1 Aboolloos Koorintooseeb iifiyihoob, Baawloos irbaayi haashii Afasoos marii iibaabiya. Beentooy kwiriyaatay galib imri. 2 Baruuh bareeh raatiya, "Yasuuꞌaab aamantaanihoob, Eeshuuk Imugaddasa tittiyeewaayna?" idi. Baraah aree "Abadan! Shuuk Tageega iifiineet toona masi han kinmaasiw." idiin.

3 Aflaay Baawloos bareeh raatiya, "Aflaay baraakna naanhooy titoomaasna?" idi. Baraah "Yuuhanna allamiyeet tꞌatoomsooy nitoomaas." idiin.

4 Baawloos "Yuuhanna tuubti jillaay oodehay iimis. Bariiyooh harꞌii yꞌiiniib aamaneeneet toona oodehay sooya. Been baruuh hooy hadiidiyeeb aree Yasuuꞌaabi." idi. 5 Baawloos een ibhali diyee imaasiw uudehay, Wꞌankwana Yasuuꞌiib oosmii itoomaasna. 6 Malya Baawloos yꞌayeeh bareeyooh kehii daasiyanihoob, Aashuuk Imugaddasa bareeyooh kehii daayaan. Malya baraah wari bhali hadiidiyaana, aree bhaliib isridna. 7 Baliin aanda kassaah tamna malooba.

8 Baawloos Yahuudi diini gaw shuumiyaayt, beentooy mhay tirga winneet ashꞌaraa oodehay Ukwaasanaayt hadꞌaayeeti aay sooyi. Bareeh bhaliisamiit afhisi. 9 Laakiin bareesooh gwadi imꞌakaarniit, wꞌaamanti iribna. Kasseeh oodehayi suurii Wꞌankwanaay usalaliib amaagna hadiidiyaan. Aflaay Baawloos bareeh yꞌish idꞌi. Baawloos yꞌaamanana geebooh haay giigiya. Tiiraanuusiit tumadrasaatiib imbꞌeebka bareeh allamiya. Aree kassoohoob beentooy bhaliiyi. 10 Beet tuuna malu hawla tiki. Aflaay kassaah Iyahuudiiwwa Iyoonaaniiwwa Aasiyaay whaashiib ikwiir, Wꞌankwanaay ibhali imaasiwna.

11 Ukwaasana Baawloosiib wꞌayii akraat mꞌuujisa ikwaas. 12 Uudehay Baawloosiib ugaru tehaab yhalakaawwa imandilwa han yakisiyaaniit, oodehay eelhaab haay ibeen. Uudehay tilhanay iibriin kassaah mheelamiyaana, aajin han hooy itfirꞌana.

13 Yahuudi gwadi oodehayiib hiireeriyaaniit, Wꞌankwana Yasuuꞌiib oosmii hadꞌaayeet anu eejin isfarꞌaneet toona jarrabiyaan. Eejinee dehaay, "Been Baawloos hadiidiyeeb Yasuuꞌiib oosmii firꞌana!" iidna. 14 Yahuudi fagiiri win Sakaawa ittiyoodiinaay ar asarama beet toona sakiin. 15 Laakiin yint gaat aajin bareeyooh dehaay, "Yasuuꞌaab nikteen! Baawloos han neemsiiw. Baraakna laakiin aabaana?" idiin. 16 Malya uutak aajin hooy iifiini bareeyooh dehaay fariyaayt ithabꞌa. Baraah raboobaawwa booyeewwa ugawii ifoorna.

17 Iyahuudwa Ijintiiliiwwa Afasooseeb ikwiir een imaasiwnihoob, kassaah irkwiin. Aflaay Wꞌankwana Yasuuꞌiib uusim hamooysamiya. 18 Baliin yꞌaamaniyaan oontꞌa gwida hooy eeyaaniit, suur iidꞌaneet tumaagtoohna ifidhadhna. 19 Gali bareesooh sehart shagaamiin, iktabeehna oodehayi suurii haay eeyaaniit loowiyaan. Baliin iktabi taman ay tamuun alfa ashteeti mhallaga iikti. 20 Aflaay Wꞌankwanaay ibhali winneet ibrarna, masi akrakaab iiktiin.

21 Tuun tuuna kastuuh tikaayt harꞌii, Baawloos Magadoonyaabwa Akhaaꞌiyaaywa hasamiit, Algudus beeti giig niyaamiya. Baawloos "Beentooysii, Roomaab iibi andi." idi. 22 Aflaay baruuh malu shamaamiigaayeeh, Tiimootiiwwa Araastuuswa, Magadoonyaab marii diigwatiya. Laakiin baruuh Aasiyaay whaashiib middaat isꞌa.

23 Beenhoob Wꞌankwanaay usalali sabbii, beentooy akraat ribshaay tiifi. 24 Tak ashteet shagaamanaab Dimeetriyoos iidneeb iifi. Uun baruuh ashteetii tusanam Artamiis shagaamiya. Bariiyooh dehaay shagaamiin uudehay aree gwida mhallaga rayiimiyaan. 25 Dimeetriyoos oodehay gaal shaga daayiin kasseeh gaal mhiin haay eeyaayt, "Yaa yꞌarawaan, oon ushagaay daayi rayi rayiimnayeet toona tikteenna. 26 Laakiin uun uutak Baawloos iyadneeb gwida dehay kwakwidhisiyaneet toona rhitaana aree timaasiwna. Uun baruuh Afasooseeb oobhaat kiiki, laakiin kastooh Aasiyaay oon ushaga daayiini. Baruuh, een hinin yꞌaadamiya shagaamnayeeb isanama sidik kwaasanaab kiikeen indi. 27 Beet tuuna ushanhoon oobhaat kitsehasir, laakiin tusanam toowin Artamiistiib uugaw han dayꞌami indi. Kassooh Aasiyaay whaashiibwa kastooh tuduniyaatiibwa yꞌabidneet Tusanam tuukna han hamooysami kitdi, umatuunuuh dhibi indi." idi.

28 Ishagaamana een ibhali imaasiwnihoob, yhaseeniit jajawiyaana, "Afasoosiit tukwaasana Artamiis tutageega!" idiin. 29 Willa tumadiinaatiib ribshaayt tiki. Uudehay eenda Baawloosi geeb Magadoonyaay yꞌaa iifiin, Gaayooswa Ariistaarkooswa yꞌaabikna. Malya baraah kassaah tumadiinaati majlisi mhiin ookiik dhaabiyaan. 30 Baawloos firꞌatiit oodehay bhaliisamtiib yhariweek han, yꞌaamanana barooh sifarꞌaab kiikeen. 31 Whaashi daabta gali Baawloosi arawa. Baraah Baawloosii dehaay diigwat ifdigniit, been oomhiin beeti biifirꞌeet toona hooy yhariwna.

32 Uudehay umajlisiib iifiin arbishamiyaana, gal gaana waliikiyaana, aaraw aree weena waliikiyaan. Igwidakaab aree aakna toona dehaay yꞌaab iiktiineet kiikanna. 33 Iyahuudi Iskandar iidni tak oodehayi suurii suurisiyaaniit naan iideeb sooyaan. Uutak wꞌayooh yꞌabikaayt toona tutikeet oodehayi suurii hadiidiya. 34 Laakiin uudehay baruuh Yahuudiib iiktiyeet toona ikannihoob, kassaah maloot sꞌa gaal hissii waliikiyaana, "Afasoosiit tukwaasana Artamiis tutageega!" idiin.

35 Tumadiinaati kaatib oodehay dinisiyaayt, "Yaa Afasoosi dehay, tusanam Artamiis tutageega toon tumadiinaatiib uudehay yꞌabidneet toona kastooh tuduniyaatiib baakaan aabu? Tulꞌandalaatuuh tibreetee tooy dhibtaneet toona baakaan aabu? 36 Toon toona ittawiib kiihaay, shaawti ashshigiit amaagna baasakaana. 37 Baraakna een eenda tooy haay eetaana. Laakiin aan baraah oodiini gaw gwiharaab kiikeena tari tukwaasanaatoon neewaab kiikeen. 38 Dimeetriyooswa yꞌarawaahwa een eenda kehii halaagaayt ibariineek, mhakamaatwa gaadiyaabwa nibari. Baraah beentooy baꞌashkiimiin. 39 Baraakna toon toonaatiika gwidakaat tidꞌaneek, aflaay tugadiyaay tumadiinaati majlisi suurii batiikti. 40 Amsi hinin ribshaayti sabbii atehimamaaba. Aree beet tuuna afoob kitbari. Rookaat haay nidꞌi sabab han kiihaay." idi.

41 Een ibhali idiit harꞌii, baruuh uudehay giigiyeet toona sooya.