1 Baawlooswa Barnaabaaswa Ikoonyoomiib Yahuudi diini gawiib suureet hooy bhaliiyaan. Baraah beentooy oodehay akraab bhaliisamiyaan. Antaakiyaay daayaaneeb ishagaayoohna, tooy han idꞌiin. Aree gwida Yahuudwa Jintiiliiwwa aamaniyaan. 2 Laakiin Iyahuudi wꞌaamanti ribaab, yꞌaamaniinnaayi kehii Ijintiili isbibna. Bareeyeehna iginꞌa imigna. 3 Baawlooswa Barnaabaaswa beentooy gwida damaan isꞌana. Baraah Wꞌankwanaay ibhali winneet ashꞌaraa hadiidiin. Wꞌankwana bareeh mꞌuujisaatwa ajaayibwa haay iikwsiini akrir yhii. Ibhaliyaahna sidik iiktiineet toona tinꞌimaateesooh han rhisiya. 4 Laakiin tumadiinaati dehay malu mhiin yꞌadhadhna. Gali Iyahuudi geeb ingadna, aree wari Ilinguumiyaayi geeb ingadna. 5 Malya Yahuudiiwwa Ijintiiliiwwa gali isuurkinaayeesoohna hiddaab maagnaayt imkirna. Baawlooswa Barnaabaaswa amaag iiwriineena ikwinna. Aweeyee raajamootiib yhariwna. 6 Laakiin ilinguumiya toon toona ikanneet tumasaafa, Liikaaꞌooniyaayt timadiina Liistaraawwa Darbaawwa oodar iifiib whaashwa beeti ifoorna. 7 Baraah beentooy usakana udaayiib bhaliiyaan.

8 Liistaraay tak iragada amꞌadhdhaab iiktiini iifi. Uun baruuh tꞌamꞌadhdhooy haay faraayu, door han hiireeraab kiiki. 9 Been uutak Baawloos bhaliiyee imaasiw. Baawloos ootak akraab ishbib. Bariiyooh iimaan rhiya, aree mheelamiiniyeet toona ikan. 10 Barooh waliikiyaayt, "Asti gadaa!" idi. Uutak asti fariyaayt hiireertiib badooya.

11 Uudehay Baawloos idꞌiyeet toona rhiyaanihoob, Liikaaꞌooniyaay ibhaliyee waliikiyaana, "Isanama aadamiyaab ikeeniit ikwibarni eeyaan hoon!" idiin. 12 Baraah Barnaabaas Safas isimna. Aree Baawloos winneet hadiidanaabuuyt Harmees isimna. 13 Safasiib ufagiiri, udiini gawuuh tumadiinaatii barraab iifiyeeb, baruuhwa uudehaywa bareeyooh dehaay karaamaat yhiridni jillaay, yoobwa hindi faari tajwa tumadiinaati dheefa beeti haay eeyaan.

14 Laakiin ilinguumiya Barnaabaaswa Baawlooswa beet toona imaasiwnihoob, yhalakaayeehna batakiyaaniit oodehay ookiik waliikee dhaabiyaana: 15 "Yꞌarawaan, toon toona naanhooy tidꞌiina? Hinin bareekna tꞌiiti aadamiyaaba. Teena titakwi baabariint ishtiit, Ukwaasana udhhaniinaay dehaay titꞌagiirni jillaay, usakana udaayiib soonay hookna. Ukwaasana toobuutwa, teebreewwa, oobharwa, tehooy teefi kastoohwa ikwaas. 16 Suur Ukwaasana kasseeh idehaya whaaliyoohna yꞌish idꞌi. 17 Laakiin baruuh ugarooyooh badehaat anu ishaab kiiki: baruuh daayiinaayt shagaamiyaayt, iifiyeet toona bareeh rhisiya. Ukwaasana teebri bireesiit wharrooyookna udooriyooh yaksiini. Gwidaat mꞌari iniiw hookna aree iginꞌaayeekna afirhisiini." idiin. 18 Barnaabaaswa Baawlooswa een ibhali idiineek han, uudehay masi bareeyooh dehaay karaamaati haruud yhariwna.

19 Antaakiyaaywa Ikoonyoomeewwa Yahuudi gali eeyaaniit oodehay geeboohna isingadna. Baraah Baawloos aweeyee geediyaana, malyaab ayaab hiisiyaaniit tumadiinaati irfifni giigisiyaan. 20 Laakiin ikwiriyaatay Baawloosi kwayaay ingadna. Baruuh yakiyaayt tumadiina beeti yꞌagar. Tooyin tooraaw baruuhwa Barnaabaaswa Darbaab ibeen.

21 Baawlooswa Barnaabaaswa tumadiina Darbaay usakana udaayiib sooyaana, aree gwida dehay Wꞌankwana aamaniyaan. Malya Liistaraawwa, Ikoonyoomwa, Antaakiyaawwa ookiik yꞌagarna. 22 Beentooy baraah ikwiriyaatay isꞌaakakirna, wꞌiimaanoohna isoorariimneet toona sooyaana: "Ukwaasanaayt tehadꞌaayeeti shuumtii dehaay ibakii gwida gwirha nimgwarheet toonaati." idiin. 23 Baawlooswa Barnaabaaswa han kaniiseetka eegrimaab dehaay waasiyaan. Malya mꞌariit tamaab baakaay giigiyaan. Siileeleewwa baaskiiteewwa bareeh Wꞌankwana wꞌaamaniyaaneeb isigwꞌadna. 24 Malya Baawlooswa Barnaabaaswa Biisiidiyaay iibaabiyaaniit, Baamfiiliyaab iktimna. 25 Baraah tumadiina Bargaay usakana udaayiib sooyaan. Malya Attaaliyaab beeti hoogiyaan.

26 Malya baraah markabt yꞌamniit Antaakiyaab beeti yꞌagarna. Baraah oontꞌa faayisiyaaneeb ushaga iitkwikwni jillaay, yꞌaamanana beentooy iifiin Ukwaasana bareeh eeshtiimeet toona hooy yhariwna. 27 Antaakiyaab iktimni harꞌii, yꞌaamanana idbilniit, Ukwaasanaayt shamaamtii dꞌiyaab iiktiineet teena kasteeh sooyaan. Ukwaasana kak Ijintiili aamanisiyaneet toona han sooyaan. 28 Baraah beentooy gwimadt midda yꞌamananaayi geeb isꞌana.