1 Baawlooswa Siilaaswa, Darbaabwa Liistaraawwa iktimna. Beentooy kwiriyaataayi gaal "Tiimooti" iidneeb iifi. Barooh tuundi Yahuudiitu aree aamananaatu, ubaaba aree Yoonaaniibi. 2 Yꞌaamanana Liistaraaywa Ikoonyoomwa iifiin Tiimootiib daayiinaayt hooy hadiidiyaan. 3 Baawloos baruuh geeboohna iibaabiyeet yhariw. Iyahuudi been oomhiin ikwiir Tiimootiib ubaaba Yoonaaniib iiktiyeet toona iktiinna. Aflaay Baawloos barooh ikwishib. 4 Malya Baawlooswa aarawwa madiinaat madiinaatii iibaabiyaan. Alguduseeb iifiin ilinguumiyaawwa yꞌeegrimaawwa imkirneeb oomkir oodehay yꞌaamanaab sooyaan. Uudehay een ibhali isnaakiirneet toona sooyaan. 5 Aflaay tikaniisa wꞌiimaaniib yꞌakirna, aree bꞌeebka yꞌadadaah gwuudiyaan.

6 Baawlooswa yꞌarawaahwa Firiigiyaabwa Galaatiyaaywa geebii hasamiyaan. Laakiin Aashuuk Imugaddasa bareeh Aasiyaay bhaliisaab kiikeen. 7 Baraah Miisiyaay yhiduud iktimnihoob, Biitiiniyaab beeti giig yhariwna. Laakiin Yasuuꞌiib Aashuuk bareeh yhabiin. 8 Aflaay baraah Miisiyaay iibaabiyaaniit Taroowaas ibeen.

9 Been whawaad Baawloos hawsoot hawsooya. Baruuh tehawsooteeb Magadoonyaayi tak gadaa barooh iinꞌal rhiya, "Tooy Magadoonyaay mꞌaa! Shama hoon!" idi. 10 Baawloos tehawsu rhiyani harꞌii, gaalhoob Magadoonyaay mabayee dehaay nimar. Ukwaasana usakana udaayiib beentooy soonayi jillaay waliikaayoon ikatiyeet toona nikan.

11 Hinin Taroowaasee markabt nꞌamaayt, Saamootraak nibi. Aree oombꞌi ooraaw Niyaaboolis niktim. 12 Beentooysii tumadiina Fiilibeeb beeti iibaabna. Fiilibi Magadoonyaayt tumadiina toowintu, laakiin Roomaani abkaab iiktiini haashi. Aree beentooy gwidaat yina nisꞌa.

13 Malya toosab tumadiinaati dheefaay nifirꞌa, aree oobhari dar nibi. Beentooy siileelti mhiin hooy nimiireeb hiisna. Malya mꞌat beentooy ammarriyaa iifiint hadiidsamna. 14 Gaat bateesooh Liidiyaab tiikti. Batuuh tumadiina Tiyaatiiraay yꞌaatu, adaru halaka alyaab tiidlib. Batuuh Ukwaasana tꞌibid takati. Wꞌankwana han Baawloos iideeb ibhali batooh agbilisiya. 15 Malya batuuhwa indhiwaayaahwa itoomaasnihoob, ugawiyooh tehadar hoon, "Baraak sidik ani Wꞌankwanaayt aamanana akatiyeet toona tikteeniineek, mꞌaanaat ugawiyu geebu sꞌana." tidi. Aflaay tuwaliiktooh agbilna.

16 Yint gaat hinin toosileelti mhiin bayee, oot kishiyaat nimri. Batuuh toona tugayii tiiktiit sooyiin jin tiibri. Batuuh oon ushagaay yꞌankwanaayeeh gwida mhallaga rayiista. 17 Tꞌoor tukishiya Baawlooswa hinin eerawwa timooraam hoon, aree waliikee, "Aan aanda Ukwaasana Utageegaanaay shagaamanaaba! Kak umidhhan timeerneeb sooyeen hookna." tidi. 18 Batuuh beet toona gwidaat yina sakta. Malya Baawloos yhasi, aree nakamiyaayt eejinee dehaay, "Yasuuꞌaab Umasiihi simii bhaliisamani hookna, toon tꞌoor hooy firꞌana!" idi. Aajin gaalhoob tꞌoor hooy giigiyaan.

19 Tꞌooti ankwana mhallagaab imaar biidiineet toona ikannihoob, Baawlooswa Siilaaswa yꞌabikniit tumhakama beeti irhifna. 20 Baraah yhaakmaayee dehaay, "Aan aanda Yahuudiiba. Aree tumadiinaatiib ribshaayt ikwasiin. 21 Hinin Iroomaani, tꞌaadaateeyoon harramamaani tari atoorbiinaayti dꞌuuy sooyeen hoon." idiin.

22 Uudehay igwida bareeyooh geeb Baawlooswa Siilaaswa ithabꞌana. Yhadꞌa eenda imalooyi halaka shatatiyaaniit, kwirbaajii jasaameeneet toona sooyaan. 23 Aanda amaag jasaamiyaani harꞌii, oosjin daamiyaan. Usijni daabit bareeh akraab ingwꞌiideet toona soomamiya. 24 Udaabit toona tusoomamaab iiktiyeet idꞌi. Bareeh usijniit hooyteeb daasiya, aree iragadaayeehna akraat shinshiltii hindi kehii yhaakwir.

25 Whawaadi tarabeeb Baawlooswa Siilaaswa siileeliyaan. Ukwaasanaay hamaadiit shiila iidna. Uudehay aaraw usijniib iifiin bareeh isniikarna. 26 Gaalhoob, tuubuur idhtaayt usijni asaas kassuuh digamiya. Idheefa ingalna, aree tishinshila kasseeh yꞌabuukiyaayee dhadhibiyaan.

27 Usijni daabit ibꞌar. Udheefa nagaal akay rhiyanihoob, yꞌabuukiya ifoorneeb hiisiya. Baruuh shaawti bꞌadhdhooh ilꞌibaayt ishuukeeyooh madar yhariw. 28 Laakiin Baawloos barooh waliikiyaayt, "Ishuukeek baaꞌadaaya! Hinin kassaan tooy neefi." idi.

29 Usijni daabit lambaat yhariwaayt oosjin shuumiya. Baruuh mirkwaayii idhee Baawlooswa Siilaasi suuriiwwa dhibiya. 30 Malya bareeh usijnii ifirꞌat harꞌii raatiya, "Yhaana, umidhhan amanriyee dehaay, ibakii naan sakani?" idi.

31 Baraah igwibiina, "Wꞌankwana Yasuuꞌaab aamana, malya umidhhan imaar tindiya! Baruukwa indhiwaayaakwa umidhhan timeerna." idiin.

32 Malya baraah Wꞌankwanaay ibhali barooh sooyaan. Bariiyeeh indhiwa eeraw kasseeh han sooyaan. 33 Been whawaadiib, usijni daabit bareeh haay giigiyaayt, bareeteeh tijarhiinay ishaagwidh. Malya baruuhwa kassaah indhiwaayaahwa itoomaasna. 34 Usijni daabit bareeh ugawooh haay ibaayt, mꞌariit suurii daasiya. Baruuh Ukwaasana aamaniya akay winneet afirhiya. Baruuhwa kassaah indhiwaayaahwa afirhiyaan.

35 Tulhaytooh yhaakma ikajareehna usijni daabit beeti diigwatiyaaniit, "Baliin eenda fidigaa!" idiin. 36 Usijni daabit Baawloosii dehaay, "Yhaakma barookwa Siilaasi fiduugwa sooyaanheeb. Oontꞌa firꞌana, asgaa giigaana!" idi.

37 Laakiin Baawloos ikajaree dehaay, "Hinin Roomaaniiba. Iroomaani daabta mhakamaat anu oodehayi suurii jasaayaan hoon. Malya oosjin idꞌiin hoon. Oontꞌa kwibsiit hoon giigsitiib niyaameen han? Abajoo! Baraah aakna bayꞌiina siisarhooyt hooy nhariw." idi.

38 Ikajar, Baawlooswa Siilaaswa Roomaaniib ikatiineet toona yhaakma sooyaanihoob, bareeh mirkwaay hooy daaya. 39 Aflaay baraah eeyaaniit afoob hooy yhariwna. Usijnii isfarꞌaniit, tumadiinaatii giigeeneet toona hooy yhariwna. 40 Baawlooswa Siilaaswa usijnii ifirꞌaniit harꞌii, Liidiyaay oogaw ibeen. Aree beentooy Wꞌankwanaay aamanana imriina, aree bareeh isꞌaakakirna. Malya giigiyaan.