1 "Nyɛ ko ye tsui, nyɛ heɔ Mawu nɔ yeɔ, nyɛ he ami hu ye nɔ nyɛɛ ye. 2 Sihi hehi babauu ngɛ ye Tsɛ we ɔ, ke pi ja a jinɛ i de nyɛ momo; nɛ i yaa nɛ ma ya dla mɛ ngɔ to nyɛ. 3 Nɛ ke i ya dla mɛ ta a, i ma kpale kɛ ba ekohu nɛ ma ba wo nyɛ kɛ ya hi he nɛ i ngɛ ɔ. 4 Nyɛ le he nɛ i yaa a, nɛ nyɛ le blɔ ɔ hulɔ."

5 Kɛkɛ nɛ Toma de lɛ ke, "Mawetsɛ, wa li he nɛ o yaa a, kɛ wa maa pee kɛ le blɔ ɔ kɛɛ?"

6 Yesu de lɛ ke, "Ami ji Blɔ ɔ kɛ Anɔkuale ɔ kɛ Wami ɔ nɛ. Nɔ ko be Tsɛ ɔ ngɔ nyɛe maa ba, ja e gu ye nɔ. 7 Ke nyɛ le mi jinɛ nyɛ ko le ye Tsɛ ɔ hulɔ. Kɛ je mwɔnɛ ɔ kɛ yaa nɛ ɔ, nyɛ le lɛ ejakaa nyɛ na lɛ."

8 Filipo de Yesu ke, "Mawetsɛ, moo tsɔɔ wɔ Tsɛ ɔ, nɛ e maa hi ha wɔ."

9 Yesu ha lɛ heto ke, "Filipo! Lɛɛ kɛ je be nɛ i kɛ mo hi si kɛ ya si nɛ ɔ, o li mi lolo lo? Nɔ tsuaa nɔ nɛ na mi ɔ, e na Tsɛ ɔ. Mɛni he je nɛ o ngɛ mi bie ke ma tsɔɔ mo Tsɛ ɔ mɔ? 10 O he we yi kaa i ngɛ Tsɛ ɔ mi nɛ Tsɛ ɔ hu ngɛ ye mi lo? Tsa pi ami nitsɛ ye he wami nya munyuhi nɛ i tuɔ nyɛ ɔ, se Tsɛ ɔ nɛ ngɛ ye mi ɔ, e munyuhi i. E tsuɔ e ni tsumi ɔ kɛ guu ye nɔ. 11 Nyɛ he nɛ nyɛɛ ye kɛkɛ kaa i ngɛ Tsɛ ɔ mi nɛ Tsɛ ɔ hu ngɛ ye mi. Aloo nyɛ he nɛ nyɛɛ ye ngɛ nyakpɛ ni tsumi agbohi nɛ i tsu ɔmɛ a he.

12 I ngɛ nyɛ dee ngɛ anɔkuale klɔuu mi kaa nɔ tsuaa nɔ nɛ heɔ mi yeɔ ɔ, e ma tsu nyakpɛ ni tsumihi nɛ i tsu ɔmɛ, nɛ tete po ɔ, e maa pee nyakpɛ nihi nɛ kle pe ja, ejakaa i yaa Tsɛ ɔ ngɔ. 13 Nɛ i ma pee nɔ́ tsuaa nɔ nɛ nyɛ ma bi lɛ ngɛ ye biɛ mi ɔ ha nyɛ, ejakaa e maa pee yi jemi kɛ ha Tsɛ ɔ ngɛ nɔ́ nɛ e Bi ɔ tsu ɔ he je. 14 Nyɛ bi nɔ tsuaa nɔ ngɛ ye biɛ mi nɛ i ma pee ha nyɛ."

15 "Ke nyɛ suɔ mi ɔ, nyɛɛ ye ye gbi nɔ; 16 nɛ i ma bi Tsɛ ɔ nɛ e ma ha nyɛ Hepiɛlɔ kpa, nɛ e kɛ nyɛ ma ba hi si kɛ ya neneene. 17 Lɛ ji Mumi Klɔuklɔu ɔ nɛ, mumi nɛ kɛ nɔ yaa anɔkuale mi ɔ. Je ɔ kulaa be lɛ hee atuu ejakaa e hla we lɛ, nɛ e li lɛ. Se nyɛɛ lɛɛ nyɛ le lɛ, ejakaa e ngɛ nyɛ ngɔ amlɔ nɛ ɔ, nɛ e maa hi nyɛ mi ligbi ko. 18 I be nyɛ sie awusahi gblee ngɛ haomi mi, i ma ba nyɛ ngɔ. 19 E piɛ bɔɔ nɛ i ma si je ɔ mi, se loloolo ɔ i kɛ nyɛ maa hi si. Ejakaa i ma ba wami mi ekohu kaa bɔ nɛ nyɛ hu nyɛ ngɛ ɔ. 20 Ke i kpale kɛ ba wami mi ekohu ɔ, nyɛ maa na kaa i ngɛ Tsɛ ɔ mi, nɛ nyɛ hu nyɛ ngɛ ye mi, nɛ ami hu i ngɛ nyɛ mi. 21 Nɔ nɛ yeɔ ye gbi nɔ ɔ, lɛ ji nɔ nɛ suɔ mi. Nɛ akɛnɛ e suɔ mi ɔ, ye Tsɛ hu maa suɔ lɛ. Ami hu ma suɔ lɛ, nɛ ma je ye he si kɛ tsɔɔ lɛ."

22 Se Yesu kaselɔ kpa ko nɛ a tsɛɛ le ke Yuda, tsa pi Yuda Iskariot, bi lɛ ke, "Mawetsɛ, mɛni he je nɛ o ma je o he si kɛ tsɔɔ wɔ o kaseli ɔmɛ kɛkɛ, se pi je ɔ tsuo ɔ?"

23 Yesu ha lɛ heto ke, "I ma je ye he si kɛ tsɔɔ nihi nɛ suɔ mi nɛ a yeɔ ye gbi nɔ ɔ kɛkɛ. Ye Tsɛ hu maa suɔ mɛ, nɛ wa maa ba a ngɔ, nɛ waa kɛ mɛ maa hi si. 24 Nɔ nɛ yi ye munyu ɔ nɔ ɔ, e sume mi. Tsa pi ami nɛ i ngɛ munyu ɔ heto hae ɔ se mohu Tsɛ ɔ nɛ tsɔ mi ɔ i. 25 I ngɛ munyu nɛ ɔmɛ tue amlɔ nɛ ɔ nɛ i kɛ nyɛ ngɛ ɔ. 26 Se ke Tsɛ ɔ tsɔ Hepiɛlɔ nɛ ji Mumi Klɔuklɔu ɔ kɛ ba nyɛ ngɔ ɔ, e maa tsɔɔ nyɛ níhi fuu, nɛ e ma kai nyɛ nɔ́ fɛɛ nɔ nɛ i de nyɛ ɔ hulɔ.

27 I ngɛ he jɔmi sie ha nyɛ. Tsa pi je ɔ he jɔmi nɛ e haa a nɛ i ngɛ sie ha nyɛ. Lɔ ɔ he je ɔ, nyɛ ko ye tsui, nɛ nyɛ ko ye gbeye. 28 Nyɛ kai kaa i de nyɛ ke i yaa, se i ma kpale kɛ ba nyɛ ngɔ ekohu. Ke nyɛ suɔ mi niinɛ ɔ, nyɛ bua maa jɔ kaa i yaa Tsɛ nɛ kle pe mi ɔ ngɔ. 29 I de nyɛ nɔ́ nɛ ɔmɛ kɛ fɔ si bɔ nɛ pee nɛ ke a ba mi ɔ nɛ nyɛ he nyɛɛ ye.

30 I be be nɛ i kɛ nyɛ maa tu munyu fuu, ejakaa je ɔ mi matsɛ bi ɔ su si ta. E be ye nɔ he wami; 31 se i ma pee bɔ nɛ Tsɛ ɔ suɔ, konɛ je ɔ nɛ na le kaa i suɔ Tsɛ ɔ. Nyɛɛ te si nɛ waa ho."