1 Malya ufagiiri uuwin Istifaanuus raatiya, "Baraah hook hadiideeneet tuuna sidiku?" idi.

2 Istifaanuus aree "Isanaayaanwa baabaanwa, sinaakirnaheeb. Hoobuun Ibraahiim Haraaneeb kwiraab biikaayihoob, masi Iraageeb haayee, Ukwaasana Wꞌalya dehaay lawiya. 3 Ukwaasana bariiyooh dehaay, ‘Whaashookwa udehayookwa ishaat, ani rhisi andiyook whaash ookiik giigaa!’ idi.

4 Aflaay Ibraahiim Kaldaani whaash hooy giigiyaayt, Haraaneeb kookiya. Baabuuh iyani harꞌii, Ukwaasana barooh oon whaash oontꞌa hooy tikweerneeb beeti ifdig. 5 Laakiin Ukwaasana barooh naat han hiiyyaab kiiki, uragadooh kehii daasiyi haash han hiiyyaab kiiki. Laakiin Ukwaasana baroohwa tidirriyaaytoohwa oon whaash iniiweet toona waadiyaab imsꞌabaak. Oodoor beeb Ibraahiim ar biibariiyeek han Ukwaasana barooh waadiyaab imsꞌabaak. 6 Ukwaasana ‘Ibraahiimiib yꞌar door gaal girba haashiib ikweerna. Beentooy aree fadhig shi hawlaab kishiyaab iikti iyadna, amaag itweeriin. 7 Laakiin oodehay bareeh amaag iwariin jasaayi andi. Beenaay harꞌii, baraah been whaashii firꞌatiit aneeb yꞌibid iyadna.’ diyaabi. 8 Malya Ukwaasana Ibraahiimi geeb ookwishuubi galad idꞌi. Aflaay baruuh Isehaag ifriit, tooyin tꞌasimha barooh ikwishib. Malya Isehaag aree Yaaguub ifri. Yaaguub aree yꞌareeh itamna malu ikwishib. Baraah Israaꞌiileet tidirriyaayti hooba yꞌawwaliiba.

9 Aan isana itamna malu Yuusif haasadiyaan. Barooh ukishiyaayt Masreeb idlibna. Laakiin Ukwaasana bariiyooh geeb iifi. 10 Ukwaasana barooh kasseeh igwirhaayee ishidhhan. Fagarandiit yhii, Masreeb whadꞌa Farꞌuun bariiyooh dehaay ishboobiib ikwaas. Aflaay Farꞌuun barooh Masri kehii haakim ikwaas, ugawooh kassooh han isꞌabik.

11 Malya kastooh Masreebwa Kanꞌaaneebwa hargwiit dhibta. Hoobaan tamiineet mꞌari miraab kiikeena, aree winneet gwirhaayeeb daayaan. 12 Yaaguub Masreeb harroob iifiyeet toona ikanihoob, awwal iibaabtoohna akay hoobeen Masir istoob. 13 Oodoor umalya ibeenihoob, Yuusif isanaayeeh itookkaan. Farꞌuun han Yoosfiib indhiwa ikan. 14 Malya Yuusif ubaaba Yaaguubwa kasseeh indhiwaayeehwa waliikisiya. Baraah kassaah asarama tamuunwa ay nafara iiktiin. 15 Malya Yaaguub Masir ibi. Baruuhwa hoobaan aarawwa beentooy iiyaan. 16 Kasseeh aree tiginaadaataah Shakiim ookiik itfayyaakna. Ibraahiim Yhaamooriyaayee idlib iyhaneeb whaashiib itoobaasna.

17 Uudoor Ukwaasana Ibraahiim hiiyyaab iiktiyeeb uwaadiya eeya. Beenhoob udehayuun Masreeb guudiyaan. 18 Malya weer hadꞌa Masir yhakim. Aree baruuh Yuusif kiikan. 19 Uun whadꞌa udehayoon itlis, hoobeen amaag waraayi. Oofraayoohna isoogid, aflaay inisrikaayaah iiyeen. 20 Been udamaaniib Muusa ifri. Baruuh winneet gibliibu, ifarooyaah mhay tirga geeboohna isehamna. 21 Malyaab barooh barraab ishti dꞌuuy hooy iteharraawna, aree Farꞌuuniitꞌoor barooh timriit oorooh tikwaas. 22 Muusa winneet daayi tꞌaliim Masreeb allamamiya. Baruuh winneet akra tak hadiidanaab iki.

23 Muusa fadhig tamuun hawla idꞌiyihoob, udehayooh Yꞌisraaꞌiili iishtameet toona yhariw. 24 Yint gaat Masri gaal bareesooh amaag waraayee rhiya. Barooh yhiibi jillaay giigiya, Umasri idiraayt barooh ishidhhan. 25 Muusa, Ukwaasana bareeh ishidhhiini jillaay barooh haay yꞌaab iiktiyeet toona udehayuuh aakna iktiinneeb hiisiya. Laakiin baraah kanaab kiikeen.

26 Oombꞌi ooraaw malu Israaꞌiili finaasamee rhiya, aree eebtik adil idꞌi. Baruuh ‘Yhaana, baraakna sanaabaana, naanhooy taktaki lhasti tehariwna?’ idi.

27 Laakiin uutak oofna badooyaab Muusaab harꞌa ikwit, malya ‘Aaw barook haakimoon ikwaas hook, aaw gaadiyoon ikwaas hook? 28 Iru Umasri tidireet toonaatiit aneeb han idaarheeb tindiya han?’ idi. 29 Muusa een ibhali imaasiwihoob, Miidiyaan beeti ifoor. Beentooy mitlaliib ikwiri, aree malu ar ifri.

30 Fadhig tamuun hawlaayi harꞌii, iitlaw hindiyi baloolee Muusaab malak dehaay lawiya. Umingaayiib Oorba Siinaayi daraag dehaay lawiya. 31 Muusa toon toona rhiyanihoob, winneet ajjabamiya. Idiili jillaay giigiya. Idwilihoob, Wꞌankwanaay hiss imaasiw: 32 ‘Ani hoobaak Ibraahiimwa, Isehaagwa, Yaaguubwa yꞌibidneeb Ukwaasana.’ idi. Muusa katatiya, iishbibee dehaay adgiraab kiiki.

33 Wꞌankwana Muusaay dehaay, ‘Tigidhꞌaateek nashꞌaa! Uumhiin baruuk hooy tingadiyeeb mugaddas haashi. 34 Ani udehayu Masreeb amaag atweeraayee rhan. Tuwaawtoohna amaasiw, aree bareeh ashidhhiini jillaay yꞌaabi. Oontꞌa mꞌaa! Masir beeti igir hook andi.’ idi.

35 Oon Muusaab ookna udehayuuh iribna. Baraah ‘Aaw haakimoonwa gaadiyoonwa ikwaas hook?’ diyaa iifiin. Muusa oodehayi haakim iiktiyi jillaaywa ishidhhini jillaaywa Ukwaasana uukna barooh diigwatiya. Ukwaasanaay malak yhindiyi bitkeesii Muusaab bhaliisamiya. 36 Muusa oodehay Masree isfarꞌa. Oobhar wꞌadarooywa umingaayiibwa fadhig tamuun hawla ajaayibwa mꞌuujisaatwa ikwaas.

37 Muusa Yꞌisraaꞌiili bak sooya: ‘Ukwaasana udehayiisookna oon aniit nabiib gaal dehookna diigwati indi.’ idi. 38 Muusa udehayoon umingaayiib idbil, umalak aree oorba Siinaayeeb baroohwa hoobeenwa bhaliisamiya. Baruuh Ukwaasanaay ibhali idhhaniib iyhaayt hinin beeti hassiya.

39 Laakiin hoobaan barooh sinaakraab kiikeen. Barooh iribna, iginꞌaayee Masir mꞌageert yhariwna. 40 Uudehay Haaruunii dehaay, ‘Sanamaab galib suuroon sakeen dehoon dꞌiyaa. Muusa Masree isfarꞌa hoon, oontꞌa laakiin naan ikayeeb nigam.’ idiin. 41 Beenhoob lagaayt hayꞌaatii sanam idꞌiin. Oon ulaga karaamaat dehaay iifirꞌana. Oon ushaga idaayaaneeb aree winneet haay afirhiyaan. 42 Ukwaasana oodehayii fidnaab nakamiyaayt, yhayikw yꞌibidni jillaay bareeh ingad idꞌi. Inabiyaayi kitaabiib bak kataabtu:

‘Yaa Yꞌisraaꞌiili, baliin ifadhig tamuun hawla umingaayiib tiifiineeb,

anii dehaay karaamaatwa miyaawwa haay eetaana?

43 Baraak usanam Mooleekiit tukheema tifiyakna

aree ukwaasanaayookna Reefaaniib whayuukw yakistaana,

baliib isanama tꞌabidni jillaay shagaamtaana.

Shaawti bareekna Baabilyooni gidehii hasiibiyaab iikwasi hookna andi.’ idi.

44 Hoobaan umingaayiib Tibadehaateet kheema ifiyakna. Beet tukheema Ukwaasana Muusaab mitiyaayaayt rhisaab iiktiyeet tehayꞌaatii shagaamamta. 45 Malya Jooshiwa hoobeeyoon maalhi iiktiyihoob, beet tukheema baraah iyheen. Ukwaasana baliin yhasheeb iifiin oodehay hoobeeyoon suurii iskwiit yhash bareeh yhii. Hoobaan been Daawidiib udamaan ookiik beet tukheemaatiib Ukwaasana yꞌabidna. 46 Daawid Ukwaasanaay gibuul imri. Yaaguubiib Ukwaasanaay dehaay gaw yhariw. 47 Laakiin whadꞌa Suleemaan been oogaw Ukwaasanaay dehaay idꞌir.

48 Laakiin Ukwaasana Winneet Utageega, uudehay shagaamaab ikatiini gawaayeeb kiikwiri. Unabi bak indi:

49 ‘Taabri kwirsiib aniita,

aree tuubuut anii mingidi mhiinu,

kak eefi gaw anii dehaay iidꞌir tiyadna?

Indi Wꞌankwana

Tari keeya haashiib fiinsiheeb tiyadna?

50 Teen teena kasteeh ani shagaamaab kaaki han?’ indi.

51 Baraak hadaniyaab tibariina, akra girmaayaana! Kassoohoob Eeshuuk Imugaddasa finaateena, hoobaakna han suur bak weeraaba. 52 Hoobaakna amaag weeraab biikaayni nabi eefi han? Ooshiboob Oongaalnaay wꞌaay sooyiin inabiya han idaarna. Oontꞌa aree barooh titilniit tidirna. 53 Ukwaasanaay imalak hag sooyaan hookna, laakiin sinaakraab kitteena." idi.

54 Umajlisi da Istifaanuusiib ibhali imaasiwnihoob, winneet yhaseeniit gadabiyaan. 55 Laakiin Istifaanuus been Eeshuuk Imugaddasa itab. Teebri ishbibihoob, Ukwaasanaay Umatuun rhiya. Yasuuꞌaab aree Ukwaasanaay umaygwadii dehaay gadee rhiya. 56 Istifaanuus bareeyooh dehaay, "Teebri nigalee rhani. Wꞌaadami Oor aree Ukwaasanaay maygwadii dehaay gadee rhani." idi.

57 Umajlisi da akraab kwinhiyaana, yꞌangwileehna yꞌaabikna. Kassaah Istifaanuusii dehaay fariyaan. 58 Barooh tumadiinaatii ifirꞌaniit aweeyee geediyaan. Uudehay bariiyooh kehii gwisree bidehaa iifiin, yhalakaayeehna Shaawil iidni oori ragadaayi whii daasiyaan.

59 Baraah barooh geedee, Istifaanuus siileeliya, "Wꞌankwana Yasuuꞌa, ishuuki nuunamaa." idi. 60 Malya baruuh ignafaayt aadhiya, "Wꞌankwana, toon toomaag dehaay baaꞌabikaa!" idi. Een idiit harꞌii malya iiya.