1 "Ami ji anɔkuale Wai Tso ɔ nɛ, nɛ ye Tsɛ ji Abɔɔtsɛ ɔ. 2 E poo wai tso ɔmɛ a kɔnihi nɛ wui yiblii ɔ. Nɛ e kplɔɔ kɔnihi nɛ woɔ yiblii ɔmɛ tete a he bɔ nɛ pee nɛ a wo yiblii agbohi pe kekle ɔ. 3 E kplɔ nyɛ he nɛ nyɛ he je momo ngɛ munyuhi nɛ i tu nyɛ ɔmɛ a he. 4 Nyɛɛ hi ye mi nɛ ami hu ma hi nyɛ mi. Kaa bɔ nɛ wai tso kɔni wui yiblii ke a kplɔ lɛ kɛ je wai tso ɔ he ɔ, ja a nɔuu nɛ e maa ba mi ha nyɛ ke nyɛ tsɔ nyɛ he kɛ je ye he.

5 Ami ji Wai Tso ɔ, nɛ nyɛ ji kɔni ɔmɛ. Nɔ tsuaa nɔ nɛ hii ye mi nɛ ami hu i hii e mi ɔ, e woɔ yiblii fuu. Ejakaa nyɛ be nɔ́ ko nyɛe maa pee ke i piɛ we nyɛ he. 6 Nɔ nɛ be ye mi ɔ, a sakee lɛ kɛ fɔɔ he kaa tso kɔni nɛ he be se nami, nɛ e gbliɔ nɛ a buaa nya nɛ a tsɔɔ lɛ la kɛ ekpahi. 7 Se ke nyɛ ngɛ ye mi nɛ nyɛ ye ye kita amɛ a nɔ ɔ, nɔ́ tsuaa nɔ nɛ nyɛ ma kpa he pɛɛ ɔ, a maa pee ha nyɛ. 8 Nihi nɛ a ji ye anɔkuale kaseli ɔmɛ woɔ yiblii fuu. Nɛ enɛ ɔ haa ye Tsɛ hɛ mi baa nyami babauu.

9 I suɔ nyɛ kaa bɔ nɛ Tsɛ ɔ suɔ mi ɔ; jaa he ɔ, nyɛɛ hi si ngɛ ye suɔmi ɔ mi. 10 Ke nyɛ ye ye kita amɛ a nɔ ɔ, nyɛ maa hi ye suɔmi ɔ mi kaa bɔ nɛ ami hu i ye ye Tsɛ kita amɛ a nɔ nɛ i ngɛ e suɔmi ɔ mi ɔ. 11 I ngɛ nyɛ ni nɛ ɔmɛ dee bɔ nɛ pee nɛ nyɛ na bua jɔmi babauu. 12 I ngɛ nyɛ kita woe kaa nyɛɛ suɔ nyɛ he kaa bɔ nɛ i suɔ nyɛ ɔ. 13 Suɔmi nɛ kle pe kulaa ji kaa nɔ ko maa ngɔ e wami kɛ sa afɔle ngɛ e huɛmɛ a he; 14 nɛ nyɛ peeɔ ye huɛmɛ ke nyɛ ye ye kita amɛ a nɔ. 15 I tsɛ we nyɛ ke nyɔguɛhi hu, ejakaa nyɔguɛhi li nɔ́ nɛ a nutsɔ peeɔ; amlɔ nɛ ɔ ye huɛhi ji nyɛ, ejakaa i de nyɛ nɔ́ tsuaa nɔ nɛ ye Tsɛ ɔ de mi ɔ.

16 Tsa pi nyɛ nɛ nyɛ hla mi, se ami nɛ i hla nyɛ, nɛ i tsɔ nyɛ konɛ nyɛ ya wo yiblii kpakpahi daa, bɔ nɛ pee nɛ Tsɛ ɔ nɛ ha nyɛ nɔ tsuaa nɔ nɛ nyɛ ma bi lɛ ngɛ ye biɛ mi ɔ. 17 I ngɛ nyɛ dee ke nyɛɛ suɔ nyɛ he, 18 ejakaa je ɔ maa nyɛ nyɛ. Se nyɛ kai kaa je ɔ nyɛ mi loko ji e ba su nyɛ nɔ. 19 Je ɔ mi bimɛ ji nyɛ jinɛ je ɔ maa suɔ nyɛ sane. Se nyɛ pi je ɔ mi bimɛ, ejakaa i hla nyɛ kɛ je je ɔ mi. Enɛ ɔ he je nɛ je ɔ sume nyɛ ɔ nɛ. 20 Nyɛ he nɛ ko je nɔ́ nɛ i de nyɛ ɔ nɔ kaa, ‘Nyɔguɛ pa we e nutsɔ ɔ.’ Lɔ ɔ he je ɔ, ke a pee mi níhi nɛ sɛ ɔ, a maa pee nyɛ hu ja a nɔuu. Nɛ kaa a bu mi tue jinɛ a maa bu nyɛ hu tue. 21 Je ɔ mi bi ɔmɛ maa wa nyɛ yi mi ngɛ ye nihi nɛ nyɛ ji ɔ he je, ejakaa a li Mawu nɔ nɛ tsɔ mi ɔ.

22 Nɛ kaa i bɛ nɛ ma ba tu munyu kɛ tsɔɔ mɛ jinɛ a be mɛ fɔ bue, se amlɔ nɛ ɔ, a be nya jemi ko ngɛ a yayami ɔmɛ a he. 23 Nɔ nɛ nyɛɛ mi ɔ, e ngɛ ye Tsɛ hu nyɛe. 24 Kaa i tsu we nyakpɛ ni tsumi nguahi ngɛ a kpɛti nɛ a na jinɛ a be mɛ fɔ bue. Se a na ni tsumi nɛ ɔmɛ nɛ loloolo ɔ, a sume i kɛ ye Tsɛ ɔ tsuo. 25 Nɛ enɛ ɔ ha nɛ nɔ́ nɛ gbali ɔmɛ de ngɛ Mesia a he ke, ‘A nyɛ mi gu ɔ’ ba mi.

26 Se i ma tsɔ Hepiɛlɔ nɛ ji Mumi Klɔuklɔu ɔ kɛ mane nyɛ. Lɛ ji anɔkuale Mumi ɔ nɛ maa je Tsɛ ɔ ngɔ kɛ ba nyɛ ngɔ, nɛ lɛ e ma ba ye ye he odase. 27 Nɛ nyɛ hu nyɛ maa ye ye he odase, ejakaa nyɛɛ kɛ mi hi si kɛ je sisije."