1 Beenhoob whadꞌa Heeroodis tukaniisaati da galib asjiniya. Bareeh amaag iweer. 2 Yaaguub Yuuhannaay oosan bꞌadhdhii isoodir. 3 Tuun tuuna Iyahuudi dehay afirhisaa rhiyanihoob, Bitrus han yꞌabik. Beet tuuna Ufatiiri Hadhiyi Iidiib tiki. 4 Barooh yꞌabikaayt harꞌii, oosjin idꞌi. Fadhigt majmuuꞌa barooh isigwꞌad, aree majmuuꞌaatiibka fadhig kajar iifiin. Heeroodis barooh Whasamti Wꞌiidi harꞌii oodehayi suurii haakamtiib yhiriw.

5 Aflaay baruuh Bitrus usijniib idꞌi. Tukaniisi door han Ukwaasanaay dehaay toosileel singadaat kitti. Toosileel barooh haay isehiriwna.

6 Whawaad isuuriib Heeroodis barooh hooy haakamaa iideeb, Bitrus maloot shinshilaatee hakwaaru, aree malu kajari bitik diwi. Kajar wari aree udheefa iigwꞌidiin. 7 Gaalhoob Wꞌankwanaay malak lawiya, aree usijniit gurfa nuur hooy talawiya. Umalak Bitrus udaraag ithꞌa, aree barooh isibꞌar. Malya "Ashshigaa! Yakaa!" idi. Aree tishinshila yꞌayeesooh dhibiyaan.

8 Umalak masi bariiyooh dehaay, "Yhalakaayeek kwayaa, tigidhꞌaateek han shabaa!" idi. Bitrus toona tusoomamiyaneet idꞌi. Masi umalak bariiyooh dehaay, "Tusideeriyaaytook kwayaat ramaheeb." idi.

9 Bitrus umalak iram. Laakiin umalak iidꞌeet tuuna sidik iikti tiideet toona kiikan. Beet toona kastooh hawsoot hiisiya. 10 Baraah ikajar igwꞌaadiiga yꞌawwaliibwa imalyaawwa hasamiyaan. Malya tumadiinaati dheefa tꞌindiitiyaay eeyaanihoob, udheefa uukna dehaay ingal. Shaawti baraah ifirꞌaniit salal gaal hasamiyaanihoob, umalak gaalhoob barooh imshamaadh.

11 Bitrus oontꞌa toona tutikeet ikan, "Wꞌankwana Heeroodisii aneeb ishidhhiini jillaaywa, kastooh Iyahuudi sꞌayaamiineet toonaatii ishidhhiini jillaaywa umalakooh diigwatiyaneet toona oontꞌa eetehak anu akan." idi.

12 Bitrus beet toona ikanihoob, Yuuhannaab oosmooh ooraaw Maarkoos iidneenaayt toondi Maryamiib oogaw ibi. Gwida dehay beentooy immarraayniit siileeliin. 13 Bitrus udheefa kadhawsiyanihoob, Rooda iidneet shagaamana udheefaay niguuli jillaay eeta. 14 Batuuh Bitrusiib whiss tikanihoob, udheefa nigilaat baakaay winneet afirhaa tꞌagar, "Bitrus udheefaay eefi!" tidi.

15 Uudehay batiiyooh dehaay, "Batuuk haalaytuwii." idiin. Laakiin batuuh "Udheefaay ingadiib Bitrusu." tidi. Uudehay aree "Uun baruuh umalakooh ikati." idiin.

16 Laakiin Bitrus masi udheefa ikwil, aree baraah udheefa dehaay ingilna. Barooh rhiyaanihoob, winneet ajjabamiyaan. 17 Laakiin Bitrus wꞌayiisooh bareeh haay dinisiyeet alaamaat rhisiya. Malya Wꞌankwana kak barooh usijnii ifirꞌeeb bareeyooh dehaay hadiidiya. Baruuh masi, "Yaaguubwa yꞌaamanana eerawwa toon toona sooyaana." idiit weer haash ookiik yꞌish giigiya.

18 Fajir ikajar igwꞌaadiiga winneet yhasikna. Bitrusii dehaay naan tikayeeb igamna. 19 Heeroodis ikajareeh barooh isehariw, laakiin miraab kiikeen. Malya baliin igwꞌaadiiga raatiya aree bareeh kasseeh isoodir.

Malya Heeroodis Yahuudaay giigiyaayt Gaysariyaay middaat isꞌa. 20 Baruuh Tiirooswa Siidooneeb oodehaywa winneet amhassiya iifi. Baraah immakkaarniit barooh itꞌajiirni jillaay galib diigwatiyaan. Timꞌariituuhna Heeroodis yhukwimeeb whaashii eeti akay, gali bareesooh whadꞌa Heeroodisiib ukishiya Biilaastoos ibeeniit mꞌasig hooy yhariwna. 21 Aflaay uwaadiyaayt tooyin, Heeroodis tehadꞌaayeeti halakaayeeh ikwi. Tehadꞌaayeeti kwirsi kehii isꞌat oodehay infaraad. 22 Uudehay waliikiyaaniit, "Uun kwaasanaay hissu, aadami hiss kiiki." idiin.

23 Heeroodis Ukwaasana hamdaab kiiki akay, Wꞌankwanaay umalak barooh ithꞌa. Malya Heeroodis dꞌoob tamiyaaniit iiya.

24 Laakiin Ukwaasanaay ibhali shaawti gwuudiyaaniit ibrarni iyheen. 25 Barnaabaaswa Shaawilwa ushanhoohna faayisiyaanihoob, Algudus beeti yꞌagarna. Yuuhannaab "Maarkoos" atoosmaab han haay giigiyaan.