1 Shaawil Wꞌankwanaay ikwiriyaatay madaree ifik. Malya ufagiiri oowin ibi. 2 Iyahuudi diini gawa Dimashigeeb iifiinnee dehaay jawaabi kituub hooy yhariw. Baruuh beentooy Wꞌankwanaay usalaliib iifiin, mꞌatwa daabwa hagtaab iiktiineek, bareeh aabiktiit Alguduseeb yhibseet toona yhariw. 3 Shaawil Dimashig idwili mhiin, gaalhoob talaw tibreetee oodar talawiya. 4 Baruuh whaashi kehii dhibiya, malya "Shaawil! Shaawil! Naanhooy amaag tiwariyaheeb?" indi hiss imaasiw.

5 Shaawil "Wꞌankwanaay, baruuk aabwa?" idi.

Whiss "Ani Yasuuꞌaab baruuk amaag tiwariyeebu. 6 Oontꞌa yakaat tumadiina shuumaa, ibakii toona tudaatiniyeet soomami tindiya." idi.

7 Shaawili geeb iifiin aanda naat igamniit ingadna. Whiss imaasiwna laakiin tak han rhaab kiikeen. 8 Shaawil whaashii asti ingadaayt igwꞌadeeh ingilihoob, shaawti hamasheeya naat rhaab kiiki. Aflaay barooh Dimashig ookiik salooliyaan. 9 Mhay bꞌi hamasheeya, tamaab kiiki, tari gwꞌaab kiiki.

10 Beenhoob Dimashigeeb kwiriyaataayi gaal Hanaaniya iidneeb iifi. Wꞌankwana barooh rheeb dehaay lawaa iifi, "Hanaaniya!" idi.

Hanaaniya "Wꞌankwanaay, ani tooy eefi." idi.

11 Wꞌankwana "Yakaat Usalal Ufadhaadh ittiyoodiib abikaa, beentooy kantiimihoob Shaawil ittiyoodi tak Yahuudaay indhiwaayee ikatiib imaar tindiya. Baruuh tumadiina Tarsuusee ikati. Baruuh beentooy siileeliini. 12 Baruuh hawsooteeb tak Hanaaniya atoosma rhaabu, aree uun uutak yꞌiit yꞌayeeh bariiyooh kehii daasiini. Aflaay baruuh rhi indi." idi.

13 Hanaaniya "Wꞌankwanaay, uun uutak Alguduseeb yꞌaamananaayeek idꞌiyeet toomaag aneeb gwida dehay sooyaanheeb. 14 Oontꞌa aree ifagiiriya isuurkina bariiyook oosmii siileeliiniibka oosjin haay shuumsiiniyeet hadꞌaayi hiiyyaabayt tooy yꞌaabi." idi.

15 Laakiin Wꞌankwana bariiyooh dehaay, "Difaa! Oon ootak oodehay igirbaabwa, yhadꞌaawwa, Yꞌisraaꞌiili dehaywa aniib oosmii bhaliisamiiniyi jillaay ani waasaabi. 16 Aniib oosmii anbiidee dehaay kak haddi gwirha ibakii hooy daayi iyadneet toona ani rhisi andi." idi.

17 Hanaaniya giigiyaayt oogaw shuumiya. Yꞌayeeh Shaawili kehii daasiyaayt, "Shaawil usanuun, usalaliib dehook lawiyaab Wꞌankwana Yasuuꞌa diigwatiyaheeb. Aflaay baruuk masi rhi tindiya aree Eeshuuk Imugaddasa iittab tindiya." idi. 18 Bariiyeeh igwꞌadee gaalhoob shadhiidh tꞌiiteena dhibtaayt baruuh shaawti rhiya. Beenhoob Shaawil yakiyaayt itoomaas. 19 Malya baruuh mꞌariit tamiyani harꞌii daayiib kwatiimiya. Aflaay Shaawil bꞌeeb galib ikwiriyaatayi geeb Dimashigeeb isꞌa.

20 Malya willa Iyahuudi diini gawaayeeb allamiya, "Yasuuꞌa Ukwaasanaay Ooru." iid. 21 Uudehay barooh imaasiw kassaah ajjabamiyaaniit, "Uun uutak Yasuuꞌi simii siileeliini, eenda Alguduseeb amaagna oodehay rhisaab barooh kiiki han? Tooy oodehay aabkiit ifagiiriya isuurkina istuubi jillaay yꞌaab kiiki han?" idiin. 22 Laakiin Shaawil gwidakaat akraatii waliikiya aree allamiya. Yasuuꞌa Umasiih iiktiyeet toona daayiib isookin. Dimashigeeb iifiin Iyahuudi aree naat isoogim.

23 Malya gwidaat yinaati harꞌii, Iyahuudi Shaawili madar niyaamiyaan. 24 Laakiin Shaawil beet toona soomamiya. Bariiyeeh madari harawaay oombꞌeewwa whawaadwa tumadiinaati dheefa iigwꞌadneet toona ikan. 25 Laakiin yꞌarawaah barooh whawaadiib biileeb winnaay daasiyaaniit teheetaati mooyii nꞌati tikwisiyaan.

26 Shaawil Algudus iktimihoob, ikwiriyaatayeeh iitrameet toona jarrabiya. Laakiin baraah kassaah barooh irkwiin. Baruuh sidik kwiriyaataayiib iiktiyeet toona aamanaab kiikeen. 27 Malya Barnaabaas barooh ilinguumiyaayee dehaay haay eeya. Shaawil kak usalaliib Wꞌankwana rhiyaneet toona bareeh sooya. Wꞌankwana aree kak barooh bhaliisamiyaneet toonaawwa, Dimashigeeb iifiyihoob mirkwaay anu Yasuuꞌiib oosmii hadiidiyaneet toonaawwa han bareeh sooya. 28 Aflaay Shaawil bareeyooh geeb isꞌa, Alguduseeb hiirareeriya. Oodehay kasseeh Wꞌankwanaay oosmiib gwꞌagwuuyt sooya. 29 Baruuh diima Iyahuudi Iyoonaani bhali hadiidiin imgwisir akay, baraah barooh madar yhariwna. 30 Yꞌaamanana beet toona ikannihoob, Shaawil Gaysariyaab beeti giigisiyaan. Aree beentooysii tumadiina Tarsuus istoobna.

31 Tukaniisa kastuuh Yahuudaaywa, Jaliileebwa, Saamiraaywa tiifiit mꞌasig timri. Aashuuk Imugaddasa batooh isꞌakirna aree ishamna. Tukaniisi yꞌadadaah guudiyaana, aree Wꞌankwanaay mirkwaayiib tikwiri.

32 Bitrus haash haashii iibaabiya. Ukwaasanaay yꞌaamanana Luddaay iifiin ibi. 33 Beentooy tak Eeniyaas iidneeb imri. Uun uutak asimhay hawla lhaa iifi, whiireer kaꞌadgiriya. 34 Bitrus Eeniyaasii dehaay, "Yaa Eeniyaas, Yasuuꞌa Umasiih mheeliya hook! Yakaa, oonꞌaalook tikwikwaa." idi. Uun uutak gaalhoob yakiya. 35 Kassaah uudehay timadiina Luddaabwa Shaaroonwa ikwiir, Eeniyaas rhiyaaniit Wꞌankwana aamaniyaan.

36 Yaafaay aamananaat Taabiitaab iidneet tiifi. Iyoonaani bhaliyeeb oosmooh Doorkaas iidna. Doorkaas "Ganaayt" miyaadi. Batuuh kassoohoob oodehay daayiinaayt tiiwri. Oodehay yhamraab han tiishtam. 37 Batuuh laakiin lhitaayt tiya. Malya batooh ishaagwidhniit amaaraati gaw mhakwaliinaayiib daasiyaan. 38 Yaafa Luddaay daraag tiifi. Aflaay ikwiriyaatay Bitrus beentooy iifiyeet toona imaasiwnihoob, malu da dehaay diigwatiyaaniit, "Willa mꞌaa hoon!" idiin.

39 Bitrus willa bareeh iram. Aanda Bitrus tꞌamaara oodoor umhakwaliib haay reewiyaan. Gwidaat mꞌat ibraatfaatkiit waawee dehaay eeyaan. Doorkaas ayaat baakaay bateeyooh dehaay dꞌiyaat tiiktiyeeb yhalakaawwa igamiswa barooh rhisiyaan.

40 Bitrus oodehay kasseeh oogawii barraab isfarꞌa harꞌii, ignafaayt siileeliya. Malya Doorkaasiit tuginaadaatiib nakamiyaayt, "Taabiita yakii!" idi. Batuuh igwꞌadeeh tingil. Bitrus rhitanihoob, shaawti tisꞌa. 41 Baruuh wꞌayi yꞌabikaayt iragadaayee dehaay isingad. Bitrus teemꞌat tꞌibraatfaatki waliikiya, yꞌaamanana eeraw han waliikiya. Malya Doorkaas tooyat hooy tidhhaneet toona rhisiya. 42 Yaafaay iifiin uudehay oon usakana imaasiw, gwida Wꞌankwana aamaniyaan. 43 Bitrus Yaafaay tak sar maaltiib Siimoon iidneenaay gawiib middaat yhagit.