1 Antaakiyaay tiifiit tukaniisi gwida nabiyaawwa allamanaawwa fagiiriyaawwa tiibri. Aan baraah Barnaabaaswa, Simꞌoon Niigar iidneebwa, Luukiyuus Geerawaanee iiktiibwa, Manaayin Heeroodisi geeb winaabwa, Shaawilwa iiktiin.

2 Baraah Wꞌankwanaay dehaay siileeleewwa baaskiiteewwa, Aashuuk Imugaddasa dehaay eeyaaniit, "Barnaabaaswa Shaawilwa ani dehaay waliikaab akatiyeeb ushanhii dehaay waasaana." idiin. 3 Malya baraah baaskiitiyaaniitwa siileeliyaaniitwa harꞌii, yꞌayeehna bareeyooh kehii daasiyaaniit giigisiyaan.

4 Barnaabaaswa Shaawilwa Aashuuk Imugaddasa giigisiyaan. Baraah Sulookiyaab ibeen. Beentooysii Gubrus tugadiira ookiik iibaabiyaan. 5 Salaamiis tumadiinaatiib eeyaanihoob, Yahuudi diini gawiib Ukwaasanaay bhali sooyaan. Yuuhanna Maarkoos iidneeb han shamaamtiib bareeyooh geeb iifi.

6 Malya baraah tugadiira kastooh iskattimniit, Baafoos iidni haash eeyaan. Beentooy seharanaab Yahuudiib gwisri nabi Baar Yasuuꞌa iidneeb imriin. 7 Seerjiyoos Baawloos, tugadiireeti haakim winneet fagar taku. Baar Yasuuꞌa bariiyooh geeb shagaamiya. Seerjiyoos Baawloos Ukwaasanaay bhaliyi maaswi yhiriw akay Barnaabaaswa Shaawilwa waliikisiya. 8 Laakiin Baar Yasuuꞌa, oosmooh ooraaw Aliim iidneeb, bareeh irib. Baruuh whaakim han Wꞌankwanaay wꞌaamantii afuuy jarrabiya.

9 Malya Shaawil, Baawloos atoosmaab, Eeshuuk Imugaddasaayee itab. Baruuh akraab Aliim ishbibaayt, 10 "Baruuk oobliisi oorwa! Gwisireebwa! Amaagwa, aree tudaayiinaay kastooh tinriiba. Wꞌankwanaay isalala idaayiinaayi kehii whadiidti naadoor isingid tindiya? 11 Wꞌankwana jasaayi hook indi. Door gaal winneet hamasheeshi hook indi, oonuur rhisi hook kiidi." idi.

Gaalhoob, ootaki gwꞌad bꞌaluuk kehii daaya, aree thibinamiyaan. Baruuh shaawti wꞌayi abkiit salooli nafari harawaay doorka jhaatii hiirareeriya. 12 Whaakim toona tutikeet rhiyanihoob, baruuh aamaniya, Wꞌankwanaay ibhaliyi allamtiib winneet ajjabamiya.

13 Baawlooswa yꞌarawaahwa Baafoosii markabtii giigiyaaniit, Baamfiiliyaay teefeet Bargaab iktimna. Beentooy Yuuhanna Maarkoos atoosmaab bareeh imshamaadh aree Algudus ibi. 14 Baraah Bargaay giigiyaaniit, Antaakiyaab Tubiisiidiyaayi ibeen. Tusabti bꞌi Yahuudi diini gaw shuumiyaaniit isꞌana.

15 Muusaay Whaggi Kitaabwa, inabiyaayi kitabwa agriiyaaniit harꞌii, Iyahuudi diini gawi haakma bareeyooh dehaay diigwatiyaan. Baraah "Isanaayaan, bhaliib oodehay isꞌaakakiir tibariineek, anaahookna hadiidaana." idiin.

16 Baawloos ingadaayt, wꞌayiisooh mitiyaaya, malya "Israaꞌiili dehaywa, Ijintiili Ukwaasana yꞌabidwa sinaakirnaheeb! 17 Israaꞌiileeb Ukwaasana hoobeen waasiya, udehayuun Masreeb iifiinihoob bareeh libaabisiya. Yꞌakrireesooh been whaashii isfarꞌa. 18 Fadhig tamuun hawlaab umingaayiib bareeh imtaraam. 19 Malya asaramaat gabiila Kanꞌaaniit kasteeh whaashii kwidhisiyaayt harꞌii, whaashoohna hoobeen yhii. 20 Beet tuuna kastuuh fadhig sheebwa ay tamuun hawlaab hooy tiyhi.

Beenaay harꞌii, unabi Saamuuꞌeeliib udamaan ookiik, udehayoon gaadiyaab yhii. 21 Laakiin uudehay hadꞌaab yhariwna. Oon usabbii, Ukwaasana fadhig tamuun hawlaab Shaawil Giishaay oor Binyaamiiniit tugabiilaatii bareeyooh kehii hadꞌaab ikwaas. 22 Malya Ukwaasana Shaawil giigisiyaayt, Daawid oomhiinooh hadꞌaab ikwaas. Ukwaasana bariiyooh dehaay, ‘Daawid Yassii oor, uginꞌu dehaay rayhamiini. Baruuh kastooh toona ani aharriiweet iitkwikw indi.’ idi.

23 Ukwaasana waadiyaab dꞌiyaabu, ‘Daawidiib indhiwaayee gaal yꞌeetiit Yꞌisraaꞌiili ishidhhiin.’ diyaabu, aree been baruuh Yasuuꞌaab ikati. 24 Laakiin Yasuuꞌa yꞌaab baakaay, Yuuhanna kasseeh Israaꞌiileeb oodehay tuubaatwa atoomsooytwa sooya. 25 Malya Yuuhanna ushanhooh faayisitiib idwilihoob, baruuh ‘Ani aab hiisteenheeb? Ani beeb uudehay sꞌayaamiiniyeeb hiisteena han? Baruuh anii harꞌii yꞌiini hookna. Ani tigidhꞌaateeh ahankwiireet toona han kaꞌastehalan.’ idi.

26 Yaa isanaayaan, Ibraahiimi ar, baraak Ukwaasana ireekw Ijintiiliiwwa, tuun umidhhaniit diigwat hinee dehaay diigwatamaati. 27 Alguduseeb uudehaywa yhaakmaayaahwa Yasuuꞌaab kanaab kiikeen. Toosabka agriiyeeneeb inabiyaayi bhali afhamaab kiikeen. Aflaay baraah inabiya diyaab iiktiineet toonaatiit Yasuuꞌaab imooraabna. 28 Barooh haay iidirni gwabab miraab biikaayneek han, Biilaatoos barooh iidireet toona hooy yhariwna. 29 Malya kastooh bariiyooh kataabt toona faayisiyaanihoob, usaliibii tikwisiyaaniit miimashiib ibisna. 30 Laakiin Ukwaasana barooh tooyat hooy yakisiya! 31 Malya Yasuuꞌa yꞌaamanaayeeh Jaliilee Algudus ookiik geeb ibeen gwidaat yina dehaay lawiya. Oontꞌa baraah Israaꞌiileeb oodehayi suurii bariiyeeh badehi ikatiin.

32 Ukwaasana hoobeen waadiyaab dehaay yꞌabik. Hinin usakana udaayiib soonayi jillaay tooy neefi. 33 Ukwaasana hinin yꞌareeh, Yasuuꞌaab tuyatii ishidhhanaayt uwaadiyaayooh dehoon itkwikw. Yasuuꞌiib hadiidiiniib tehabayaati kitaabiib, tehabay tumaliyaatiib kataabtu:

‘Baruuk ooroowwa,

amsi ani baabook akati.’ tindi.

34 Ukwaasana Yasuuꞌaab tuyatii yakisiya, aree ugarooyuuh abadan kasuusiya. Ukwaasana diyaab ikatiyeet toonaatiit:

‘Daawid waadiyaayaneet tibaraka timugaddasa, bareekna han iyaaw hookna andi.’ idi.

35 Habayt weenaatiib bak attiyoodiyaatu:

‘Ukwaasana Umugaddasooh Oongaal suus rhisi kiidi.’ tindi.

36 Daawid dhhanii iifiyihoob, Ukwaasana isnaakir. Baruuh iyanihoob, indhiwaay miimashaayeeb itoobaas, aree ugarooyuuh suusiya. 37 Laakiin Ukwaasana tuyatii yakisiyaneeb, ugarooyuuh suusaab kiiki.

38 Aflaay isanaayaan, sinaakirna, Yasuuꞌi geebii idanuubeekna afoomteeneet toona asookiineet aharriiw. 39 Muusaay whag sakaab biikaayeet toona, kassaah uudehay Yasuuꞌaab aamaneen idanuubaahna afoomeen. 40 Inabiya diyaab iiktiineet tuuna dehookna bitꞌakaay, digwagwna! Baraah,

41 ‘Shibibna,

baraakna uudehay Ukwaasanaay kehii kashteena!

Ajjabamaana aree kwidhaana!

Ani idamaneeyookna naat atankwiikw,

baraakna gaal sooyiiniyuukna han

kaꞌaamantaana!’ idiin." idi.

42 Baawlooswa Barnaabaaswa Yahuudi diini gawii itfirꞌana, uudehay bareeh teen teena toosab tooraaw bhaliiyeeneet toona bareeyooh yhariwna. 43 Uudehay idabal ibrarnihoob, gwida Yahuudiiwwa Yahuudiib ikeenwa Ukwaasana yꞌabid baliin bareeh iramna. Baawlooswa Barnaabaaswa bareeh bhaliisamiyaan. Ukwaasanaayt tinꞌima isoorariimneet toona hooy yhariwna.

44 Toosab tooraaw kassaah tumadiinaatiib iifiin uudehay Wꞌankwanaay ibhali isnaakiirni jillaay eeyaan. 45 Laakiin Iyahuud oodehay igwidaab rhiyaanihoob, winneet giiraat itabna. Baraah Baawloos neewiyaana, aree hadiidiyi bhaliiyeebka barooh imꞌakaarna.

46 Malya Baawlooswa Barnaabaaswa gwꞌagwuuyt bareeyooh dehaay igwibiina, "Ukwaasanaay ibhali oodehay eeraw sooyaab baakaay awwal bareekna sooniyeet toonaatu, laakiin baraakna tiribna. Tuun aree baraakna umidhhan udaayim bitꞌastehalayneet toona sootni. Oontꞌa hinin Ijintiili beeti giignay. 47 Een ibhali Wꞌankwana waseeya hoon:

‘Barook idehayaayi nuur akwaas hook,

kassooh toobuuti agiya ookiik tishidhhiina.’ idi." idiin.

48 Ijintiili een ibhali imaasiwnihoob, winneet afirhiyaan. Wꞌankwanaay imaasiwneet toona yhamidna. Aree kassaah uudehay umidhhan udaayimii dehaay waasamaab, Wꞌankwana aamaniyaan.

49 Aflaay Wꞌankwanaay ibhali kassooh whaashiib ibrarna. 50 Laakiin Iyahuudi Ukwaasana iriikwt teemꞌa tifagaraawwa, tumadiinaati suurkinaawwa isbibna. Baraah Baawlooswa Barnaabaasi kehiiwwa amaag waraab yayakisiyaana aree bareeh whaashiisoohna isfarꞌana. 51 Aflaay Baawlooswa Barnaabaaswa whaash tigidhꞌaateeyoohna falfuut dehaay infishna. Beet tuuna aree raab mitiyaatni. Malya tumadiina Ikoonyoom ookiik giigiyaan. 52 Aree ikwiriyaatay winneet afirhiyaana, aree Eeshuuk Imugaddasa itabna.