1 "I de nyɛ ni nɛ ɔmɛ bɔ nɛ pee nɛ nyɛ nane ko tɔtɔ ngɛ níhi nɛ maa ba a he. 2 Ejakaa a maa fie nyɛ kɛ maa je kpe he ɔmɛ, nɛ be ma nɛ nihi nɛ ngɛ nyɛ gbee ɔ ma susu kaa Mawu suɔmi nya ni nɛ a ngɛ tsue. 3 A maa pee nyɛ nɔ́ nɛ ɔmɛ, ejakaa a li Tsɛ ɔ loo ami 4 I ngɛ nyɛ ni nɛ ɔmɛ dee konɛ ke be ɔ su ɔ, nyɛ kai kaa i wo a nɔ ta de nyɛ. I de we nyɛ kɛ ji sisije ɔ mi, ejakaa i kɛ nyɛ ngɛ jamɛ a be ɔ mi.

5 Se jehanɛ ɔ, i kpale kɛ yaa nɔ nɛ tsɔ mi ɔ ngɔ, nɛ e pee we nyɛ ti nɔ ko kɔmɔ nɛ e ma bi nɔ́ nɛ he je nɛ i yaa a; 6 se mohu kɔmɔ kɛkɛ nɛ nyɛ ngɛ yee. 7 Se i ngɛ nyɛ dee anɔkuale mi ke, ke i ho ɔ e hi ha nyɛ, ejakaa jaja loko Hepiɛlɔ ɔ maa ba nyɛ ngɔ.

8 Nɛ ke e ba a, e ma ka je ɔ hɛ mi ngɛ yayami he, nɛ e maa tsɔɔ dami kɛ kojomi. 9 Je ɔ pee yayami, ejakaa nimli ɔmɛ he we ye nɔ yi; 10 se dami maa hi si ejakaa i yaa Tsɛ ɔ ngɔ, nɛ a be mi nae hu; 11 nɛ a ma kpɔ nyɛ kɛ je kojomi mi ejakaa a kojo je ɔ matsɛ bi ɔ momo.

12 I ngɛ níhi fuu nɛ ma suɔ ma de nyɛ, se nyɛ be a sisi nue amlɔ nɛ ɔ. 13 Se ke Mumi Klɔuklɔu ɔ nɛ ji anɔkuale ɔ ba a, e ma ba tsɔɔ nyɛ anɔkuale ɔ kulaa mi blɔ, ejakaa tsa pi lɛ nitsɛ e juɛmi mi níhi nɛ e ma ba de nyɛ, se mohu nihi nɛ a ma de lɛ ke e de ɔ. Nɛ e maa tsi nihi nɛ maa ba a nɔ ta kɛ de nyɛ. 14 E ma je ye yi nɛ e maa wo ye hɛ mi nyami, ejakaa e maa tsɔɔ nyɛ ye anunyami ɔ. 15 Tsɛ anunyami ɔ kulaa a, ye nɔ i, nɛ nɔ nɛ i de ke e maa tsɔɔ nyɛ ye anunyami ɔ, e sisi ji lɔ ɔ nɛ. 16 E piɛ bɔɔ nɛ ma si nyɛ, nɛ nyɛ be mi nae hu, nɛ lɔ ɔ se bɔɔ ɔ, nyɛ maa na mi ekohu."

17,18 Nɛ e kaseli ɔmɛ a ti ni komɛ bi a he ke, "Se mɛni kulaa e ngɛ tsɔɔe kaa ‘I yaa Tsɛ ɔ ngɔ’ ɔ? Wa nui ní nɛ e ngɛ dee ɔ sisi."

19 Yesu kɔ se kaa a ngɛ hlae nɛ a bi lɛ, lɔ ɔ he je ɔ, e de mɛ ke, "Akɛnɛ i de nyɛ ke e piɛ bɔɔ nɛ ma si nyɛ nɛ nyɛ be mi nae hu, nɛ e piɛ bɔɔ nɛ nyɛ maa na mi ekohu ɔ, enɛ ɔ nɛ nyɛ ngɛ nyɛ he bie ɔ? 20 I ngɛ nyɛ dee anɔkuale mi ke, je ɔ ma nya ngɛ nɔ́ nɛ maa ba ye nɔ ɔ he, se nyɛɛ lɛɛ nyɛ ma fo ya nɛ nyɛ maa ye kɔmɔ, se nyɛ kɔmɔ yemi ɔ ma plɛ bua jɔmi, be mi nɛ nyɛ maa na mi ekohu ɔ. 21 Nyɛ bua jɔmi ɔ maa pee kaa bɔ nɛ yo nuu kɔɔmi nɛ e fɔɔ. E nɔ́ nami kɛ pimi ɔ ba plɛɔ bua jɔmi haa lɛ si kake too, nɛ e hɛ jee e haomi ɔ nɔ. 22 Amlɔ nɛ ɔ, nyɛ maa ye kɔmɔ, se i ma kpale kɛ ba ekohu nɛ nyɛ bua maa jɔ nyɛ he, nɛ nɔ ko be nyɛ bua jɔmi ɔ kpɔe ngɛ nyɛ dɛ. 23 Jamɛ a be ɔ mi ɔ, nyɛ be mi nɔ ko bie hu, ejakaa Tsɛ ɔ ma ha nyɛ nɔ tsuaa nɔ nɛ nyɛ ma kpa he pɛɛ ngɛ ye biɛ mi ɔ. 24 Nyɛ pee we ja a hyɛ; nyɛ bi nɔ́ tsuaa nɔ ngɛ ye biɛ mi, nɛ nyɛ ma na konɛ nyɛ bua jɔmi ɔ nɛ hyi fuu.

25 I de nyɛ nɔ́ nɛ ɔmɛ ngɛ abɛhi a mi, se be ma nɛ i kɛ nyɛ be munyu tue ngɛ abɛ mi hu, se mohu ma jaje Tsɛ ɔ he sane ma tsɔɔ nyɛ paa. 26 Ke jamɛ a be ɔ su ɔ, nyɛ ma bi nɔ tsuaa nɔ ngɛ ye biɛ mi, nɛ e hia we kaa ma bi Tsɛ ɔ loko e ha nyɛ nyɛ hiami ni ɔmɛ, 27 ejakaa Tsɛ ɔ suɔ nyɛ saminya, akɛnɛ nyɛ hu nyɛ suɔ mi, nɛ nyɛ he ye kaa Tsɛ ɔ ngɔ nɛ i je ɔ? 28 Niinɛ, Tsɛ ɔ ngɔ nɛ i je kɛ ba je ɔ mi, nɛ jehanɛ ɔ hu i ma kpale kɛ ho Tsɛ ɔ ngɔ ya."

29 E kaseli ɔmɛ de lɛ ke, "Kpaloko o ngɛ munyu tue paa, nɛ o tui munyu ngɛ abɛ mi hu. 30 Jehanɛ ɔ, wa na kaa o le nɔ́ tsuaa nɔ nɛ e hia we kaa nɔ ko nɛ de mo nɔ ko. Enɛ ɔ he je ɔ, wa he ye kaa Mawu ngɔ nɛ o je."

31 Yesu he nɔ nɛ e bi mɛ ke, "Anɛ nyɛ heɔ yeɔ jehanɛ ɔ lo? 32 Nyɛ nɛ, ngmlɛfia a ma, nɛ e su ta, nɛ nyɛ maa gbɛ fia, nɛ nɔ tsuaa nɔ ma pue e we mi blɔ, nɛ nyɛ maa je ami nɔ kake ye he. Se kɛ ɔ, tsa pi ami nɔ kake i, ejakaa Tsɛ ɔ kɛ mi ngɛ. 33 I de nyɛ nɔ́ nɛ ɔmɛ tsuo konɛ nyɛɛ wo nyɛ he bua. Nyɛ ma na haomi kɛ pimi ngɛ je nɛ ɔ mi, se nyɛ bua nɛ jɔ nyɛ he, ejakaa i ye je ɔ nɔ kunimi."