1 Benɛ je na a, osofo nikɔtɔma amɛ kɛ ma mi nikɔtɔma amɛ kɛ mlaa tsɔɔli ɔmɛ kɛ ma kpe ɔ kulaa ya kpe nɛ a wo Yesu kɔsɔkɔsɔ nɛ a kpaka lɛ kɛ ho Pilato hɛ mi ya.

2 Pilato bi Yesu ke, "Anɛ mo ji Yuda bi ɔmɛ a matsɛ ɔ lo?" E ha heto nɛ e de Pilato ke, "Ja a ji bɔ nɛ o de ɔ nɛ."

3 Nɛ osɔfo nikɔtɔma amɛ po munyu slɔɔtohi ngɔ fɔ e nɔ, se e pɛ nya mi. 4 Pilato pa bi lɛ ke, "O be munyu nɛ ɔmɛ nɛ a ngɔ wo o he nɛ ɔ eko kulaa heto hae lo?"

5 Se Yesu kpɛ we e kuɛ si; nɛ Pilato hɛ mi pee lɛ yaa.

6 Daa ke Yuda bi ɔmɛ ngɛ a jeha a yee ɔ, Pilato ngmɛɛɔ Yuda bi nɛ a wo mɛ tsu mi ɔ a ti nɔ kake he kɛ haa mɛ. 7 E ba mi kaa jamɛ a be ɔ mi ɔ, a wo Yuda nɔ ko nɛ a tsɛɛ lɛ ke Baraba kɛ ni komɛ tsu mi ngɛ nɔ ko nɛ a gbe ngɛ ma a atuã tsɔmi kɛ basabasa peemi mi ɔ he.

8 Ma a bi Pilato kaa e pee bɔ nɛ e peeɔ daa jeha ngɛ Hebemi be ɔ mi ɔ kɛ ha mɛ. Nɛ Pilato ha mɛ heto nɛ e bi ke, 9 "Nyɛ suɔ kaa ma ngmɛɛ Yuda bi ɔmɛ a matsɛ ɔ he ha nyɛ lo?"

10 Ejakaa e na paa kaa ninyɛ kɛ he tai he je nɛ osɔfo nikɔtɔma amɛ nu Yesu ngɛ nɛ a wo lɛ kɛ ba ha lɛ ɔ nɛ.

11 Se osɔfo nikɔtɔma amɛ wo ma a yi mi kaa a bi Pilato nɛ e ngmɛɛ Baraba mohu he ha mɛ.

12 Jehanɛ ɔ, Pilato bi ma a ekohu ke, "Lɛɛ mɛni nyɛ suɔ kaa ma pee nɔ nɛ nyɛ ngɛ tsɛɛ ke Yuda bi ɔmɛ a matsɛ ɔ?"

13 Nɛ mɛ tsuo a kpa ngmlaa nɛ a de ke, "Moo sɛu lɛ!"

14 Pilato bi mɛ ke, "Mɛni he je? Mɛni yayami nɛ e pee?" Se kpaloko ji a kpa ngmlaa wawɛɛ pe kekle ɔ ke, "Moo sɛu lɛ!"

15 Nɛ akɛnɛ Pilato ngɛ gbeye yee kaa basabasa maa te si, nɛ e suɔ hu kaa e he hɛ mi fini he je ɔ, e ngmɛɛ Baraba he nɛ e ha a fiaa Yesu kpa nɛ e wo lɛ ngɔ ha ma a nɛ a ya sɛu lɛ.

16 Kɛkɛ nɛ soja amɛ kpaka lɛ kɛ ho Amlaalo ɔ mwɔ ɔ mi ya nɛ a tsɛ soja amɛ nɛ ngɛ mwɔ ɔ he bue ɔ kulaa kɛ ba lejɛ ɔ.

17 Jehanɛ ɔ, a wo tade tsutsu ko ngɔ wo lɛ; nɛ a bɔ mio kla ngɔ bu e yi. 18 Kɛkɛ nɛ a bɔni e he fɛu yemi nɛ a ngɛ lɛ ngae ke, "Mo he manye, Yuda bi a matsɛ!" 19 Nɛ a wo tso kɛ fiaa e yi nɛ a la lada kɛ pue e nɔ nɛ a kpla si ngɛ e hɛ mi ke a ngɛ lɛ jae.

20 Benɛ a ye e he fɛu bɔ nɛ a ma nyɛ se ɔ, a kpɔ tade tsutsu ɔ ngɛ e he, nɛ a wo lɛ nitsɛ e tade ɔmɛ ngɔ wo lɛ, nɛ a kpaka lɛ kɛ ho nɛ a ya sɛu lɛ.

21 Benɛ a yaa ngɛ blɔ ɔ nɔ ɔ, a kɛ nyumu ko nɛ a tsɛɛ lɛ ke Simon nɛ je Kirene, nɛ ji Aleksandra kɛ Rufus a tsɛ ɔ ya kpe nɛ e ma ma a mi, nɛ a nyɛ e nɔ nɛ a wo Yesu sɛumi tso ɔ ngɔ tloo lɛ.

22 Nɛ a wo lɛ kɛ ya su he ko nɛ a tsɛɛ ke Golgata, nɛ e sisi ji Yikokonohe. 23 Kɛkɛ nɛ a ha lɛ wai nɛ a wo mi tsopa, se e kua numi. 24 Lɔ ɔ se ɔ, a ka lɛ kɛ wo sɛumi tso ɔ he. Nɛ a fɔ e tade ɔmɛ a nɔ sɔ kɛ dla mɛ ngɔ ha a he.

25 Be mi nɛ a ke sɛu lɛ ɔ ji mɔtu ngmlɛ nɛɛ.

26 Nɛ a ngma munyu nɛ a kɛ wo e he ɔ ngɔ fɔ e yi mi je ke, "Yuda bi ɔmɛ a matsɛ ɔ."

27 Jamɛ a mɔtu ɔ mi nɔuu ɔ, a sɛu ojo fiali enyɔ hu ngɔ piɛ e he, nɔ kake ngɛ e hiɔ nɔ, kɛ nɔ kake hu ngɛ e muɔ nɔ. 28 Lɔ ɔ he je ɔ, Ngmami ɔ nɛ de ke, "Nɛ a bu lɛ kɛ piɛ yayami peeli a he" ɔ ba mi.

29 Nɛ nihi nɛ ba be ngɛ lejɛ ɔ ye e he fɛu nɛ a hoso a yi nɛ a de ke, "Mo nɛ o ke o maa hule Sɔlemi Tsu ɔ nɛ o maa kpale ma lɛ ekohu ngɛ ligbi etɛ mi ɔ, mo ji enɛ ɔ? 30 Mo kple si kɛ je sɛumi tso ɔ nɔ nɛ o he mo nitsɛ o yi wami."

31 Ja a kɛ̃ nɛ osɔfo nikɔtɔma amɛ kɛ mlaa tsɔɔli ɔmɛ hu ye e he fɛu nɛ a de ke, "Ni kpahi a yi wami nɛ e heɔ, se lɛ nitsɛ e yi wami lɛɛ e nyɛ we hemi.

32 Tsa pi lɛ ji Kristo Israel matsɛ ɔ? E kple si kɛ je sɛumi tso ɔ nɔ kɛkɛ wa ma he lɛ maa ye!" Ni enyɔ ɔ mɛ nɛ a sɛu ngɔ piɛ e he ɔ hu ye e he fɛu.

33 Pu dadɛ mi ɔ, diblii wo ngɛ zugba a nɔ kulaa kɛ ya si ngmlɛ etɛ. 34 Nɛ benɛ a fia ngmlɛ etɛ pɛpɛɛpɛ ɔ, Yesu kpa ngmlaa wawɛɛ nɛ e de ke, "Eli, Eli, lama sabaktani?" E sisi ji, "Ye Mawu, Ye Mawu, mɛni he je nɛ o kua mi?"

35 Nihi nɛ daa si ngɛ lejɛ ɔ, a ti ni komɛ nɛ nu ɔ de ke, "Nyɛɛ hyɛ, e ngɛ Elia tsɛe." 36 Kɛkɛ nɛ nɔ ko ma fo ya wo kutsa nɛ e wo ngɔ tsɔ wai nɛ duɔ mi nɛ e ngɔ kɛ hɔ tso nya kɛ mane lɛ. Nɛ benɛ e wo kɛ ngɛ lɛ manee ɔ, e de ke, "Nyɛ ha waa hyɛ ha kaa Elia ma ba je lɛ kɛ je sɛumi tso ɔ nɔ lo?"

37 Jamɛ a be ɔ mi nɔuu nɛ Yesu hia ngmlaa wawɛɛ nɛ e ngɔ e mumi ɔ kɛ ha.

38 Amlɔ ɔ mi ɔ, Sɔlemi We ɔ mi dlami bo ɔ mi gba enyɔ fiee kɛ je hiɔmi kɛ ba ma si.

39 Nɛ benɛ Roma soja amɛ a nɔkɔtɔma nɛ ji lafa a nyatsɛ nɛ daa si ngɛ e ha nɔ ɔ na bɔ nɛ e plɛ kɛ ngɔ e nya a, e hia ngmlaa nɛ e de ke, "Niinɛ, Nɔmlɔ nɛ ɔ, Mawu Bi ji lɛ!"

40 Yi komɛ hu daa si ngɛ se ngɛ nɔ nɛ ngɛ nɔ yae ɔ hyɛe. Mɛ ji Maria Magdalena kɛ Maria nɛ ji Yakobo Wayo kɛ Yosefmɛ a nyɛ kɛ Salome kɛ yi kpa komɛ. 41 Yi nɛ ɔmɛ kulaa ji Yesu se nyɛɛli nɛ sɔmɔ lɛ benɛ e ngɛ Galilea a, kɛ yi kpahi fuu nɛ nyɛɛ e se kɛ ba Yerusalem ɔ hu daa si ngɛ lejɛ ɔ.

42 Benɛ du bɔni bumi ɔ, akɛnɛ ligbi ɔ hine he dlami ligbi, nɛ ji ligbi nɛ nyɛɛ Hejɔɔmi Ligbi ɔ hɛ mi he je ɔ, 43 Yosef nɛ je Arimatia, nɛ e ji Kpe Ngua a mi nɔ nɛ a buu lɛ saminya, nɛ e ngɛ Mawu Matsɛyemi ɔ bami blɔ hyɛe ɔ, pee ka nɛ e ya Pilato nitsɛ ngɔ. E ya bi lɛ nɛ e ha lɛ he blɔ nɛ e ya je Yesu gbogboe ɔ kɛ je sɛumi tso ɔ nɔ.

44 Benɛ Pilato nu kaa nɔmlɔ ɔ gbo momo o, e pee lɛ nyakpɛ saminya. E tsɔ nɛ a ya tsɛ sojahi lafa a nyatsɛ ɔ kɛ ba nɛ e bi lɛ kaa e gbo kɛ lo? 45 Nɛ benɛ lafa a nyatsɛ ɔ ba ma nɔ mi ɔ, e ngmɛɛ gbogboe ɔ he ha Yosef.

46 Yosef ya he klala kɛ ba nɛ e ba je gbogboe ɔ ngɛ tso ɔ he nɛ e wo klala a ngɔ blaa e he. Nɛ e ya dla lɛ ngɛ yɔkɔ nɛ a kpɛ ngɛ tɛ sa mi ɔ mi, nɛ e kpɛne tɛ ngɔ tsi muɔ ɔ nya.

47 Nɛ Maria Magdalena kɛ Maria nɛ ji Yosef nyɛ ɔ ngɛ lejɛ ɔ nɛ a na he nɛ e to Yesu ngɛ ɔ.