1 Shaawil Istifaanuusi madareeb taafagiya. Beet tooyin Alguduseeb tiifiit tukaniisaatiib akra amaag wara iki. Ilinguumiya nuun aree kassaah uudehay Yahuudaawwa Saamiraaywa yhasheeb ibrarni iyheen. 2 Ukwaasana aamaniin da gwadi eeyaaniit, Istifaanuus ibisna aree winneet waawiyaan. 3 Laakiin Shaawil tukaniisaati katꞌiti yhariw. Gaw gawiika giigi, teemꞌatwa eendaawwa rarhoofiit oosjin istuub.

4 Laakiin yꞌaamanana ibarar iifiin, iibiini mhiinka usakana udaayiib sooyiin. 5 Fiilibus tumadiina Saamiraay tiifiit hadiit giigiyaayt, oodehay Umasiihiib usakana sooyi. 6 Uudehay igwida barooh imaasiwna, aree timꞌuujisaateet alaama tꞌikwaaseet rhiyaanihoob, baraah kassaah bariiyeeh ibhali daayiib isnaakirna. 7 Gwida dehay jin hooy iifiineeb mheelamiyaana, aajin akraab aadhee hooy itfirꞌana. Gwida garbamaabwa ankwalanaabwa han mheelamiyaan. 8 Aflaay tumadiina kastuuh afirhita.

9 Beenhoob tumadiinaatiib Siimoon iidni tak seharana gaal iifi. Baruuh sehart shagaami. Saamiraay uudehay kassaah hooy ajjabamiyaan. Baruuh ugarooyooh win tak hiisi. 10 Kassaah uudehay iwawinwa idadiswa barooh kwalala aree isnaakirna: "Uun uutak Ukwaasanaay Yꞌakrir ‘Yꞌakrir Itageega’ ittiyoodiin ikati." iidna. 11 Uutak gwidaat midda tusehartiisooh oodehay ajbaa iifi akay, uudehay barooh iramna. 12 Laakiin Fiilibus Ukwaasanaayt tehadꞌaayeeti usakana udaayiib bhaliiya aree Yasuuꞌaab Umasiihiib oosmiiwwa bhaliiya aree baraah barooh aamaniyaanihoob, aandaawwa taamꞌatwa kassaah itoomaasna. 13 Siimoon uukna han aamaniyaayt itoomaas. Malya baruuh Fiilibus iibiyeeb oomhiin geeb ibi. Fiilibus iidꞌeet timꞌuujisaawwa tꞌalaamaawwa barooh akraab ajibiyaan.

14 Alguduseeb iifiin Ilinguumiya Saamiraay uudehay Ukwaasanaay ibhali gabbalamiyaan miyaad imaasiwnihoob, Bitruswa Yuuhannaawwa bareeh beeti diigwatiyaan. 15 Ilinguumiya imalu Saamiraab iktimnihoob, uudehay Eeshuuk Imugaddasa imeerneet toona dehaay siileeliyaan. 16 Oonaay suurii gwadi Wꞌankwana Yasuuꞌiib oosmii atoomsaab iiktiineek han, Eeshuuk Imugaddasa gaal han miraab kiiki. 17 Malya Bitruswa Yuuhannaawwa yꞌayeehna oodehayi kehii dadaasiyaan. Aree baraah Eeshuuk Imugaddasa imriin.

18 Siimoon ilinguumiya yꞌayeehna oodehayi kehii daasiyaanihoob Eeshuuk Imugaddasa imriineet toona rhiyanihoob, bareeh mhallagaab yhii. 19 Malya Yuuhannaawwa Bitrusii dehaaywa, "Aneeb han een yꞌakrir hiinaheeb, malya ani yꞌayi kehii daasaniyeeb uudehay Eeshuuk Imugaddasa imeerna." idi.

20 Bitrus bariiyooh dehaay, "Ukwaasanaay miyaaw mhallagaayee itdaliibeeb hiistiniyeek, baruukwa imhallagaayaakwa toonꞌi daayi tiyadna. 21 Oon ushanhiib baruuk naat adhidh hooy kitbariya. Aree baruuk amaag ginꞌiib tikatiyeet toona Ukwaasana rhiini hook. 22 Tumaagnaaytook hooy tuubaat Wꞌankwanaay dehaay siileela. Uginꞌiyook tibariyeet tehadaatniya kisib baruuh afooyiini hook. 23 Hamiinaayt ataabwa, idanuubaak abkaayeek akay rhani hook." idi.

24 Siimoon "Aflaay tuuna baraakna tiyadneet anii dehaay bitꞌakaayi jillaay, baraakna Wꞌankwanaay dehaay siileelaana." idi.

25 Bitruswa Yuuhannaabwa Ukwaasanaay ibhali bhaliiyaani harꞌii, Algudus beeti yꞌagarna. Gwidaat Saamiraay gariyaateeb aree Wꞌankwanaayt diigwat sooyiin.

26 Wꞌankwanaay umalak Fiilibusii dehaay, "Yakaa oosꞌiid bayaa! Algudusee Gazzaab eebiib umingaayi salalii sakaa!" idi. 27 Aflaay Fiilibus idif. Usalaliib Habashiib win daabit tanbiil iibriib imri. Uun uutak Whabashiit Tehadꞌa Kandaakaati oomraayi wakiili. Baruuh han ibaadaatee dehaay Algudus bayaa iifi. 28 Oontꞌa aree utanbiilooh amaa itꞌigir. Unabi Isyaasiib ooktaab aree agriiyi.

29 Aashuuk Imugaddasa Fiilibusii dehaay, "Suurbayaa, been utanbiil diwilaa." idiin.

30 Fiilibus utanbiil idwilihoob, uutak unabi Isyaasiib ooktaab tageega hissii agriiyee imaasiw. Fiilibus barooh raatiya, "Toona tꞌagriitiniyeet afhamtiniya?" idi.

31 Uuntak igwibi, "Weer iishatamheeb biidiyeek, kak afhamani?" idi. Malya baruuh Fiilibus utanbiiliib geebooh eesitꞌeet toona hooy yhariw.

32 Uutak ooktaabiib een ibhali agriiyi:

"Baruuh wharuudi arginiit saloolamiya,

aree wꞌargin wꞌitoomiinnaayt diniya,

aflaay uyafooh han nigilaab kiiki.

33 Baruuh amaag itweeraay, adil miraab kiiki.

Umidhhanuuh tubuutii yakamiyaneek,

aaw tidirriyaaytooh sooyiini?" idi.

34 Uun Whabashi Fiilibusii dehaay, "Unabi ugarooyooh haay tuuliini han, hana weer tak? Sooyaaheeb." idi. 35 Malya Fiilibus oon unabi kitaabii badooyaayt, barooh Yasuuꞌiib usakana udaayiib sooya.

36 Baraah masi usalal abkee, yami mhiin eeyaan. Uutak Fiilibusii dehaay, "Shibiba! Tooy yam eefeen. Tooy atoomiiseek naan hanbiheeb?" idi. 37 Fiilibus "Kassooh uginꞌiisook haay aamantiniyeek titoomiisee dehaay adgirtiniya." idi. Uutak "Ani Yasuuꞌa Umasiih Ukwaasanaay oor ikatiyeet toona aamanani." idi. 38 Aflaay baruuh utanbiil isingad. Malya baraah hiddaab eeyam beeti tikwiyaan. Fiilibus aree ooraaw imis. 39 Iyamee ifirꞌanihoob, Wꞌankwanaay Aashuuk gaalhoob Fiilibus giigisiyaan. Whabashi shaawti barooh rhaab kiiki. Baruuh laakiin winneet afirhaa usalalooh sakiya. 40 Door weer, Fiilibus Asootuus iidneet madiinaatiib lawiya. Kasteeh timadiinaateeb hiireeriya, Gaysariyaab iktimeeb ookiik oodehay Yasuuꞌiib usakana udaayiib sooyi.