1 Gaysariyaay tak Koorneelyoos ittiyoodi iifi. Baruuh Roomaani dheeshi daabit iikti. 2 Uun uutakwa kassaah indhiwaayaahwa Ukwaasana iriikw dehaya. Baruuh diima Ukwaasanaay dehaay siileeli. Oodehay yhamraab aree gwida mhallaga iyiw. 3 Himniyaayt gaat tuusꞌa mhayt tiifi, baruuh hawsooya. Tehawsooteeb Ukwaasanaay malak dehaay eeyaayt, "Koorneelyoos!" idi.

4 Koorneelyoos rikwiyee ishbib, malya "Naan teefi, Wꞌankwanaay?" idi.

Umalak bariiyooh dehaay, "Tusileeltookwa imiskiinaayi umiyaawookwa Ukwaasana agbiliya. Umiyaawuuk shꞌaniiteet karaama akay Ukwaasanaay dehaay reewiya. 5 Oontꞌa daab Yaafaay dehaay diigwata. Siimoon been Bitrus ittiyoodiib ootak haay mꞌaa! 6 Baruuh Siimoon oosar maalti, ugawuuh oobhari dar eefiyeeb, bariiyooh geeb eefi." idi.

7 Umalak een idiit giigiya. Koorneelyoos ishagaamanaayeesooh maloobwa, Ukwaasana iriikw kajaraayi diimaab imuurmeebwa waliikiya. 8 Bareeh kastooh toona sooyaayt Yaafaab ookiik ifdig.

9 Tooyin tumalya aan aanda nabhoob Yaafaab idwilneeb oodoor, Bitrus siileeliyee dehaay gaw reewiya. 10 Baruuh yharagw aree mꞌariit tamiyeet yhariw. Tumꞌari shagaamamee aree baruuh hanꞌaariya aree hawsooteeb daaya. 11 Teebri nigalee rhiya, naat gaat win halak fadhigtee tishinkiitee hakwaar tꞌiiteena toobuuti kehii tikwee rhiya. 12 Oon whalaki kehii kastaah tidhhaniyaawwa, ibuutranfiifaawwa, aakilaywa iifiin. 13 Hiss Bitrusii dehaay eeyaayt, "Bitrus, yakaa! Een haardaat tamaa." idi.

14 Bitrus igwibi, "Wꞌankwanaay, ani een awariyee dehaay kaꞌadgiran! Ani naat nhast baakaayt tari amaagna masi kataman." idi.

15 Whiss masi dehaay igwibi, "Ukwaasana sinhasaab ikatiyeena, baruuk nhast kitti baadiya." idi.

16 Tuun tuuna mhay doora tiikti, malya whalak gaalhoob teebri yꞌagar.

17 Bitrus beet tuuna naan tiiktiyeeb winneet ajjabamiya. Koorneelyoos diigwatiyaneeb aanda Siimooniib oogawi mhiin imriiniit, udheefaay ingadna. 18 Baraah waliikiyaaniit raatiyaana, "Siimoon Bitrus ittiyoodi tak tooy eefee?" idiin.

19 Bitrus tehawsu tirhaab iiktiyeet masi hooy kwakwoonee, Aashuuk Imugaddasa dehaay eeyaaniit, "Siimoon, mhay da barook yhariw eefeen. 20 Aflaay yakaa aree nꞌati tikwaa. Baahasiika aree bareeh ani diigwataabi." idiin.

21 Bitrus hoogiyaayt eenda infaraad: "Ani baraakna tehariwneeb ootaku, naanhooy yꞌaabaana?" idi.

22 Baraah igwibiina, "Koorneelyoos udaabit diigwatiya hoon. Baruuh shibu taku, aree Ukwaasana rankwiibi. Iyahuudi dehay kassaah han barooh hamooyseen. Ukwaasanaay umalak umugaddas Koorneelyoos ugawooh beeti eetniyi jillaay dehook diigwatisiya. Shaawti ibhaliyeek itindiyeeb isnaakiir." idiin. 23 Malya Bitrus bareeh yhadar, whawaad beentooy naasiya.

Tooyin tumalya Bitrus bareeyooh geeb giigiya. Yaafaay iiktiin Ukwaasanaay aamanana gali han geeb giigiyaan. 24 Tooyin tooraaw baraah Gaysariyaab iktimna. Koorneelyoos bareeyooh wꞌaay yhigit. Baruuh yꞌayaydeehwa yꞌaraweehwa han waliiksaa iifi. 25 Bitrus oogaw shuumiyani door, Koorneelyoos barooh yꞌashish. Malya Bitrusiib iragadaayi suurii dhibiyaayt asjidiya. 26 Laakiin Bitrus barooh yꞌabikaayt, "Yakaa! Ani barook tꞌiiti aadami akati." idi.

27 Bitrus Koorneelyoosi geeb hadiidee oogaw shuumiya. Baruuh beentooy gwida dehay ammarriyaa rhiya. 28 Malya bareeyooh dehaay, "Yahuudi tak Jintiiliib kaꞌaraweesamiya tari barooh han ugawiyooh kiibi. Beet tuuna whaggiyoon bitehaayeet toona tikteenna. Laakiin gaalnaay dehay han ‘Nhas kiiki tari nijisu.’ iyaad kaadi, beet toona Ukwaasana rhisiyaheeb. 29 Aflaay waliikamanihoob, raab anu yꞌan. Oontꞌa naanhooy waliiktaanheeb? Sooyaanheeb." idi.

30 Koorneelyoos igwibi, "Fadhigt yinaati suurii, tuusꞌa mhayt tiiktiyihoob himniit ani ugawiib siileeli. Gaalhoob tak eera halakaayi suuru ingad. 31 Uun uutak ‘Koorneelyoos, Ukwaasana tusileeltookwa oodehay imiskiinaayi umiyaawookwa agbiliya. 32 Oontꞌa Yaafaab beeti diigwata. Siimoon Bitrus ittiyoodiib waliiksaa. Baruuh Siimoon yhakooyi shagaamana ubhari dar ugawuuh eefiyeenaay geeb eefi.’ idiheeb. 33 Aflaay ani willa dehook diigwatan. Eetaneek aree daayiib tiweera. Oontꞌa kassaan tooy Ukwaasanaay suurii neefi. Wꞌankwana sooyaneetook toona kastooh neemsiiweet nhariw." idi.

34 Malya Bitrus hadiidiya: "Ukwaasana oodehay kasseeh gaal shibuub shanbiibeet toona oontꞌa akan. 35 Laakiin oodehay barooh rikwiit tooshbu shagaameen kasseeh yhashee agbiliini. 36 Ukwaasana Israaꞌiileeb oodehayii dehaay ifdigeet tudiigwat tikteenna. Kasseeyooh Ankwana ikatiib, Yasuuꞌaab Umasiihi geebii umꞌasgi sakana udaayiib sooya. 37 Yahuudaay naan tikayeeb baraakna tikteenna. Yuuhanna oodehay itoomiisneet toona sooyani harꞌii, beet tuuna kastuuh Jaliileeb badoota. 38 Ukwaasana Eeshuuk Imugaddasaawwa yꞌakrirwa Yasuuꞌaab Unaasiraayi yhii. Ukwaasana bariiyooh geeb iifi akay, Yasuuꞌa kasseeh yhasheeb hiireeriya, oobliisi akriri whii iifiin oodehay mheeliya.

39 Yasuuꞌa Israaꞌiileebwa tumadiina Alguduseebwa idꞌiyeet toona kassaan rhina. Yasuuꞌa saliibi kehii itoodaar. 40 Laakiin Ukwaasana barooh mhayt yinaati harꞌii, tooyat hooy yakisiyaayt lawisiya. 41 Kasseeh oodehay rhamaab kiiki. Badehiib ikatiini jillaay Ukwaasana waasiyaneeb, hinin eebhat rhamiya. Baruuh tooyatii yakiyanihoob, bariiyooh geeb tamna geeb gwꞌina. 42 Yasuuꞌa oodehay yꞌayaabwa idhhaniibwa kehii Ukwaasana gaadiib ikwaaseet toona nibadehi jillaay sooya hoon. Udehayoon soonayi jillaay aree sooya hoon. 43 Kassaah inabiya bariiyooh ibadehana. Barooh aamaneen uudehay kassaah bariiyooh oosmii tumaagnaay afoomeen." idi.

44 Bitrus masi hadiidee, Aashuuk Imugaddasa een ibhali iimsaw oodehay kasseeyooh daayaan. 45 Shalik Yahuudi Ukwaasana aamaniin Bitrusi geeb eeyaan. Aashuuk Imugaddasa Ijintiili kehii han daayaaneet toona winneet ajjabisiyaan. 46 Bareeh wari bhali hadiidee imaasiwna. Ukwaasana aree hamdee imaasiwna. Malya Bitrus bareeyooh dehaay, 47 "Aan baraah shaawti Eeshuuk Imugaddasa oon hineet ittiyeewaayna. Een oodehay yamee atoomsooyt yhanbi eefi han?" idi. 48 Aflaay baruuh Yasuuꞌaab Umasiihiib oosmii itoomiisneet toona bareeh sooya. Baraah han Bitrus shalikt yina geeb hangiiteet toona hooy yhariwna.