1 Agriiba Baawloosii dehaay, "Oontꞌa ugarooyook hanibyeet toona adgirtiniya." idi.

Aflaay Baawloos wꞌayiisooh mitiyaaya: 2 "Whadꞌa Agriiba, oon amsi bariiyook suurii angadiyeet toona hooy afirhaabi. Iyahuudi aneeb atehimeeneet teena kasteeh dehaay igwaab andi, 3 aree baruuk Iyahuudiit tꞌaadaawwa wꞌamgwasuuraayoohwa daayiib tikteena. Aflaay anaahook daayiib sinaakiraheeb.

4 Iyahuudi kassaah aneeb wꞌadhmuumii ikteennaheeb. Ani whaashoon ooknaaywa Alguduseebwa wꞌadhimuumii akwiri. 5 Baraah shꞌiika ikteennaheeb. Ani winneet akra madehab iitram Fariisi iiktiyeet toona baraah yhariwneek sooyeen hook. 6 Ukwaasana hoobeen waadiyaayaab ikatiyeet toona sꞌayaamani akay, amsi haakameenheeb. 7 Hineet tigabiila titamna malu whawaadwa oombꞌeewwa usidkii Ukwaasana shagaameena, aree uwaadiyaay tikwuukw sꞌayaameen. Yaa Whadꞌa Agriiba, oon isꞌayaay sabbii, Iyahuudi eegrima atehimeenheeb. 8 Ukwaasana yꞌayaab ishidhhiineet toona naanhooy eetehakteena?

9 Door gaalnaay ani uknaayu han Yasuuꞌaab Unaasiraayiib oosim amꞌakiireet toona akwin. 10 Beet toona aree Alguduseeb adꞌi. Ifagiiriya isuurkina isidꞌiinheeb, gwida dehay Ukwaasana aamaniin oosjin adꞌi. Baraah yattii dehaay haakamamiyaanihoob, ani han ayyadan. 11 Gwida doora Yahuudi diini gawaayeeb bareeh jasaayan. Udiinoohna ashooꞌiisheet toona han jarraban. Beenhoob ani bareesooh hasi. Bareeh jasaati jillaay girba hasheeb iifiint timadiina abi.

12 Yaa Whadꞌa Agriiba, bꞌeeb gaal ani ifagiiriya isuurkina halaagaaytiib Dimashig istoobnaheeb. 13 Yaa Whadꞌaay, usalaliib nabhoob talaw tuyintiika eerakaab rhan. Uun utalaw aneebwa geebu iibaabiinwa tibreetee kehoon talawiya. 14 Kassaan whaashi kehii dhibna. Malya hiss Araami bhaliiyee, ‘Shaawil, Shaawil, naanhooy amaag tiwariyaheeb? Aniib ifinaasamti afreeba!’ idiheeb.

15 Malya ani raatan, ‘Baruuk aabwa?’ adi.

Wꞌankwana igwibi, ‘Ani Yasuuꞌaab! Ubaruuk amaag tiweereeb akati. 16 Oontꞌa yakaa! Baruuk anii shagaamani tikatiyi jillaay waasaayooku akay dehook lawan. Oontꞌa aniib rhitaneet toonaawwa, amseenee fidnaab rhisi hook andiyeet toonaawwa, badehiib iikti tindiya. 17 Udehayook ooknaaywa, Ijintiileewwa ishidhhin hook andi. Ani bareeh beeti afandiig hook. 18 Baraah oobliisi salalii Ukwaasanaay dehaay itꞌagiirni jillaaywa, tuthibintii ooyꞌii dehaay itfarꞌani jillaaywa, eegwꞌad nangiileet toona hook aharriiw. Aflaay idanuubee afoob imeerna, aneeb aamaniit Ukwaasanaay oodehay imugaddasaayee gal ikatiin.’ idi.

19 Aflaay yaa Whadꞌa Agriiba, ani een tibreetee eeyaan eerhi amoorbaab kaaki. 20 Awwal Dimashigeeb oodehay sooyan, malya Alguduswa kastooh Yahuudaabwa abi. Baraah tuubiit Ukwaasanaay dehaay itꞌagiirneet toona sooyan, aree tuubiyaaneet toona rhisiini shaga idꞌaneet toona sooyan. 21 Beet toonaati sabbii Iyahuudi oodiini gawi hooshiib yꞌabiknaheeb, anii madar han jarrabiyaan. 22 Laakiin kassooh been oodoor Ukwaasana ishamheeb. Ani han oodehay idadiswa iwawinwa kasseeh bhaliisaman. Inabiyaawwa Muusaawwa tikati diyaab iiktiineet toona toobhaat sooyan. 23 Umasiih kak lhamiiniyeet toonaawwa, masi baruuh tuyatii awwal yakiiniyeet toonaawwa sooyan. Aflaay baruuh udehayoohwa Ijintiiliiwwa umidhhani nuur sooyiini." idi.

24 Baawloos ugarooyooh habuuyi bhali faaysaab baakaay, Feestoos waliikiyaayt, "Baawloos, Baruuk haalaywa! Uun utꞌaliim igwida haaleesiini hook." idi.

25 Laakiin Baawloos "Feestoos whamooysama, ani haaleeb kaabari, ani oosdik andi, tuun aree daayiinaati. 26 Teen teena tehadiidaniyeet whadꞌa ani anfariidi daayiib ikteen. Barooh naat han hooy kwabaast kitti, thibnama rikwniib akaana kitti." idi. 27 Malya Baawloos Whadꞌa Agriibaay dehaay, "Inabiya sooyaaneet toona aamantiniya? Aamantiniyeet toona akteen." idi.

28 Agriiba Baawloosii dehaay, "Bak shalikt middaatiib masiihiib akatiyeena tiseharriiwheeb han?" idi.

29 Baawloos "Uudoor shanliikeek gwuudiiniyeek, teen tishinshila nuun, baruukwa yꞌisneekiirwa kassaakna amsi oon aneeb tꞌiiteena tikatiineet toona Ukwaasanaay dehaay siileelani." idi.

30 Malya whadꞌa Agriibaawwa, whaakim Feestooswa, Barniikiiwwa, kassaah geeb iifiinwa yakiyaaniit giigiyaan. 31 Laakiin baraah giigaab baakaay, "Uun uutak gwabab kiibari. Yat tari sijin kaꞌastehaliya." idiin.

32 Malya whadꞌa Agriiba Feestoosii dehaay, "Baawloos, Gaysar Iroomaani whaakamamti hariwaab biikaayeek, itfidig." idi.