1 Baawloos umajlisi da winneet ishbibaayt, "Yaa isanaayaan, ani oon amsi ookiik Ukwaasana kassooh uginꞌiisu shagaaman!" idi. 2 Malya Hanaaniya ufagiiri uuwin, eenda Baawloosi dar ingid Baawloosiib ooyaf eethꞌaneet toona sooya. 3 Laakiin Baawloos bariiyooh dehaay, "Barook tꞌeeraat heeta, Ukwaasana iithꞌa hook indi. Baruuk beentooy sꞌiit kak whaggii haakamtiniyaheeb? Baruuk abiiyeek whag timnafiya, ani atoothꞌeet toona sootniya." idi.

4 Aanda Baawloosi daraag ingid barooh raatiyaana, "Ukwaasanaay ufagiiri oowin adgiriit kak neewtiniya?" idiin.

5 Baawloos "Yaa isanaayaan, ani baruuh ufagiiri oowin ikatiyeet toona kanaab kaaki. Uuktaab ‘Udehayyook whaakim baaneewa!’ indi." idi.

6 Baawloos umajlisiib gali Sadduukiibwa, wari aree Fariisiibwa iiktiineet toona ikanihoob, "Yaa isanaayaan, ani Fariisiib Fariisi oor akati. Ani uudehay yꞌayaab yakeeneet toona aamanan akay haakamamani." idi. 7 Baawloos een ibhali idiyi harꞌii, Ifariisiiwwa Isadduukiiwwa akra amgwasuuraay daayaan, malya umajlisi da eengal giraadiyaan. 8 Isadduuki yak kiihaay iidna, malak tari shuuk han kiihaayna iidna. Laakiin Ifariisi een bareeh kasseeh haay aamaniin.

9 Toon toonaati sabbii aree akraat jawa tiifi. Whaggi kooja gali Fariisiibayt yhaseeniit, "Oon ootak gwabab hooy karhina. Barooh shuuk tari malak bhaliisamaab ikatiin." idiin. 10 Wꞌamgwasuura akrakaab iikti, udheeshi daabit Baawloos katꞌamiiniyeena irkwi. Barooh tikwsiit bareesooh akruurii yaksiit umꞌaskar beeti haay itꞌagiirneet toona ikajareeh sooya.

11 Been whawaad Wꞌankwana Baawloosi dar ingadaayt, "Baarikwiya! Suur Alguduseeb aniib sootiyeeb ibhali tꞌa han Roomaay ibakii sooyaa." idi.

12 Tooyin tumalyaatiib Yahuudi gali immarraayniit Baawloos ituudir biidiyeek mꞌariit biitamayneet toona tari yam biigwꞌayneet toona halafooyaan. 13 Oon wꞌamaag waraay dehaay fadhig tamuuni mhakwal yꞌiin da hooy yakiyaan. 14 Gali bareesooh ifagiiriya isuurkinaawwa yꞌeegrimaawwa ibeeniit, "Hinin Baawloos nidaar bindiyeek itamtiiwwa igwꞌitiiwwa dehoon harramamaaba. 15 Aflaay baraakwa umajliswa ibakii udheeshi daabit beenaat, Baawloosiib masi mhakamaatiit halaagaayt tishtabbiib hooy tibariineet toona sooyaana, aree barooh waliiksaana. Been oodoor baruuh beentooy kitmaab baakaay nidaar niyad." idiin.

16 Laakiin Baawloosi kwaati oor baraah niyaamiineet toona imaasiwihoob, umꞌaskar ibaayt Baawloos sooya.

17 Baawloos dheeshi suurkina gaal waliikiyaayt, "Oon wꞌoor udheeshi daabit sitooba. Barooh naat gaat sooyi indi." idi. 18 Aflaay barooh udheeshi daabit haay ibi.

Udheeshi suurkina udaabtii dehaay, "Wꞌabuuki Baawloos ittiyoodiib oon wꞌoor barook askatiimeet toona hoosu yhariw. Baruuh naat gaat sooyi hook indi." idi.

19 Udheeshi daabit wꞌoori ayi yꞌabik, haay itfalaayt raatiya, "Naan sooyiheeb tindiya?" idi.

20 Baruuh "Lhayt Yahuudi da gali Baawloos umajlisii dehaay haay eetniyeet toona hook yhariwni jillaay immarraayna. Barooh masi mhakamaatiit halaagaay hooy tibariina massalameen. 21 Laakiin baruuk beet toona baaꞌagbilaa. Fadhig tamuuni mhakwal ikatiin da bariiyooh dehaay kamiin abkaaba. Baruuh itoodiireeb ookiik katamna tari kagwꞌina, diyaa halafooyaaba. Oontꞌa baraah amara. Baruuk gwanbiyeet toona yhagitna." idi.

22 Udheeshi daabit wꞌoor giigisiyaayt, "Een ibhali aneeb sootaneet toona gaal han baasooyaa!" idi.

23 Malya udheeshi daabit malu dheeshi suurkina waliikiyaayt, "Amsi whawaad tuusꞌa ashshadhig tikatiyihoob, malu shi kajar Gaysariyaay dehaay soomirna. Asarama tamuun hatay oomanaabwa, malu sheeb aree gargaab finaateesoohwa soomirna. 24 Baawloos hataay dehaay soomirna. Barooh whaakim Fiiliikis ibakii asgaa tiskatiimna." idi.

25 Malya udheeshi daabit jawaab iktib. Uun ujawaab bak iid:

26 Kilaawdiyoos Liisiyaasii, Whaakim Fiiliikis whamooysama ookiik, tishiboonay salaamani hook!

27 Yahuudi gali oon ootak yꞌabikniit madar yhariwna. Laakiin malya barooh Roomaaniib iiktiyeet toona akanihoob, kajar galib ayhaayt ashidhhan. 28 Malya bariiyooh yhiriwneet toona iikaneet ahariw. Oon usabbii, barooh umajlisiyoohna suurii haay yꞌan. 29 Malya barooh udiiniyoohna eefi gaanuuni sabbii atehimaab iiktiineet toona akan. Uun uutak madar tari sijin han haay astehaliiniyeet maagt gwibbaab kiiki. 30 Baraah bariiyooh kehii maagt niyaameeneet toona akanihoob, willa barook beeti giigsan. Barooh atehimaab aree tehalaagaaytoohna bariiyook suurii haay yꞌeeneet toona sooyan.

31 Aflaay ikajar udheeshi daabti bhali isnaakirniit, been whawaad Baawloos tumadiina Antiibaatriis istoobna. 32 Tooyin tumalyaatiib ikajar iragadaayee giigaab umꞌaskaroohna yꞌagarna. Ikajar yhatayi kehii giigaab aree usalal ooraaw iskatiimneet toona sooyaaniit yꞌagarna. 33 Baraah Gaysariyaab iktimnihoob, ujawaab whaakim nuuniyaan. Baawloos han sallamiyaan. 34 Whaakim ujawaab agriiyaayt Baawloos raatiya, "Keeya haashii yꞌaabwa?" idi. Baawloos Kiiliikiyaay iiktiyeet toona aree ikanihoob, 35 "Uudehay yꞌatehimaayaak yꞌeenihoob, tehalaagaaytook willa iishbib andi." idi. Malya Baawloos Heeroodisiib ugawiib eegwꞌadiineet toona ikajareeh sooya.