1 Benɛ Yesu tu munyu nɛ ɔmɛ gbe nya a, e je lejɛ ɔ nɛ e kɛ e kaseli ɔmɛ ya po Kedron Pa a kɛ ho abɔɔ ko mi ya. 2 Yuda, nɔ nɛ tsɔɔ e se blɔ ɔ le lejɛ ɔ, ejakaa Yesu kɛ e kaseli ɔmɛ pɔɔ lejɛ ɔ yami.

3 Osɔfo nikɔtɔma amɛ kɛ Farisi bi ɔmɛ tsɔ sojahi kɛ polisihi kɛ piɛ Yuda he, nɛ a hɛɛ kanehi ke awi yemi nihi kɛ ba abɔɔ ɔ mi.

4 Akɛnɛ Yesu le nɔ́ nɛ maa ba e nɔ he je ɔ, e je kpo nɛ e kɛ mɛ ya kpe, nɛ e bi mɛ ke, "Mɛnɔ nyɛ ngɛ hlae?" 5 Tsɔli ɔmɛ he nɔ ke, "Wa ngɛ Yesu Nazaret no ɔ hlae?" Kɛkɛ nɛ Yesu de mɛ ke, "Ami ji nɛ ɔ nɛ!" 6 Se Yesu nya nɔɛ si nɛ tsɔli ɔmɛ tsuo gbee senyasenya ya nɔ si.

7 Nɛ e bi mɛ ekohu ke, "Mɛnɔ nyɛ ngɛ hlae?" Nɛ a kpale ha lɛ heto ke, "Yesu Nazaret no ɔ nɛ wa ngɛ hlae."

8 Yesu ha mɛ heto ke, "I de nyɛ ke ami ji nɛ ɔ nɛ! Nɛ ke ami nɛ nyɛ ngɛ hlae ɔ, lɛɛ nyɛ ha ni nɛ ɔmɛ nɛ a ya." 9 E ha mɛ heto nɛ ɔ bɔ nɛ pee nɛ nɔ́ nɛ gbalɔ ɔ de ke, "I laa we nihi nɛ o ngɔ ha mi ɔ a ti nɔ ko" ɔ nɛ ba mi.

10 Kɛkɛ nɛ Simon Petro hia klaate nɛ e po Malko nɛ ji Osɔfo Nɔkɔtɔma a tsɔlɔ ɔ hiɔ tue.

11 Se Yesu de Petro ke, "Ngɔɔ klaate ɔ ngɔ hɔ e kpo ɔ mi. Anɛ e sɛ kaa ma nu kplu nɛ Tsaatsɛ ha mi ɔ e mi nyu ɔ lo?"

12 Kɛkɛ nɛ polisi ɔmɛ kɛ soja amɛ kɛ a nɔkɔtɔma a nu Yesu nɛ a fi lɛ. 13 Nɛ a kpaka lɛ kɛ ho Hana nɛ ji Kaiafa ngatsɛ ɔ ngɔ ya kekle, ejakaa lɛ ji Osɔfo Nɔkɔtɔma ngɛ jamɛ a jeha a mi. 14 Kaiafa ji nɔ nɛ wo Yuda nikɔtɔma amɛ ga kaa e sa kaa nɔ kake nɛ gbo ngɛ ma a nane mi ɔ nɛ. 15 Simon Petro kɛ kaselɔ kake nɛ Osɔfo Nɔkɔtɔma a le lɛ ɔ nyɛɛ Yesu se. Akɛnɛ Osɔfo Nɔkɔtɔma a le kaselɔ nɛ ɔ he je ɔ, a ha lɛ blɔ nɛ e nyɛɛ Yesu se kɛ sɛ we ɔ mi. 16 Se Petro lɛɛ e daa si ngɛ agbo ɔ se. Kɛkɛ nɛ jamɛ a kaselɔ ɔ kpa yoyo ɔ nɛ ngɛ agbo ɔ nya bue ɔ pɛɛ nɛ e ha Petro blɔ nɛ lɛ hu e sɛ we ɔ mi. 17 Se yoyo o bi Petro ke, "Anɛ tsa pi Yesu kaseli ɔmɛ a ti nɔ kake ji mo lo?" Nɛ Petro he nɔ ke, "Dabi, tsa pi a ti nɔ eko ji mi!"

18 Jamɛ a be ɔ mi ɔ fiɛ ngɛ yee. Lɔ ɔ he je ɔ, polisi ɔmɛ kɛ sɔmɔli nɛ ngɛ we ɔ mi ɔ ngɛ la hluie ngɛ kpo ɔ nɔ, nɛ Petro hu ya piɛ a he.

19 Osɔfo Nɔkɔtɔma a bi Yesu e kaseli ɔmɛ kɛ ni nɛ e tsɔɔ mɛ ɔ he munyu.

20 Yesu ha heto ke, "Nɔ fɛɛ nɔ le ye ni tsɔɔmi ɔmɛ, ejakaa i fiɛɔ ngɛ kpe he ɔ kɛ Sɔlemi We ɔ be fɛɛ be, nɛ Yuda nikɔtɔma amɛ tsuo nuɔ ye ni tsɔɔmi ɔ, ejakaa i de we nɔ́ ko ngɛ laami mi. 21 Mɛni he je nɛ o ngɛ mi kikɛmɛ a munyu nɛ ɔ bie? Nihi nɛ buɔ mi tue ɔ, a ti ni komɛ ngɛ hiɛ ɔ. Bi mɛ nɛ a de mo nɔ́ nɛ i deɔ mɛ ɔ."

22 Kɛkɛ nɛ soja amɛ a ti nɔ kake nɛ daa si ngɛ lejɛ ɔ gba Yesu ma nɛ e de lɛ ke, "Kikɛ ɔ nɛ e sa kaa o ha Osɔfo Nɔkɔtɔma a munyu ɔ heto lo?"

23 Se Yesu de lɛ ke, "Ke i ye lakpa a, moo ye lɔ ɔ he odase, se ke anɔkuale munyu nɛ i tu ɔ, lɛɛ mɛni he je nɛ o ngɛ mi ma gbae."

24 Jehanɛ ɔ, Hana ha nɛ a kpaka Yesu ngɛ kpa a mi kɛ ya ha Kaiafa nɛ ji Osɔfo Nɔkɔtɔma a.

25 Jamɛ a be ɔ mi ɔ Simon Petro daa si ngɛ he nɛ a slɛ la a ngɛ ɔ nɛ nɔ ko bi lɛ ekohu ke, "Anɛ tsa pi e kaseli ɔmɛ a ti nɔ kake ji mo lo?" Se Petro kua ekohu nɛ e de ke, "Dabi, i li lɛ."

26 Enɛ ɔ se ɔ, Osɔfo Nɔkɔtɔma a nyɔguɛ ɔmɛ a ti nɔ kake nɛ ji nɔ nɛ Petro po e tue ɔ weku no bi lɛ ke, "Anɛ tsa pi mo nɛ i na kɛ Yesu ngɛ abɔɔ ɔ mi ɔ lo?"

27 Se Petro kua ekohu nɛ amlɔ ɔ nɔuu ɔ kungwɔ kpa nɔ́.

28 Jehanɛ ɔ a kpaka Yesu kɛ je Kaiafa kojomi he ɔ mɔtu kpla kɛ ho Roma amlaalo nɛ a tsɛɛ lɛ ke Pilato ɔ ngɔ ya. Se Yesu nya poli ɔmɛ a ti nɔ ko sɛ we Pilato we ɔ mi, ejakaa ke a sɛ we ɔ mi ɔ a ma puɛ kɔ, nɛ a be hae nɛ a ye Hebemi to ɔ. 29 Lɔ ɔ he je ɔ, Pilato je kpo kɛ ba a ngɔ nɛ e ba bi mɛ ke, "Mɛni yayami nɛ Nɔmlɔ nɛ ɔ pee? Mɛni he nɛ nyɛ ngɛ e nya poe ngɛ?"

30 A je nya nɛ a de Pilato ke, "Tsa pi yayami peelɔ ji lɛ jinɛ wa be lɛ nue kɛ ba."

31 Nɛ Pilato de mɛ ke, "Lɛɛ nyɛɛ ngɔ lɛ kɛ ya nɛ nyɛ nitsɛmɛ nyɛ ya kojo lɛ ngɛ nyɛ mlaa nya."

Se Yuda bi ɔmɛ ha lɛ heto ke, "Wa be he blɔ nɛ wa gbee nɔ ko." 32 Enɛ ɔ ha nɛ Yesu munyu nɛ e tu kɛ fɔ si kɛ tsɔɔ gbenɔ nɛ e ma gbo ɔ ba mi.

33 Jehanɛ ɔ Pilato sɛ kojomi he ɔ ekohu nɛ e ha a kɛ Yesu ba e ngɔ nɛ e bi lɛ ke, "Anɛ mo ji Yuda bi ɔmɛ a matsɛ ɔ lo?"

34 Yesu he nɔ nɛ e bi Pilato ke, "Mo nitsɛ o yi mi tomi munyu nɛ o ngɛ mi bie nɛ ɔ, aloo ni komɛ nɛ a de mo ngɛ ye he lo?"

35 Pilato hu ha heto ke, "Anɛ Yuda no ji mi lo? Mo nitsɛ o ma mi bi ɔmɛ kɛ osɔfo nikɔtɔma amɛ nɛ a nu mo kɛ ba ha mi. Mɛni o pee?"

36 Jehanɛ ɔ Yesu ha lɛ heto ke, "Ye Matsɛyemi ɔ tsa pi je nɛ ɔ mi nɛ e je. Kaa ye Matsɛyemi ɔ je je nɛ ɔ mi jinɛ ye se nyɛɛli ɔmɛ maa pɛ ye he benɛ Yuda nikɔtɔma amɛ ba nu mi ɔ. Se ye Matsɛyemi ɔ ji je nɛ ɔ mi."

37 Pilato bi lɛ ekohu ke, "Lɛɛ matsɛ ji mo kɛ lo?"

Yesu he nɔ nɛ e de lɛ ke, "Ee, lɔ ɔ he nɛ a fɔ mi ngɛ, nɛ enɛ ɔ he nɔuu i ba je ɔ mi ngɛ nɛ ma ngɔ anɔkuale ɔ kɛ ba. Nɔ tsuaa nɔ nɛ suɔ anɔkuale ɔ, peeɔ ye se nyɛɛlɔ."

38 Pilato bi Yesu ekohu ke, "Mɛni ji anɔkuale?" Kɛkɛ nɛ Pilato je kpo ekohu nɛ e ya de Yuda bi ɔmɛ ke, "I nɛ fɔ yemi sane ko ngɛ e he. 39 Se akɛnɛ e ji nyɛ kusumi kaa ma ngmɛɛ nihi nɛ a wo tsu mi ɔ a ti nɔ kake he kɛ ha nyɛ ngɛ Hebemi nyami ligbi ɔ nɔ he je ɔ, anɛ nyɛ maa suɔ kaa ma ngmɛɛ Yuda bi ɔmɛ a matsɛ ɔ he kɛ ha nyɛ lo?"

40 Pilato nya mɛ si nɛ a he nɔ kɛ ngmlaa ke, "Dabi! Tsa pi nyumu nɛ ɔ, Baraba mohu." Be mi nɛ Baraba ji ojo fialɔ.