1 Baawloos "Yaa isanaayaanwa ifarooyaanwa, toona tutikeet dehookna hadiidi andi sinaakirnaheeb!" idi.

2 Uudehay Baawloos Araami bhali bhaliiyee imaasiwnihoob, diniyaaniit isnaakirna.

Malya Baawloos: 3 "Ani Yahuudiibu, Kiiliikiyaay whaashiib tumadiina Tarsuuseeb faraayi. Laakiin Alguduseeb hamaayi. Ani Gamaalꞌeeli whii agriiyan, aree yhoobeeteen tꞌaada kasteeh agriiyan. Oon bareetookna amsi, ani han Ukwaasana asnaakiireet toona winneet ihiriw. 4 Ani kasseeh oodehay Wꞌankwana aamaniin amaag aweer, galib adaar, daabwa mꞌatwa warib han aree aabikaayt oosjin adꞌi. 5 Ufagiiri uuwinwa, kassaah umajlisi suurkinaawwa han beet toona ibadehana. Baraah Yahuudi suurkina Dimashigeeb iifiinnee dehaay jawab han yhiinheeb. Beentooy oodehay aabiktiit Algudus haay yꞌeetiit jasaamiineet toona yhiriwna.

6 Yint gaat nabhoob, ani Dimashig dawil mhiin aktim. Tibreetee gaalhoob eera talaw anii kehii talawiya. 7 Ani whaashi kehii dhiban, malya hiss aneeb raatiib amaasiw, ‘Shaawil, Shaawil, naanhooy amaag tiwariyaheeb?’ idi.

8 Ani raatan, ‘Wꞌankwanaay, baruuk aabwa?’ adi.

Baruuh ‘Ani Yasuuꞌaab Unaasiraayi akati! Ubaruuk amaag tiwariyeebi.’ idiheeb. 9 Aanda geebu iibaabiin utalaw rhiyaana, laakiin whiss aneeb infirid maasiwaab kiikeen.

10 Ani raatan, ‘Wꞌankwanaay, naan sakani?’ adi.

Baruuh ‘Yakaat Dimashig bayaa! Beentooy kantiimihoob, naan saki tindiyeeb kastooh soomami tindiya.’ idiheeb. 11 Utalaw winneet eeraabuuyt irhiti adgiraab kaaki. Aanda aaraw wꞌayi yꞌabikniit Dimashig ookiik salooliyaanheeb.

12 Beet tumadiinaatiib Hanaaniya iidni tak iifi. Baruuh Muusaay whaggii aamani taki. Kassaah Iyahuudi beentooy ikwiir aree winneet barooh hamooysiin. 13 Baruuh aneeb beeti eeyaayt, ‘Shaawil usanuun, oontꞌa shaawti masi rhi tindiya!’ idiheeb. Gaalhoob aree rhan.

14 Malya Hanaaniya idiheeb, ‘Ukwaasana hoobaan suur yꞌibidneeb whankaay waasiya hook, tꞌeeteeh sookintook harriiw. Ooshiboob Oongaal rhistiyook harriiw, whissooh teemsiiweet toona iseharriiw hook. 15 Toona turhitaneetwa tutimaasiweetwa kasseeh oodehayi suurii bariiyooh badehi tikatiya. 16 Baruuk oontꞌa naan hangiita? Yakaa! Atoomaasa! Bariiyooh oosim waliika, idanuubeek shaagwidha.’ idiheeb.

17 Beenaay harꞌii, ani Algudus beeti agar. Ani oodiini gawiib siileelee hanꞌaariib atoogaad aree hawsooyan. 18 Tehawsooteeb Wꞌankwana dehu lawiya, ‘Willa Algudusee giigaa! Aniib tindiyeeb ibhali uudehay isniikar hook kiidiin.’ idiheeb.

19 Ani han ‘Wꞌankwanaay, ani gwida diini gawaayeeb oodehay barook aamaniin thaabꞌaabwa haakwiraabwa akatiyeet toona baraah ikteenna. 20 Istifaanuus bariiyeek ibhaliyi sabbii itoodaar, ani oodoor beeb beentooy ingid imadar dꞌam hooy miraa iifi. Barooh idir eenda halaka han agwꞌad.’ adi.

21 Laakiin Wꞌankwana, ‘Giigaa! Sagi mhiin Ijintiili haash istuub hook andi.’ idiheeb." idi Baawloos.

22 Uudehay Baawloos een ibhali idiyeeb ookiik isnaakirna. Malya jajawiyaana, "Oon ootak diraa! Midhhan kaꞌastehaliya." idiin.

23 Baraah masi jajawiyaana, yhalakaayeehna nashꞌiyaaniit falfuut asti geediyaan.

24 Iroomaani dheeshi daabit Baawloos umꞌaskar istoobiineet toona ikajareeh sooya. Kwirbaajii imeethibꞌeet toonaawwa raatamamiiniyeet toonaawwa ikajar sooya. Baruuh bak haay iidꞌeeb usabab aree aan uudehay Baawloosiib naanhooy jajawiineeb kanaant yhariw. 25 Ikajar Baawloos jasaatii dehaay yꞌayi yhaakwirnihoob, baruuh beentooy ingid dheeshi suurkina raatiya, "Tak Roomaaniib gwabab anu, tumhakama na baasitoob jasaamiiniyeet tuuna gaanuunu?" idi.

26 Udheeshi suurkina een ibhali imaasiwihoob, udheeshi daabit ibaayt, "Naan daatniya? Uun uutak Roomaaniibi!" idi.

27 Udheeshi daabit Baawloosii dehaay eeyaayt, "Sooyaaheeb, baruuk Roomaaniibwa?" idi.

Baawloos han "Awooh" idi.

28 Malya udheeshi daabit, "Ani Roomaaniib iiktiyi jillaay gwida mhallaga afirꞌa." idi.

Baawloos igwibi, "Laakiin ani timifraytii Roomaaniibi." idi.

29 Aanda Baawloos raatiin willa hooy giigiyaan. Udheeshi daabit han tak Roomaaniib shinshilaatee sehakwiraab iiktiyeet toona ikanihoob, winneet irkwi.

30 Tooyin tooraaw udheeshi daabit aan Iyahuudi eegrima Baawloosiib naan yhiriwneeb iktiineet toona yhariw. Malya Baawloosii tishinshila fadagiya, aree ifagiiriya isuurkinaawwa kassuuh umajliswa immarriineet toona sooya. Malya Baawloos haay eeyaayt, bareeyooh suurii isingad.