1 Nɛ e je lejɛ ɔ, e kɛ e kaseli ɔmɛ je kɛ ho lɛ nitsɛ e ma nɛ ji Nazaret ɔ ya. 2 E ya kpe he ɔ ngɛ Hejɔɔmi Ligbi ɔ nɔ nɛ e ya tsɔɔ ni. Nihi nɛ bu e ni tsɔɔmi ɔ tue ɔ, a na kaa e nile mi kuɔ. Enɛ ɔ pee mɛ nyakpɛ nɛ a bi ke, "Jije Nɔmlɔ nɛ ɔ ya kase ni ngɛ? Nɛ jije nɛ e na nile kaa kikɛ ɔ kɛ je? Nyakpɛ ni nɛ ɔmɛ hu nɛ e ngɛ pee ɔ nɛɛ, jije a je?

3 Anɛ tsa pi kapitɛ ɔ kɛ Maria a bi ɔ, Yakobo kɛ Yosef kɛ Yuda kɛ Simon a nyɛminyumu ɔ ji nɛ ɔ lo? Nɔ nɛ e nyɛmimɛ yihi ngɛ wa kpɛti ngɛ wa ma nɛ ɔ mi ɔ lo?" Kɛkɛ nɛ nɔ́ ɔ pee mɛ tai.

4 Se Yesu de mɛ ke, "Nyɛ nɛ, gbalɔ he be bumi ngɛ lɛ nitsɛ e ma mi kɛ e wekuli kɛ e nyɛmimɛ a kpɛti, se a buu lɛ ngɛ he fɛɛ he." 5 Nɛ akɛnɛ a he we yi he je ɔ, Yesu nyɛ we nyakpɛ ni nguahi nɛ e tsu ngɛ lejɛ ɔ. Nɔ nɛ kɛkɛ nɛ e pee ji, e wo e nine ngɔ pue hiɔtsɛ bɔɔ komɛ kɛkɛ a nɔ nɛ e tsa mɛ. 6 Nɛ e pee lɛ nyakpɛ kaa ni ɔmɛ he we lɛ yi. Enɛ ɔ he je ɔ, e si ma a mi nɛ e bɔni kɔpe ɔmɛ kpami ngɛ ni tsɔɔe. 7 Nɛ e tsɛ e kaseli nyɔngma kɛ enyɔ ɔmɛ nɛ e tsɔ mɛ ni enyɔɔnyɔ nɛ e ha mɛ he wami nɛ a ma kɛ hia mumi yayamihi. 8 E de mɛ ke, nɛ a yaa nɛ ɔ, a hɛɛ dɛma tso, se a ko de ke a maa hɛɛ niye ni loo kotoku loo sika. 9 Nɛ a ko hɛɛ tade loo tokota hu kɛ piɛ nɔ́ nɛ a wo ɔ he.

10 E tsa nɔ nɛ e de mɛ ke, "Ke nyɛ ya su ma ko mi ɔ, nyɛɛ to we kake pɛ mi kɛ ya si be nɛ nyɛ maa je jamɛ a ma a mi. 11 Se ke nyɛ na kaa ma a mi bi ɔmɛ sume nɛ a nu munyu nɛ nyɛ hɛɛ ɔ, nyɛɛ je kɛ ho he kpa ya. Se mohu, ke nyɛ ma si ma a mi ɔ, nyɛ blɛ nyɛ nane si zu ngɔ pue ma a nɔ kaa okadi ngɛ hwɔɔ se he."

12 Kɛkɛ nɛ e kaseli ɔmɛ ma blɔ nɛ a bɔni Munyu ɔ fiɛmi ngɛ ni ɔmɛ dee ke a tsake a tsui. 13 Nɛ a hiaa mumi yayamihi ngɛ nihi fuu a mi nɛ a pɔ hiɔtsɛmɛ nu nɛ a tsa mɛ.

14 E kɛ we nɛ Matsɛ Herode nu Yesu he, ejakaa e nyakpɛ ni tsumi ɔmɛ ha nɛ e he sane kpe zugba a nɔ tsuo. E je nihi a nya nɛ a de ke, "Yohane Baptisilɔ ɔ pɛ nɛ e kpale ba blaa nɛ ɔ nɛ; nɛ enɛ ɔ he je nɛ e nyɛ nyakpɛ ni slɔɔto nɛ ɔmɛ ngɛ tsue ɔ nɛ." 15 Ni komɛ hu de ke Elia, blema gbalɔ ɔ nɛ kpale kɛ ba wami mi ekohu. Se nihi hu de ke, gbalɔ he kaa blema gbali ngua amɛ a ti nɔ ko i. 16 Se Matsɛ Herode de ke, "Dabi! Yohane Baptisilɔ nɛ i ha a po e yi ɔ, lɛ nɛ e kpale te si ekohu ɔ nɛ."

17 Ejakaa Herode nɛ e ha a nu Yohane ngɔ wo tsu mi. 18 Ejakaa Herode ya wo e nyɛmi Filipo yo Herodia nɛ e ngɔ.Nɛ Yohane ka Herode hɛ mi ngɛ he, nɛ e de lɛ ke e dɛ blɔ kaa e ngɔɔ e senɔ yo ɔ. 19 Enɛ ɔ he je ɔ, Herodia sume Yohane sane nɛ e ko na nɛ a gbe lɛ se e na we e he blɔ. 20 Se akɛnɛ Herode yee Yohane gbeye, ejakaa e buu lɛ Mawu Nɔmlɔ he je ɔ, e kɛ lɛ ya to kɛkɛ. Yohane munyu ɔmɛ haoɔ Herode juɛmi, se loloolo ɔ, e suɔ kaa e maa bu lɛ tue.

21 E ba mi kaa Herode ngɛ e fɔmi ligbi yee nɛ e tsɛ okplɔɔ nɛ e kpee e he buli kɛ e tatsɛ ɔmɛ kɛ Galilea nikɔtɔma amɛ kulaa. 22 Nɛ benɛ a ba kpe nɛ a ngɛ ni ɔ yee ɔ, Herodia biyo ɔ ba do kɛ je ni ɔmɛ a hɛ ja, nɛ e do ɔ muɔ Herode kɛ ni ɔmɛ kulaa nɛ ba kpe ɔ a hɛ mi saminya. Lɔ ɔ he je ɔ, matsɛ ɔ de jokuɛ yo ɔ ngɛ ni ɔmɛ a hɛ mi ke, "Mo bi mi nɔ́ tsuaa nɔ nɛ o suɔ, nɛ i ma ha mo." 23 Nɛ e ka lɛ kita ke, "Ke ye matsɛ ma nɛ fɔɔ si nɛ ɔ e mi dlami fiee po i jio, i ma ha mo!"

24 Kɛkɛ nɛ yoyo ɔ ho nɛ e ya bɔ e nyɛ Herodia amaniɛ nɛ e bi e nyɛ ɔ nɔ́ nɛ e ma bi matsɛ ɔ. E nyɛ ɔ ha lɛ heto ke, "Mo ya bi lɛ ke o ngɛ Yohane yi hlae."

25 Yoyo ɔ kpale amlɔ ɔ nɔuu kɛ ho nɛ e ya de matsɛ ɔ ke, "I suɔ nɛ o po Yohane Baptisilɔ ɔ yi nɛ o kɛ fɔ suwe nɔ ha mi nɔuu."

26 Sane ɔ he wa ha matsɛ ɔ saminya, se kaa e ka kita ngɛ nihi nɛ e kpee kɛ ba a tsuo a hɛ mi he je ɔ, e nyɛ we nɛ e kua. 27 Amlɔ ɔ nɔuu nɛ matsɛ ɔ fa e he buli ɔmɛ a ti nɔ kake ke e ya tsu ɔ mi nɛ e ya po Yohane yi ke ba ha lɛ. Kɛkɛ nɛ soja a ho nɛ e ya gbe Yohane ngɛ tsu ɔ mi. 28 Nɛ e wo yi ɔ kɛ fo suwe nɔ kɛ ba ha yoyo ɔ nɛ yoyo ɔ hu wo kɛ ya ha e nyɛ ɔ.

29 Benɛ Yohane kaseli ɔmɛ nu munyu ɔ he ɔ, a ba nɛ a ba wo gbogboe ɔ kɛ ho nɛ a ya pu.

30 Benɛ Yesu kaseli ɔmɛ kpale kɛ ba a, a ba bɔ lɛ a tsɔmi ɔ mi amaniɛ, nɛ a de lɛ ni nɛ a ya tsu kɛ ni nɛ a ya tsɔɔ ni ɔmɛ ɔ.

31 Nɛ Yesu de e kaseli ɔmɛ ke, "Nyɛɛ ba nɛ waa ho he ko banee ya nɛ nyɛ ya jɔɔ nyɛ he bɔɔ." Ejakaa nihi fuu ngɛ a ngɔ bae he je ɔ, kaseli ɔmɛ na we deka nɛ a ma kɛ wo a nya mi nɔ ko. 32 Kɛkɛ nɛ a ya sɛ lɛ mi nɛ a gbla a he si bɔɔ. 33 Se nihi fuu na mɛ be mi nɛ a sɛ lɛ ɔ mi ɔ, nɛ a je kɔpe ɔmɛ a mi nɛ a nyɛɛ nane kɛ fie a se mlamlaamla kɛ ya po mɛ, nɛ a ya su pa a se loko e kɛ e kaseli ɔmɛ ya su. 34 Lɔ ɔ he je ɔ, benɛ e je kpo ngɛ lɛ ɔ mi ɔ, nihi fuu ba su lejɛ ɔ momo; nɛ benɛ e na mɛ ɔ, a ni pee lɛ mɔbɔ. Ejakaa a ngɛ kaa tohi nɛ be kpakalɔ. Nɛ e tsɔɔ mɛ níhi fuu nɛ sa kaa a le.

35 Maa pee gbɔkuɛ he ɔ, e kaseli ɔmɛ ba e ngɔ nɛ a ba de lɛ ke, "Du maa ho bumi ya, nɛ hiɛ ɔ kɛ ma a mi kɛ. 36 Ja a he je ɔ, moo wo ni ɔmɛ blɔ nɛ a ho kɔpekɔpe ɔmɛ kɛ ngmɔ si ɔmɛ ya nɛ a ya hla nɔ́ ko nɛ a ye, ejakaa niye ni ko be hiɛmɛ nɛ ɔ."

37 Se Yesu de mɛ ke, "Nyɛ nitsɛmɛ nyɛ ha mɛ nɔ́ ko nɛ a ye." A ha lɛ heto nɛ a bi lɛ ke, "Mɛni wa ma ha mɛ lo? Anɛ wa ma nyɛ nimli nɛ pueɔ si nɛ ɔ a nya ngma ma he piɔ? Ku sidi lafa enyɔ hu tsa be mɛ sue!"

38 Yesu bi mɛ ke, "Abolo nyɛmɛ ngɛ nyɛ dɛ? Nyɛɛ ya nɛ nyɛ ya hyɛ ha." A ya nɛ a kpale kɛ ba de lɛ ke a ngɛ abolo kakaaka enuɔ kɛ lo tsɔwi enyɔ. 39 Nɛ Yesu de e kaseli ɔmɛ ke, "Nyɛ ha nɛ ni ɔmɛ a bua a he nya kuuhikuuhi kɛ hi si ngɛ nga a nɔ." 40 Nɛ kaseli ɔmɛ ha ni ɔmɛ hi si nyingmi enuɔɔnuɔ kɛ lafalafa.

41 Benɛ ni ɔmɛ hi si ta a, Yesu wo abolo enuɔ ɔ kɛ lo tsɔwi enyɔ ɔ. E wo e hɛ mi nɔ nɛ e hyɛ hiɔwe, nɛ e jɔɔ nɔ. Jehanɛ ɔ, e poo mi nɛ e wo ngɔ ha e kaseli ɔmɛ nɛ a dla kɛ ha ni ɔmɛ. Ja a kɛ e ngɔ lo enyɔ ɔmɛ hu kɛ ha mɛ nɛ a dla. 42 Niye ni ɔ su nɔ tsuaa nɔ nɛ a ye nɛ a tɔ.

43 Nɛ a kukuɔ niye ni ɔ sisi bibliwi nɛ e hyi kusii agboagbo nyɔngma kɛ enyɔ. 44 Nyumuhi nɛ ye ni ɔ a hiɛmi ji akpe enuɔ.

45 A ye ni ɔ ta pɛ nɛ Yesu wo e kaseli ɔmɛ blɔ nɛ e de mɛ ke a sɛ lɛ ɔ nɛ a sɛ e hlami kɛ ho Betsaida ya ngɛ pa a se, nɛ lɛ nitsɛ ɔ lɛɛ e maa wo ni ɔmɛ blɔ loko ji e maa fie a se.

46 Benɛ e kɛ ni ɔmɛ ye sɛ se ɔ, e ho yoku ɔ nɔ ya nɛ e ya sɔle. 47 Nyɔ mi be mi ɔ, e kaseli ɔmɛ ya su pa a kpɛti; se jamɛ a be ɔ mi ɔ, Yesu lɛɛ e ngɛ kpo ɔ nɔ ngɛ pa a se kɛ sa. 48 E na kaa kaseli ɔmɛ ngɛ kɔɔhiɔ kpee wawɛɛ nɛ pɔ ngɛ a he tɔe kɛ lɛ ɔ hluimi. Kɛkɛ nɛ e fie a se, maa pee makɛ ngmlɛ etɛ mi, nɛ e ngɛ nyu ɔ nɔ nyɛɛe. Se benɛ e maa ho a he bemi ya a, 49 a na lɛ nɛ a tsui po nɛ a kpa ngmlaa wawɛɛ, ejakaa a susu kaa kpade i. 50 Se amlɔ ɔ mi nɔuu ɔ, e de mɛ ke, "Nyɛ tsui nɛ ko po. Ami i!" 51 Kɛkɛ nɛ e ya sɛ lɛ ɔ mi, nɛ nɔuu ɔ, kɔɔhiɔ ɔ kpa a nya doomi. Enɛ ɔ ha nɛ a nya kpɛ a he saminya. 52 A yɔse we nɔ nɛ e ji ngɛ abolo sane ɔ se tete, ejakaa a tsui wa. 53 A tsa nɔ nɛ a ya sa si ngɛ Genesaret pa a nya nɛ a muɔ lɛ ɔ si. 54 Se kpo nɛ e je pɛ nɛ nihi nɛ ngɛ lejɛ ɔ yo lɛ, 55 nɛ nɔuu ɔ, a gbɛ e he sane kɛ fia nɛ nihi bɔni a hiɔtsɛ ɔmɛ womi kɛ e ngɔ bami. 56 Nɛ he tsuaa he nɛ e ya a, ngmɔ si kɔpe ɔmɛ kɛ ma tsɔwi ɔmɛ kɛ ma ngua amɛ a mi ɔ, a woɔ hiɔtsɛ ɔmɛ kɛ baa gbɛjegbɛ ɔmɛ kɛ jua amɛ a nɔ nɛ a kpaa lɛ pɛɛ kaa e ha mɛ he blɔ nɛ a ta e tade ɔ he kɛkɛ. Nɛ hiɔtsɛ tsuaa hiɔtsɛ nɛ na he blɔ ta e tade ɔ he ɔ, e naa he wami.