1 Ay tamuunt yinaati harꞌii wꞌiid eeyanihoob, Ukwaasana aamaniin kassaah gaal mhiin iifiin. 2 Gaalhoob, hiss akra baraam tꞌiiti tibreetee eeyaayt, oogaw hooy iifiineeb itib. 3 Malya nꞌeeti miidalab tari balool kasteeh teejha beeti hiireeriin rhiyaan. Gaalka aree miidalaab kehii ingad. 4 Baraah kassaah Eeshuuk Imugaddasaayee itabna. Wari bhali hadiidiyaan. Aree Aashuuk Imugaddasa hadiidisiyaaneeb ibhaliyeeka hadiidiyaan.

5 Ukwaasanaay mirkwaay iibriin gwida Yahuudi Alguduseeb iifiin. Baraah kasseeh yhashee yꞌaaba. 6 Baraah oon whiss imaasiwnihoob, uudehay immararaayna. Gaalka ibhaliyeeh iknaayee hadiidamee imaasiwna aree winneet ajjabisiyaan.

7 Baraah winneet ajjabsee raatiyaana, "Aan baraah yhadiideen kassaah Jaliilee yꞌaab kiikeena han? 8 Laakiin gaalka ibhaliyeen hadiidee neemsiiweek? 9 Hinee gwadi Fartiiba, gwadi Maadiiba, gwadi Eelaamiiba. Wari aree Iraageewwa, Yahuudaaywa, Kabbadookiyaaywa, Boontuuseewwa, Aasiyaay whaashiiwwa, 10 Firiigiyaaywa, Baamfiiliyaaywa, Masreewwa, Liibiyaab Geerawaaniit tumadiina dawil mhiiniiwwa, Roomaani rheesamanaawwa, 11 (Yahuudwa Yahuudiib akaabwa), Kireetaayiiwwa, Wꞌarabiiwwa yꞌaaba. Bareeh Ukwaasana ikwaaseet tꞌajaayib hadiidee gaalka ibhaliyeesoon nimaasiw." idiin. 12 Gaalka ajjabamiya aree arbishamiya. Gwadi masi taktak raatiyaana, "Tuun naan mitiyaatni?" idiin.

13 Laakiin dehay wari beentooy iifiin bareeyooh ifaayayidna, "Aan baraah askiraaba." idiin.

14 Malya Bitrus ikwiriyaatay itamna gwiri geeb ingadaayt, win hissii oodehay bhaliisamiya: "Yꞌarawaan Iyahuudiiwwa kassaah uudehay Alguduseeb eefeenwa, bak dehookna fassari andi, ani andiyeet toona daayiib sinaakirna! 15 Gwadi bareesookna teekwinneet toona kitti, aan uudehay askiraab kiikeen. Oontꞌa fajiru, tuusꞌa aree ashshadhig toobhaat teefi. 16 Laakiin beet toona turhitaaneet gwidahoob Unabi Yuuꞌeel haay hadiidaabu:

17 Ukwaasana indi: ‘Tꞌaakharaati aambꞌi yꞌeenihoob,

aniib Eeshuuk kasseeh oodehayi kehii iifif andi.

Yꞌaraaknaawwa tꞌartaaknaawwa bhaliib isaridna,

Yhankwilaayaakna eerhi rhi iyadna,

Yꞌeegrimaayaakna hawsoot hawsooyi iyadna.

18 Baliit tiyinaateeb

ani Ishuuki ikishiyaayeewwa tikishiyaateewwa kehii iifif andi,

aree baraah han bhaliib iisrid iyadna.

19 Asti tibreeteeb ajaayibt iikwasi andi,

aree nꞌati tubuutiib alaamaat iikwasi andi,

booywa, nꞌeetwa, kwaraari bꞌaluukwa iikti iyadna.

20 Been Wꞌankwanaay uumbꞌi uuwin umatuun ibari yꞌaab baakaay,

tuuyin thibnami tindi,

tuutirig booy tꞌiiteet adaroot iikti tindi.

21 Wꞌankwanaay oosmii waliikeen baliin kassaah midhhan imaar iyadna.’ indi.

22 Yaa Yꞌisraaꞌiili, Yasuuꞌa Unaasiraayiib hadiidi andiyeet toona sinaakirna. Ukwaasana barooh mꞌuujisaatwa, ajaayibwa, alaamaateewwa ayyadiyaayt dehookna ifdig. Beet toona aree kassaakna tikteenna. 23 Laakiin Ukwaasana toona iikti tiid ikan. Baruuh suur niyaamaab iiktiyeeb uumkir iki. Bareekna amag da gaanuun baabariin ishamniit hookna, barooh usaliibi kehii mismaraayee tithꞌaniit tidirna. 24 Laakiin Ukwaasana barooh tuyatii yakisiyaayt ishidhhan. Tuyattiit lhanaytee isfadig. Tuuyat bariiyooh wꞌabuuk kaꞌadgirta. 25 Daawid bariiyooh bak diyaabu:

‘Ani kassoohoob Wꞌankwana geebu rhani.

Baruuh umaygwadu eefi akay,

ani katati kaadi.

26 Aflaay uginꞌu afirhaabu, umiidalaabu barooh yhammiid,

ugarooyu sꞌayaay ikwaar andi.

27 Baruuk yꞌayaani bitik iiyꞌishheeb kitdiya.

Umugaddasook Oongaal umiimashiib suusiisi kitdiya.

28 Baruuk umidhhani salal rhistaaheeb,

suurook firhaat iitibheeb tindiya.’ idi Daawid.

29 Yaa isanaayaan, hoobuun Daawid iiyaayt itoobaas, aree umiimashuuh amsi ookiik tooy eefi andi hookna. 30 Laakiin baruuh nabiibu aree Ukwaasana bariitooh tidirriyaaytii gaal bariiyooh oomhiin hadꞌaab ikwasiyeet toona iktiin. Ukwaasana beet toona bariiyooh dehaay halafooyaayt waadiyaaya. 31 Daawid tuun akaa tiideet toona iktiin. Umasiihiib ooyak aree hooy hadiidiya. Ukwaasana barooh umiimashiib isha biidiyeet toona tari ugarooyooh suusiisi biidiyeet toona hadiidiya. 32 Ukwaasana Yasuuꞌaab tuyatii ishidhhaneet toona kassaan badehiiba. 33 Ukwaasana barooh tuyatii yakisiyaayt umaygwadooh win mhiiniib isoosꞌa. Ubaaba dꞌiyaab iiktiyeeb uwaadiyaayt Eeshuuk Imugaddasa ittiyeewaayiit aree hini kehii ifif idꞌi. Oontꞌa beet toona baraakna rhiteena aree teemsiiwna. 34 Daawid teebri reewaab kiiki. Baruuh masi een ibhali diyaabu:

‘Wꞌankwana aniib Wꞌankwanaay dehaay:

Wꞌayu umaygwadiinaay sꞌaa!

35 Ani yꞌashooyeek

iragadaayeek whii eetameen akwasiyeeb ookiik sꞌaa.’ idi.

36 Shaawti Yꞌisraaꞌiili kassaakna bak kanna: Ukwaasana oon Yasuuꞌaab baraakna usaliibi kehii tidirneeb Ankwanaabwa Masiihwa ikwaas." idi Bitrus.

37 Uudehay een bhali imaasiwnihoob, baraah akraab gadabiyaan. Bitruswa ilinguumiya eerawwa raatiyaana, "Isanaayaan! Oontꞌa naan nidꞌeet toonaati?" idiin.

38 Bitrus igwibi, "Baraakna Ukwaasanaay dehaay agarna. Yasuuꞌaab Umasiihiib oosmii atoomaasna! Malya tumaagnaaytuukna afoomtini. Aree Eeshuuk Imugaddasaayi miyaaw imaar tiyadna. 39 Uun uwaadiya bareekwa yꞌareekwa, kasseeh baliib isagiib Wꞌankwana Ukwaasanaayoon waliiki indiyeebwa, bareeyookna dehaay daayaabi." idi.

40 Bitrus masi bareeh gwida bhali warib han sooya. Malya baruuh "Oon ootaas toomaag shagaameen ugarooyookna hooy shidhhanna." idi. 41 Been oombꞌi mhay alfa iiktiin dehay hooy imshawawaayna, tudiigwattooh agbiliyaaniit itoomaasna.

42 Aan baraah malya ilinguumiya agriisiineet toona hadiriini jillaay igarooyeehna waasiyaan. Bareeh araweesamiyaana, hadhiib ikitꞌana, aree hiddaab sileeliyaan.

43 Kassaah uudehay tꞌajaayibwa tꞌalaama tigwidaat ilinguumiya idꞌiineet rhiyaan winneet ajjabamiyaan. 44 Kassaah yꞌaamaniyaan hiddaab iifiin, toona tꞌiibriineet kastooh imꞌadhdhaadhna. 45 Teena tꞌiibriineetwa oomraayoohwa iidlabna, imhallaga oodehay ishanha iyiwna. 46 Kassoohoob udiini gawi hooshiib hiddaab daayiin. Igawaayeeb yhadhi ikitꞌana, afirhaa hiddaab tamiina, aree iginꞌa rayhamaa iifiin. 47 Ukwaasana yhamidna, uudehay kassaah bareeyooh geeb ishboobna. Aree Wꞌankwana baliib shidhhana iideeb oodehay bareeyooh ishaawiit gaguudisiya.