1 Enɛ ɔ se ɔ, Yesu kpale kɛ ba Yerusalem ekohu ngɛ Yuda bi ɔmɛ a gbijlɔ ko yemi he. 2 Taku ko ngɛ Yerusalem ma a mi ngɛ Tohi Agbo ɔ kasa nya nɛ a tsɛɛ lɛ ke Betesda, nɛ asahi enuɔ ngɛ he. 3 Nɛ hiɔtsɛmɛ fuu nɛ ji libɔɔhi, hɛ ngmɛ yuyuili kɛ nihi nɛ ku pue si ngɛ asa amɛ a nɔ, nɛ a hii nyu ɔ mi klɛmi blɔ hyɛe. 4 Ejakaa Nutsɔ ɔ bɔfo ba klɛɔ nyu ɔ mi be komɛ, nɛ lɔ ɔ se ɔ hiɔtsɛ nɛ maa sɛ taku ɔ mi kekle ɔ naa he wami.

5 Nyumu ko nɛ ku pue si jeha nyingmi etɛ kɛ kpaanyɔ sɔuu ji nɛ ɔ piɛɛ hiɔtsɛ ɔmɛ a he ngɛ taku ɔ nya. 6 Benɛ Yesu na lɛ nɛ e le kaa e ngɛ hiɔ nue kɛ ɔ, e bi ke, "Anɛ o suɔ kaa o na he wami lo?"

7 Nɛ hiɔtsɛ ɔ he nɔ ke, "I be nɔ ko nɛ ke a ba klɛ nyu ɔ mi nɛ e ma wo mi kɛ ya fɔ taku ɔ mi; nɛ ke i ngɛ mɔde bɔe nɛ ma ya sɛ mi ɔ, nɔ kpa sɛɔ ye hlami ya nɔɔ taku ɔ mi."

8 Kɛkɛ nɛ Yesu de lɛ ke, "Moo te si nɛ o hluɛ o sa a nɛ o ho we mi ya!"

9 Nyumu ɔ na he wami amlɔ ɔ nɔuu, nɛ e hluɛ e sa a nɛ e bɔni nyɛɛmi. Se Hejɔɔmi Ligbi ɔ nɔ nɛ Yesu tsu kikɛmɛ a nyakpɛ ni nɛ ɔ ngɛ. 10 Lɔ ɔ he je ɔ, Yuda bi ɔmɛ a bua jɔɛ a he nɛ a de nɔ nɛ a tsa a ke, "O be he blɔ nɛ o tsuɔ ni ngɛ Hejɔɔmi Ligbi ɔ nɔ, nɛ ja a he je ɔ, o be he blɔ kaa o tlooɔ o sa a."

11 Nɛ nyumu ɔ he nɔ ke, "Nɔ nɛ tsa mi ɔ nɛ de mi ke ma tloo ye sa a."

12 Nɛ a bi lɛ ke, "Mɛnɔ ji nɔ nɛ de mo ke o pee ja?"

13 Se nyumu ɔ nɛ a tsa a li nɔ nɛ tsa lɛ ɔ, ejakaa nihi fuu ngɛ lejɛ ɔ nɛ Yesu ya futu a kpɛti. 14 Pee se ɔ, Yesu na lɛ ngɛ Sɔlemi We ɔ nɛ e de lɛ ke, "Amlɔ nɛ ɔ, o he mi wa mo; mo ko pee yayami hu, ke pi ja a nɔ́ ko yaya nɛ pe kekle nɔ́ ɔ maa ba o nɔ."

15 Kɛkɛ nɛ nyumu ɔ ho ya de Yuda bi ɔmɛ a nikɔtɔma amɛ ke Yesu ji nɔ nɛ tsa lɛ ɔ nɛ.

16 Enɛ ɔ ha nɛ Yuda bi ɔmɛ bɔni Yesu haomi kaa e tɔ Hejɔɔmi Ligbi mlaa a nɔ. 17 Se Yesu de mɛ ke, "Ye Tsɛ tsuɔ ni tsumi kpakpa be fɛɛ be nɛ imi hu i ngɛ ni tsue."

18 Kɛkɛ nɛ Yuda bi ɔmɛ na e he abofu nɛ a bɔni e he blɔ hlami nɛ a gbe lɛ, ejakaa tsa pi Hejɔɔmi Ligbi ɔ nɔ kɛkɛ nɛ e tɔ, se mohu e ngɛ Mawu tsɛe ke e Tsɛ, nɛ e kɛ e he ngɛ Mawu he toe.

19 Yesu he nɔ ke, "Bi ɔ be nyɛe maa pee nɔ́ ko ngɛ lɛ nitsɛ e he wami nya, se mohu e kaseɔ nɔ́ nɛ e tsɛ pee ɔ, nɛ lɛ hu e peeɔ ja a pɛpɛɛpɛ. 20 Ejakaa Tsɛ ɔ suɔ Bi ɔ, nɛ e tsɔɔ lɛ nɔ́ tsuaa nɔ nɛ e peeɔ, nɛ Bi ɔ maa pee nyakpɛ ni nguahi nɛ pe nyumu nɛ ɔ tsami ɔ. 21 Nɛ kaa bɔ nɛ Tsɛ ɔ tleɔ ni gbogboehi si kɛ jee gbeje nɛ e haa mɛ neneene wami ɔ, ja a nɔuu nɛ Bi ɔ hu ma tle nihi nɛ e suɔ si kɛ je gbeje. 22 Tsɛ ɔ ngmɛɛ yayami he kojomi tsuo he kɛ ha Bi ɔ, 23 konɛ nɔ tsuaa nɔ nɛ bu Bi ɔ kaa bɔ nɛ a buu Tsɛ ɔ. Nɛ nɔ nɛ bui Mawu Bi ɔ, blɔ e bui Tsɛ ɔ hulɔ.

24 I ngɛ nyɛ dee anɔkuale mi ke nɔ tsuaa nɔ nɛ buɔ ye munyu ɔ tue nɛ e heɔ Mawu nɛ tsɔ mi ɔ nɔ yeɔ ɔ, e ma na neneene wami, nɛ a be lɛ kojoe ngɛ e yayami ɔmɛ a he, ejakaa a je lɛ kɛ je gbenɔ mi kɛ ba wami mi momo. 25 I ngɛ nyɛ dee anɔkuale mi ekohu ke be ma, nɛ e su ta, nɛ ni gbogboehi maa nu Mawu Bi ɔ gbi, nɛ nihi nɛ maa bu tue ɔ a yi ma na wami. 26 Tsɛ ɔ ngɛ wami ngɛ lɛ nitsɛ e mi, nɛ e ha Bi ɔ hu he blɔ nɛ e hi wami ngɛ lɛ nitsɛ e mi; 27 nɛ e ha lɛ he blɔ kaa e kojo nimli adesahi a he yayami, ejakaa Nɔmlɔ Bi ji lɛ. 28 Enɛ ɔ ko pee nyɛ nyakpɛ tsɔ, ejakaa be ma nɛ ni gbogboe ɔmɛ ngɛ yɔkɔ ɔmɛ a mi ɔ maa nu Mawu Bi ɔ gbi, 29 nɛ a maa te si ekohu, nɛ ni nɛmɛ nɛ pee kpakpa a maa te si kɛ maa ya neneene wami mi, nɛ a maa kojo nihi nɛ ngɛ yayami pee kɛ sa a.

30 Se i kojo we nɔ ko nɛ Tsɛ ɔ li he nɔ́ ko. I yeɔ e gbi nɔ, nɛ i kojoɔ kaa bɔ nɛ e deɔ mi, nɛ ye kojomi ɔ mu ko be he, ejakaa tsa pi ye suɔmi nya, se mohu Mawu nɛ tsɔ mi ɔ suɔmi nya kojomi nɛ i kojoɔ.

31 Ke ami nitsɛ i ye ye he odase ɔ, a he we yi. 32 Se nɔ kpa ko nɛ ji Yohane Baptisilɔ ɔ hu nɛ ngɛ ye he odase yee. 33 Nyɛ bu e fiɛmi ɔ tue, nɛ i ngɛ nɔ mi mae ha nyɛ, kaa anɔkuale odase nɛ e ye ngɛ ye he ɔ nɛ. 34 I kai nyɛ Yohane odase yemi ɔ bɔ nɛ pee nɛ nyɛ he mi ye nɛ a he nyɛ yi wami; se ye he anɔkuale odase ɔ, tsa pi nɔmlɔ adesa ngɔ nɛ e je. 35 Yohane ji la ko nɛ kpɛ kɛ ha nyɛ ngɛ be bɔɔ mi, nɛ nyɛ na e he se, nɛ nyɛ bua jɔ. 36 Se ami lɛɛ i ngɛ odase nɛ pa Yohane nɔ́ ɔ, ejakaa nyakpɛ ni nɛ ɔmɛ nɛ Tsɛ ɔ ngɔ ha mi nɛ i ngɛ pee ɔ tsɔɔ kaa Tsɛ ɔ nɛ tsɔ mi. 37 E ngɛ mi kaa nyɛ nɛ Tsɛ ɔ hyɛ, nɛ e kɛ nyɛ tu we munyu hu hyɛ, se lɛ nitsɛ ye ye he odase. 38 Nyɛɛ lɛɛ nyɛ bui lɛ tue, ejakaa nyɛ he we ami e tsɔlɔ ɔ yi.

39 Nyɛ hlaa Ngmami ɔmɛ a mi, ejakaa nyɛ he ye kaa a ma ha nyɛ neneene wami, nɛ Ngmami ɔmɛ nɔuu yeɔ ye he odase. 40 Se loloolo ɔ, nyɛ sume kaa nyɛ maa ba ye ngɔ nɛ ma ha nyɛ neneene wami nɛ ɔ.

41 E pee we mi nyakpɛ kaa nyɛ he we mi yi, 42 ejakaa i le kaa Mawu suɔmi be nyɛ mi. 43 I le kaa nyɛ sume Tsɛ ɔ, ejakaa i ba ngɛ e nane mi nɛ nyɛ he we mi kɛ hɛ muɔ, se nyɛ heɔ nihi nɛ ba ngɛ mɛ nitsɛmɛ a suɔmi nya a mohu atuu. 44 Nɛ e be nyakpɛ kaa nyɛ he we nɛ nyɛɛ ye, ejakaa nyɛ woɔ nyɛ nitsɛmɛ nyɛ hɛ mi nyami nɛ nyɛ di hɛ mi nyami nɛ jee Mawu ngɔ ɔ se.

45 Se tsa pi ami nɛ i ma po nyɛ nya kɛ ha Tsɛ ɔ, Mose mohu i, nɔ nɛ mlaahi a nɔ nɛ nyɛ ngɔ nyɛ hɛ kɛ fɔ kaa nyɛ maa ya hiɔwe ɔ. 46 Se nyɛ sume nɛ nyɛ he Mose nyɛɛ ye. E ngma ye he sane, se nyɛ he we nyɛɛ ye, nɛ lɔ ɔ he je ɔ nyɛ he we ye nɔ nɛ nyɛɛ ye. 47 Nɛ akɛnɛ nyɛ he we lɛ yi ɔ, e be nyakpɛ kaa nyɛ he we ami hu yi."