1 Da gali Yahuudaay Antaakiyaab beeti eeyaaniit yꞌaamanana allamiina, "Muusa allamaab iiktiyeet tehayꞌaatii itkwishibna bitdiineek, midhhan imaar kitdiina." iidna. 2 Een ibhaliyi sabbii, Baawlooswa Barnaabaaswa bareeyooh geeb akra amgwasuura ikwaasna. Aflaay Baawlooswa Barnaabaaswa wari aamananaawwa yakiit ilinguumiyaawwa tukaniisaati eegrimaayi geebwa hadiidiini jillaay, Algudus istoobna. 3 Aanda tukaniisi diigwattaneeb Fiiniigiyaaywa Saamiraaywa hasamiinihoob, Ijintiili Ukwaasanaay dehaay kak yꞌagarneeb oodehay sooyiin. Uun usakana aree Ukwaasanaay yꞌaamanana kasseeh winneet afirhisiya. 4 Aanda Algudus iktimnihoob, tukaniisaati dehaywa, ilinguumiyaawwa yꞌeegrimaawwa bareeh daayiib yꞌashishna. Baraah Ukwaasana dehaay idꞌiyeet toona kastooh bareeyooh dehaay hadiidiyaan.

5 Laakiin shalik Fariisi Wꞌankwana aamanaab iifiin. Baraah yakiyaaniit, "Ijintiili Wꞌankwana aamaniyaan ibakii itkwashiibneet toonaati. Aree Muusaay ooktaab haay shagaameeneet toonaati." idiin.

6 Ilinguumiyaawwa tukaniiseeti eegrimaawwa toon toonaatiib hadiidiini jillaay immarraayna. 7 Gwida had bhaliiyaani harꞌii, Bitrus bareeyooh dehaay, "Yaa isanaayaan, shꞌiika Ukwaasana gwadib hookna waasiya. Ijintiili usakana udaayiib aniib uyafii maaswiit han aamaneen. 8 Ukwaasana oodehayi ginꞌaayeeb teefeet toona ikteen. Ijintiili oon hineet bareeh han Eeshuuk Imugaddasa yhiit agbiliya. 9 Ukwaasana hininwa bareehwa farig ibitkeen dꞌiyaab kiiki, aree iginꞌaayeehna wꞌiimaanii isinhas. 10 Oontꞌa een ikwiriyaatayi kehii hasaal dꞌiit naanhooy Ukwaasana jarrabteena? Been whasaali yakisti hinin kaꞌadgirna, hoobaan han kaꞌadgiriyaan. 11 Laakiin Wꞌankwanaayoon Yasuuꞌiit tinꞌimaatee nidhhaneet toona aamannay. Ijintiili han bak idhhanna." idi.

12 Barnaabaaswa Baawlooswa timꞌuujisaateet alaamaawwa tꞌajaayibwa Ijintiili bitik Ukwaasana bareeyooh geebii ikwaaseet hadiidee imaasiwnihoob, kassuuh umajlis diniyaan. 13 Baraah ibhali faayisiyaanihoob, Yaaguub hadiidiya, "Yaa isanaayaan, sinaakirnaheeb! 14 Ukwaasana Ijintiilee dehaay awwal eeyaayt, kak galib bareesooh dehayooh ikwaaseet toona Siimoon sooya hookna. 15 Inabiyaayi bhali aree ooktaabiib kataabt toonaatiit ikatiin. Uuktaab indi:

16 ‘Ani Wꞌankwana, oonaay harꞌii itꞌigir andi,

aree Daawidiib oogaw udhibaab masi iidꞌir andi.

Toona tikatꞌamaat masi iidꞌir andi,

aree masi iitkwikw andi.

17 Malya uudehay aaraw han Wꞌankwana yhariwna,

aree kassaah Ijintiili aniib oosim yakseen,

indi Wꞌankwana baliit teena ikwasiib.

18 Wꞌankwana baliit teena shꞌiika isookin.’ indi.

19 Aflaay aniib irꞌayeeb, Ukwaasanaay dehaay itꞌagiir Ijintiili kehii akra rabi bandaasayeet toonaati. 20 Laakiin bareeh jawaab dehaay kitibtiit waseenayeet toonaatu, isanama dayꞌaab ikatiineet timꞌari biitamayneet toona ibakii soonay, oojkuunii itꞌafiineet toonaatu, sikuutii atoodiraab ureewiit tooshaawwa oobooywa biitamayneet toonaati. 21 Muusa shꞌiika kasteeh timadiinaateeb bhaliiya. Utooraat toosabka Iyahuudi diini gawaayeeb agriimamiya." idi.

22 Malya ilinguumiyaawwa yꞌeegrimaawwa kassaah tukaniiseeti dehaywa daab gwadib waasiyaaniit, Baawlooswa Barnaabaasi geeb Antaakiyaab ookiik giigisiyaan. Baraah Wꞌankwanaay yꞌaamananaayi bitik winneet hamooysama da maloob waasiyaan. Yahuuda (Baarsaabbaas) atoosmaabwa Siilaaswa waasiyaan. 23 Malya baraah oon ujawaab iktibna: "Hinin ilinguumiyaawwa yꞌeegrimaawwa, isanaayaakna, kasseekna Ijintiili Wꞌankwana aamaneen Antaakiyaay eefeenwa, Suuriyaay eefeenwa, Kiiliikiyaay eefeenwa tishboonay salaamnay hookna. 24 Daab gali hinee giigiyaaniit amag bhaliyee isehasneetookna toona nimaasiw. Laakiin bareeh hinin giigsaab kinki. 25 Aflaay hinin nimmarraayiit kassaan daab galib waasna. Een bareeh Yꞌaraween ifagara Baawlooswa Barnaabaasi geeb dehookna diigwattiib nimkir. 26 Aan aanda Wꞌankwanaayoon Yasuuꞌaab Umasiihiib oosmi jillaay ishuukeehna bidhꞌiib dꞌiyaaba. 27 Shaawti hinin han Yahuudaawwa Siilaaswa diigwatnay. Baraah hinin niktibeet toona aakna iyafaayeesooh sooyeen hookna. 28 Hininwa Aashuuk Imugaddasaawwa tuwaajibtiyookna kehii masi weer rabi kehookna bandaasayeet toona daayiit hiisnay. 29 Laakiin baraakna isanama attiyeewiyaat timꞌari ibakii baatamaana. Toosha uubooy kehii eefiyeet baatamaana, tari ooreew sikuutii atoodiraanaayt toosha baatamaana, baajakiinna. Teen bateeh timooriibneek, daayiib ishbuub tiyadna. Uuraaw umidhhanookna!" idiin.

30 Aanda Algudusee giigiyaaniit Antaakiyaab ibeen. Malya tukaniiseeti da majlisii dehaay waliikiyaaniit ujawaab yhiin. 31 Ujawaab agriimamiyanihoob, uudehay kassaah tisꞌakrooytiit diigwattiib winneet afirhiyaan. 32 Yahuudaawwa Siilaaswa aakna nabiyaaba. Gwida doora Wꞌankwana aamaniin oodehay gwidaana sooyiina aree isꞌikirna. 33 Yahuudaawwa Siilaaswa shalikt midda Antaakiyaay isꞌana. Malya eenda ibareeh diigwataab beeti itꞌigirnihoob, yꞌaamanana bareeh umꞌasgii ideharniit giigisiyaan. 34 Laakiin Siilaas beentooy mhaayiib yhariw. 35 Baawlooswa Barnaabaaswa Antaakiyaay imhiin. Beentooy baraahwa gwidaab waribwa Wꞌankwanaay ibhali allamiyaana aree bhaliiyaan.

36 Shalik doori harꞌii, Baawloos Barnaabaasii dehaay, "Agartiit kasteeh timadiinaateeb Wꞌankwanaay ibhali sooniyeeb yꞌaamanana niibi. Shaawti baraah kak eefeeneeb nidaal." idi. 37 Barnaabaas, Yuuhanna "Maarkoos" atoosmaab bareeyooh geeb giigiyeet toona yhariw. 38 Laakiin Maarkoos suur bareeh Baamfiiliyaay yꞌish hooy giigaa iifi, ushaga bareeyooh geeb soorarmaab kiiki akay, Baawloos barooh iitrameet toona hariwaab kiiki. 39 Baawlooswa Barnaabaaswa winneet imgwassaarna. Malya imshammaadhna. Barnaabaas, Maarkoos iyhaayt falluukaatii Gubrus beeti giigiya. 40 Laakiin Baawloos Siilaas waasiyaayt giigiya. Yꞌaamanana bareeh Wꞌankwanaayt tinꞌima isehasibniit giigisiyaan. 41 Baruuh Suuriyaawwa Kiiliikiyaaywa yhash beeti iibaabiya, aree tikaniisa isꞌaakakir.