Milagres de Jesus
Os Evangelhos registram dezenas de milagres realizados por Jesus — curas, ressurreições, domínio sobre a natureza e libertações. Cada milagre revelava sua divindade e compaixão.
Curas de cegos e surdos
Jesus devolveu a visão aos cegos e a audição aos surdos, manifestando seu poder sobre toda enfermidade e deficiência.
Yasuuꞌa beentooysii giigiyanihoob, malu hamashaya da barooh imooraamniit waliikiyaana, "Daawidi Oor, dehoon nꞌakwmanaaya." idiin.
Yasuuꞌa oogaw shuumiyanihoob, aanda yhamashaya bariiyooh dehaay eeyaan. Baruuh bareeh raatiya, "Ani toon toona sakaniyeet toona aamanteena?" idi.
Baraah "Awooh Wꞌankwanaay." idiin.
Malya Yasuuꞌa bareeyeehna eegwꞌad tehiyaayt, "Baraak aamantaanayt, tuun batiikti." idi. Aanda shaawti rhiyaan. Yasuuꞌa bareeh winneet sooya, "Toon toona gaal han baasooyaana." idi. Laakiin baraah giigiyaaniit oon usakana ubariiyooh kassooh whaashiib ibrirna.
Yasuuꞌa malu da hamashayaab mheeliya
Yasuuꞌaawwa ikwiriyaatayaahwa Ariihaay giigeeneet midda, gwida dehay bareeh iramna. Malu da hamashaya usalali dar iistꞌana, Yasuuꞌa hasamiini diyee imaasiwnihoob, baraah waliikiyaana, "Wꞌankwana, Daawidi Oor, dehoon nꞌakwmanaaya!" idiin.
Uudehay igwida bareeh idaaninna, aree tim ikatiineet toona sooyaan. Laakiin baraah masi tageegisiyaani waliikiyaaniit, "Wꞌankwana, Daawidi Oor, dehoon nꞌakwmanaaya!" idiin.
Yasuuꞌa ingadaayt bareeh waliikiya, "Naan dehookna sakaniyeet toona tehariwna?" idi.
Baraah "Wꞌankwanaay, rhinayeet toona nhariw." idiin.
Yasuuꞌa bareeh dehaay nꞌakwmanaayaayt eegwꞌad tehiya. Aanda willa aagwꞌad rhiyaaniit, barooh iramna.
Yasuuꞌa tak hamashay Beetsaydaay mheeliya
Baraah Beetsaydaab beeti eeyaan. Dehay gali tak hamashay Yasuuꞌii dehaay haay eeyaan. Wꞌayooh oon ootaki kehii daasiyeet toona hooy yhariwna. Yasuuꞌa ootak wꞌayi yꞌabikaayt oodehayii haay isgi. Malya ootaki gwꞌadi kehii tifiya, yꞌayeeh kehii daasiya. Yasuuꞌa ootakii dehaay, "Naat han rhitniya?" idiit raatiya.
Uutak ishbibaayt, "Dehay rhani. Baraah yhindi yhantaayeen tꞌiiteeba." idi.
Yasuuꞌa masi yꞌayeeh ootaki gwꞌadi kehii daasiya. Malya uutak daayiib rhiya, suureet aagwꞌad yꞌagarna, naatka daayiib rhiiniib iki. Yasuuꞌa ootakii dehaay, "Ugawook bayaa, laakiin tugariya baashuuma!" idi.
Yasuuꞌa tak angwilaywa gilluusiibwa mheeliya
Yasuuꞌa Tiiroosi haashii giigiya. Siidooni salalii Jaliil oobhar hadiit idif. Timadiina Titaminti haashii hasamiya. Beentooy dehay gali angwilay tak gilluusiib dehaay haay eeyaan. Uudehay Yasuuꞌa ootak wꞌayooh kehii daasiyeet toona hooy yhariwna.
Yasuuꞌa ootak oodehayii haay isgi, tigiibalayteeh ootaki angwili kehii daasiya. Malya kehii tifiya, umiidalaab aree tatehiya. Yasuuꞌa teebri ishbibaayt ootakii dehaay "Eeffaata!" idi. Eeffaata Iyahuudi bhaliyeeb "Nigala!" miyaadi. Igidiyeesooh ootaki angwil ingalna, umiidalaab ifdag, aree winneet hadiidiya.
Yasuuꞌa beet toona dehay biisooyayneet toona waseeya. Laakiin baruuh gwida doora waseeyaneek han, baraah beet toona amaagkaab sooyiin. Baraah winneet ajjabamiyaana, "Baruuh daayiiniyeet tuuna kastuuh tishiboobi. Yꞌangwilaya ismaasiiw, igilluusi hadiidsiini." idiin.
Yasuuꞌa Bartiimaaꞌiyoos whamashay mheeliya
Malya baraah Ariihaab iktimna. Yasuuꞌaawwa ikwiriyaataywa, gwida dehaywa tumadiinaatii firꞌee, tak hamashay Bartiimaaꞌiyoos (Timaaꞌiyoosi oor) iidneeb, nꞌaliigaab usalaliib oodehay iinꞌal iifi. Yasuuꞌa Unaasiraayi yꞌaabi diyee imaasiwihoob, tageega hissii waliikiya, "Yasuuꞌa, Daawidi oor, arhamaaheeb!" idi.
Gwida dehay barooh idaaninna aree, "Tim akaa!" idiin. Laakiin baruuh winneet masi waliikiya, "Daawidi oor, arhamaaheeb!" idi.
Yasuuꞌa ingadaayt, "Ootak waliikaana!" idi.
Aflaay baraah ootak whamashay waliikiyaana, "Abshir, yakaa! Baruuh waliikiini hook." idiin. Uutak whalakooh igidaayt fafaree Yasuuꞌii dehaay eeya.
Yasuuꞌa barooh raatiya, "Naan harriiwa? Naan dehook atankwiikw?" idi.
Uutak whamashay, "Seednaay! Ani rhitiib aharriiw." idi.
Yasuuꞌa ootakii dehaay, "Aflaay giigaa! Wꞌiimaanuuk mheeliya hook." idi.
Ootak willa aagwꞌad rhiyaana, aree usalaliib Yasuuꞌaab iram.
Yasuuꞌa Hamashay Tak Nꞌaliigaab Mheeliya
Yasuuꞌa Ariihaab iidneet madiina idwilihoob, tak hamashay usalali daraag iistꞌa oodehay iinꞌal iifi. Uun uutak gwida dehay hasamiinaayi hiss imaasiwihoob, baruuh naan tiiktiyeeb sakanaaya. Baraah barooh sooyaana, "Yasuuꞌa Unaasiraayi tooysii hasamiini." idiin.
Uutak tageega hissii waliikiya, "Yasuuꞌa, Daawidi Oor, arhamaaheeb!" idi.
Uudehay Yasuuꞌaay suurii sakiin baliin, tim iiktiyeet toonaati jillaay barooh idninna. Laakiin baruuh winneet masi waliikiya, "Daawidi Oor, arhamaaheeb!" idi.
Yasuuꞌa ingadaayt, been ootak haay yꞌeeneet toona galib sooya. Uutak idwilihoob, Yasuuꞌa barooh raatiya, "Naan harriiwa? Naan dehook sakani?" idi.
Uutak, "Wꞌankwanaay, ani rhaniyeet aharriiw." idi.
Yasuuꞌa bariiyooh dehaay, "Shibiba aree rhi tindiya! Wꞌiimaanuuk isinꞌir hook." idi. Uutak igidiyeesooh rhiyaayt Yasuuꞌaab iram, aree Ukwaasana yhamid. Uudehay kassaah toona tutikeet rhiyaanihoob, baraah han Ukwaasana yhamidna.
Yasuuꞌa Hamashay Tak Mheeliya
Yasuuꞌa oodꞌooh hiireeree, tak ifrayeekka hamashay rhiya. Ikwiriyaatayaah barooh raatiyaana, "Seedna, aay danuub oon ootak hamashay akay isfarna? Barooh ooknaay danuub ikatiin han ifarooyeeba?" idiin.
Yasuuꞌa "Bariiyuuh whamashi bariiyeeh idanuub tari ifarooyi danuub naat han shaawaab kiiki. Ukwaasanaay akriri shaga bariiyooh rhameeni sabbii baruuh hamasheeyaabi. Aflaay masi bꞌeebuuyt, beeb aneeb diigwatiyaanaay ishaga ibakii nidꞌeet toonaati. Whawaad ikatiyihoob, gaal han shagaamtiib kaꞌadgiriya. Ani tuduniyaatiib ahayeeb ookiik, ani tuduniyaati nuur akati." idi.
Yasuuꞌa een ibhali idiit harꞌii, whaashiib siil tifiyaayt, eesiil whaashiib yhathik. Malya oothiin ootaki gwꞌadeeb idꞌi. Malya Yasuuꞌa bariiyooh dehaay, "Difaat, Silwaami hoodhiib ifiireek shigwidha!" idi. Silwaam aree "Diigwatamaab" miyaadi. Aflaay uutak idifaayt ifiireeh ishigwidh, aflaay rhee yꞌagar.
Curas de paralíticos e enfermos
Paralíticos caminharam, leprosos ficaram limpos e todo tipo de doença foi curada pelo toque e pela palavra de Jesus.
Tak bhadh iibriib bariiyooh dehaay eeyaayt whii ignaf malya, "Wꞌankwanaay, sinhasaheeb, harriiweek sinhasooyti adgirtiniya." idi.
Yasuuꞌa wꞌayooh ibriraayt ootaki kehii daasiyaayt, "Aharriiw, nhas akaa!" idi. Igidiyeesooh uubhadh ootakii giigiya aree baruuh inꞌir Malya Yasuuꞌa ootakii dehaay, "Toon toona tak han baasooyaa, laakiin ugarooyook ufagiiri rhisaa, aree Muusa sooyaab iiktiyeeb oomiyaaw firꞌa. Malya baraah baruuk tinꞌireet toona iikan iyadna." idi.
Daab gali amꞌadhdha tak bꞌadhiib bꞌee bariiyooh dehaay haay eeyaan. Yasuuꞌa bareeh wꞌiimaanoohna rhiyanihoob, ootak ugarbamaanaay dehaay, "Wꞌooruun baahasiika! Timaagnaytaak afoomaata." idi.
Malya whaggi kooja gwadi igarooyeehna dehaay, "Uun uutak kifuuri bhali hadiidiini!" idiin.
Yasuuꞌa baraah iikwinneet toona iktiinayt, "Naanhooy iginꞌaayeekna maagt teekwinna? Naan laamakaatu ‘Tumaagnaaytuuk afoomaatu’ uumiyaad laamakaabu han, tari ‘Yakaat difaa!’ uumiyaad laamakaabu? Laakiin Wꞌaadami Oor tubuuti kehii timaagnay haay afooyiiniyeet hadꞌaayi ibariyeet toona shaawti tikteenna." idi. Malya ootak ugarbamaanaay dehaay, "Yakaa! Umbꞌadhook yaksaat ugawook bayaa!" idi. Uutak yakiyaayt ugawooh ibi.
Beentooy tak wꞌayi adhaadh iiktiyeeb iifi. Baraah Yasuuꞌaab haay atehimiini sabab yhiriwna, baraah barooh raatiyaana, "Tusabtiib imheelti halaalu?" idiin.
Yasuuꞌa bareeyooh dehaay, "Gaal bareesookna argin iibriyeek, aree tusabtiib deelaay dhibiiniyeek, wꞌargin udeelaay sikwiit kiifirꞌa han? Wꞌaadami wꞌarginiika alyakaab kiiki han? Aflaay toosab tudaayiinaayti shaga halaal ikati." idi.
Malya Yasuuꞌa ootak infaraad, "Wꞌayook fidhidha." idi. Uutak wꞌayooh ifidhidh, shaawti wꞌayi itkwakw aree ooraaw tꞌiiteeb iki.
Siimooniit teham abaakiib barii nꞌaaliib bꞌaa tiifi. Baraah willa Yasuuꞌii dehaay batiiyooh whaal hadiidiyaan. Aflaay Yasuuꞌa tootakat idwil, wꞌayi yꞌabikaayt isingad. Malya yꞌabaaki tootakatii giigiyaan. Aree batuuh bareeyooh dehaay mꞌariit shagaamta.
Yasuuꞌa tak bhadh iibriib mheeliya
Tak bhadh iibriib Yasuuꞌii dehaay eeya. Whaashiib bariiyooh whii ignafaayt aree inꞌal, "Wꞌankwanaay, sinꞌiraheeb, harriiweek na tisinꞌiiraheeb!" idi.
Yasuuꞌa bariiyooh dehaay nꞌakwmanaayaayt wꞌayooh ootaki kehii daasiyaayt, "Aharriiw, nhas akaa!" idi. Igidiyeesooh uubhadh ootakii giigiya aree baruuh inꞌir.
Da gwadi eeyaana, amꞌadhdha tak fadhig da itfiyikneeb bariiyooh dehaay haay eeyaan. Laakiin udehayiit guudti sabbii, ishuumti adgirat iribnihoob, ootak ugawi mooy haay reewiyaan. Malya oogaw umooyii itilꞌaniit, been ootak madhamti kehii haayee oodehayi bitikii hoogisiyaan, aree Yasuuꞌi suurii daasiyaan. Yasuuꞌa wꞌiimaanoohna rhiyanihoob, ootak wꞌamꞌadhdhaanaay dehaay, "Wꞌooruun! Tumaagnaaytuuk afoomaati." idi.
Oontꞌa haggi kooja gwadi beentooy iistꞌana, baraah aakna kwakwooniin: "Uun baruuh naanhooy bak hadiidiini? Baruuh kifuuri bhali hadiidiini! Ukwaasana oodꞌooh baakaay, weer adgiriit tumaagnaay afooyiini aabu?" idiin.
Laakiin Yasuuꞌa baraah iginꞌaayeeb iikwinneet toona willa ikan, aree bareeyooh dehaay, "Naanhooy teen teena teekwinna? Naan laamakaatu: ootak wꞌamꞌadhdhaay dehaay, ‘Tumaagnaaytuuk afoomaatu,’ uumiyaad laamakaab han, hana ‘Yhaa! Yakaa! Tumadhamtook yaksaat giiga!’ uumiyaad, naan laamakaatu? Laakiin Wꞌaadami Oor tubuutiib tumaagnaay haay afooyiiniyi akrir ibariyeet toona kanaant asehariiw hookna." idi. Aflaay baruuh ootak wꞌamꞌadhdhaay dehaay, "Yhaa yakaa! Tumadhamtook yaksaat ugawook bayaa!" idi. Uutak igidiyeesooh baraah kassaah shibbee, tumadhamtooh yakisiyaayt giigiya. Kassaah uudehay ajjabamiyaana aree Ukwaasana yhamidna, "Beet toona tꞌiiteena door han rhaab kinki!" idiin.
Yasuuꞌa toosab mheeliya
Yasuuꞌa door weer Iyahuudi diini gaw shuumiya. Beentooy tak wꞌayi ayaab iiktiyi iifi. Ifariisi Yasuuꞌiib sabab haay atehimiineeb yhiriwna. Aflaay barooh igwꞌadna, toosab mheeliini han kamheeliya iishbibna! Yasuuꞌa Ootak wꞌayi ayaab iiktiyeenaay dehaay: "Oodehayi suurii gadaa!" idi.
Malya Yasuuꞌa bareeh raatiya, "Yhaana! Tusabtiib naan halaalu: tudaayiinaayti sakti han tumaagnaay? Shuuki madar daayiib han, shidhhanooyt?" idi. Laakiin baraah tim ikeen.
Een bareeyooh wꞌamꞌakuuraawwa wꞌamaagniyaawwa rhiyanihoob winneet lhamaa ishbib. Malya baruuh ootakii dehaay, "Wꞌayook fidhidha!" idi. Uutak wꞌayooh ifidhidh, aree wꞌayuuh daayiib inꞌir.
Yasuuꞌa Tak Bhadh Iibriib Mheeliya
Yasuuꞌa madiinaat gaanaatiib haayee, tak bhadh iibriib eeya. Uun uutak Yasuuꞌaab rhiyanihoob, ifiiree whaashi kehii dhibiyaayt, barooh inꞌal, "Wꞌankwanaay, sinhasaheeb, harriiweek baruuk sinhasooyti adgirtiniya." idi.
Yasuuꞌa wꞌayooh ibriraayt, ootaki kehii daasiyaayt, "Aharriiw, nhas akaa!" idi. Igidiyeesooh uubhadh ootakii giigiya aree baruuh inꞌir.
Daab gali amꞌadhdha tak madhamti kehii fiyakee haay eeyaan. Ootak oogaw haay shuumiit, Yasuuꞌii suurii daasiineet toona jarrabiyaan. Laakiin dehayiit guudti ishuumti adgirat iribnihoob, ootak ugawi mooy haay reewiyaan. Malya baruuh tumadhamtiyooh kehii haayee tukaaktii nꞌati hoogisiyaaniit, oodehayi bitik Yasuuꞌi suurii daasiyaan.
Yasuuꞌa wꞌiimaanoohna rhiyanihoob, "Yaa takay! Tumaagtuuk afoomaati." idi.
Ifariisiiwwa whaggi koojaawwa aakna kwoontiib badooyaana, "Uun ukifuuri bhali hadiidiini aabu? Ukwaasana oodꞌooh baakaay, weer adgiriit tumaagnaay afooyiini aabu?" idiin.
Yasuuꞌa baraah naan iikwinneeb iktiin aree raatiya, "Iginꞌiyookna naanhooy teen teena teekwinna? Naan laamakaatu: ‘Tumaagnaaytuuk afoomaati’ uumiyaad han ‘Yhaa! Asti gadaat, hiireera!’ uumiyaad? Laakiin ani Wꞌaadami Oor tubuuti kehii tumaagnaay haay afooyaniyeet hadꞌaayi abari." idi. Malya baruuh ootak wꞌamꞌadhdhaanaay dehaay, "Asti gadaa! Tumadhamtook yaksaat ugawook bayaa, andi hook" idi. Uutak igidiyeesooh bareeyooh suurii asti ingad. Toona tehooy bꞌaab iiktiyeet iyhaayt Ukwaasana hamdee ugawooh ibi.
Wꞌayi Adhaadh Iiktiyeeb Ootak
Sabt weet baruuh Iyahuudi diini gaw shuumiyaayt, oodehay allamiya. Been oomhiin wꞌayi umaykwa ayaab iiktiyi tak iifi. Ifariisiiwwa, whaggi koojaawwa Yasuuꞌaab haay atehimiini sabab yhiriwna. Aflaay baruuh ootak toosab mheeliini han kaamheeliya isdawilni igwꞌadna. Laakiin Yasuuꞌa baraah iikwinneet toona iktiin. Aree ootak wꞌayi ayaab iiktiyeenaay dehaay, "Yakaat kassooh oodehayi suurii asti gadaa!" idi. Aflaay uutak yakiyaayt, beentooy asti ingad.
Malya Yasuuꞌa bareeyooh dehaay, "Raati hookna andi! Tusabtiib naan halaalu: tudaayiinaayti sakti han tumaagnaay? Gaalnaayt shidhhanooyt han kwidhistiib?" idi.
Baruuh kasseeh bareeyooh nakamiya, malya ootakii dehaay, "Wꞌayook fidhidha!" idi. Uutak bak idꞌi, aree wꞌayuuh winneet inꞌir.
Yasuuꞌa Uroomaani daabti Shagaamana Mheeliini
Yasuuꞌa een ibhali kasseeh uudehay maaswee hadiidiyaayt faaysiyani harꞌii, baruuh Kafarnaahuum shuumiya. Dheeshi daabit Roomaani, winneet areeyi kishiya iifi. Baruuh lhiyaayt tooyat idwil. Uun udaabit, Yasuuꞌiib usakana imaasiwihoob, Yahuudi eegrima gwadib bariiyooh dehaay diigwatiya. Yasuuꞌa yꞌeetiit ukishiyaayooh mheeliyeet toona isehariw. Baraah Yasuuꞌii dehaay eeyaanihoob, barooh winneet inꞌalna, "Uun uutak sidik tushamaamtook astehaliini. Baruuh udehayoon areeyiini, aree udiini gawoon idꞌir." idiin. Aflaay Yasuuꞌa bareeyooh geeb giigiya.
Baruuh ugawii sagiib kiiki. Udaabit yꞌaraweeh dehaay diigwatiyaayt, "Wꞌankwanaay, ugawu shuumtiniyeet toona kaꞌastehalanayt, ugarooyook baagallabaa! Oon usabbii, ugarooyu barook haay anshiisheeb takwi hiiyyaab kaaki. Laakiin kalmaat diyaa, aree ukishiyaayu iinꞌir indi. Ani uknaayu hadꞌaayeeti whii eefi taku, anii whii han kajar eefeen. Oon barooh, ‘Difaa!’ andiyeek, indiif. Aree been barooh, ‘Mꞌaa!’ andiyeek, yꞌiini. Ukishiyaayu dehaay, ‘Toon sakaa!’ andiyeek, beet toona sakiini." idi.
Yasuuꞌa een ibhali imaasiwihoob, bariiyooh winneet ajjabamiya. Oodehay harꞌii sakiinnaayee dehaay nakamiyaayt, baruuh "Ani andi hookna, Israaꞌiileeb han bak tꞌiiti win iimaan miraab kaaki." idi. Malya aanda idiigwatamaab ugawii dehaay yꞌagarnihoob, ukishiya nꞌiraa imriin.
Been oomhiin tamna asimhay hawla jin lhasaab iiktiineet takat tiifi. Batuuh winneet agwaal ahaatu aree timifdheedh kaꞌadgirta. Yasuuꞌa batooh rhiyanihoob suurbeeti waliikiyaayt, "Yaa takatay! Tulhanaaytook hooy nꞌiraatuwii." idi. Malya batiiyooh kehii yꞌayeeh daasiyaayt, igidiyeesooh tutakat tifidhadh, aree Ukwaasana tehamid.
Yasuuꞌa Lha Tak Mheeliya
Sabti bꞌi Yasuuꞌa mꞌariit tamiyee dehaay Fariisi suurkina gaalnaay gaw shuumiya. Kassaah oomhiin iifiin Yasuuꞌaab akraab igwaarirna. Beentooy iragada aamaab iiktiini tak Yasuuꞌii suurii ingad. Yasuuꞌa Ifariisiiwwa whaggi koojaawwa raatiya, "Tusabtiib imheelti halaal han kiiki?" idi. Laakiin baraah naat diyaab kiikeen. Aflaay Yasuuꞌa ootak yꞌabik, aree mheeliyaayt giigisiya.
Tamin Da Bhadhiyay
Yasuuꞌa Algudus beeti sakee, Saamiraabwa Jaliilwa eebtik yhiduudee hasamiya. Gariyaat gaat shuumiyaneeb oodoor, bhadh iibriin tamin da barooh yꞌashishniit isgiini ingadna. Baraah tageega hissii, "Yaa Yasuuꞌa, Wꞌankwana! Arhamaa hoon!" idiin.
Yasuuꞌa bareeh rhiyihoob, "Giigaana! Igarooyeekna ifagiiriya rhisaana!" idi. Aree giigiinihoob, baraah inhasna.
Gaal bareesooh inꞌireet toona rhiyanihoob, tageegi hissii Ukwaasana hamdee yꞌagar. Baruuh Yasuuꞌiib iragadaayi suurii dhibiyaayt, barooh yhamid. Been uutak aree Saamiriibi.
Yasuuꞌa raatiya, "Aanda itamin kassaah inꞌirna? Aaraw yꞌashshadhig keeyaana? Oon barooh ugirbaab baakaay, weer yꞌeetiit, Ukwaasana yhammiid kiihaay han?" idi. Malya baruuh bariiyooh dehaay, "Yakaat giiga! Wꞌiimaanuuk mheeliya hook." idi.
Yasuuꞌa Tak Garbamaab Mheeliya
Been oodoori harꞌii, Yasuuꞌa Iyahuudi wꞌiidii dehaay Algudus ibi. Beentooy Algudus tꞌanooti dheefa dawil mhiin yami hoodh iifi. Yꞌaraami bhaliyee Beet Hisda iidna. Baruuh ay wawin gawaayee kwalaalu. Been oomhiin gwida lha dehay bꞌiina hamashayaawwa, garbamaawwa, amꞌadhdhaawwa iifiin. Doorka - doorka Wꞌankwanaay malak yꞌiit eeyam ifiidh. Aayam itfidhni harꞌii shuumi takka iibriyeet lhanaaytiika iinꞌir. Been oomhiin tak gaal mhay tamuunwa asimhay hawla lhaab iifi. Yasuuꞌa ootak been oomhiin bꞌee rhiyanihoob, oon whaaliib gwida doora dꞌiyaab iiktiyeet toona ikan. Malya "Mheelamtiib harriiwa han?" idi.
Uutak uulha igwibi, "Seedna, aayam itfadhiinihoob aneeb istoobiib gaal han kaabari. Ani tooy yꞌee, anii suurii weer gaal tikwiya." idi.
Yasuuꞌa bariiyooh dehaay, "Asti yakaa! Tumadhamtook yaksaat hiireera." idi. Uutak igidiyeesooh inꞌir aree tumadhamtooh yakisiyaayt hiireeriya.
Beet tuuna hooy tiiktiyeeb uumbꞌi aree sabtu.
Malya Yasuuꞌa Jaliiliib tiifiit Gaanaab beeti yꞌagar. Been oomhiin baruuh eeyam haab hooy ikwaaseebu. Aree beentooy Kafarnaahuumeeb wꞌooruuh lhaab iiktiyi hikwuumaati daabit iifi. Uutak Yasuuꞌa Yahuudaay Jaliil beeti yꞌaabu miyaad imaasiwihoob, barooh ibaayt Kafarnaahuum geeb giigiit wꞌooriyooh mheelti hooy yhariw. Wꞌooruuh tooyat diwlaa iifi.
Yasuuꞌa bariiyooh dehaay, "Mꞌuujisaatwa ajaayibwa rhi bitdiineek gaal han hookna aamani kiidi." idi.
Uutak Yasuuꞌii dehaay, "Seedna, wꞌooru baayaay geebu yakaa." idi.
Yasuuꞌa "Difaa, wꞌooruuk ikwaar indi!" idi.
Uutak Yasuuꞌiib ibhali aamaniyaayt giigiya. Baruuh usalaliib ugawooh bayee, ikishiyaayaah yꞌashishniit wꞌoor dhhaniib iiktiyeet toona usakana sooyaan. Baruuh ikishiyaayee dehaay, "Wꞌoor naadoor shabhamiya?" idi. Baraah "Iru nabhoob iiktiyihoob yꞌabaaki hooy imhiin." idiin.
Malya wꞌoori baaba been Yasuuꞌa bariiyooh dehaay, "Wꞌooruuk ikwaar indi." diyaab iiktiyeet toosꞌa tookna tiiktiyeet toona ikan. Aflaay baruuhwa indhiwaayaahwa aamaniyaan.
Yasuuꞌa Yahuudaay Jaliil beeti yꞌagareekka, tuun timꞌuujisa tꞌikwaaseet tumalya tiikti.
A mulher com fluxo de sangue
Uma mulher que sofria há doze anos tocou a orla do manto de Jesus e foi curada instantaneamente pela sua fé.
Been oodoor takat tamna malu hawlaayeeka booy tiitfaf eetaayt, bariiyooh harꞌii tingad. Malya bariiyooh whalakiit shinki tehita. Batuuh ugarooyooh dehaay, "Ani bariiyooh whalak ookna tehaniyeek iinꞌir andi." tidi.
Yasuuꞌa batiiyooh nakamiyaayt, "Tꞌootuun biihasiiki! Wꞌiimaanuuk mheeliya hook." idi. Tutakat shaawti been oodoor ookna tinꞌir.
Beentooy takat lhaat, tamna malu hawlaayeeka booy tiitfaf tiifi. Batuuh gwida hakiima mheelamta, aree tiibriyeenaaka kastooh hakiimaayi mheeliib giigsaa tiifi. Laakiin mheelamaat kitti, aree masi amaagkaat tiki. Tutakat Yasuuꞌiib usakana timaasiwihoob, oodehay harꞌiisii eetaayt, bariiyooh whalak tehita. Tutakat ugarooyooh dehaay, "Whalakooh tehaniyeek, iinꞌir andi." tidi. Igidiyeesooh uubooy hooy ingad. Tulhanaaytii tinꞌireet toona tikan, ugarooyooh han hissiita.
Aree beentooy takat lhaat, tamna malu hawlaayeeka booy tiitfaf tiifi. Tuun batuuh kasseeh imhallagaayeeh hakiimaayi mheeliib giigsaati. Laakiin gaal han adgiraa batooh sinꞌiraab kiiki. Tutakat Yasuuꞌi harꞌiisii eetaayt, bariiyooh whalakiit shinki tehita. Igidiyeesooh uubooy hooy ingad.
Yasuuꞌa raatiya, "Aaw tehiyaheeb?" idi. Tak fidhadhat iribhoob, Bitrus "Seednaay, uudehay kwalaleeka aree hook tuusameen." idi.
Laakiin Yasuuꞌa, "Aadami gaal tehiyaheeb, yꞌakrir hoosu ifirꞌaneet toona hissiyan." idi.
Malya tutakat tunaatuuh lawtaneet toona tikanihoob, idhee eetaayt, Yasuuꞌii suurii dhibta. Kassooh oodehayi suurii Yasuuꞌaab tehitaneet toona hadiidta. Aree kak igidiyeesooh tinꞌireet toona han hadiidta. Malya Yasuuꞌa tootakatii dehaay, "Yaa tꞌoorii, wꞌiimaanuuk mheeliya hooki, asgaa giigii!" idi.
Ressurreições
Jesus ressuscitou mortos — a filha de Jairo, o filho da viúva de Naim e Lázaro. Ele é Senhor sobre a morte.
Ayaat ootwa lhaat takatwa
Yasuuꞌa een ibhali diyee, daabit gaal dehaay eeyaayt bariiyooh whii ignaf, "Tꞌootu hallaay tiya. Laakiin mꞌaat wꞌayook kehii daasaa, batuuh shaawti iidhhan tindi." idi. Yasuuꞌa yakiyaayt bariiyooh geeb giigiya, aree ikwiriyaatayaah han iramna.
Yasuuꞌa udaabti gaw shuumiyanihoob, gwida dehay waawiinwa nawwaatiinwa imri. Yasuuꞌa oodehayii dehaay, "Baraak hooy giigaana, tꞌoor ayaat kitti diwtini." idi. Laakiin uudehay ifaayidna. Uudehay ugawii ifirꞌanihoob, baruuh shuumiyaayt tꞌooti ayi yꞌabikihoob, batuuh asti yakta.
Malya Iyahuudi udiini gawi suurkinaayee gaal iiktiib, Yaayiirus iidni tak eeya. Yasuuꞌaab rhiyanihoob, iragadaayi whii dhibiyaayt, winneet hooy yhariw, "Ootu dabaloot tooyat dawiltu. Anaahook awaya hoon! yꞌayeek kehii daasa, aflaay batuuh mheelamiit iidhhin tindi." idi. Aflaay Yasuuꞌa ootaki geeb giigiya. Gwida dehay barooh iramniit usalal yhiibna.
Baraah oodiini gawi mudiiri gaw eeyaanihoob, oodehay tꞌoor waawee, idraayee aree winneet aadhee rhiya. Malya Yasuuꞌa shuumiyaayt oodehayii dehaay, "Naanhooy waawteena idraateena? Tunisrik diwtini nuun, ayaat kitti." idi. Laakiin uudehay hooy ifaayidna. Tꞌooti faroowwa bariiyooh geeb iifiinwa iyhaayt, oodehay eeraw barraab isfarꞌa. Tꞌoor tiifiyeeb oomhiin shuumiya. Tꞌoor wꞌayi yꞌabikaayt, "Taaliita, kuumii!" idi. Aan ibhali "Tunisrik, yakii andi hook!" miyaadi. Tꞌoor willa tingad aree hiirareerta. Batuuh tamna malu hawla tiibri. Beet toona rhiyaan uudehay winneet ajjabamiyaan.
Yasuuꞌa "Oon udamaani dehay, aab asnadiir? Kak tꞌiiteeba? Baraah usuugiib eestꞌi ar, aree gali eeraw waliikeen tꞌiiteeba:
‘Yhaana! Biilhooyt dehookna nithꞌa,
aree lagat tiribna.
Nawwaattiit kaft dehookna kafna,
aree waawat tiribna.’ iyadna.
Yuuhanna Umoosana mꞌariit tamaab baakaay, tari haab gwꞌaab baakaay eeya. Aree baraakna, ‘Oon jin hooy eefeen’ tiyadna. Laakiin Wꞌaadami Oor tameewwa, gwꞌeewwa eeya, aree baraakna, ‘Uun tamana taku, haab gwꞌanaabu. Itilbaat tamanaawwa, baliib yꞌamag daawwa araweesamiini.’ tiyadna. Laakiin tifagarandi kasseeh yꞌareesooh laween." idi.
Yasuuꞌa Takat Afooya
Tak Fariisi Yasuuꞌii dehaay diraariit aduuma idꞌi. Aflaay Yasuuꞌa Ufariisi gaw shuumiyaayt, tumꞌariiti tamtii dehaay isꞌa. Tumadiinaatiib amaagt takat tiifi. Tuun tutakat Yasuuꞌa Ufariisi gawiib mꞌariit tamiini miyaad timaasiwihoob, shakwiintiit karoora haay eeta.
Malya Yaayiirus iidni tak Iyahuudi diini gawi suurkina eeya. Baruuh eeyaayt Yasuuꞌiib iragada suurii dhibiya, aree bariiyooh oogaw geeb iibiyeet toona winneet hooy yhariw. Baruuh tamna malu hawla tiibriit gaalalaayt ootuuh amshaat tiifi.
Yasuuꞌa usalaliib sakiyeet midda, uudehay igwida bariiyooh kehii tuusamiyaan.
Yasuuꞌa masi bhaliiyee, Yaayiirus, Iyahuudi diini gawi suurkina iiktiinaay ugawii gaal eeya. Baruuh "Tꞌootuuk tiya. Seednaab shaawti baagallabaa!" idi.
Yasuuꞌa een ibhali imaasiwihoob, Yaayiirusii dehaay, "Baarakwiya, aamana nuun! Tꞌootuuk iinꞌir tindi." idi.
Yasuuꞌa Yaayiirusiib oogaw iktimihoob, baruuh Bitruswa, Yuuhannaawwa, Yaaguubwa, tꞌooti baabaawwa, tꞌootiit deewwa nuun, gaal han geebooh shuumsaab kiiki. Beenhoob kassuuh uudehay tꞌoor waawiina aree nawwaatiin. Yasuuꞌa "Baawaawaana! Tꞌoor ayaat kitti, laakiin diwtini." idi.
Baraah bariiyooh ifaayidna. Tꞌoor ayaat tiiktiyeet toona kanaa iifiin. Laakiin Yasuuꞌa tꞌooti wꞌayi yꞌabikaayt "Tꞌootuunay, yakii!" idi. Tꞌoor ishuukaah dehaay yꞌagarna, igidiyeesooh yakta. Malya Yasuuꞌa batooh naat mꞌariit iyawneet toona bareeh sooya. Tꞌooti faru winneet ajjabamiyaan. Laakiin Yasuuꞌa beet toona tutikeet gaal han biisooyayneet toona bareeh sooya.
Yasuuꞌa Lꞌaasir Ishidhhan
Lꞌaasir iidni tak Beetaanyaay ikwiir lhaa iifi. Beetaanya Maryamwa tuukwa Maartaawwa hooy ikwiirneet gariyaati. Beet tishakwiin Yasuuꞌiib iragadaayi kehii tifif tidꞌiit malya tehamooteesooh tiysis batuuh Maryamtu. Uun Lꞌaasir uulhaab aree batiiyooh san iikti. Bariitaah taakwa Yasuuꞌii dehaay diigwatiyaaniit, "Wꞌankwanaay, wꞌaraawuuk wꞌareetiniyi lhaabi." idiin.
Yasuuꞌa toon imaasiwihoob, "Toon tulhanaay wꞌaakharuuh Lꞌaasiriit yat bitkaayeet toonaati. Tuun aree Ukwaasana matuun tiniiwi jillaay iikti tindi. Masi aree Ukwaasanaay Oor matuun imaar miyaadiib iikti tindi." idi.
Yasuuꞌa Maartaawwa tukwaatoohwa, Lꞌaasirwa areeya. Lꞌaasiriit tulhanaayti sakana imaasiwihoob, oomhiin baruuh iifiyeeb masi maloot yina hooy yhagit.
Malya ikwiriyaatayeeh dehaay, "Yakaana, Yahuudaab beeti nitꞌigir!" idi.
Baraah "Seedna, shalik doori hankaay uudehay beentooy rajamootiyook yhariwna. Baruuk beentooy mꞌageert niyaamtiniya han?" idiin.
Yasuuꞌa "Oombꞌi tamna maloot saaꞌaat hooy kiihaayna han? Aflaay oombꞌii hiireeriiniibka iigaf kiidi. Baruuh toon tuduniyaati nuur rhiini. Laakiin baruuh whawaad hiireeriiniyihoob, thibintuuyt eetgiif." idi.
Malya een ibhali idiit harꞌii, masi "Wꞌaraawuun Lꞌaasir nꞌariitiib dhibaabu, laakiin ani difiit isibꞌir andi." idi.
Ikwiriyaatayaah igwibiina, "Wꞌankwanaay, baruuh diwiiniyeek, shabhami indi." idiin. Yasuuꞌa Lꞌaasiriit tooyat mitiyaaya. Laakiin baraah sidkiit nꞌari hiisiyaan.
Aflaay malya Yasuuꞌa oosdik ugwꞌagwaab bareeh sooya, "Lꞌaasir ayaabu,
Domínio sobre a natureza
Jesus acalmou a tempestade, andou sobre as águas e multiplicou pães. A natureza obedece à voz do seu Criador.
Yasuuꞌa ubaraam isingad
Malya tufalluuka yꞌam, ikwiriyaatayaah han iramna. Gaalhoob akra baraam oobhariib eeya. Aflaay uumooj tufalluuka oomamiya. Laakiin Yasuuꞌa diwi. Ikwiriyaatay giigiyaaniit barooh isibꞌarna, "Wꞌankwana, shidhhana hoon! Aayam iyaay hoon iyadna." idiin.
Yasuuꞌa igwibi, "Baraak ishalik iimaani, naanhooy tirkwiina?" idi. Malya asti yakiyaayt ubaraamwa oomoojwa idaanin shaawti baraah ingadna.
Uudehay ajjabamiyaaniit raatiyaana, "Uun kak eefi taku? Ubaraamwa uumoojwa han barooh isnaakiirna!" idiin.
Whawaad idwilihoob aree, ikwiriyaatayaah bariiyooh dehaay eeyaaniit, "Uun whaash mingaayamaabu, aree hawaad yꞌaabi. Oodehay fidnaab giigsaa, shaawti indhiwaayeehna bayiit mꞌariitoohna baꞌiidlibna." idiin.
Yasuuꞌa "Uudehay giigtiib shanha kiikeen. Baraak bareeh mꞌariit tamsaana." idi.
Baraah "Hinin tooy ay hadhiiwwa maloot aashooyaytwa nibari." idiin.
Yasuuꞌa "Bareeh tooy haay mꞌaanaheeb." idi. Yasuuꞌa oodehay oosiyaami kehii isoosꞌa. Malya yhadhi yꞌaywa yꞌaashu imaloowwa iyhaayt teebri nakamiya. Ukwaasana yhamid aree yhadhi katꞌiya. Malya bareeh ikwiriyaatay nuunisiya, ikwiriyaatay aree oodehay yhiin. Uudehay kassaah gabiyaaneeb ookiik tamiyaan. Aree ikwiriyaatay yhadhiyi firkakeet toodhikw tamna malu biileeb hooy toobiyaan. Been uudehay timꞌari tamiyaan ay alfa da iiktiin. Mꞌatwa nisrikaabwa han geeb iifiin.
Fajir karuumaab Yasuuꞌa iyami kehii hiireeree bareeyooh dehaay eeya.
Yasuuꞌa ikwiriyaatayeeh marooh waliikiyaayt, "Ani oon oodehay dehaay nꞌakwmanaayani, baraah suur akay mhayt yiina geebu ibariina aree naat han tamaab kiikeen. Ani bareeh hargwaa giigsi kaadi tari baraah usalaliib dhibi iyadna." idi. Ikwiriyaatayaah igwibiina, "Oon umingaayiib oodehay kassooh mheen hadhi naad nimeer?" idiin. Yasuuꞌa bareeh raatiya, "Naaka hadhi tibariina?" idi. Baraah "Asarama hadhiiwwa shalik dadis aashoowwa nibari." idiin. Yasuuꞌa uudehay whaashiib nꞌati eesitꞌaneet toona sooya. Malya baruuh yhadhi yꞌasaramaawwa yꞌaashoowwa iyhaayt, Ukwaasana yhamidayt harꞌii, bareeh katꞌiya. Malya ikwiriyaatayeeh yhii, aree ikwiriyaatay oodehay yhiin. Baraah kassaah tamiyaaniit gabiyaan. Malya ikwiriyaatay biileeb yakisiyaaniit toodhikw yhadhiyi firkak asarama biili hooy toobiyaan. Timꞌari tamiyaan uudehay fadhig alfa iiktiina, aree mꞌatwa nisrikaabwa geeb iifiin.
Udiini gawiib titilba
Yasuuꞌaawwa ikwiriyaatayaahwa Kafarnaahuum iktimnihoob, udiini gawi tilbaat lakkatana Bitrusii dehaay eeyaaniit, "Ukoojaayuukna, Ukwaasanaay ugawiit tilba kwansi han?" idiin.
Bitrus "Awooh titilba kwansi." idi.
Bitrus oogaw shuumiyanihoob, Yasuuꞌa hankaab hadiidiya, "Siimoon, naan tinkwiina? Tubuuti hadꞌa tuwaajibwa titilbaawwa aay iyayna? Yꞌareesoohna iyayna han weer dehayii iyayna?" idi.
Bitrus "Weer dehayii iyayna." idi.
Yasuuꞌa bariiyooh dehaay, "Aflaay yꞌaraahna titilba kiifirꞌana. Laakiin aflaay bareeh nisehasiyeet toona kinhariw. Baruuk oobhar bayaat sinnaarook gidaa! Wꞌaashu hankaab tꞌanbiikeeb ooyaf haaksaa aree fadhig girsha imaar tindiya. Eegrish yaksaat bareeh hiiyya, aniit titilbaawwa tubariitookwa haay kwisiya." idi Yasuuꞌa.
Yasuuꞌa tiini hindi yꞌat
Fajir karuumaab Yasuuꞌa tumadiina agaree yharagw. Usalaliib tiini hindi rhiya. Been whindi laakiin teerat nuun naat han hooy miraab kiiki. Malya whindii dehaay, "Shaawti door han firaay baayaksaa!" idi. Whindi willa balamiya.
Ikwiriyaatay toon toona rhiyaanihoob, ajjabamiyaaniit, "Utiini hindi kak willa bak balamiya?" idiin.
Yasuuꞌa igwibi, "Ani oosdik andi hookna: iimaan tibariineek, malya aree eetehak bitbariineek, baraak tidꞌaneet tuuna oon ootiini hindii dehaay tikeet toonaati dꞌuuy oobhaat kiiki. Laakiin baraak oon oorbaay dehaay, ‘Difaat oon ubhariib dhibaa!’ tiyadneek, baruuh saki indi. Baraak aamanteeneek, siileelteenihoob raatteeneet toona kastooh imaar tiyadna." idi.
Gaalhoob akra baraam eeya, aree uumooj tufalluuka shuumiya, aflaay tufalluuka yam mateebt tidwil. Yasuuꞌa tufalluukaati niiwaay diwi. Girmaay whiiti kehii bꞌi. Ikwiriyaatay barooh isibꞌarna, "Seedna! Seedna! Aayam iyayna hoon, imshibib hoon kitdiya han?" idiin.
Yasuuꞌa ibꞌaraayt ubaraam idnin, oomoojii dehaay, "Tim akaa! Baarigasaa!" idi. Malya ubaraam ingad, aayam aree dhibiyaan. Yasuuꞌa ikwiriyaatayee dehaay, "Naanhooy tireekwna? Masi iimaan kitbariina han?" idi.
Baraah winneet irkwiiniit taktak raatiyaana, "Uun aabu? Ubaraamwa aayamwa han barooh isnaakiirna." idiin.
Whawaad iidwilihoob, ikwiriyaatay Yasuuꞌii dehaay eeyaaniit, "Uun baruuh mingaayami haashu, hawaad aree yꞌaabu. Oodehay fidnaab gagiigsa, aflaay baraah tigariyaawwa ikwayaay eefeent tidirꞌaawwa bayiit tameeneena dilibti iyaynee dehaay giigsa." idiin.
Laakiin Yasuuꞌa bareeyooh dehaay, "Baraakna mꞌariit hiina, tamsaana!" idi.
Baraah bariiyooh dehaay, "Diftiit, malu shi diinaree hadhiib dilibtiit bareeh tamsinay han?" idiin.
Yasuuꞌa bareeh raatiya, "Naaka hadhi tibariina? Giigaanaat shibibna." idi.
Ilinguumiya ishbibniit, "Ay hadhiiwwa malu aashoowwa nibari." idiin.
Malya Yasuuꞌa bareeyooh dehaay, "Oodehay jamꞌaab-jamꞌaab kwaasnaat oosiyaam isootaayi kehii soosꞌana!" idi. Aflaay baraah ay tamuun ay tamuun, sheeb - sheeb ikeeniit isꞌana. Yasuuꞌa yhadhi yꞌaywa, yꞌaashu imaloowwa yakisiya, teebri ishbibaayt baarakiya. Malya yhadhi irfit idꞌiit bareeh yhii. Oodehayii dehaay yꞌadhidhneet toona hooy yhariw. Masi yꞌaashu imalu han kasseeh bareeyooh dehaay yꞌadhidh. Kassaah uudehay tamiyaaniit gabiyaan. Malya ikwiriyaatay yhadhiiwwa yꞌaashooyi gaafiiwwa tamna malu biileeb itibniit yakisiyaan. Yhadhi tamiyaan eendi adad ay alfa iiktiin.
Yasuuꞌa ikwiriyaatay iyami bitik kak akraab imgwarhaneeb rhiya. Baraah winneet gallabamiyaana aree ubaraam whiireer yhabi. Yasuuꞌa karuumaab iyami kehii hiireeree bareeyooh dehaay eeya. Bareeh hasamtiib idwil. Laakiin ikwiriyaatay Yasuuꞌa oobhari kehii hiireeriyeet toona rhiyaanihoob, barooh whiinaayt hiisiyaaniit aadhiyaan. Kassaah barooh rhiyaanihoob winneet irkwiin.
Willa baruuh bareeyooh dehaay, "Ariknaa! Uun aneebu. Baarakwiina!" idi. Yasuuꞌa bareeyooh geeb tufalluuka yꞌamihoob, ubaraam ingad. Baraah han winneet ajjabamiyaan.
Yasuuꞌa fadhig alfa dehay mꞌariit tamisiya
Beenhoob gwida dehay wari Yasuuꞌii dehaay immarraayna. Baraah mꞌariit tamiineet kiibariin akay, Yasuuꞌa ikwiriyaatayeeh waliikiyaayt: "Ani oon oodehayii dehaay nꞌakw manaayani. Baraah mhayt yiinaateeka anii geeb eefeena, aree tameeneena han kiibariin. Ani bareeh hargwaa igawaayeeh astoobiyeek, gali bareesooh sagi mhiinii yꞌaaba akay, usalaliib dhadhibi iyadna." idi.
Ikwiriyaatay "Laakiin oon umingaayiib oodehay kasseeh gabseen hadhi naad nimeer?" idiin.
Yasuuꞌa raatiya, "Baraak naaka hadhi tibariina?" idi.
Baraah "Hinin asarama hadhi nibari." idiin.
Yasuuꞌa oodehay whaashi kehii thathameeneet toona sooya. Yhadhi yꞌasarama yakisiya. Ukwaasana yhamidaayt yhadhi ikitꞌa. Yhadhi ikwiriyaatay nuuniyaayt oodehay iyawneet toona sooya. Baraah han bak sakiyaan. Ikwiriyaatay masi shalik aashoob dadis iibriin. Yasuuꞌa bareeyooh dehaay idehar, aree ikwiriyaatay yꞌaashu oodehay iyawneet toona sooya. Uudehay tamiyaani gabiyaan. Malyaab timꞌariitii mhiyaab ifirkak yakisiyaaniit asarama biileeb hooy toobiyaan. Uudehay fadhig alfa iiktiin. Malya Yasuuꞌa bareeh giigisiya.
Yasuuꞌa Tiini hindi yꞌat
Tulhaytooh baraah Beetaanyaay giigiinihoob, Yasuuꞌa yharagw. Yasuuꞌa sagi mhiinii tiini hindiit raat rhiya. Mꞌariit hooy amarri miyaadiib dehaay eeya. Laakiin iktimihoob, teerat nuun naat han miraab kiiki. Whindi mibsheekwtiyooh door kiiki akay naat han miraab kiiki. Yasuuꞌa whindii dehaay, "Door han gaal masi samaraat hook tami kiidi!" idiit whindi yꞌat. Ikwiriyaatay barooh een bareeh diyee imaasiwna.
Utiini hindi balamiya
Fajir tooyin tooraaw baraah hasamee, been ootiini hindi kassuuh igadamaayee balamaa rhiyaan. Bitrus Yasuuꞌiib ibhali shꞌaa iifi, malya "Seednaay, shibiba! Utiini hindi baruuk tꞌateeb balamiya." idi.
Yasuuꞌa "Ukwaasana aamanaana! Oosdik andi hookna, Ukwaasana aamanteeneek aree uginꞌii bitꞌeetehakayneek, oon oorba ‘Fitakaat ubhariib dhibaa!’ tiyadneek, beet toona sakiini. Oon usabbii, ani andi hookna, kastooh baraakna siileeliit tehariwneet toona aamanaana timeerna. Aree bareetookna iikti tindi. Baraakna siileelteenihoob, naat gaat taki kehii tibariineek afooyaana. Aflaay been baabuukna tibreeteeb eefi han tumaagtookna afooyiini.
Yasuuꞌa Ikwiriyaatay Yꞌawwaleeb Waliikiini
Yint gaat Yasuuꞌa Ganeesaareeteeb iyami dar ingid. Uudehay Ukwaasanaay ibhali isniikarni jillaay barooh kwalala. Yasuuꞌa iyami ginnaal yꞌaashoob aabki ishaab iiktiineet maloot falluuka rhiya. Baraah tishabakaateehna iishgwadhna. Yasuuꞌa falluukaat gaat Siimooniit tiiktiinaati kehii ingadaayt, "Tufalluukaatook iyami ginnaalii diiseet suurbeeti gwishisha!" idi. Malya Yasuuꞌa tufalluukaatiib isꞌat oodehay allamiya.
Baruuh ibhaliyeeh faayisiyanihoob, Siimoonii dehaay, "Tufalluukaatook iyameet tehooy beeti gwishisha, aree tishabakaateekna iyameeb gidnaat aashoob aabikna!" idi.
Siimoon igwibi, "Wꞌankwanaay, oon oomhiin whawaad kassooh akraab shagaamna, aashooyaayt han abkaab kinki. Laakiin baruuk bak tindiyayt, tishabaka iigid andi." idi.
Baraah tishabakaateehna iyameeb igidnihoob, tishabakaataahna shatatamiyaaneeb hadiit gwida aashoob yꞌaabikna. Aflaay baraah tufalluuka tooraawtiib iifiin yꞌaraweehna beeti ashshariyaaniit, yꞌeetiit bareeh eeshtiimneet toona hooy yhariwna. Aree baraah eeyaaniit, mhalliteehna tishabaka aayam miyaay yhiriwneeb hadiit winneet itibna.
Siimoon Bitrus toon toona rhiyanihoob, Yasuuꞌiib iragadaayi whii dhibiyaayt, "Wꞌankwanaayu, hoosu giiga! Ani amaag taku." idi. Siimoon Bitruswa, yꞌaashoob aabki igeeb iifiin kassaahwa baliin yꞌaabkaab iiktiineet yꞌaashooyeet guudtiib winneet ajjabamiyaan. Aree Yaaguubwa Yuuhanna Sabadi arwa, Siimooniib ishariikiiwwa han winneet ajjabamiyaan.
Malya Yasuuꞌa Siimoonii dehaay, "Baarakwiya! Amseenee fidnaab dehayi aabki iikti tindiya." idi. Aflaay tifalluukaateehna iyami ginnaal beeti sookwiyaaniit, naatka ingadni idꞌiiniit barooh iramna.
Yasuuꞌa Ubaraam Isingad
Yint gaat Yasuuꞌa ikwiriyaatayeeh dehaay, "Yakaana, ubhari dar ooraaw niibi!" idi. Aflaay baraah falluukaat yꞌamniit hantaayaan. Baraah ubhariib iibaabee, Yasuuꞌa diwiya. Ubhariib gaalhoob akra baraam eeya. Tufalluuka yam titab, aree baraah akra bidhꞌiib daayaan.
Ikwiriyaatay giigiyaaniit barooh isibꞌarna. Baraah "Seedna! Seedna! Aayam miyaayoon yhariwna." idiin.
Yasuuꞌa yakiyaayt ubaraamwa, eeyam yꞌitrigiswa idnin. Ubaraam ingad aree naatka hayaayta. Malya Yasuuꞌa ikwiriyaatayeeh raatiya, "Wꞌiimaanuukna keeya?" idi.
Ikwiriyaatay winneet irkwiiniit ajjabamiyaan. Baraah gaal ooraaw raatiyaana, "Uun aabu? Ubaraamwa eeyamwa danniin, aree baraah barooh isnaakirna." idiin.
Yasuuꞌa Ubaraam Isingad
Yint gaat Yasuuꞌa ikwiriyaatayeeh dehaay, "Yakaana, ubhari dar ooraaw niibi!" idi. Aflaay baraah falluukaat yꞌamniit hantaayaan. Baraah ubhariib iibaabee, Yasuuꞌa diwiya. Ubhariib gaalhoob akra baraam eeya. Tufalluuka yam titab, aree baraah akra bidhꞌiib daayaan.
Ikwiriyaatay giigiyaaniit barooh isibꞌarna. Baraah "Seedna! Seedna! Aayam miyaayoon yhariwna." idiin.
Yasuuꞌa yakiyaayt ubaraamwa, eeyam yꞌitrigiswa idnin. Ubaraam ingad aree naatka hayaayta. Malya Yasuuꞌa ikwiriyaatayeeh raatiya, "Wꞌiimaanuukna keeya?" idi.
Ikwiriyaatay winneet irkwiiniit ajjabamiyaan. Baraah gaal ooraaw raatiyaana, "Uun aabu? Ubaraamwa eeyamwa danniin, aree baraah barooh isnaakirna." idiin.
Yasuuꞌa Jin Abkaab Iiktiini Tak Mheeliya
Jaraasiin iidni haash Jaliili fiireeb eefeeb iyami dar ooraaw iktimna.
Tehimni tidwilihoob, itamna malu Yasuuꞌii dehaay eeyaaniit, "Hinin mingaayama mhiiniib neefi akay, oodehay igwidaab mꞌariitwa fiinaniiti mhiinwa imeerni jillaay tigariya yhadabeeb eefeentwa tidirꞌaawwa beeti giigsa." idiin.
Yasuuꞌa bareeyooh dehaay, "Baraakna bareeh tameeneet mꞌari hiina." idi.
Baraah igwibiina, "Ay hadhiiwwa, malu aashoowwa eebhat nibari. Oosuug dehaay giigiit, kassooh oodehayii dehaay mꞌariit niidlib bindiyeek!" idiin. Been oomhiin ay alfa da iifiin.
Laakiin Yasuuꞌa ikwiriyaatayeeh dehaay, "Oodehay ay tamuun yꞌeen jamꞌaabka kwaasnaat soosꞌana." idi. Ikwiriyaatay beet toona sakiyaana, aree kasseeh isoosꞌana. Yasuuꞌa yhadhi yꞌaywa, yꞌaashu imaloowwa yakisiyaayt teebri ishbib. Yhadhi baarakiyaayt irfit. Malya bareeh ikwiriyaatay yhiit, oodehayii dehaay suurseeneet toona isehariw. Kassaah uudehay hooy tamiyaaniit gabiyaan. Malya ikwiriyaatay ugaafii tamna malu biili itibniit yakisiyaan.
Yasuuꞌa Eeyam Haab Ikwaas
Tooyin tumhaya Jaliili haashiib Gaanaay doob iiktiin. Yasuuꞌiit tuundi beentooy tiifi. Yasuuꞌaawwa ikwiriyaatayaahwa han been idoobaani mhiin waliikamaa iifiin. Wha faayamiyanihoob, Yasuuꞌiit tuundi bariiyooh dehaay, "Baraah shaawti haab kiibariin." tidi.
Yasuuꞌa "Yaa takatay, naan tindii, aniib uudoor masi yꞌaab kiiki." idi.
Yasuuꞌiit tuundi ishagaamanaayee dehaay, "Baruuh indiyeetookna toonaaka dꞌiina." tidi.
Iyahuudi diini tahaaraatiit aada iibriina, beet toonaatii dehaay aree asagwir aweeyi diwan yam toobamaab iifiin. Diwaanka sheeb litraab yꞌibik.
Yasuuꞌa ishagaamanaayee dehaay, "Eedwan yam toobaana." idi. Aflaay baraah eedwan iyafa ookiik yam itibna.
Malya baruuh bareeh sooya, "Oontꞌa shalik yam hooy ahaanaat ootak tꞌaduuma abkaab hiina." idi.
Baraah han beet toona idꞌiin. Oontꞌa aayam haab ikeena, aree uutak tꞌaduuma abkaab eeyam dꞌamisiya. Baruuh wha keeya mhiinii eeyaneeb kiikan, laakiin ishagaamana beet toona iktiinna. Malya udooba waliikiyaayt, "Uudehay gaalka wha udaayiib hankaab iyawna, aree malya yꞌamna gwꞌeetiit eelꞌanihoob wha iyameemaab iyawna. Laakiin baruuk oontꞌa hadiit wha udaayiib tidibiya." idi.
Yasuuꞌa teen timꞌuujisa Jaliileeb Gaanaay ikwaas. Beentooy umatuunooh rhisiya, aree ikwiriyaatayaah barooh haay aamaniyaan.
Yasuuꞌa een ibhali Fiilibusi jarrabti haay yhiriw nuun, kak weeri iideeb suur akay iktiin.
Fiilibus "Gaalka hadhiyi firkaak marriyee dehaay, malu shi diinaar han kamhiyaan." idi.
Bariiyeeh ikwiriyaatayee weer Siimoon Bitrusi san Andaraawoos hadiidiya, "Tooy oor gaal ay shaꞌiiri hadhiiwwa malu aashoob dadiswa ibariib eefi. Laakiin een oodehay kasseeh sidik kamhiyaan." idi.
Yasuuꞌa ikwiriyaatayee dehaay, "Oodehay nꞌati soosꞌana." idi. Been oomhiin gwida siyaam iifi, aree uudehay kassaah nꞌati isꞌana. Baraah ay alfa da iiktiin. Yasuuꞌa yhadhi yakisiyaayt Ukwaasana yhamid, malya oodehay beentooy iifiinaay dehaay yhadhi yꞌaadhidh. Yꞌaashu han bak iweer, uudehay kassaah aree gabiyaaneeb ookiik tamiyaan.
Kassaah gabiyaanihoob, baruuh ikwiriyaatayeeh dehaay, "Toodhikw dibilna, naat han bangiideet toonaati." idi. Aflaay toodhikw kastooh ishaawawiiniit, tamna malu biileeb hooy toobiyaan. Tuun tuudhikw kastuuh aree ishaꞌiiri yꞌay hadhi uudehay tamiyaaniit isimhaneeba.
Ikwiriyaatay ay tari asagwir kiiloomitra isiignihoob, Yasuuꞌaab iyami kehii hiireeree tufalluuka diwlee rhiyaani door irkwiin. Laakiin Yasuuꞌa bareeyooh dehaay, "Baarakwiina, uun aneebu!" idi. Baraah barooh tufalluuka reewistiib yhariwna, aree tufalluuka willa baraah iibiineeb oodar tiktim.
Yasuuꞌa Asarama Kwiriyaatayee Dehaay Lawiya
Oonaay harꞌii, Yasuuꞌa ikwiriyaatayeeh Tiibaaryaasi bhariib masi weer door dehaay lawiya. Tuun bak tiikti. Siimoon Bitruswa, Toomaas Utiita atoosmaabwa, Naatnaaꞌeel Jaliileeb teefeet Gaanaay iiktiibwa, Sabadi arwa, wari Yasuuꞌi kwiriyaatay maloobwa kassaah hiddaab iifiin. Siimoon Bitrus irawee dehaay, "Ani diftiit aashoob ibik andi." idi. Baraah "Geebook niibi niyad." idiin. Aflaay baraah bariiyooh geeb tufalluuka yꞌamniit giigiyaan. Laakiin been whawaad kassooh aashoob naat han aabkaab kiikeen.
Fajir tuuyin talawtiyihoob, Yasuuꞌa iyami dariib ingad. Laakiin ikwiriyaatay baruuh Yasuuꞌaab iiktiyeet toona kanaab kiikeen.
Malya Yasuuꞌa bareeh raatiya, "Yaa yhankwila, naat aabkaab kitteena han?" idi.
Baraah "Naat han aabkaab kinki." idiin.
Baruuh bareeyooh dehaay, "Tushabakaatookna tufalluukaati maygwadii dehaay gidnaa, naat ibik tiyadna." idi. Aflaay baraah tushabaka igidnihoob, gwida aashoob titabayt oosaakw adgiraab kiikeen.
Ukwiriyaataayi Yasuuꞌa areeyaab iiktiyeeb Bitrusii dehaay, "Uun baruuh Wꞌankwana ikati!" idi. Siimoon Bitrus Wꞌankwana oomiyaad imaasiwihoob, whalak hoosooh firꞌaab iiktiyeeb ikwaayt iyameeb dhibiya. Ikwiriyaatay aaraw tufalluukaatiib iyami ginnaal beeti eeyaana, tushabaka aashoob tabaa sookwiin. Baraah uginnaalii sagiib kiikeenayt, sheeb mitraab eetiit masaafa whaashii iifiin. Baraah ubhari ginnaal tikwiyaanihoob, balooliint dhhaliiti kehii aashoobwa hadhiibwa daasama rhiyaan.
Malya Yasuuꞌa bareeyooh dehaay, "Oontꞌa aabkaab tikatiineeb aashoob galib haay mꞌaana." idi.
Siimoon Bitrus tufalluuka reewiyaayt, tushabaka barraab irhif. Batuuh wawin aashu ataabtu, sheebwa ay tamuunwa mhay aashoob iiktiin. Laakiin yꞌaashu gwidaab iiktiineek han tushabaka masi shatatamaat kitti.
Libertações
Jesus expulsou demônios com autoridade. Os espíritos impuros não resistiam à sua palavra e saíam imediatamente.
Yasuuꞌa Roomaani daabti kishiya mheeliya
Yasuuꞌa Kafarnaahuum shuumiyanihoob, Roomaani daabit dehaay eeyaayt, shamaamt hooy yhariw, "Seedna, ukishiyaayu amꞌadhdhaabu, ugawiib bꞌiini aree winneet lhaabu." idi. Yasuuꞌa bariiyooh dehaay, "Ani diftiit barooh mheeli andi." idi.
Udaabit "Wꞌankwanaay, baruuk aniib ugawiib ishuumti kaꞌastehalan. Laakiin gaat kalma diyaa, shaawti ukishiyaayu iinꞌir indi. Ani uknaayu hadꞌaayeeti whii shagaamani taku, aree kajar anii whii shagaameen abari. Oon barooh sooyiit ‘Difaa!’ andiyeek indiif. Been barooh aree ‘Mꞌaa’ andiyeek yꞌiini. Ukishiyaayu ‘Toon sakaa!’ andiyeek sakiini." idi.
Yasuuꞌa een ibhali imaasiwihoob, ajjabamiyaayt barooh iitram oodehayii dehaay, "Oosdik andi hookna: Israaꞌiileeb bak win iimaan iibriib gaal han miraab kaaki. Toon toona aree andi hookna: gwida dehay uyintalawiiwwa uyindhibiiwwa yꞌi iyadna, Ibraahiimi geeb iistꞌa iyadna, Isehaagi geebwa, Yaaguubi geebwa, tibreeteet hadꞌaayeetiib firhiib iistꞌa iyadna. Laakiin tehadꞌaayi shuumeen ikatiin baliin barraab uthibniib ituugid iyadna. Beentooy waawi iyadna, lhamiit tikwileeteehna ishuuthithꞌa iyadna." idi.
Malya Yasuuꞌa udaabtii dehaay, "Difaa! Oontꞌaaneet baruuk aamantaneet tunaatiit iikti tindi." idi. Aree ukishiyaayuuh beet toosꞌa tookna inꞌir.
Yasuuꞌa malu da jin hooy ifrꞌa
Baruuh oobhar oodar ooraaw Gadareeni haash iktimihoob, malu da jin hooy iifiineeb miimashaayee yꞌee barooh imriin. Baraah winneet ribshaayt iikwsiinayt, uudehay gaal han been usalalii kasakiyaan. Aanda aadhiyaaniit, "Ukwaasanaay Oor, naan hoon harriiwa? Uudoor wꞌattiyoodiyaab yꞌaab baakaay tooy hini lhastii dehaay eeta han?" idiin.
Bareesooh sagi mhiin gwida khansir ikwiir iifiin. Aajin Yasuuꞌaab inꞌalna, "Iifirꞌa hoon tindiyeek, ikhansir shuumsaa hoon." idiin.
Baruuh bareeyooh dehaay, "Difna" idi. Aajin ifirꞌaniit ikhansireeb shuumiyaan. Ikhansir kassaah oorbaay nꞌati dhaabiyaaniit ubhariib dhibiyaan, malya iiyaan. Baliin ikhansir iishkwiin aanda dhaabiyaaniit tumadiina ibeen. Kastooh toona aree oodehay sooyaan. Aajin hooy iifiineeb eenda han naan dehaay tikayeeb kastooh oodehay sooyaan. Malya kastuuh tumadiinaati dehay ifirꞌaniit Yasuuꞌi ashuush yhariwna. Aree barooh rhiyaanihoob, whaashiisoohna giigiiniyeet toona bariiyooh yhariwna.
Yasuuꞌa tak gilluusiib mheeliya
Baraah itfirꞌanihoob, tak jin hooy iifiineeb gilluusiib bariiyooh dehaay haay eeyaan. Yasuuꞌa ootak eejin hooy ifirꞌihoob, shaawti hadiidiya. Uudehay igwida winneet ajjabamiyaaniit, "Israaꞌiileeb toon toona tꞌiiteet door han akaat kitti." idiin.
Yasuuꞌaawwa Baꞌalsabuulwa
Malya baraah tak jin hooy iifiineeb hamashaywa gilluusiibwa iiktiib Yasuuꞌii dehaay haay eeyaan. Yasuuꞌa barooh mheeliya, shaawti uutak inꞌir, hadiidiya, aree rhiya.
Yasuuꞌa been whaash hooy giigiyaayt, Tiirooswa Siidoonwa haash ibi. Takat Kanꞌaaniit been whaashii waawee bariiyooh dehaay eetaayt, "Wꞌankwana Daawidi Oor, anii dehaay nꞌakwmanaaya. Tꞌootu winneet amag jin hooy eefeen." tidi.
Yasuuꞌa kalmaat han diyaab kiiki. Aflaay ikwiriyaatayaah dehaay eeyaaniit, "Tootakat giigsa, harꞌoon waawi tindi." idiin. Yasuuꞌa "Ani Israaꞌiileeb wꞌargin ukwidhaab oobhaanaay dehaay diigwatamaabu." idi. Tutakat eetaayt bariiyooh suurii tignaf, "Wꞌankwana, awayaheeb!" tidi. Yasuuꞌa "Inisrikaayi hadhi yaksiit iyasee dehaay uugaad daayiina kitti." idi. Batuuh "Awooh Wꞌankwanaay, laakiin aayas han yꞌankwanaayeet taawlaatii dhibeen ifirkak tameen." tidi. Malya Yasuuꞌa "Yhayi! Batuuk akra iimaan tibarii! Batuuk harriiweet tuuna iikti tindi." idi. Aflaay beet toosꞌa tookna tꞌootuuh mheelamta.
Yasuuꞌa oor jin hooy iifiineeb mheeliya
Baraah oodehay igwidaab beeti eeyaanihoob, tak gaal Yasuuꞌaab idwilaayt bariiyooh suurii ignaf. Uutak "Wꞌankwanaay, wꞌooru dehaay nꞌakwmanaaya, barooh jin abkaaba aree winneet gwirhaayeeb eefi. Baruuh diimaab tunꞌeetiib dhibiini tari iyameeb dhibiini. Barooh ikwiriyaatayeek dehaay haay yꞌan, laakiin barooh imheelti adgiraab kiikeen." idi.
Yasuuꞌa "Baraak wꞌiimaan baabariinwa, wꞌamaag dehaywa, ani naadoor ookiik geebookna iistꞌa andi? Ani naadoor ookiik geebookna daayi andi? Wꞌoor tooy haay mꞌaana." idi. Yasuuꞌa eejin idnin, aree baraah wꞌoorii ifirꞌana. Aree beet tumiddaatii wꞌoor mheelamiya.
Iyahuudi diini gawiib jin hooy iifiini tak gaalhoob eeya. Uun uutak aadhiya, "Yasuuꞌa Unaasiraayi! Naan hoon harriiwa? Kwidhsitiyoon dehaay yꞌaabwa han? Ani akteen hook, baruuk Ukwaasanaay Umugaddas Oongaal tikatiya!" idi.
Yasuuꞌa eejin idninaayt, "Tim akaa! Ootak hooy firꞌaa!" idi. Aajin ootak winneet irgisna, tageega hissii aadhiyaaniit hooy ifirꞌana.
Yasuuꞌa tak jin hooy iifiineeb mheeliya
Jaraasiinaayi haash, oobhari daraag ooraaw eefeeb iktimna. Yasuuꞌa tufalluukaatii tikwiyanihoob, miimashaayee farꞌa tak jin hooy iifiini yꞌashish. Uun uutak miimashaayeeb askinaa iifi. Gaal han aree shinshiltii yhikwiree dehaay adgiraab kiiki. Gwida doora bariiyaah yꞌayeewwa iragadaawwa imhakwaarna, laakiin baruuh tinshinshilaawwa t’indiyaawwa iragadaayeeh iifiint katꞌiya. Aree gaal han adgiriit kiiꞌamsꞌabaak. Whawaadwa oombꞌeewwa diimaab imiimashaayeebwa irbaayeebwa saki aree aadhi. Ugarooyooh aweeyee wooki.
Uun uutak Yasuuꞌaab sagi mhiinii rhiyanihoob, dhaabiyaayt bariiyooh suurii asjidiya. Winneet win hissii, "Yasuuꞌa, Ukwaasana Winneet Utageegaanaay Oor! Naan hoosu harriiwa? Ukwaasanaay oosmii halafoosani hook, anaahook, baalhasaaheeb." idi. Yasuuꞌa eejin infaraadiit "Baruuk unajis, oon ootak hooy firꞌa!" diyaa iifi.
Malya Yasuuꞌa barooh raatiya, "Oosmook aab iyadna hook?" idi.
Aajin "Hinin gwidaaba akay, oosmu Gwidaab iyadnaheeb." idiin. Aajin doorka doorka Yasuuꞌaab inꞌalniit whaashii biisifarꞌeet toona hooy yhariwna.
Been oomhiin gwida khansireet dirimt oorbaay ikwiir iifiin. Aajin Yasuuꞌiib winneet hooy yhariwniit, "Ikhansiri bitik fidiga hoon, bareeyooh shuumsaa hoon." idiin. Yasuuꞌa bareeh wꞌidin yhii. Aajin aree ifirꞌaniit ikhansireeb shuumiyaan. Ikhansiri adad malu alfa yꞌiin. Baraah oorbaay ikwibarniit oobhariib dhibiyaan. Aree bareeh aayam iyheen.
Beet toona rhiyaan ikhansireega, willa tumadiinaawwa tidirꞌaawwa hadiit dhaabiyaaniit, oon usakana udehayii dehaay hadiidiyaan. Uudehay beet toona tutikeet shibuubii dehaay ifirꞌana.
Laakiin baraak Ifariisi, tak ifarooyeeh dehaay: ‘Baraak anii timeerneet tushamaam, ani Ukwaasanaay dehaay mhalaniyi miyaaw ikati.’ tiyadna. Malya bareeh ifarooyeehna biishaamneet toona tisehariiwna. Ukwaasanaay ibhali ishtiit hoobeeteekna tꞌaada tisnaakiirna. Aree bak tꞌiiteet amagnayt gwidaat han sakteen." idi.
Oodehay naan yiwaashiistini
Yasuuꞌa masi oodehay igwidaab waliikiyaayt, "Kassaakna sinaakirnaheeb, aree een ibhali afhamaana. Barraay yꞌiit wꞌaadamiib shuumtiniina kayiwaashiista. Laakiin oodehayii titfarꞌi tuuna oodehay yiwaashiistini.
Takati iimaan
Yasuuꞌa been oomhiin hooy giigiya, tumadiina Tiiroos dawil mhiin beeti ibi. Beentooy gaw shuumiya, uudehay iikanneet toona hariwaab kiiki. Laakiin iikwibiseet toona han adgiraab kiiki. Takat dist ootooh jin hooy daaya iifiineet tiifi. Yasuuꞌa been oomhiin yꞌaab iiktiyeet toona timaasiweet midda willa eeta. Batuuh Yasuuꞌiib iragadaayi whii whaashiib dhibta. Tutakat Yoonaaniitu, aree Suuriyaay eefi haash Fiiniigiyaay faraaytu. Batuuh tꞌootiisooh eejin iifirꞌee dehaay Yasuuꞌaab tinꞌal.
Yasuuꞌa batiiyooh dehaay, "Awwal inisrika kastooh timꞌari tiyhariwneet tamsii. Inisrikaayi hadhi yaksiit iyasee dehaay titoogiideet tuuna daayiit kitti." idi.
Tutakat "Awooh Wꞌankwanaay, laakiin aayas tutarabeesaati whii eefeen han inisrika dhibseeneet timꞌari tameen." tidi.
Malya Yasuuꞌa batiiyooh dehaay, "Giigii! Een ibhaliyi jillaay aajin tꞌootiisook ifirꞌana." idi.
Malya tutakat giigtaayt ugawooh tꞌagarihoob, tꞌootooh nꞌaali kehii bꞌee, aajin na hooy giigaa timri.
Oodehayii tak gaal igwibi: "Seednaay! Wꞌooru haay yꞌan hook. Barooh jin hooy daayaaba! Aajin ibhali yhabiin. Aajin hooy daayeenihoob, whaashiib dhibseen. Uuyaf hibibt eetfiif, teekwiri ishoothathꞌi, malyaab balamiini. Ikwiriyaatayaak wꞌoor eejin hooy ifarꞌaneet toona hooy ahariw. Laakiin baraah adgiraab kiikeen." idi.
Yasuuꞌa "Baraakna amseeneeb uudehay wꞌiimaan baabariin! Ani naadoor hadiit geebookna daayani? Naadoor hadiit bareekna atfayiik? Yhaa! Wꞌoorook haay mꞌaa!" idi.
Aflaay wꞌoor haay eeyaan. Aajin Yasuuꞌaab rhiyaanihoob, willa wꞌoor katatisiyaan. Wꞌoor whaashi kehii dhibiyaayt irgas. Hibibt ifaf.
Yasuuꞌa wꞌoori baaba raatiya, "Wꞌooruuk nhoobeeka bak lhaabu?" idi.
Uutak "Wꞌadhimuumii bak lhaabu. Aajin diimaab barooh madar yhariwna. Door yameeb, door nꞌeetiib eegidna. Adgirtinyeek, dehoon nꞌakwmanaaya, shama hoon!" idi.
Yasuuꞌa ootakii dehaay, "Adgirtiniyeek naanhooy tindiya? Wꞌiimaan ibariib ootak naatka dehaay laamaati." idi.
Wꞌoori baaba gaalhoob aadhiya, "Ani iimaan abari, gwidaka iimaan aharriiw, hooy shamaheeb!" idi.
Been oodoor Yasuuꞌa oodehay willa ammarriyee rhiya, aree eejin idaanin, "Aajin baraak yꞌangwilaya, igilluusiya! Ani sooyani hookna! Willa hooy firꞌana! Shaawti dehaay baaꞌagaarna!" idi.
Aajin wꞌoor whaashi kehii dhibisiyaaniit irgisna. Malya hooy ifirꞌana. Laakiin wꞌoor ayaana itꞌi, aree uudehay igwida, "Wꞌoor iiya." idiin. Laakiin Yasuuꞌa bariiyooh wꞌayi yꞌabikaayt isingad. Aree wꞌoor iragadaayeesooh ingad.
Yasuuꞌa Gwida Dehay Mheeliya
Yasuuꞌa Iyahuudi diini gawii giigiyaayt, Siimooniib oogaw shuumiya. Beenhoob Siimoon tehamtuuh akra abaaki tiibri, aree baraah Yasuuꞌa tootakat dehaay mheeliyeet toona raatiyaan. Aflaay Yasuuꞌa batiiyooh kuuramiyaayt yꞌabaaki idnin. Aree yꞌabaaki tutakatii ifirꞌana. Batuuh gaalhoob yaktaayt, bareeyooh dehaay shagaamta.
Yasuuꞌa tufalluukaatii tikwiyanihoob, tumadiinaatii tak jin abkaab iiktiini imꞌashaash. Uun uutak gwida daman halakaab akwaay kiiki, tari gawiib kwiraab kiiki. Laakiin imiimashaayi bitik ikwiir. Uutak Yasuuꞌaab rhiyanihoob, bariiyooh suurii dhaabiyaayt, winneet win hissii waliikiya, "Yasuuꞌa Ukwaasana Winneet Utageegaay Oor, naan hoosu harriiwa? Winneet atꞌajiir hook, baajasaayaheeb." idi. Yasuuꞌa ootakii itfarꞌaneet toona eejin sooyaabu. Aajin ootak gwida doora abkaaba. Aree barooh yꞌayeewwa iragadaawwa shinshilaatee imhakwaarna aree itigwꞌideek han, baruuh tishinshila katꞌi. Aree aajin barooh umingaay beeti salooliin.
Yasuuꞌa ootak raatiya, "Oosmook aab iyadna?" idi.
Utakiib gwida jin shuumaabayt, baruuh "Oosmu ‘Gwidaab’ iyadnaheeb." idi. Aan aajin Yasuuꞌaab doorka irmidniit inꞌalna, oodi shuumaana biidiyeet toona hooy yhariwna.
Beentooy oorbaay kehii ikwiir gwida khansireet dirimt iifiin. Aajin ikhansireeb shuumiini jillaay wꞌidin iniiweet toona Yasuuꞌiib winneet yhariwna. Aree Yasuuꞌa bareeh wꞌidin yhii. Aajin ootakii ifirꞌanihoob, ikhansireeb shuumiyaan. Aree ikhansireet dirimt igidiyeesooh dhaabiyaaniit, oorbaay shidhꞌaayii igidehana aree whoodhiib tikwiyaaniit bareeh aayam iyheen.
Ikhansireega beet toona tutikeet rhiyaanihoob, willa tumadiinaawwa tidirꞌaawwa beeti dhaabiyaaniit usakana hadiidiyaan. Uudehay kassaah beet toona tutikeet rhiini jillaay ifirꞌana. Baraah Yasuuꞌii dehaay eeyaanihoob, ootak aajin hooy giigaa, Yasuuꞌiib iragadaayi geeb sꞌee, akwaay akay whaaluuh shibooba imriin. Aree baraah winneet irkwiin.
Oosdik andi hookna, een tooy ingadiin oodehayii gali, Ukwaasanaayt tehadꞌaayi rheeneeb ookiik iiyyi kiidiin." idi.
Yasuuꞌiib Umatuun
Yasuuꞌa een hadiidiyaayt harꞌii asimhayt yina eetiit middaatiib, baruuh Bitruswa, Yuuhannaawwa, Yaaguubwa iyhaayt, siileeliyee dehaay oorba reewiya. Siileelee ifiiraah weet hayꞌa ikeen. Yhalakaayaah utalaw tꞌiiteeb eeraab ikeen. Laakiin Yasuuꞌaab malu da infiridna. Aan baraah Muusaabwa Eelyaawwa iiktiin. Baraah daawriit hayꞌaatii lawiyaan. Yasuuꞌi geeb hadiidiyaan. Baraah bariituuh tooyat Alguduseeb iikti tiidnaatiib hadiidiyaan.
Bitruswa yꞌarawaahwa akraat nꞌari hooy daata. Laakiin baraah daayiib ibꞌarnihoob, Yasuuꞌiib umatuunwa bariiyooh geeb ingid eenda imaloowwa rhiyaan. Aan aanda imalu Yasuuꞌii giigiineeb oodoor, Bitrus bariiyooh dehaay, "Seednaay! Oon oomhiin daanayeet tuuna daayiit kitti han? Mhay alleeka niidꞌir, gaal bariiyook dehaay, gaal Muusaay dehaay, gaal Eelyaay dehaay." idi. (Baruuh naan hadiidiyeeb kiikan.)
Oodehayii tak gaal waliikiyaayt, "Seednaay! Winneet hook aharriiw, uun baruuh gaalꞌoor aniibu. Barooh shibiba! Barooh jin hooy shuumaaba, aree baruuh gaalhoob aadhiini. Uuyaf hibibt eettiibeeb hadiit aajin barooh iragisna. Door han barooh baalhasi kiiꞌish. Ikwiriyaatayeek eejin ifirꞌaneet toona anꞌal, laakiin baraah adgiraab kiikeen." idi.
Yasuuꞌa "Yaa uutaas wꞌiimaan baabariin yꞌamag, ani naa door hadiit geebookna daayani? Naa door hadiit dehookna asbirani? Yhaa! Wꞌoorook tooy haay mꞌaa!" idi.
Been oodoor wꞌoor yꞌee, aajin barooh whaashi kehii dhibisiyaaniit irgisna. Laakiin Yasuuꞌa eejin idnin, wꞌoor isinꞌiraayt ubaaba yhii. Kassaah uudehay Ukwaasanaay yꞌakrireeb winneet ajjabamiin.
Uudehay Yasuuꞌa sakiyeet kasteeh tinaateeb ajjabamee, Yasuuꞌa ikwiriyaatayeeh dehaay,
Yasuuꞌaawwa Baꞌalsabuulwa
Yasuuꞌa gilluusi takii jin iifirꞌa. Aajin ifirꞌanihoob, uutak ugilluusi hadiidiya aree uudehay hooy ajjabamiyaan.
Aree gaal bareesooh ufagiiri oowinnaay kishiya bꞌadhdhii ithꞌa, aree wꞌangwiil umaykwaab hooy ikitꞌa.
Yasuuꞌa igwibi, "Oontꞌa gadna!" idiit, ootaki angwiil shiishiyaayt isinꞌir.
Yuuhannaay idiigwatkina giigiyaani harꞌii, Yasuuꞌa oodehayii dehaay Yuuhannaayiib hadiidiya: "Umingaay tibeenihoob, naan rhitiib tehiriwna? Aggaab ubaraam nanfiyeeb rhaa miyaadiib tibeena han? Bak biikaayeek, naan rhaa miyaadiib tibeena? Daawri halaka akwaay tak? Abadan, aanda alya halaka eetkwiinwa, igabaawwa, nafirnayteeb ikweerwa baliin siraayaateeb eefeen. Laakiin naan rhaa miyaadiib giigtaana? Nabiib? Awooh, andi hookna, aree nabiika winkaabi. Tuun batuuh uktaabiib kataabtu:
‘Ani udiigwatkinaayu suurook iifdig andi,
baruuh whankaay usalalook isuumir indi.’ diyaabi.
Ani andi hookna, Yuuhannaayiika winkaab taamꞌa firaat kiikeen. Laakiin Ukwaasanaayt hadꞌaayeetiib uudiska Yuuhannaayiika winkaabi." Yasuuꞌa idi.
Uudehay kassaah, itilbaat tamana han, een Yasuuꞌiib ibhali imaasiwnihoob, baraah Yuuhannaayiib yꞌayee atoomsaabayt, Ukwaasanaay usalal shiboot ikatiyeet toona ifidhadhna. Laakiin Ifariisiiwwa, whaggi koojaawwa Ukwaasana bareeh iknaayee dehaay iibriyeet tehalaagaay iribna. Yuuhannaab atoomsaab kiikeen.