1 E ya nɔ nɛ e de e kaseli ɔmɛ ke, "I ngɛ nyɛ dee ke, nyɛ nihi nɛ daa si ngɛ hiɛ ɔ piɔ nɛ ɔ, nihi ngɛ nyɛ kpɛti nɛ a maa na Mawu Matsɛyemi ɔ bami ɔ paa loko ji a ma si je mi."

2 E nɔ ligbi ekpa se ɔ, Yesu ngɔ Petro kɛ Yakobo kɛ Yohane nɛ e kɛ mɛ ho yoku ko nɔ ya banee, he nɛ nɔ ko be. A ngɛ lɛ hyɛe nɔuu nɛ si kake too ɔ, e hɛ mi bɔni kpɛmi kɛ anunyami. 3 Nɛ e tade nɛ e wo ɔ plɛ futaa bɔ nɛ nɔ́ ko be zugba nɛ ɔ nɔ nɛ ma nyɛ ha e hiɔ ja. 4 Kɛkɛ nɛ Gbalɔ Elia kɛ Mose ba je kpo nɛ a kɛ Yesu bɔni munyu tumi.

5 Nɛ Petro de Yesu ke, "Tsɔɔlɔ, e hi kaa waa hi hiɛ ɔ. Mo ha nɛ waa ma bo tsuhi etɛ ha nyɛ ngɛ hiɛ ɔ, o nɔ́ kake, Mose nɔ́ kake kɛ Elia hu nɔ́ kake."

6 Se enɛ ɔ nɛ Petro de ɔ, pe e de gu kɛkɛ, ejakaa nɔ́ nɛ a na a ha a tsui po nɛ a li bɔ nɛ a ngɛ pee.

7 Kɛkɛ nɛ bɔ kuu ko ba ha mɛ tsuo a nɔ. Nɛ gbi ko de kɛ je bɔ kuu ɔ mi ke, "Ami nitsɛ ye suɔmi Bi ji nɛ ɔ nɛ, nyɛɛ bu lɛ tue."

8 Se benɛ a po hɛ nɛ a hyɛ ɔ, Mose kɛ Elia laa nɛ e piɛ Yesu nɔ kake too kɛ mɛ ngɛ lejɛ ɔ.

9 Benɛ a ngɛ yoku ɔ kplee kɛ ma a, Yesu wo mɛ si ke, "Nyɛ ko de nɔ ko nɔ́ nɛ nyɛ na nɛ ɔ kɛ ya si be nɛ Nɔmlɔ Bi ɔ maa te si kɛ je gbeje." 10 Enɛ ɔ he je ɔ, e kaseli ɔmɛ de we nɛ nɔ kpa ko nɛ nu, nɛ mɛ kɛkɛ a sɛsɛɛ munyu ɔ he ngɛ a kpɛti nɛ a hii a he bie ke, "Si temi kɛ je gbeje nɛ ɔ nɛɛ, kɛ ji e mi tsɔɔmi kɛɛ?"

11 Nɛ a bi lɛ ke, "Mɛni he je nɛ mlaa tsɔɔli ɔmɛ deɔ ke ja Gbalɔ Elia sɛ hlami kɛ ba lolo ɔ?" 12 Heto nɛ e ha mɛ ji, "Munyu ngwɔhe i; Elia maa sɛ hlami nɛ e ba to nɔ tsuaa nɔ blɔ nɔ lolo. Se mɛni he je nɛ Ngmami ɔ de ke Nɔmlɔ Bi ɔ maa na nɔ babauu nɛ a ma kua lɛ ɔ? 13 I ngɛ nyɛ dee faii ke Elia ba mo nɛ a pee lɛ bɔ nɛ a suɔ kaa bɔ nɛ Ngmami ɔ de ngɛ e he ɔ."

14 Benɛ a kpale kɛ ma kaseli nɛ piɛ ɔmɛ a ngɔ ɔ, a na kaa nihi fuu ba bu wo a he nɛ mlaa tsɔɔli ɔmɛ ekomɛ kɛ mɛ ngɛ munyu he huae. 15 Benɛ asafo ɔ na Yesu ɔ, a hɛ mi pee mɛ yaa nɛ a wo fo kɛ ya kpee lɛ nɛ a nga lɛ. 16 Kɛkɛ nɛ Yesu bi e kaseli ɔmɛ ke, "Mɛni munyu he nyɛɛ kɛ ni ɔmɛ ngɛ huae ɔ?"

17 Nɔ ko ha heto ngɛ ni ɔmɛ a kpɛti nɛ e de ke, "Tsɔɔlɔ, i wo ye binyumu nɛ ɔ kɛ ba nɛ o tsa lɛ ha mi, ejakaa mumi yayami ngɛ nɔ dee ha lɛ nɛ e nyɛ we munyu nɛ e tu. 18 Nɛ ke benɛ mumi ɔ klã a, e poo lɛ kɛ fɔɔ si ngɛ zugba, kɛkɛ ɔ e nya mi fiaa hwɔli nɛ e hii e lungu kpee nɛ lɛ nɔmlɔ ɔ tsuo e wluaa gaganii. I kpa o kaseli ɔmɛ pɛɛ nɛ a hia mumi yayami ɔ kɛ je ye bi ɔ mi ha mi se a nyɛ we."

19 Yesu bi e kaseli ɔmɛ ke, "Mɛni he je nɛ nyɛ hemi kɛ yemi hiɛ́ kulaa kikɛ ɔ? Mɛni be kulaa e sa kaa i kɛ nyɛ maa hi si kɛ ya si loko ji nyɛ ma na hemi kɛ yemi? Nɛ mɛni be ma na tsui ha nyɛ kɛ ya si? Nyɛ wo nyumuyo ɔ kɛ ba ha mi."

20 A kpaka lɛ kɛ ba Yesu ngɔ. Nɛ benɛ mumi ɔ na Yesu pɛ kɛkɛ nɛ e po jokuɛ ɔ ngɔ fɔ si nɛ e ha nɛ e bɔni kunemi ngɛ zugba nɛ e nya mi bɔni hwɔli fiami.

21 Kɛkɛ nɛ Yesu bi e tsɛ ɔ ke, "Be nyɛmɛ ji nɛ nɛ mumi yayami ɔ bɔni nɔ demi ha lɛ?" E ha lɛ heto ke, "Kɛ je e jokuɛ si; 22 nɛ behi fuu ɔ, mumi yayami ɔ ya poo lɛ kɛ fɔɔ la loo nyu mi, ejakaa e ngɛ hlae nɛ e gbe lɛ. Moo na wɔ mɔbɔ nɛ o pee he nɔ ko ha wɔ ke ji o ma nyɛ."

23 Yesu bi lɛ ke, "O ke ke i ma nyɛ lo? Ke o ngɛ hemi kɛ yemi ɔ, o ma nyɛ nɔ́ fɛɛ nɔ maa pee."

24 E nya nɔɛ si nɛ jokuɛ ɔ tsɛ ɔ hia ngmlaa kɛ de ke, "I heɔ yeɔ. Moo piɛ ye hemi kɛ yemi nɛ pi ɔ he ha mi!" 25 Benɛ Yesu na kaa ni ɔmɛ ba ngɛ buae fuu tsɔ ɔ, e nga mumi yayami ɔ yi nɛ e de ke, "Mo tue kpoku kɛ mumui mumi yayami, i ngɛ mo fae kaa o je kpo ngɛ nyumuyo nɛ ɔ mi nɛ o ko kpale kɛ ba sɛ e mi hu!"

26 Kɛkɛ nɛ mumi ɔ kpa ngmlaa nɛ e po jokuɛ ɔ ngɔ fɔ si nɛ e hoso lɛ wawɛɛ loko ji e je e mi. Jokuɛ ɔ pee kaa nɔ nɛ gbo; nɛ nɔ tsuaa nɔ ke e gbo. 27 Se Yesu nu e kɔni si nɛ e wo e nɔ kɛ da si nɛ e na he wami. 28 Benɛ Yesu kɛ e kaseli ɔmɛ ho we ɔ mi ya nɛ e piɛ mɛ sɔuu ɔ, e kaseli ɔmɛ bi lɛ ke, "Mɛni he je loko ji wɔɔ lɛɛ wa nyɛ we nɛ waa hia mumi yayami ɔ ngɛ nyumuyo ɔ mi ɔ?"

29 Yesu ha mɛ heto nɛ e de ke, "Níhi kaa kikɛ ɔ, sɔlemi nɔ wawɛɛ a guu kɛ hiaa mɛ."

30 Benɛ Yesu kɛ e kaseli ɔmɛ si lejɛ ɔ, a tsa fiɛmi ɔ nɔ kɛ ya gu Galilea. Se e sume nɛ nɔ ko nɛ le he nɛ e ngɛ bɔ nɛ pee nɛ e na be kɛ ha e kaseli ɔmɛ. 31 Ejakaa e ngɛ mɛ nɔ titli ko tsɔɔe. E de mɛ ke, "A maa tsɔɔ Nɔmlɔ Bi ɔ se blɔ nɛ a maa gbe lɛ. Se ligbi nɛ ji etɛ ɔ nɔ ɔ, e maa te si ekohu kɛ je gbeje."

32 E kaseli ɔmɛ nui nɔ́ nɛ e ngɛ mɛ dee ɔ sisi; se a ngɛ gbeye hu yee kaa a ma bi lɛ nɛ e tsɔɔ mɛ sisi. 33 Benɛ a ya su Kapernaum nɛ a ya to we mi he nɛ a maa hi ɔ, e bi mɛ ke, "Mɛni munyu he nɛ nyɛ ngɛ sɛsɛɛ ngɛ blɔ ɔ nɔ ɔ?"

34 Se a nyɛ we lɛ heto nɛ a ha, ejakaa nɔ nɛ he nɛ a ngɛ huae ji a ti nɔ nɛ hine agbo pe kulaa.

35 Kɛkɛ nɛ e ho hi si nɛ e tsɛ mɛ nɛ e de mɛ ke, "Ke nɔ ko ngɛ hlae nɛ e pee agbo pe kulaa ngɛ nyɛ kpɛti ɔ, jamɛatsɛ ɔ nɛ pee e he nyɛ tsuo nyɛ sɔmɔlɔ."

36 Kɛkɛ nɛ e tsɛ jokuɛ nyafii ko kɛ ba da si ngɛ a hɛ mi nɛ e wo e nine ngɔ fɔ e konɔ nɛ e de mɛ ke, 37 "Nɔ tsuaa nɔ nɛ heɔ jokuɛ nyafii kaa kikɛ ɔ atuu ngɛ ye biɛ mi ɔ, ami nɛ e ngɛ hee ɔ nɛ. Nɛ nɔ tsuaa nɔ nɛ heɔ mi ɔ, Tsaatsɛ nɛ tsɔ mi ɔ nɛ e ngɛ hee ɔ nɛ."

38 Ligbi ko ɔ, Yesu kaseli ɔmɛ a ti nɔ kake nɛ a tsɛɛ lɛ ke Yohane ɔ de Yesu ke, "Tsɔɔlɔ, wa na nɔ ko nɛ e wo o biɛ kɛ ngɛ mumi yayamihi hiae, nɛ akɛnɛ e be wa kpɛti he je ɔ, wa tsi e nya kaa e be he blɔ nɛ e peeɔ ja."

39 Yesu de mɛ ke, "Nyɛ ko de ke nyɛ ngɛ nɔ ko kaa ja a e nya tsie, ejakaa nɔ ko be nɛ e ma wo ye biɛ kɛ tsu nyakpɛ ni nɛ lɛ nɔuu e ma plɛ maa te si kɛ wo mi. 40 Ejakaa nɔ ko nɛ ti si ke wui wɔ ɔ, lɛɛ e ngɛ wa se. 41 Nɛ nɔ tsuaa nɔ nɛ ma ha nyɛ nyu kplu kake ke nyɛɛ nu ngɛ ye we bi nɛ nyɛ ji he je ɔ, ma de nyɛ anɔkuale mi kaa e be yaka pee. Mawu nitsɛ maa haa lɛ tsumi ngɛ he. 42 Se mohu ji kaa, mo nɔ nɛ e maa je o he nɛ bi tsɔwi nɛ ɔmɛ a ti nɔ ko nane maa tɔtɔ ɔ, afani nɛ a wo wɛ ngɔ muɔ mo jamɛatsɛ ɔ o kuɛ nɛ a ya sake mo ngɔ fɔ wo mi.

43 Ke ji o nine maa de nɔ ha mo ɔ, moo po lɛ nɛ o sake lɛ ngɔ fɔ he. Afani nɛ o maa hɛɛ nine kpoku kɛ sɛ wami mi, pe nɛ o ninehi maa su ngɛ o he se a ma sake mo ngɔ fɔ gehena ngɛ Abosiamihi a je la a mi, 44 he nɛ gɔgɔ ɔmɛ gbo we nɛ la a hu a gbi lɛ gblee ɔ. 45 Nɛ ke o nane ma gba o nya a, moo po lɛ ngɔ fɔ he. E hi mohu kaa o maa hɛɛ nane kake kɛ ya sɛ neneene wami mi pe nɛ o maa hi nane enyɔ nɛ a ma sake mo ngɔ fɔ neneene la a mi, 46 he nɛ gɔgɔ ɔmɛ gbo we nɛ la a hu a gbi lɛ gblee ɔ.

47 Nɛ ke ji o hɛ ngmɛ ma ha nɛ o pee yayami ɔ, moo hia lɛ ngɛ o yi he nɛ o sake lɛ kɛ fɔ he. Ejakaa e maa hi ha mo kaa o kɛ hɛ ngmɛ kake ya sɛ Mawu Matsɛyemi ɔ mi pe nɔ nɛ o hɛ ngmɛhi maa su ngɛ o yi he se a ma sake mo ngɔ fɔ Abosiamihi a je, 48 he nɛ gɔgɔ ɔmɛ gbo we nɛ la a hu a gbi lɛ gblee ɔ, 49 nɛ a ngɔɔ la kɛ woɔ nɔ́ fɛɛ nɔ ngo ngɛ ɔ.

50 Nɔ kpakpa saminya ji ngo. Se ke mɛmɛɛmɛ ta ngo mi ɔ, kɛkɛ e he be se nami hu, ejakaa e be hiɛ nɛ a ma kɛ wo nɔ ko hu. Lɔ ɔ he je ɔ, nyɛ ko ha nɛ ngɔɔmi nɛ ngɛ nyɛ mi ɔ nɛ ta. Se mohu nyɛɛ kɛ nɔ tsuaa nɔ nɛ hi si ngɛ tue mi jɔmi mi."