1 Baawlooswa yꞌarawaahwa Amfiibooliiswa Aboollooniyaaywa iibaabiinihoob, Tasaaluuniikaab ibeen. Beentooy Yahuudi diini gaw iifi. 2 Baawloos suur sakiyeet toonaatiit beentooy ibi. Mhayt Sabtaat aree oodehay ooktaabii bhaliisamiya. 3 Baruuh Umasiih ibakii lhamiiniyeet toona oodehay rhisi. Malya tooyat hooy yakiyaneet toona sooyi. Baawloos masi Yasuuꞌa, baruuh hooy hadiidiyaneeb Umasiih ikatiyeet toona han sooyi. 4 Gali bareesooh Baawloos iideeb ibhali aamaniyaaniit, Baawlooswa Siilaaswa iramna. Gwida Ukwaasana iriikw Yoonaaniibwa, gwidaat fagaraat mꞌatwa han ibhali aamaniyaan.

5 Laakiin Iyahuudi hasaadaat idꞌiin. Aflaay shalik amaag dehay usuugii ishaawawiiniit tumadiinaatiib ribshaayt idꞌaneet toona sooyaan. Baraah Baawlooswa Siilaaswa oodehayi majlis nuuntiib yhiriwnayt, willa Yaasooniib oogaw ibeen. 6 Laakiin bareeh beentooy inawnihoob, Yaasoonwa Wꞌankwanaay aamanana gwadibwa rarhoofiyaan. Bareeh yꞌabikna, tumadiinaati hadꞌaayi suurii isingadniit, "Aan aanda kasseeh yhasheeb ribshaayt ikwaas oontꞌa tooy yꞌaaba. 7 Aree Yaasoon bareeh ugawiyooh yhadar. Baraah kassaah Gaysar Iroomaani bhali kiisinaakirna, masi Yasuuꞌa ittiyoodi gaal weer hadꞌa eefi iyadna." idiin. 8 Yhaakmaawwa uudehaywa een ibhali imaasiwnihoob yhaseen. 9 Malya Yaasoonwa yꞌaamanana eerawwa damaanaati mhallaga iskwasniit ifdigna.

10 Been whawaadiib yꞌaamanana Baawlooswa Siilaaswa Beeriiyaab beeti ifdigna. Beentooy iktimnihoob, Yahuudi diini gaw ibeen. 11 Uudehay Beeriiyaay iifiin Tasaaluuniikaay udehayiika daayikaabayt, afirhaa ibhali isnaakirna. Ibhali baraah iidneeb sidik iiktiineeb biikaayneeb iishbibnee dehaay bꞌeebka ooktaab agriiyaan. 12 Gwida Yahuudi Ukwaasana aamaniyaan. Aree Yoonaanee fagaraat mꞌatwa gwida daawwa han aamaniyaan.

13 Iyahuudi Tasaaluuniikaay iifiin, Baawloos Ukwaasanaay ibhali Beeriiyaay oodehay sooyiini miyaad imaasiwnihoob, oodehay Baawloosiib isbibniit gwirhaab idꞌiin. 14 Yꞌaamanana willa Baawloos oobhar dawil mhiin istoobna. Laakiin Siilaaswa Tiimootiiwwa Beeriiyaay isꞌana. 15 Shalik da Asiinaab ookiik Baawloos iramna. Malya yꞌagarniit Siilaaswa Tiimootiiwwa willa barooh eenkiibneet toona sooyaan.

16 Baawloos Asiinaay bareeh yhigitihoob, tumadiina sanamaab ataabt akay rhiyaayt winneet yhasi. 17 Aflaay baruuh Iyahuudiibwa Ukwaasana iriikw Iyoonaani geeb bhaliisamti jillaay, Iyahuudi diini gaw ibi. Bꞌeebka aree usuugiib imiireeb oodehay bhaliisamiya.

18 Gwadi Abiigooriyaawwa Istoowaawwa falaasifa han barooh imgwasaarna. Baawloos Yasuuꞌiib usakana udaayiibwa tuyatii uyaktiibwa hadiidi. Gali barooh raatiyaana, "Uun whaalay kak indi?" idiin. Aree aaraw "Baruuh wari ankwana atꞌiimiini!" idiin.

19 Malya baraah Baawloos Aryuubaaguus iidni majlisi suurii haay eeyaaniit, "Naan gayiina agriistiniya oontꞌa sooyaa hoon? 20 Girbaana hadiidee nimaasiw hook, oontꞌa naan haay tisehariiweeb kanaant nhariw, sooyaa hoon." idiin. 21 Kassaah Asiinaay uudehaywa, beentooy ikwiir uudehay igirbaabwa, idamaneehna weenaatiib kwidhsaab kiikeen. Laakiin baliit teena tigayiinaateeb hadiidiyaana aree isnaakirna.

22 Oontꞌa Baawloos Aryuubaaguuseeb oodehayi suurii ingadaayt, "Yaa Asiinaay uudehay! Bareekna diini dehay akay rhani hookna. 23 Ani tumadiinaatiib hiireeran, baraakna tꞌabidneet teena han ashbib. Karaamaati mhiin gaal rhan, bariiyooh kehii ‘Ukwaasana wꞌatoogagmaay dehaay’ miyaad kataabi. Baraakna barooh tꞌabidna laakiin baruuh sidik aab ikatiyeeb kitkanna. Aflaay oon barooh sooyi hookna andi.

24 Uun Ukwaasana tuduniyaawwa kastooh hooy teefeetwa ikwaas. Baruuh toobuutwa tibreeti Ankwana ikati, aree dehayi ayi shagaamaab ikatiini diini gawaayeeb kiikwiri. 25 Baruuh dehayii shamaamt kiihariw. Kasseeh oodehay midhhanwa, yhamshukwwa, weenaawwa iniiw. 26 Oodehay kasseeh tubuutiib eefeen Ukwaasana gaal takii ikwaas. Kassaah aan uudehay nhoobwa naadwa ikweerneeb aree whankaay sooya. 27 Ukwaasana toon kastooh dꞌiyaabu, shaawti hinin aree barooh nhariw, niiktim niyad, nimaar niyad. Baruuh hinee gaalnaay han sagiib kiiki. 28 Baruuh umidhhan iniiw hoon, hantaaysiini hoon, isfaayi hoon. Ilabiibaayaakna gali ‘Hinin han dirriyaaytooh nikati!’ diyaaba.

29 Hinin Ukwaasanaay ara. Aflaay barooh dimꞌaraaywa ashteetiiwwa tari aweeyeewwa dehay shagaamaab ikatiineeb, yꞌista yhariwneet hayꞌaatiika idꞌani sanam hiisnayeet tuuna daayiit kitti. 30 Uudehay suur gamaamtiib iifiinayt, Ukwaasana bareeh afooya. Laakiin oontꞌa Ukwaasana uudehay kassaah eefeeni mhiiniika ibakii bariiyooh dehaay itꞌagiirneet toona waliikiini. 31 Baruuh oodehay wꞌadlii haakamiiniyeet yint gaat waasiya. Beet toona aree tak dehaay waasiya. Wꞌankwana barooh tuyatii yakisiyaayt beet toona kasseeh oodehay rhisiya." idi Baawloos.

32 Uudehay Baawloos tak tuyatii yakiya diyee imaasiwnihoob, gali ifaayidna. Wari aree "Weer door een ibhali masi hadiidtiniyeet toona hook nhariw." idiin. 33 Baawloos been umajlisii aree bak giigiya. 34 Shalik da Ukwaasana aamaniyaaniit Baawloos iramna. Gaal bareesooh umajlisi eegrimaayeeb gaalu, aree Diyooniisyoos iidna. Daamaariis iidneet takatwa waribwa han Ukwaasana aamaniyaan.