1 Yint gaat Bitruswa Yuuhannaabwa tuusꞌa mhayt asir tikayihoob, siileeliinee dehaay Ukwaasanaay gaw ibeen. 2 Ifrayeekka garaabaay tak, Wꞌankwanaay oogawi dheefa Wꞌindaawriib ittiyoodiib beeti itfiyikneeb iifi. Bꞌeebka aree oon udheefaay yaf daasiin. Been oodehay Wꞌankwanaay oogaw shuumiin iinꞌili jillaay barooh beentooy daasiin. 3 Uutak Bitruswa Yuuhannaabwa Wꞌankwanaay oogaw shuumee rhiyanihoob, naat mhallagaab hooy yhariw. 4 Baraah hasiit liiliyaatee barooh igwaalilniit, "Gwaalila hoon!" idiin. 5 Uutak naat iyiwneeb hiisiyaayt bareeh igwaalil.

6 Laakiin Bitrus "Ashteet tari dimꞌaraab kaabari! Laakiin toona tꞌabariyeet iyaaw hook andi. Yasuuꞌa Umasiihi Unaasiraayi simii, yakaat hiireeraa!" idi. 7 Malya Bitrus ootak wꞌayi umaykwaab yꞌabikaayt isingad. Gaalhoob utaki ragadaawwa tikwilbaawwa yꞌakirna. 8 Uutak asti fariya, aree hiireertiib badooya. Baruuh Wꞌankwanaay oogaw ookiik Bitruswa Yuuhannaabwa iram, hiireereewwa fafareewwa Ukwaasana hamdeewwa giigiya. 9 Kassaah uudehay barooh hiireereewwa, Ukwaasana hamdeewwa rhiyaanihoob, 10 baraah ootak inꞌaliiga Wꞌankwanaay oogawi dheefa Wꞌindaawriib ittiyoodiinaay iistꞌa iiktiyeet toona ikanna. Toona bariiyooh dehaay tikeet winneet hooy ajjabamiyaan.

11 Uutak inꞌaliiga Bitruswa Yuuhannaaywa yꞌabik kaleewiya. Aree uudehay kassaah ajjabamiyaana aree Suleemaaniit Tifooti Mhiin ittiyoodiib oomhiin beeti dhaabee eeyaan. 12 Bitrus toon toona rhiyanihoob oodehayii dehaay, "Israaꞌiili ar, uun naanhooy ajjabsiini hookna? Oon ootak hini akrireewwa shibootiiwwa hiireersaab eendeet naanhooy hasiit liiliyaatee teegwiliilna hoon? 13 Ibraahiimiib Ukwaasana, Isehaagwa Yaaguubiib Ukwaasana, hoobaan yꞌibidneeb ukishiyaayooh Yasuuꞌaab tageegisiya. Baraakna barooh tuyatii dehaay nuuntaana. Biilaatoos barooh fidgi dꞌuuy yhariweek han, baraakna tiribna. 14 Baraakna Yasuuꞌaab Umugaddas Ooshboob tiribna. Madoor tak bariiyooh oomhiin itfadiigeet toona tehariwna. 15 Oodehay umidhhan beeti suuriimiib oongaal tidirna. Laakiin Ukwaasana barooh tooyat hooy yakisiya. Beet toona aree kassaan dehaay badehiiba. 16 Oon ootak rhiteena, aree barooh tikteenna. Yasuuꞌiib oosmii aamaniyaayt yꞌakir. Uudehay kassaah shibbee, Yasuuꞌii wꞌaamanti oon ootak akraab isinꞌir.

17 Yꞌarawaan, baraakwa yhadꞌaayaakwa naan saktiineeb kanaab bitkaayneet toona ani akteen. 18 Laakiin Ukwaasana kasseeh inabiyaayeeh Umasiih lhamiiniyeet toona suur sooya, oontꞌa aree been uwaadiya faayisiya. 19 Aflaay tuubaana, Ukwaasanaay dehaay agarna, tumaagnaay gadna dꞌiina, afoomi tiyadna. 20 Wꞌankwana aree Yasuuꞌaab Umasiih dehookna diigwati indi. Baruuh bareeyookna dehaay suur waasamaabi. 21 Laakiin Ukwaasana naatka tankwiikweeb ookiik Yasuuꞌa ibakii tibreeteeb hangiit. Suur inabiyaayeeh imugaddasaayi geebii waadiyaayaab iiktiyeet toonaatiit tikati. 22 Muusa ‘Wꞌankwana Ukwaasanaayuukna udehayiisookna gaal nabiib ikatiyi jillaay waasi indi, oon aneeb waasiyaneet toonaatiit waasi indi. Baruuh indiyeet toona kastooh daayiib sinaakirna! 23 Oon unabi baasinaakiir udehayiisooh itkitꞌa indi.’ idi.

24 Saamuuꞌeelwa kassaah inabiya aaraw bariiyooh harꞌii eeyaanwa han, oontꞌa tikatiit toona suur haay hadiidiyaan. 25 Baraakna baliin inabiyaayi ar tikatiina. Ukwaasana hoobeeyookna geeb idꞌiyeeb ugaladiib teefeena. Baruuh Ibraahiimii dehaay, ‘Tubuutiib eefeeb uudehay kassaah bariitook tidirriyaayti geebii baarakami iyadna.’ idi. 26 Ukwaasana ukishiyaayooh yakisiyanihoob, awwal bareeyookna dehaay diigwatiya. Bareekna toomaagti salalii yꞌangiiree dehaay barooh baarakiyaayt diigwatiya." idi.