1 Baawloos Asiinaay giigiyaayt Koorintoos ibi. 2 Beentooy Akiilaab iidni Yahuudi Boontuusii iiktiib imri. Gaysar Kilaawdiyoos kasseeh Iyahuud Roomaay giigiineet toona sooyaa iifi akay, Akiila tootakatooh Biriskillaayi geeb hallaay Itaalyaay yꞌaa iifi. Baawloos bareeyooh eerhi jillaay giigiya. 3 Baawloos bareeh kheemaati shagaamana akay rhiya. Baawloos uukna han kheemaati shagaamanaabi. Aflaay bareeyooh geeb isꞌa aree geeb shagaamiya.

4 Toosabka Baawloos Yahuudi diini gaw iibi. Baruuh Iyahuudwa Iyoonaaniiwwa bhaliisami aree afhisi. 5 Laakiin Siilaaswa Tiimootiiwwa Magadoonyaay eeyaani harꞌii, Baawloos kassoohoob Yasuuꞌaab Umasiihiib usakana udaayiib Iyahuudi sooyi. 6 Laakiin Iyahuudi barooh imooraabniit neewiyaan. Baruuh hasiyaaytii yhalakaayeesooh ifathfath infish, malya bareeyooh dehaay, "Ubooyuukna igirmaayeekna kehii eefi. Ani nhasu! Oontꞌaanee fidnaab diftiit usakana udaayiib Ijintiili sooyi andi." idi.

7 Malya Baawloos beentooysii giigiyaayt, tak Jintiiliib Tiitiyoos Yuustuus iidni geeb amnaamiya. Uun uutak Ukwaasana yꞌibid, aree Yahuudi diini gawi daraag ikwiir. 8 Kirisboos, Yahuudi diini gawi haakimwa kassaah indhiwaayaahwa Wꞌankwana aamaniin. Gwida Koorintooseeb iifiin han tudiigwat imaasiwna, aree Wꞌankwana aamaniyaaniit itoomaasna.

9 Hawaad gaal Baawloos hawsooteeb Wꞌankwana rhiya. Wꞌankwana tehawsooteeb bariiyooh dehaay, "Baarikwiya, usakana udaayiib sooyaa! Baadinaa! 10 Ani geebook eefi, gaal han adaayi kiidi hook, lhami han kitdiya. Ani toon tumadiinaatiib gwida dehay abari." idi. 11 Aflaay Baawloos Koorintooseeb hawilwa tarab Ukwaasanaayt diigwat oodehay allamee iyhi.

12 Gaalyoos Akhaaꞌiyaay haakim iiktiyi door, Yahuudi gali immarraayniit Baawloos yꞌabikna, aree tumhaakamaati suurii isingadna. 13 Malya baraah "Uun uutak hineet tꞌaada imnafi salalii udehayoon Ukwaasana isꞌabiid." idiin.

14 Baawloos hadiidaab baakaay, Gaalyoos Iyahuudi dehayii dehaay, "Yaa Iyahuudi, baraakna halaagaayt tiibriineek tari gaalnaay ashkiimtiineek, ani iimsaw hookna. 15 Laakiin beet tuuna bhaliibwa, simaabwa, iknaayeekna hagwa ikatiyeek, tehalaagaay baraakna iknaayaakna tikwikwna. Ani teen tinaati gaadi iikti kaadi." idi. 16 Malya bareeh tumhaakamaatii isfarꞌa. 17 Malya kassaah uudehay Soosteenees, Yahuudi diini gawi suurkina yꞌabikniit tumhaakamaati suurii ithabꞌana. Laakiin Gaalyoos hooy halaag kiiki.

18 Baawloos Koorintoosi yꞌaamananaayi geeb shalik door isꞌa. Malya yꞌaamananaayee giigiyaayt, ubharii Suuriyaab beeti ibi. Akiilaabwa Biriskillaaywa barooh iramna. Baruuh iibaabaab baakaay Ukwaasanaay dehaay waadiyaab abkaa iifi akay, tumadiina Kanakhiryaay tehamooteeh imin.

19 Baraah Afasoos iktimna. Baawloos beentooy Biriikilaabwa Akiilaabwa yꞌish giigiya. Malya baruuh oodehayi bhaliisamti jillaay Yahuudi diini gaw shuumiya. 20 Baraah Baawloos gwimadka daman geeb eesitꞌeet toona hooy yhariwnihoob, baruuh irib. 21 Baruuh oodoor igiigiyeeb, bareeh waadiyaab imsꞌabaak, "Ukwaasana indiyeek, dehookna itꞌigir andi." idi. Shaawti baruuh Afasoosee giigiya, markabtii iibaabiya.

22 Gaysariyaab iktimihoob, beentooy tukaniisi salaamiya. Malya Antaakiyaab beeti hoogiya.

23 Baawloos Antaakiyaay shalik door isꞌa. Malya giigiyaayt gwida hash Galaatiyaaywa Firiigiyaaywa iifiin iktim. Aree kasseeh yꞌaamanana isꞌaakakir.

24 Tak Yahuudiib Aboolloos iidneeb Afasooseeb eeya. Aboolloos tumadiina Iskandariyaay faraay taku, winneet fagar hadiidanaabu aree eektab gwidaana hooy iktiin. 25 Wꞌankwanaay usalal han gwidaana hooy soomamaabi. Baruuh winneet ashꞌaraa hadiidi. Yasuuꞌiib allamiyeet tuuna aree kastuuh sidiki. Laakiin Yuuhannaayt tꞌatoomsooy toobhaat iktiin. 26 Aboolloos mirkwaay anu Yahuudi diini gawiib bhaliiya. Laakiin Akiilaabwa Biriskillaabwa imaasiwnihoob, barooh ugawoohna haay ibeeniit Ukwaasanaay usalal daayiib afhisiyaan.

27 Aboolloos Akhaaꞌiyaay whaash beeti iibaabt ikwin. Ukwaasanaay yꞌaamanana barooh isꞌaakakirna. Beentooy iifiin ikwiriyaatay barooh daayiib yꞌishishni jillaay jawab dehaay ikaatibna. Beentooy iktimihoob, baliib tinꞌimaatee aamaniyaan baruuh akraat shamaam dehaay iki. 28 Baruuh Iyahuudi geeb akra amgwasuuraab ikwaas. Udehayi suurii aree Yasuuꞌa Umasiih ikatiyeet toona eektabee oodehay rhisi.