1 Turibshaay tingadihoob, Baawloos yꞌaamananaayee dehaay diigwatiyaayt isꞌaakakir. Malya bareeh usalaamiib imsiyoodaayiit, Magadoonyaab ibi. 2 Baruuh haash haashii iibaabiya. Yꞌaamanana gwidaat diigwataatee isꞌaakakir. Malya Yoonaan ibi. 3 Beentooy Baawloos mhay tirga isꞌa. Ubharii Suuriyaay mabayee dehaay iitmarihoob, Yahuudi suurkina gali maagnaayt dehaay niyaamiyaan. Aflaay baruuh Magadoonyaay usalalii mꞌageert imkir. 4 Soobaatrus Beerusi oor Beeriyaay iiktiib barooh iram. Ariistaarkooswa Sakoondooswa Tasaaluuniikaay iiktiinwa, Gaayoos Darbaay iiktiibwa, Tiimootiiwwa, maloob Aasiyaay whaashii iiktiin Tiikiikooswa Turoofiimuuswa han barooh iramna. 5 Aan baraah suuroon Taroowaas ookiik giigiyaaniit, beentooy yhagitna hoon.

6 Laakiin Ufatiiri Hadhiyi Iidi harꞌii, Fiilibii giigna, markabtii iibaabna. Ayt yinaati harꞌii, Taroowaas niktimaayt bareeh ninaakib. Beentooy asaramaat yina nhagit.

7 Tꞌasaramaatiit gwiraatiib hiddaab yhadhi niikitꞌee dehaay nimmarraay. Baawloos tulhaytooh giigi akay whawaadi tarab ookiik oodehay bhaliisamiya. 8 Oogaw umhakwaliib hooy niisitꞌeeb gwidaat lamba hooy iifiin. 9 Adhami oor Aftiikhoos iidneeb ushibbaaki kehii isꞌa. Baawloos bhaliiyee, been wꞌoor hanꞌaariya. Malya diwiyaayt umhaya doorii dhibiya. Shaawti barooh yakisiyaanihoob, ayaa rhiyaan.

10 Baawloos tikwiyaayt wꞌoori kehii kuuramiya, yꞌayeesooh nuunamiyaayt, "Baahasiikna baruuh dhhaniibi!" idi. 11 Malya Baawloos oogaw reewiya, hadhiib ikitꞌa aree tamiya. Fajir ookiik hadiidiya, malya iibaabiya. 12 Aflaay uudehay wꞌoor dhhanii yakisiyaaniit oogaw haay ibeen, aree winneet afirhiyaan.

13 Baawloos whaashii Asoos beeti iibaabtiib niyaamiya. Barooh beentooy nhigiti jillaay hinin aaraw markabtii suurii iibaabna. 14 Baruuh Asooseeb inaakib hoon, malya barooh tumarkab nisꞌam, hiddaab Miitiiliin nibi. 15 Tooyin tumalya beentooysii giignaayt Khiyoos niktim. Tulhaytooh Saamoos hasamna. Tooyin tooraaw aree ubharii Miileetoos niktim. 16 Baawloos Aasiyaay gwida door iisitꞌeet toona hariwaab kiiki akay, Afasoos hasamiit ubharii iibaabt niyaamiya. Baruuh Alguduseeb Beenteekoostiib wꞌiid iidiyeet yhiriwayt winneet ashshigi.

17 Miileetoosee Baawloos tukaniisaati suurkina Afasooseeb iifiin beeti diigwatiya. 18 Baraah beentooy iktimnihoob, baruuh "Ani oombꞌi wꞌawwaliib Aasiyaay whaashiib yꞌaneenaay, kasseeh idaman igeebookna hassaneeb kak sakaneeb baraakna tikteenna. 19 Yahuudi gali akraat maagnaayt hoosu idꞌiin. Laakiin ani winneet miskiinamaa Wꞌankwana shagaaman, winneet milootan. 20 Bareekna rayiistiniina naat han hookna akish kaaki. Naatka sooyan hookna, diima oodehayi suurii allaman hookna, gaw gawii aktim. 21 Ani Iyahuudwa Ijintiiliiwwa Ukwaasanaay dehaay tuubeeni jillaaywa Wꞌankwanaayoon Yasuuꞌaab aamaneeni jillaaywa sooyan.

22 Alguduseeb anii dehaay naan iikti tindiyeeb ani kaakan. Laakiin Ukwaasanaay shuuk ibakii sinaakriit beentooy iibi andi. 23 Madiinaatka shuumanihoob, oosjin daamiit Alguduseeb lhami andiyeet toona Aashuuk Imugaddasa sooyeenheeb. 24 Laakiin tehalaagaay faaysaniyeeb ookiikwa, ushaga Wꞌankwana Yasuuꞌa sꞌabkaayu ikatiyeeb, Ukwaasanaayt tinꞌimaati usakana udaayiinaay isooti atankwiikweeb ookiikwa, aniib umidhhan takweet kiibari.

25 Ani mhiin mhiiniika giigan. Ukwaasanaayt tehadꞌaayi sooyaneeb baraakna shaawti gaal han rhi kitdiinaheeb. 26 Aflaay amsi sooyani hookna, ani kasseeh oodehayi booyii nhasu, gaalnaay han kaꞌaraatamaman! 27 Ukwaasana hookna yharriiweet toona kastooh sooyan hookna. 28 Igarooyookna gwꞌadna, Aashuuk Imugaddasa sigwꞌadaayeekna ikatiineeb oodehay gwꞌadna. Ukwaasana ubooyooh ooknaay dilba ahaab ikatiyeet tukaniisaati shakwa akeena. 29 Aniib oogiigi harꞌii, karay yꞌiit ibitkeekna itkwabiisneet toona akteen. Baraah dehookna fareena. 30 Udehayiisookna gali yakiit gwisir allami iyadna, yꞌaamanana harꞌoohna eesikwneet yhariwna. 31 Aflaay digwagwna! Mhay hawla oombꞌi whawaad taamlu igwꞌadeeb haayee sooyeetookna toona shꞌaana.

32 Ani oontꞌa Ukwaasanaayt gwꞌadaadtiibwa Ukwaasanaay ibhali idaayiini dehaaywa anꞌiish hookna. Tuun batuuh asti yakistini hookna, Ukwaasana kasseeh oodehayooh iniiweet tibaraka aree iyaaw hookna indi. 33 Ani masi han gaalnaay ashteet tari dimꞌaraab tari halakaab hariwaab kaaki. 34 Aneebwa yꞌarawaawwa nishtinheet teena kasteeh een yꞌayeesi shagaamanaayt atkwikweet toona baraakna tikteenna. 35 Kasteeh teena ani adꞌiyeet, oodehay ootaad baabariin kak teeshtiimneet toona oon wꞌakra shanhii rhisan hookna. Wꞌankwanaayuun Yasuuꞌa uukna diyaab iikiyeeb ibhali shꞌaana, ‘Oomiyaayiika oomiyaawiib gwida dehara eefi.’ diyaabi." idi.

36 Baawloos ibhali faayisiyanihoob, ignafaayt bareeyooh geeb siileeliya. 37 Uudehay kassaah wawaawiyaana, hooy yhalabniit fꞌiyaan. 38 Baawloos "Shaawti karhitaanaheeb!" diyaabuuyt, baraah winneet gadabiyaan. Malya barooh tumarkab beeti isiisarhana.