ kɛ ba e kasa nya nɛ e de mɛ ke, "Ma de nyɛ anɔkuale mi kaa sika nɛ yalɔyo ohiafo nɛ ɔ kɛ ba wo daka a mi ɔ hiɛ hluu pe nɔ́ nɛ sikatsɛ ɔmɛ tsuo ba tsu ɔ. 44 Ejakaa sikatsɛ ɔmɛ lɛɛ a ni nɛ a na nɛ be nɔ ɔ mi nɛ a je kɛ ba ha nɔ́ nɛ a ha a nɛ. Se ahoyo ɔ lɛɛ ní tsɛ kɛ nyɛ nɛ ngɛ e dɛ ɔ kulaa nɛ e kɛ ba ha nɛ ɔ nɛ."