1 Ligbi ko nyɔ mi ɔ, Yuda bi ɔmɛ a nɔkɔtɔma ko nɛ je Farisi bi ɔmɛ a kpɛti nɛ a tsɛɛ lɛ Nikodemo ɔ, 2 ba Yesu ngɔ nɛ e ba de lɛ ke, "Mawetsɛ, wɔ tsuo wa lɛ kaa Mawu tsɔ mo nɛ o ba tsɔɔ wɔ ni, nɛ nyakpɛ níhi nɛ o ngɛ pee ɔ yeɔ enɛ ɔ he odase paa."

3 Nɛ Yesu ha lɛ heto ke, "I ngɛ mo dee anɔkuale mi ke, Ke a fɔ we mo ekohu ɔ, o be Mawu Matsɛyemi ɔ mi nyɛe maa sɛ."

4 Nikodemo bi lɛ ke, "A fɔ mi ekohu? Mɛni o ngɛ tsɔɔe ɔ? Kɛ Nɔmlɔ nɛ bwɔ ɔ maa pee kɛ sɛ e nyɛ muklii mi nɛ a fɔ lɛ ekohu kɛɛ?"

5 Yesu he nɔ ke, "Nɔ nɛ i ngɛ mo dee ngɛ anɔkuale mi ji, ke a fɔ we nɔ ko kɛ ji nyu kɛ Mumi mi ɔ, e be Mawu Matsɛyemi ɔ mi nyɛe maa sɛ. 6 Nimli ma nyɛ fɔ ngɛ he lo mi, se Mumi Klɔuklɔu ɔ nɛ haa wami he nɛ je hiɔwe ɔ nɛ. 7 Enɛ ɔ he je ɔ, e ko pee mo nyakpɛ kaa i de mo ke ja a fɔ mo ekohu ɔ. 8 Kaa bɔ nɛ o nuɔ kɔɔhiɔ fiami he, se o li he nɛ e je kɛ he nɛ e yaa a, ja a nɔuu nɛ Mumi ɔ ngɛ. Wa li nɔ nɛ e maa ngɔ kikɛmɛ a wami nɛ je hiɔwe nɛ ɔ kɛ ha."

9 Nikodemo bi Yesu ke, "Kɛ o ngɛ tsɔɔe kɛɛ?"

10,11 Yesu he nɔ nɛ e de lɛ ke, "Yuda bi ɔmɛ a Tsɔɔlɔ nɛ a buu ji mo, mɛni he je nɛ o nui ni nɛ ɔmɛ a sisi ɔ? I ngɛ mo nɔ́ nɛ i le kɛ nɔ́ nɛ i na dee nɛ o he we mi yi. 12 Ke i de mo zugba nɔ níhi nɛ ba ngɛ nimli a kpɛti nɛ o he we yi ɔ, kɛ maa pee kɛɛ nɛ ke i de mo níhi nɛ ngɛ nɔ yae ngɛ hiɔwe nɛ o ma he ye? 13 Ejakaa imi Yiwamihelɔ ɔ pɛ ji nɔ nɛ ba zugba a nɔ nɛ maa kpale kɛ ho hiɔwe ya ekohu.

14 Nɛ kaa bɔ nɛ Mose wo ayawa sinɔ ɔ nɔ ngɛ tso nya ngɛ nga a nɔ ɔ, ja a nɔuu nɛ a ma wo ye nɔ ngɛ tso nɔ, 15 konɛ nɔ tsuaa nɔ nɛ heɔ ye nɔ yeɔ ɔ, e na neneene wami. 16 Ejakaa Mawu suɔ je ɔ saminya nɛ e tsɔ e Bi kake too ɔ ngɔ mane konɛ nɔ tsuaa nɔ nɛ heɔ e nɔ yeɔ ɔ, e hɛ mi nɛ ko kpata, se mohu e na neneene wami. 17 Mawu tsɔɛ e Bi ɔ kɛ bɛ je ɔ mi nɛ e ba puɛ je ɔ, se mohu nɛ e ba he je ɔ yi wami.

18 Nɛ nihi nɛ heɔ e nɔ yeɔ ɔ, a be neneene fɔ bumi ko, se nihi nɛ ngɔɛ a hɛ kɛ fɔɛ e nɔ ɔ, a kojo mɛ nɛ a bu mɛ fɔ momo, ejakaa a he we Mawu Bi kake too ɔ nɔ yi. 19 Fɔ nɛ a bu mɛ ɔ sisi ji, La je hiɔwe kɛ ba je ɔ mi, se a suɔ diblii ɔ pe La a, ejakaa a ni tsumi ɔmɛ ɔ yayami i. 20 A sume hiɔwe La a, ejakaa a suɔ nɛ a pee yayami ngɛ diblii mi. A je a he kɛ je La a he, ejakaa a ngɛ gbeye yee kaa La a ma je a sisi kpo nɛ a maa gbla a tue. 21 Se nihi nɛ peeɔ kpakpa a, a baa La a he kɛ bua jɔmi konɛ nɔ tsuaa nɔ nɛ na kaa a ngɛ Mawu suɔmi nya ni tsue."

22 Pee se ɔ, Yesu kɛ e kaseli ɔmɛ si Yerusalem kɛ ya hi Yudea bɔɔ nɛ a baptisi nihi ngɛ lejɛ ɔ.

23,24 Jamɛ a be ɔ mi ɔ, a wui Yohane Baptisilɔ ɔ tsu lolo, nɛ e ngɛ nihi baptisie ngɛ Ainon, ma ko nɛ ngɛ Salim ma a kasa mi ɔ, ejakaa nyu fuu ngɛ lejɛ ɔ. 25 Ligbi ko ɔ, Yohane kaseli ɔmɛ kɛ nɔ ko ngɛ nya sae, nɛ nɔ ɔ de mɛ ke Yesu baptisimi ɔ hi pe kulaa. 26 Enɛ ɔ he je ɔ, a ba Yohane ngɔ nɛ a ba de lɛ ke, "Nutsɔ, maminyumu ɔ nɛ kɛ mo kpe ngɛ Yordan Pa a se, nɛ o de wɔ ke lɛ ji Yiwamihelɔ ɔ hu ngɛ nihi baptisie, nɛ nɔ tsuaa nɔ ngɛ e ngɔ yae ngɛ lejɛ ɔ nɛ a si wɔ."

27 Yohane ha mɛ heto ke, "Mawu nɛ ngɛ hiɔwe ɔ nɛ haa nɔ tsuaa nɔ e ni tsumi. 28 Ye ni tsumi ji kaa ma dla blɔ ɔ ngɔ to jamɛ a nɔ ɔ konɛ nɔ tsuaa nɔ nɛ ya e ngɔ. Nyɛ nitsɛmɛ nyɛ le kaa i de nyɛ ke tsa pi imi ji Mesia a; blɔ dlami he nɛ i sɛ hlami kɛ ba ngɛ. 29 Nɔ́ nɛ ngɛ fɛu ɔ nɛ tsɛɔ nihi; ayɛflo ɔ, e yaa he tsuaa he nɛ e huno ɔ ngɛ, nɛ e huno ɔ huɛmɛ kɛ lɛ nyaa. Yo he ɔ huno ɔ huɛ ji mi, nɛ ye bua jɔ ye he kaa e ye kunimi. 30 E sa nɛ e ya nɔ nɛ imi lɛɛ ma ba si.

31 E je hiɔwe nɛ e kle pe nɔ tsuaa nɔ. Imi lɛɛ a fɔ mi ngɛ zugba nɛ ɔ nɔ, nɛ zugba nɛ ɔ nɔ ni nɛ i le. 32 Nɔ́ nɛ e na kɛ nɔ́ nɛ e nu ɔ he odase e yeɔ, se nihi bɔɔ pɛ nɛ heɔ lɛ yeɔ. 33 Nɛ ni nɛmɛ nɛ heɔ lɛ yeɔ ɔ, naa kaa anɔkualetsɛ ji Mawu. 34 Ejakaa nɔ nɛ Mawu tsɔ ɔ, Mawu Munyu e tuɔ, ejakaa Mawu Mumi ɔ hyi lɛ tɔ. 35 Tsɛ ɔ suɔ Bi ɔ, nɛ e to nɔ́ tsuaa nɔ ngɔ wo e dɛ. 36 Nihi tsuo nɛ heɔ Bi ɔ nɔ yeɔ ɔ naa neneene wami, se nihi nɛ he we lɛ yi kɛ nihi nɛ bui lɛ tue ɔ be neneene wami ɔ nae, se mohu Mawu mi mi fumi nɛ maa hi a nɔ."