1 Ubharii Itaalyaay mabay niyaamamiyanihoob, Wꞌimbiraatoor Agustusiib udheeshiit tukatiibeeti daabit Yuuliyoos iidneeb, Baawlooswa yꞌabuukiya eerawwa isigwꞌadna. 2 Adraamiitiyuumee markabt nꞌam. Aasiyaay ubhari dar iifiint timiinaati mabayee dehaay nimar. Ariistaarkoos, tumadiina Tasaaluuniikaab iikti Magadoonyaayi han geeboon tumarkabtiib iifi.

3 Tooyin tooraaw Siidoon niktim. Udaabit Yuuliyoos aree Baawloos winneet daayiib imshabaab. Baruuh masi Baawloos yꞌaraweeh han rhisiya. Aflaay yꞌarawaah baruuh shanha iiktiyeena iyiwni jillaay rhisiya. 4 Siidoonii giignanihoob, ubaraam harꞌa imuutir hoon. Ubaraamii niidhhini jillaay Tugadiiri Gubrusi harꞌiisii iibaabna. 5 Malya Kiiliikiyaay whaashii Baamfiiliyaay oosꞌiid beeti iibaabna, tumadiina Miiraab Liisiyaay whaashiib teefeet niktimeeb ookiik iibaabna. 6 Beentooy udheeshi daabit markabt Iskandariyaay Itaalyaab tiibiit imri. Aflaay baruuh tumarkab isꞌam hoon.

7 Gwidaat yina diiseet ubharii sakna. Malya tꞌakraati gidehii Kiniidoos niktim. Ubaraam beet toojha sikatimaayoon kiiki. Aflaay tugadiiri Kireeti sꞌiidii giigna, tumadiina Raas Salmoonee hasamna. 8 Ubhari daraagii diiseet iibaabna. Malya tumadiina Lasaaꞌiyaab dawil mhiin iifi haash Timiina Tidaawriit iidneeb niktim.

9 Oontꞌa gwidaat midda hassina, tꞌiibaab han shaawti asgaat kitti. Tubaaski han hasamaa tiifi. Malya Baawloos bareeh bhaliisamiya, 10 tumarkabti shagaamanaayee dehaay, "Aandaay, sinaakirnaheeb! Hallaay giignayeek, tumarkabwa igadhꞌaahwa katꞌami iyadna. Gwida shuuk han dayꞌameen." idi. 11 Laakiin udaabit Yuuliyoos Baawloosiib ibhaliiyeeka, tumarkabti hiireersanaawwa wꞌankwanaayoohwa isnaakir.

12 Beet tumiina oowiyaay door daayiit kitti. Oon usabbii, kassaah uudehay tumiina Fiiniikis iiktimneet toona minniimiyaan. Beentooy oowiya hassiineet yhariwna. Beet tumiina Kireeteeb tiifi, oowiyaay door oosꞌiidi yindhibwa, tugiblaati yindhibwa beeti titnigil.

13 Oosꞌiidiit jhaatii ubaraam diiseet iniifihoob, aanda aflaay baraah niyaamaab iiktiineet Fiiniikis beeti iigwshisheeb hiisiyaan. Aflaay baraah tumarkab hayaaysitiit di yakisiyaaniit, Kireeti daraagii iibaabiyaan. 14 Laakiin shalik doori harꞌii akra baraam, "Tugiblaati Yintalawiyaay" iidneeb, tugadiireetii imꞌakaari infi hoon. 15 Ubaraam tumarkab ithꞌa, hinin aflaay ubaraamiit tꞌamꞌakrooy adgiraab kinki. Aflaay hinin nigwooy, ubaraam ifiyak hoon. 16 Dist gadiiri, Kuuda iidneet dawil mhiin beeti hasamna. Ubaraamii niidhhini jillaay tugadiireeti sꞌiidii hasamna. Tꞌakraati harꞌii midhhaniit markab adhamiit yakisna. 17 Aflaay aanda batooh tumarkabti kehii daasiyaan. Malya tingꞌatee teeyay taktakee dehaay isikwniit iwdidna. Tumarkab Siirtiit tꞌissi amoothꞌat eetni miyaadiib mirkwaay iibriinayt, aflaay teeyaywa umarsaawwa dhoomisiyaan. Ubaraam tumarkab igwishish. 18 Ubaraam winneet akraab iikti, tooyin tumalya shalik rabi hooy igidna. 19 Malya tooyin tumhaya, tumarkabti gadhꞌi yꞌayeesoohna igidna. 20 Ubaraam gwida bꞌi akrakaab iki, tooyin tari yhayikw rhat nirib. Akra baraam iniifayt, hinin shaawti midhhan sꞌaayaamaab kinki.

21 Gwida dooreeka gaal han mꞌariit hoon tamaab kiiki akay, Baawloos ingadaayt eenda sooya, "Aneeb tisniikarneet toonaatu! Kireeteeb hayaayaab tiiktiineek, aan igwirhaawwa tehasarwa dehookna akaa kiidiin. 22 Laakiin ani oontꞌa fagaramtiib asehariiw hookna. Baraak iidhhan tiyadna, tumarkab laakiin katꞌami tindi. 23 Afa Ukwaasana ani bariiyooh akatiyeeb, ushagaamaniyeeb, umalakuuh anii dehaay lawiya. 24 Uun umalak ‘Baawloos, baarikwiya! Gaysari suurii ibakii haakamami tindiya. Bariiyook sabbii aree, Ukwaasana tumarkabtiib geebook iibaabeen oodehay kasseeh ishidhhin indi.’ idiheeb. 25 Aflaay yaa aanda, fagaramaana! Ani Ukwaasana aamanani. Baruuh sooyaab ikatiyeet tuuna iikti tindi. 26 Laakiin tumarkab gadiireet gaanaati haashi kehii ibakii katꞌami tindi." idi.

27 Tamna fadhig bꞌeebwa hawadwa Oobhar Wꞌadriyaayi* kehii ubaraam ifiyak hoon. Laakiin whawaadi tarabeeb tumarkabti shagaamana balama haash dawil niiktiyeet toona eetehakiyaan. 28 Iyami dhoom igilnihoob, aayam fadhig tamuun mitra eetiit masaafa hoogaab iiktiineet toona rhiyaan. Shalikt middaati harꞌii masi igilnihoob, mhay tamuun mitra eebhat akay imriin. 29 Ishagaamana tumarkab liilaaw amoothꞌat eetni miyaadiib irkwiina, uniiwaay fadhig marsa iyameeb igidniit, uumha mhiyeet toona minniimiyaan. 30 Ishagaamana tumarkabtii faraat jarrabiyaan. Umidhhaniit markab tikwisiyaana, tumarkabti daba iifiin imarsa whiisii tikwistiina massalamiyaan. 31 Laakiin Baawloos, Yuuliyuus udheeshi daabitwa, ikajaree dehaaywa, "Tumarkabti shagaamana tumarkabtiib biihagiitneek, ishuukeekna ishidhhin kitdiina." idi. 32 Aflaay ikajar umidhhaniit markabtiib iifiint teeyay katꞌiyaaniit oobhariib dhibisiyaan.

33 Uumha mhaab baakaay, Baawloos oodehay naat tameeneet toona sooya. Baruuh "Tamna fadhigt yina winneet haskaa tiifiina, naat han tamaab kitteena. 34 Oontꞌa naat tamteeneet toona hookna aharriiw. Umidhhanuukna timꞌariitiib eefi. Beet toona sakaana, gaal han hookna lhami kiidi." idi. 35 Baawloos een ibhali idiit harꞌii, hadhiib yakisiyaayt Ukwaasana yhamid. Malya kasseeh oodehayi suurii yhadhi ikitꞌa, aree naat hooy tamiya. 36 Baraah kassaah guugduuseeb idꞌiiniit gaalka naat tamiyaan. 37 Tumarkabtiib 276 dehay iifiin. 38 Malya gaalka tamiyaayt harꞌii, tumarkab shooft iikwsiini jillaay igamhi rabi iyameeb igidna.

39 Uumha mhiya. Tumarkabti shagaamana haash suur biikaanneeb rhiyaan. Laakiin iyami ginnaal wꞌissi hooy iifiyeeb rhiyaanihoob, adgiriineek tumarkab been wꞌissi beeti gwishuush niyaamiyaan. 40 Kasseeh imarsa katꞌiyaaniit iyameeb yꞌishna. Malya yhindi tumarkab haay hiireersiineeb ifaadigniit, suurii iifiin ijillika tageegisiyaan. Malya iyami ginnaal beeti hantaayaan. 41 Laakiin tumarkab whaash tithꞌa tꞌisseeti kehii hantaayta. Aasuur itumarkabti tꞌisseeteeb itbakna, uniiwa aree iyameet mooja katꞌiyaan.

42 Yꞌabuukiya uumiit biifoorni jillaay, ikajar bareeyooh madar niyaamiyaan. 43 Laakiin udaabit, Baawloos ishidhhineet toona yhariw. Ikajar niyaamiyaaneet toona sidꞌaab kiiki. Malya kasseeh wꞌuumti adgiriin, iyameeb fareetiit whaash ubalamaab ookiik hasamiineet toona sooya. 44 Eeraw hindiib tari tumarkabti shidhꞌa gaal abiktiit giigiineet toona sooya. Bak aree kassaah asgaa whaash iktimna.