1,2 Benɛ Yesu na lɛ kaa Farisi bi ɔmɛ nu kaa nihi babauu ngɛ e ngɔ bae pe bɔ nɛ a ngɛ Yohane ngɔ yae, nɛ e ngɛ mɛ baptisie nɛ e ngɛ kaseli fuu nae, be mi nɛ Yesu nitsɛ baptisii we se mohu e kaseli ɔmɛ nɛ a ngɛ ni ɔmɛ baptisie ɔ, 3 e si Yudea nɛ e kpale kɛ ba Galilea ekohu.

4 Nɛ e ya gu Samaria loko e ba Galilea. 5 Maa pee piani ngmlɛ nyɔngma kɛ enyɔ mi ɔ, e ba su Sikar kɔpe ɔ nɛ ngɛ Samaria kasa nya a he. 6 Lejɛ ɔ nɛ Yakob vu ɔ ngɛ, ngɛ zugba kpɔ ko nɛ Yakob ngɔ ha e bi Yosef ɔ nɔ.Yesu ho hi si ngɛ vu ɔ kasa nya nɛ e jɔɔ e he, ejakaa pɔ tɔ e he kɛ nyɛɛmi.

7 E yi be ko nɛ Samaria yo ko ba nyu sami. Yesu bi yo ɔ nɛ e ba lɛ nyu nɛ e nu. 8 Jamɛ a be ɔ mi ɔ, Yesu nɔ kake nɛ ngɛ lejɛ ɔ ejakaa e kaseli ɔmɛ ho ma a mi ya nɛ a ya he niye ni. 9 Samaria yo ɔ nya kpɛ e he nɛ e bi Yesu nɔ́ he je nɛ lɛ Yuda no ɔ e ngɛ lɛ Samaria no nɛ a bui ɔ nyu bie nɛ e nu. Ejakaa Yuda bi ɔmɛ kɛ Samaria bi ɔmɛ yi, nɛ Yuda bi ɔmɛ pɔɛ munyu tete tumi ha mɛ.

10 Yesu de yo ɔ ke, "Kaa o le Mawu nike nɔ nɛ e ngɛ kɛ ha mo, kɛ nɔ nɛ ngɛ mo nyu ɔ bie nɛ ɔ, jinɛ mo mohu o ma bi lɛ nɛ e ha mo neneene wami nyu."

11 Nɛ yo ɔ de lɛ ke, "Vu nɛ ɔ mi kuɔ, nɛ o be nyu sami kpa kɛ goga. Jije o ma na wami nyu nɛ ɔ kɛ je? 12 Anɛ o pe Yakob, wa nɛ ɔ lo? Kɛ o maa pee kɛ ha nyu nɛ hi pe vu nɛ ɔ mi nyu nɛ Yakob kɛ e bimɛ kɛ e lohwehi nuu ɔ kɛɛ?"

13 Yesu ha lɛ heto ke, "Nihi nɛ nuu nyu nɛ ɔ, kuma yee mɛ ekohu. 14 Se nyu nɛ i haa mɛ ɔ plɛɔ nyu hɛ ngmɛ nɛ baa ngɛ a mi daa kɛ daa nɛ e haa mɛ neneene wami."

15 Kɛkɛ nɛ yo ɔ de Yesu ke, "Mawetsɛ, i kpa mo pɛɛ nɛ o ha mi jamɛ a nyu ɔ eko konɛ kuma nɛ ko ye mi hu, nɛ ma jɔɔ blɔ gaga nɛ ɔ nyɛɛmi kɛ vu nɛ ɔ nya bami daa."

16 Nɛ Yesu de lɛ ke, "Yaa tsɛ o huno kɛ ba."

17 Yo ɔ he nɔ nɛ e de Yesu ke, "I be huno." Yesu na kaa yo ɔ tu anɔkuale. Enɛ ɔ he je ɔ, e de lɛ ke, "Munyu ngwɔhe nɛ o tu ɔ nɛ, 18 ejakaa o kɛ nyumuhi enuɔ hi si hyɛ, nɛ nyumu nɛ o kɛ lɛ ngɛ piɔ nɛ ɔ, tsa pi o huno i."

19 Yo ɔ de lɛ ke, "Mawetsɛ, e maa pee gbalɔ ji mo. 20 Gerazim Yoku nɛ ɔ nɔ nɛ wa tsɛmɛ ja Mawu ngɛ. Mɛni he je nɛ Yuda bi ɔmɛ ke doo ja Yerusalem ji he nɛ sa kaa a ja Mawu ngɛ ɔ?"

21 Yesu de lɛ ke, "Mamiyo, mo he mi nɛ o ye kaa be ma, nɛ pi yoku nɛ ɔ nɔ loo Yerusalem nɛ nyɛ ma ja Tsɛ ɔ ngɛ. 22 Nyɛ jaa nɔ́ nɛ nyɛ li; wɔɔ lɛɛ wa jaa nɔ́ nɛ wa le, ejakaa Yuda bi ɔmɛ a ngɔ nɛ yi wami hemi ɔ je. 23 Se be ma, nɛ e su, nɛ anɔkuale jali ɔmɛ ma ja Tsɛ ɔ ngɛ mumi kɛ anɔkuale mi, ejakaa ja a ji bɔ nɛ Tsɛ ɔ ngɛ hlae nɛ a ja lɛ. 24 Mawu ɔ, mumi ji lɛ, nɛ nihi nɛ jaa lɛ ɔ, a ja lɛ ngɛ mumi kɛ anɔkuale mi."

25 Yo ɔ de Yesu ke, "Saminya, i le kaa Mesia nɛ a tsɛɛ lɛ Kristo ɔ maa ba, nɛ ke e ba a, e ma ba gba nɔ́ tsuaa nɔ mi kɛ tsɔɔ wɔ."

26 Yesu he nɔ nɛ e de lɛ ke, "Ami ji Mesia a nɛ."

27 Yesu nya nɔɛ si nɛ e kaseli ɔmɛ ba su vu ɔ nya. E pee mɛ nyakpɛ kaa e kɛ yo ɔ ngɛ ni sɛɛe, se a ti nɔ ko bi we lɛ nɔ́ nɛ ba loo nɔ́ nɛ e kɛ yo ɔ ngɛ sɛɛe ɔ.

28,29 Kɛkɛ nɛ yo ɔ si e paya buɛ ɔ ngɛ vu ɔ nya nɛ e kpale kɛ ho ma a mi ya nɛ e ya de ni ɔmɛ ke, "Nyɛɛ ba nɛ nyɛ ba hyɛ nyumu ko nɛ de mi nɔ́ fɛɛ nɔ nɛ i pee hyɛ ɔ ha kaa tsa pi lɛ ji Kristo ɔ lo?" 30 Nɛ ni ɔmɛ muɔ a he kɛ je ma a mi kɛ ba lɛ hyɛmi.

31 Jamɛ a be ɔ mi ɔ, e kaseli ɔmɛ ngɛ lɛ pɛɛ kpae ke e wo e nya mi nɔ́ ko. 32 Se e de mɛ ke, "Dabi, i ngɛ niye ni nɛ i yeɔ nɛ nyɛ li."

33 Enɛ ɔ ha nɛ kaseli ɔmɛ bi a he ke, "Anɛ nɔ ko ba haa lɛ niye ni ko lo?"

34 Yesu gba mi kɛ tsɔɔ mɛ nɛ e de ke, "Ye niye ni ji kaa ma pee Mawu nɛ tsɔ mi ɔ suɔmi nya ni nɛ ma gbe e ni tsumi ɔ nya. 35 Anɛ nyɛ li kaa e piɛ hlami eywiɛ pɛ nɛ ni kpami be ɔ maa su lo? Nyɛɛ hyɛ nyɛ he kɛ kpe, bɔ nɛ níhi bɔni fumi ngɛ ngmɔ ɔmɛ a nɔ kɛ ha kpami. 36 A maa wo ni kpali ɔmɛ hiɔ bɔ nɛ sa, nɛ a ma bua neneene susuma amɛ a nya kɛ to ngɛ hiɔwe ni tomi he ɔmɛ; nɛ ni dulɔ kɛ ni kpalɔ tsuo ma na bua jɔmi kake. 37 Ejakaa enɛ ɔ ma ha nɛ munyu nɛ a tu ke nɔ ko ma du, nɛ nɔ ko ma kpa a maa ba mi. 38 I tsɔ nyɛ nɛ nyɛ ya kpa ni ngɛ he nɛ nyɛ du we nɔ́ ko ngɛ, ni komɛ tsu ni ɔ momo, nɛ nyɛ ma na a ni tsumi ɔ he se."

39 Samaria bi nɛ ba vu ɔ nya a a ti nihi fuu he ye kaa lɛ ji Mesia a, ngɛ yo ɔ odase nɛ e ye ngɛ e he ke, "E de mi nɔ́ fɛɛ nɔ nɛ i pee hyɛ ɔ."

40 Enɛ ɔ he je ɔ, benɛ Samaria bi ɔmɛ ba na lɛ ngɛ vu ɔ nya a, a kpa lɛ pee nɛ e ba hi a ngɔ bɔɔ; nɛ e kɛ mɛ ya hi si ligbi enyɔ. 41 Nɛ nihi fuu he lɛ ye ngɛ munyuhi nɛ je e nya mi ɔ he. 42 Nɛ a de yo ɔ ke, "Jehanɛ ɔ wa he ye, tsa pi ngɛ nɔ́ nɛ o de wɔ ɔ he je. Wɔ nitsɛmɛ wa nu e nya mi gbi nɛ wa he ye kaa lɛ ji Kristo, je ɔ Yiwamihelɔ ɔ."

43 Ligbi enyɔ se ɔ, Yesu si Samaria nɛ e pue nɔ kɛ ho Galilea ya; 44 ejakaa lɛ nitsɛ e ye odase ke, "Gbalɔ ko be nɛ he ngɛ bumi ngɛ lɛ nitsɛ e ma mi." 45 Se benɛ e ya su Galilea a, a he lɛ atuu, ejakaa mɛ hu a ya Hebemi jeha yemi ngɛ Yerusalem ɔ nɛ a na nyakpɛ níhi nɛ e pee ɔ.

46 Yesu kpa Galilea ma amɛ a nɔ, nɛ e ba su Kana ma nɔ he nɛ e plɛ nyu kɛ pee wai ngɛ ɔ ekohu. Nɛ benɛ e ngɛ lejɛ ɔ, ma mi nɔkɔtɔma ko ngɛ Kapernaum nɛ e bi ngɛ gboe ɔ, 47 nu e he kaa e je Yudea nɛ e ngɛ si kpae ngɛ Galilea. Nyumu nɛ ɔ hia blɔ kɛ ba Yesu ngɔ ngɛ Kana nɛ e ba kpa lɛ pɛɛ nɛ e ba Kapernaum nɛ e ba tsa e bi nɛ ngɛ gbenɔ muɔ nya a ha lɛ.

48 Nɛ Yesu bi lɛ ke, "Anɛ nyɛ ti nɔ ko be mi hee ye kaa ja i pee nyakpɛ nɔ́ ko kɛ tsɔɔ nyɛ lolo?" 49 Se nɔkɔtɔma a de lɛ ke, "Mawetsɛ, i kpa mo pɛɛ, ba loko ye bi ɔ yi nɛ ta."

50 Nɛ Yesu de lɛ ke, "Moo ya, o bi ɔ yi na wami." Nyumu ɔ he Yesu ye nɛ e pue we mi blɔ. 51 Benɛ e yaa ɔ, e sɔmɔli ɔmɛ ekomɛ kɛ lɛ ba kpe nɛ a de lɛ ke e binyumu ɔ na he wami. 52 E bi mɛ benɛ e bɔni he wami nami, nɛ a he nɔ ke, "Asla a tsɔ ngɛ e nɔ si kake too hiɛ piani maa pee ngmlɛ kake mi." 53 Kɛkɛ nɛ tsɛ ɔ kai kaa jamɛ a be ɔ mi nɔuu nɛ Yesu de lɛ ke e bi ɔ he mi wa lɛ ɔ nɛ. Enɛ ɔ ha nɛ nyumu ɔ kɛ e we ɔ tsuo he ye kaa Yesu ji Mesia a nɛ.

54 Enɛ ɔ ji nyakpɛ níhi enyɔ nɛ Yesu pee ngɛ Galilea benɛ e je Yudea kɛ ba lejɛ ɔ.