1 Ilinguumiya masi oodehay bhaliisamiinihoob, ifagiiriyaawwa, Wꞌankwanaay gawi gwꞌaadiigaayi suurkinaawwa, Sadduukiibwa bareeyooh dehaay eeyaan. 2 Ilinguumiya oodehay allamiina, "Yꞌaya tuyatii yakeena, aree Yasuuꞌiib uuyak beet toona akkadiini." idiin. Baliin aanda ilinguumiya bak diyee imaasiwnayt, winneet yhaseen. 3 Uudoor himniit iikti. Baraah Bitruswa Yuuhannaabwa tooyin tooraaw ookiik oosjin idꞌiin. 4 Laakiin gwida dehay bareeyeeh ibhali imaasiw aamaniyaan. Aanda yꞌaamaniyaan yꞌadadaah ay alfa iiktiin.

5 Tooyin tumalya yhaakmaawwa, yꞌeegrimaawwa, whaggi koojaawwa Alguduseeb immarraayna. 6 Hannaas ufagiiri uuwin beentooy iifi. Kayaafaaswa, Yuuhannaabwa, Iskandarwa, wari da ufagiiri oowinnaay dhiwaayee iiktiinwa beentooy iifiin. 7 Bitruswa Yuuhannaawwa haay eeyaaniit suuroohna isingadniit raraatiyaana, "Naa akrireewwa aay simiiwwa beet toona tidꞌiina?" idiin.

8 Bitrus Eeshuuk Imugaddasa itab, malya bareeyooh dehaay, "Yhaakmaawwa oodehayi suurkinaawwa, 9 garbama takii dehaay nidꞌiyeet tudaayiinaayti sabbii waliiktaan hoon han? Baruuh kak mheelamiyaneeb kanaant tehariwna han? 10 Aflaay baraakwa kassaah Israaꞌiileeb uudehaywa toon kanna: Uun uutak nꞌiraa suurookna ingadiib, Yasuuꞌa Umasiih Unaasiraayi baraakna tidirneenaay oosmii inꞌir. Baraak Yasuuꞌaab saliibi kehii tidirna. Laakiin Ukwaasana barooh ishidhhan. 11 Uuktaab indi:

‘Baruuh wꞌawi idꞌaariiga iribneeb,

malyaab toorkwinti awi oogaw yaksiiniib barooh ikati.’ indi.

12 Yasuuꞌaab nuun weer ishidhhiin kiihaay. Tibreeti whii barooh nuun oodehay ishidhhiin sim weer kiihaay." idi.

13 Umajlisi da Bitruswa Yuuhannaaywa wꞌashꞌartiib ajjabamiyaan. Masi aan ilinguumiya imalu aree agriiya da biikaayneet toona ikanna. Aan aanda suur Yasuuꞌi geeb iifiineet toona han ikanna. 14 Laakiin ootak umheelamiyaab bareeyooh daraag gadee rhiyaan akay, umajlis naat han gwibiyaab kiikeen. 15 Aflaay bareeh umajlisii itfarꞌaneet toona sooyaan. Malyaab isuurkina aakna tarootsamiyaan.

16 Baraah "Een eenda kak niwari? Alguduseeb ikweer uudehay kassaah teen timꞌuujisa ikteenna. Aree beet toona nittawiyee dehaay kaꞌadgirna. 17 Laakiin uun usakana oodehayi bitik biiꞌatmassaawee dehaay een eenda shaawti Yasuuꞌi simii tak han biiꞌanfaraadneet toona sooni." idiin.

18 Malya ilinguumiya imalu waliikiyaaniit, shaawti Yasuuꞌi simii biibhaliiyayneet toona tari biiꞌallamayneet toona sooyaan. 19 Laakiin Bitruswa Yuuhannaawwa, "Baraakna iknaayaakna hakimna: Ukwaasana bareekna nisnaakiireet toona harriiw hana barooh? 20 Hinin toona turhinaneetwa tunimaasweetwa tim kehii nikatiyee dehaay kaꞌadgirna." idiin.

21 Yꞌeegrima bareeh akraab ifikni harꞌii ifdigna. Beenhoob uudehay kassaah toona tutikeetiib Ukwaasana yhamidna akay, bareeh amaag iiwriineet toona adgiraab kiikeen. 22 Uutak timꞌuujisaatee inꞌir fadhig tamuuni mhakwal hawlaab iibri.

23 Bitruswa Yuuhannaabwa ifdagnihoob, udehayoohna ookna beeti yꞌagarna. Ifagiiriya isuurkinaawwa yꞌeegrimaawwa hadiidiyaaneeb ibhali kasseeh oodehay sooyaan. 24 Ukwaasana aamaniin aaraw een ibhali imaasiwnihoob, hiddaab siileeliyaana, "Wꞌankwana Utageega, toobuutwa teebreewwa tidꞌiya, oobharwa tehooy teefi kastoohwa tidꞌiya. 25 Baruuk Eeshuuk Imugaddasaayee hooboon Daawid ukishiyaayook miidalaabii hadiidta. Baruuk:

‘Uudehay naanhooy itragiisna?

Uudehay naanhooy toomaag imakirna?

26 Tubuuti hadꞌa oofinaay dehaay eetmiirna,

aree yhaakma hiddaab immarriina

Wꞌankwana imꞌakiirna,

aree Wꞌankwanaawwa Umasiihoohwa imoomiigna.’ tidiya.

27 Tooy Alguduseeb Heeroodiswa, Boontiyus Biilaatooswa, Ijintiiliiwwa, Israaꞌiileeb uudehaywa toon tumadiinaatiib immarraayniit, Yasuuꞌaab ukishiyaayook umugaddas baruuk waasaab tiiktiyeeb kehii maagt sakiini jillaay imkirna. 28 Baraah baruuk batiikti suur diyaab tiiktiyeet toona idꞌiin. 29 Oontꞌa, yaa Wꞌankwanaay, bareeyooh oofaak maasiwa! Hinin kishiyaayeeka akay ibhaliyeek soonayi jillaay ashꞌaraab kwaasa hoon. 30 Oomheeli jillaay wꞌayook fidhidhaa, mꞌuujisaateet alaama kwaasa, ukishiyaayook umugaddas Yasuuꞌiib oosmii ajaayibt kwaasa." idiin.

31 Toon toosileelti harꞌii, uugaw ibaraah hooy iifiineeb katatiya. Baraah kassaah Eeshuuk Imugaddasa itabna, winneet ashꞌaraa aree Ukwaasanaay ibhali hadiidiyaan.

32 Kassaah yꞌaamana gaal ginꞌiiwwa gaal girmaay sakiin. Gaal han oomraay wꞌiibriyeeb waasaab kiiki. Laakiin iibriineena kastooh imꞌadhdhaadhna. 33 Ilinguumiya Wꞌankwana Yasuuꞌa tooyat hooy yakaab iiktiyeet toona akraab ibidehana. Ukwaasanaayt tinꞌima aree kasseeyooh geeb iifiin. 34 Bareeh eebtik aniw tak kiihaay. Door doorii aree baliin whaash iibriin tari gawaab iibriin idaalibniit, imhallaga haay yꞌiin. 35 Malya baliin imhallaga ilinguumaayi suurii oodehay yꞌaniw iyiwna.

36 Yuusif Laawiib Gubrusaayiibu, oon barooh ilinguumiya Barnaabaas simaaba. Barnaabaas "Wꞌisꞌaakakiir." miyaadi. 37 Uun baruuh tudirꞌaatooh idlib idꞌiit imhallaga haay eeyaayt ilinguumiyaayi suurii daasiya.