1 Ilinguumiyaawwa yꞌaamanaawwa Yahuudaay iifiin baliin Ijintiili Ukwaasanaay bhali agbiliyaaneet toona imaasiwna. 2 Malya Bitrus Algudus eeyanihoob, gali Yahuudi aamanana barooh imgwasaarna. 3 Baraah "Ibaakwishaabaayi gawaayeeb shuumta, mꞌariit han geeb tamta!" idiin.

4 Aflaay Bitrus kastooh toona tutikeet bareeh sooya: 5 "Ani tumadiina Yaafaay iifi, siileelee diwanihoob hawsooyan. Teebri fidagee rhan, halak fadhigtee tishinkiitee hakwaar aneeb ookiik nꞌati hoogi yꞌee rhan. 6 Whalak ashbibhoob, tubuuti kehii eefeent fadhig ragada ibariint imalaaliit dhhaniyaawwa, ibuutranfiifaawwa, eekilaywa rhan. 7 Malya hiss waliikiib amaasiw, ‘Bitrus, Yakaa! Een haardaat tamaa.’ idi.

8 Ani ‘Wꞌankwanaay, toon kaadꞌi! Ani masi han amaagna nhast baakaayt kataman.’ adi.

9 Whiss tibreetee masi kwinhiyaheeb, ‘Ukwaasana sinhasaab ikatiyeena, nhast kitti baadiya!’ idi. 10 Tuun tuuna mhay doora tiki. Malya naatka masi teebri beeti tꞌagar.

11 Malya mhay da Gaysariyaay ani hooy iifiyeeb ugawi suurii willa ingadna. 12 Aashuuk Imugaddasa een eenda geeb eetehak anu giigiyeet toona sooyaanheeb. Aan yꞌaamanana yꞌasagwir han geebu giigiyaana, aree ootaki gaw shuumna. 13 Baruuh ugawiyooh malak dehaay yꞌaa iifiyeet toona sooya hoon. Umalak bariiyooh dehaay ‘Yaafaab beeti daab diigwata, Siimoon Bitrus ittiyoodi tak waliiksaa. 14 Malya Bitrus baruukwa kassaah udehayuukwa kak iidhhan tiyadneet toona sooyi hookna indi.’ idi.

15 Ani bhaliiyee, oon hinin Eeshuuk Imugaddasa awwal nittiyeewaayeet toonaatiit, baraah han ittiyeewaayna. 16 Ani Wꞌankwana diyaab iiktiyeeb ibhali shꞌan, ‘Yuuhanna yamee iimis, baraakna laakiin Eeshuuk Imugaddasaayee titoomiisna.’ idi Wꞌankwana. 17 Wꞌankwana Yasuuꞌaab Umasiih aamannanihoob, Ukwaasana yhiiyyeetoon toona oodehay igirbaab han yhii. Aflaay Ukwaasana kak amꞌakiir?" idi.

18 Uudehay beentooy iifiin Bitrus een ibhali diyee imaasiwnihoob, wꞌamgwasuura yꞌishniit Ukwaasana yhamidna. Baraah "Ukwaasana Ijintiili han umidhhan imeerni jillaay tuubisiya." idiin.

19 Aamanana gali Istifaanuus itoodaari harꞌii ikeen igwirhaayi sabbii ibrarni iyheen. Gali Fiiniigiyaabwa, Gubruswa, Antaakiyaaywa yhasheeb ibrarni iyheen, usakana udaayiib laakiin Iyahuudi eebhat sooyiin. 20 Shalik aamanana Gubruswa, Geerawaaneebwa iifiina, Antaakiyaab ibeeniit Wꞌankwana Yasuuꞌiib usakana udaayiib Ijintiili sooyiin. 21 Wꞌankwanaay yꞌakrir bareeyooh geeb iifiina, aree gwida dehay tuubiyaaniit Wꞌankwana aamaniyaan.

22 Uun usakana Alguduseeb tiifiit tukaniisi iktim. Malya Barnaabaas Antaakiyaab beeti diigwatiyaan. 23 Barnaabaas beentooy iktimihoob, Ukwaasanaayt tinꞌima rhiya, aree winneet afirhiya. Malya baraah kassooh uginꞌiisoohna Wꞌankwana aamaneeneet toona hooy yhariw. 24 Barnaabaas daayi taku, aree Eeshuuk Imugaddasaawwa iimaanwa ataabu, aree gwida dehay Wꞌankwanaay dehaay yꞌagarna.

25 Malya Barnaabaas Shaawil harwee, Tarsuus ibi. 26 Baruuh Shaawil imriit, Antaakiyaay haay eeya. Beentooy tukaniisaatiib hawil timmiimaab gwida dehay allamiyaan. Been Antaakiyaay iifiin Wꞌankwanaay yꞌaamanana awwal "Masiihiin" atoosmaab bareeh ikatiin.

27 Been udamaaniib nabiya gali Algudusee Antaakiyaab beeti eeyaan. 28 Bareesooh gaal Agaabuus iidna. Baruuh Eeshuuk Imugaddasaayee isrid, kasseeh yhasheeb hargwi hooy daayi indiyeet toona oodehay sooya aree Gaysar Kilaawdiyoosi damaaniib tehargwi sidik tiki. 29 Ikwiriyaatay Antaakiyaay iifiin, imiirneenaaka shamaamt akay Yahuudaay yꞌaamanana istuubna. 30 Baraah beet toona idꞌiin. Oomiyaawoohna Barnaabaaswa Shaawili geeb Alguduseet tukaniisaati suurkina beeti istoobna.