Milagres de Jesus
Os Evangelhos registram dezenas de milagres realizados por Jesus — curas, ressurreições, domínio sobre a natureza e libertações. Cada milagre revelava sua divindade e compaixão.
Curas de cegos e surdos
Jesus devolveu a visão aos cegos e a audição aos surdos, manifestando seu poder sobre toda enfermidade e deficiência.
दो अन्देया खे नजरा रा दान
जेबे यीशु तेथा ते आगे गए, तेबे दो अन्दे तिना पीछे ये बोली की आक्का लगे पाणे, "ओ दाऊदो री ल्वाद! आसा पाँदे दया कर।" जेबे सेयो कअरे पऊँचे, तेबे सेयो दो अन्दे तिना गे आए, तेबे यीशुए तिना खे बोलेया, "क्या तुसा खे विश्वास ए कि आऊँ तुसा खे ठीक करी सकूँआ?" तिने बोलेया, "आ प्रभु।" तेबे यीशुए तिना रिया आखिया छुँईं की तिना खे बोलेया, "तुसा रे विश्वासो रे मुताबिक तुसा साथे ओ।" और सेयो तेबुई देखणे लगे। यीशुए तिना खे सावधान करदे ऊए बोलेया, "देखो! कोई बी एसा गल्ला खे नि जाणो।" पर तिने बारे निकल़ी की तिना रा यश सारे देशो रे फैलाई ता।
दुँईं अन्देया खे नजरा रा दान
जेबे सेयो यरीहो नगरो ते निकल़ने लगी रे थे, तेबे एक बड़ी पीड़ तिना पीछे आईगी। तेबे दो अन्दे, जो सड़का रे कनारे बैठी रे थे, तिने जेबे ये सुणेया कि यीशु जाणे लगी रे, तो सेयो आक्का पायी की बोलणे लगे, "ओ प्रभु! दाऊदो री ल्वाद, आसा पाँदे दया कर।" लोक तिना खे बकणे लगे कि चुप रओ, पर सेयो ओर बी चींगी की बोलणे लगे, "ओ प्रभु! दाऊदो री ल्वाद, आसा पाँदे दया कर।" तेबे यीशुए खड़े ऊई की सेयो बुलाए और बोलेया, "तुसे क्या चाओए कि आऊँ तुसा खे करुँ?" तिने बोलेया, "ओ प्रभु! ये कि म्हारिया आखी खुली जाओ" यीशुए खे तिना पाँदे तरस आया और तिने तिना रिया आखिया छूँईया और सेयो तेबुई देखणे लगे और सेयो तिना पीछे चलणे लगे।
बैतसैदा रे एक अन्दे खे ठीक करना
तेबे सेयो बैतसैदा नगरो खे आए और लोक एक अन्दे खे यीशुए गे ल्याए और बिनती कित्ती कि तुसे एसखे छुँईं देओ। तेबे यीशु तेस अन्दे खे आथ पकड़ी की गांव ते बारे लईगे और तेसरी आखी पाँदे थूकी की आथ राखे और तेसते पूछेया, "क्या तूँ देखी सकेया?" तिने आखी चकी की बोलेया, "आऊँ माणूंआ खे देखी सकूँआ, सेयो माखे चलदे ऊए डाल़ा जेड़े दिशोए।" तेबे यीशुए तेसरी आखी पाँदे फेर आथ राखे और तेबे तिने अन्दे त्यानो साथे देखेया और से ठीक ऊईगा और सब कुछ साफ-साफ देखणे लगेया। यीशुए से कअरो खे पेजेया और तेसखे बोलेया, "एस गांव रे पीतरे पैर पनि राखणा।"
टऊणे और तूतले माणूंए खे ठीक करना
तेबे यीशु सूर और सैदा रे नगरो ते निकल़ी की सिदोन और दिकापुलिसो रे प्रदेशो रे ऊँदे ऊए गलीलो रे समुद्रो रे नेड़े पऊँचे। तेबे लोके एक माणूं तिना गे ल्याया जो टौणा और तूतला था, तेबे तिने यीशुए ते बिनती करी की बोलेया, "आपणा आथ एस पाँदे राखी देयो।" तेबे यीशु तेसखे पीड़ा ते लग जे लईगे और आपणियां गूठिया तेसरे कानो रे पाईया और थूक लगाई की तेसरी जीब छुँईं। तेबे तिने स्वर्गो खे लांबा साआ परी की देखेया और बोलेया, "ईप्फत्तह!" मतलब "खुली जा!" तेबे से तेबुई सुणने लगेया और तेसरी जीब खुली गी और से साफ-साफ बोलणे लगेया। तेबे तिने तेसखे सावधान करी की बोलेया, "केसी गे नि बोलणा।" पर जितणा तिने से सावधान कित्तेया, तिथणा ई से ओर बी प्रचार करने लगेया। तेबे सेयो लोक बऊत हैरान ऊई की बोलणे लगे, "तिने जो कुछ कित्तेया, अच्छा कित्तेया, सेयो टौणेया खे सुणने री और गूँगेया खे बोलणे री शक्ति देओ ए।"
अन्दे बरतिमाईए खे देखणे रा दान
यीशु और तिना रे चेले यरीहो नगरो रे आए। और जेबे सेयो और तिना रे चेले बाटा रे थे, तेबे एक बड़ी पीड़ तिना पीछे-पीछे जाणे लगी री थी, तेबे तिमाईयो रा पाऊ बरतिमाई एक अन्दा भिखारी सड़का रे कनारे बैठेया रा था। जेबे तिने ये सुणेया कि यीशु नासरी ये, तेबे से जोरे-जोरे की आक्का पाणे लगेया कि, "ओ दाऊदो री ल्वाद, यीशु! मां पाँदे दया कर।" कई जणे तेसखे बकणे लगे कि चुप रओ, पर से ओर बी आक्का पाणे लगेया कि, "ओ दाऊदो री ल्वाद! मां पाँदे दया कर।" तेबे यीशुए रूकी की बोलेया, "तेसखे बुलाओ।" तेबे लोके से अन्दा बुलाई की तेसखे बोलेया, "याओ राख, उठ, यीशु ताखे बुलाणे लगी रे।" से आपणी चादर सेटी की फटाफट उठी गा और यीशुए गे आईगा। तेबे यीशुए तेसखे बोलेया, "तूँ क्या चाएया कि आऊँ ताखे क्या करुँ?" अन्दे बोलेया, "ओ गुरू! ये कि आऊँ देखणे लगी जाऊँ।" यीशुए तेसखे बोलेया, "चली जा, तेरे विश्वासे तूँ ठीक करी ता" और से तेबुई देखणे लगेया और बाटा रे से तिना पीछे चलणे लगेया।
अन्दे मांगणे वाल़े खे आखी रा दान
जेबे सेयो यरीहो नगरो रे नेड़े पऊँचे, तेबे एक अन्दा सड़का रे कनारे बैठे रा पीख लगी रा था मांगणे। तेबे से पीड़ा रे हांडणे री छेड़ सुणी की पूछणे लगेया, "ये क्या लगी रा ऊणे?" तिने तेसखे बोलेया, "यीशु नासरी लगी रे जाणे।" तेबे तिने आक्का पायी की बोलेया, "ओ दाऊदो री ल्वाद यीशु! मां पाँदे दया कर।" जो आगे-आगे लगी रे थे चलणे, सेयो तेसखे बकणे लगे कि चुप रओ, पर से ओर बी चींगणे लगेया, "ओ दाऊदो री ल्वाद मां पाँदे दया कर!" तेबे यीशुए खड़े ऊई की आज्ञा दित्ती, "एसखे मांगे ल्याओ।" और जेबे से नेड़े आया, तेबे तिने तेसते पूछेया, "तूँ क्या चाएया कि आऊँ ताखे क्या करुँ?" अन्दे बोलेया, "ओ प्रभु ये कि आऊँ देखणे लगी जाऊँ।" यीशुए बोलेया, "देखणे लग, तेरे विश्वासे तूँ ठीक करी ता।" और से तेबुई देखणे लगेया और परमेशरो री तारीफ करदा ऊआ तिना पीछे चलणे लगेया और सबी लोके ये देखी की परमेशरो री स्तुति कित्ती।
जन्मो रे अन्दे खे देखणे रा दान
यीशु और तिना रे चेलेया तीसिए जांदे ऊए एक एड़ा माणूं देखेया, जो जन्मो तेई अन्दा था। तेबे तिना रे चेलेया तिना ते पूछेया, "ओ गुरू! किने पाप कित्तेया था, इने माणूंए, जो अन्दा जम्मेया या एसरे माए-बाओ?" यीशुए ज्वाब दित्तेया, "ना तो इने पाप करी राखेया और ना एसरे माए-बाओ कि ये अन्दा जम्मेया, पर ये तेबे ऊआ, ताकि परमेशरो रे सामर्था रे काम एस पाँदे प्रगट ओ। जिने आऊँ पेजी राखेया, आसा खे जरूरी ये कि आसे तेसरे काम दिनो-दिने ई नपटयाणा जरूरी ए, कऊँकि से रात आऊणे वाल़ी ए, जिदे कोई काम नि करी सकदा। जदुओ तक आऊँ दुनिया रे ए, तदुओ तक, दुनिया री जोति ए।" ये बोली की तिने जमीना पाँदे थूकेया और तेस थूको साथे माट्टी सीन्नी कित्ती और से माट्टी तेस अन्दे रिया आखी रे मल़ी की तेसखे बोलेया, "जा, और शीलोहो रे कुण्डो रे आपणी आखी तोई लो" (जेतेरा मतलब पेजे राए) तेबे तिने जायी की आखी तोईया और देखदा ऊआ आया।
Curas de paralíticos e enfermos
Paralíticos caminharam, leprosos ficaram limpos e todo tipo de doença foi curada pelo toque e pela palavra de Jesus.
तेबे देखो, एक कोढ़िए तिना गे आयी की तिना गे माथा टेकेया और बोलेया, "ओ प्रभु, जे तुसे चाओ तो माखे ठीक करी सकोए।" यीशुए आपणा आथ आगे कित्तेया और से छूँयां और तेसखे बोलेया, "आऊँ चाऊँआ कि तूँ ठीक ऊई जाए।" से तेबुई आपणे कोढ़ो ते ठीक ऊईगा। यीशुए तेसखे बोलेया, "देख, केसी गे नि बताणा, पर जाई की आपू खे पुरोईतो गे दखा और जो कुछ मूसे नबीए चढ़ावा ठराई राखेया, तेस चढ़ा, ताकि तिना खे गवाई ओ कि तूँ ठीक ऊईगा।"
तेबे यीशुए देखेया, कई लोक एक अदरंगो रे रोगिए खे माँजे पाँदे चकी की तिना गे ल्याए, यीशुए तेसरा विश्वास देखेया और तेस अदरंगो रे रोगिए खे बोलेया, "ओ पाऊआ! याओ राख; तेरे पाप माफ ऊईगे।" तेबे कई शास्त्रिए सोचेया, "ये तो परमेशरो री निन्दा करने लगी रा।" यीशुए तिना रे मनो री गल्ल जाणी की तिना खे बोलेया, "तुसे आपणे मनो रे बुरा बिचार कऊँ करने लगी रे? ये बोलणा बऊत आसान ए कि, ‘तेरे पाप माफ ऊईगे’, पर ये बोलणा बऊत कठण ए कि, ‘आपणा मांजा चकी की चल फिर।’ पर इजी री खातर कि तुसे जाणी लओ कि मां माणूं रे पुत्रो खे तरतिया पाँदे पाप माफ करने रा बी अक्क ए।" यीशुए तेस अदरंगो रे रोगिए खे बोलेया, "उठ, आपणा मांजा चक और आपणे कअरो खे चली जा।" से उठी की आपणे कअरो खे चली गा।
तेती एक माणूं था, जेसरा आथ सूकेया रा था। तिने यीशुए पाँदे दोष लगाणे रिया तँईं तिना ते पूछेया, "क्या रामो रे दिने चंगा करना ठीक ए?" यीशुए तिना खे बोलेया, "तुसा बीचा ते एड़ा कूणे, जेसगे एक ई पेड ओ और से रामो रे दिने गड्डे रे पड़ी जाओ और से तेसा खे नि निकयाल़ो? पला, माणूंए री कीमत तो पेडा ते कितणी बड़ी की ए। इजी री खातर बिधानो रे मुताबिक रामो रे दिने पला करना ठीक ए।" तेबे यीशुए तेस माणूंए खे बोलेया, "आपणा आथ आगे कर" तिने आगे कित्तेया, तेबे तेसरा आथ दूजे आथो जेड़ा ठीक ऊईगा।
शमौनो री सासुआ खे बऊत बुखार था से माँजे पाँदे सुती री थी और तेबे तिने फटाफट तेसा रे बारे रे यीशुए खे बोलेया। तेबे यीशुए नेड़े जाई की तेसा रा आथ पकड़ी की से ऊबे ठवाल़ी और तेसा रा बुखार उतरी गा और तेबे से तिना री सेवा करने लगी।
कोढ़ो रे रोगिए खे ठीक करना
तेबे एक कोढ़िए यीशुए गे आई की बिनती कित्ती और तिना रे सामणे कूटणे टेकी की तिना खे बोलेया, "जे तुसे चाओ, तो माखे ठीक करी सकोए।" तेबे यीशुए तेस पाँदे तरस खाई की आपणा आथ आगे कित्तेया और तेसखे छुँईं की बोलेया, "आऊँ चाऊँआ कि तूँ ठीक ऊई जाए।" तेबे तेबुई तेसरा कोढ़ निकल़ी गा और से ठीक ऊईगा।
तेबे लोक एक अदरंगो रे रोगिए खे चार माणूंआ ते चकाई की तिना गे ली आए। पर जेबे सेयो पीड़ा रिया बजअ ते यीशुए गे नि पऊँची सके, तेबे तिने से छत जेते निठे यीशु थे, खोली ता और जेबे सेयो तेस पटी चुके, तेबे से मांजा जेते पाँदे अदरंगो रा रोगी पड़ी रा था, यीशुए रे सामणे त्वारेया। यीशुए तिना रा विश्वास देखी की तेस अदरंगो रे रोगिए खे बोलेया, "ओ पाऊआ, तेरे पाप माफ ऊईगे।"
तेबे कुछ शास्त्री जो तेती बैठी रे थे, आपणे-आपणे मनो रे सोचणे लगे, "ये माणूं कऊँ एड़ा बोलोआ? ये तो परमेशरो री निन्दा करने लगी रा। परमेशरो खे छाडी की ओर कुण पाप माफ करी सकोआ?" यीशुए तेबुई आपणी आत्मा रे जाणी ला कि सेयो आपणे मनो रे एड़ा लगी रे सोचणे तेबे तिने तिना खे बोलेया, "तुसे आपणे-आपणे मनो रे एड़ा बिचार कऊँ करने लगी रे? ये बोलणा बऊत आसान ए कि तेरे पाप माफ ऊईगे पर ये बोलणा बऊत कठण ए कि आपणा मांजा चकी की चल फिर। इजी री खातर तुसे जाणी लओ कि मां माणूं रे पुत्रो खे तरतिया पाँदे पाप माफ करने रा बी अक्क ए।" यीशुए तेस अदरंगो रे रोगिए खे बोलेया, "आऊँ ताखे बोलूँआ कि उठ! आपणा मांजा चकी की आपणे कअरो खे चली जा" से उठेया और तेबु आपणा मांजा चकी की सबी रे सामणे ते निकल़ी की चली गा। तेबे सब हैरान ऊईगे और परमेशरो री तारीफ करी की बोलणे लगे, "आसे एड़ा कदी पनि देखेया।"
सूके रे आथो वाल़े माणूंए खे ठीक करना
यीशु प्रार्थना रे कअरो रे फेर गए, तेबे तेती एक माणूं था, जेसरा आथ सूकेया रा था। तेबे कुछ फरीसी यीशुए पाँदे दोष लगाणे खे और तिना खे काणे रे चक्रो रे थे कि देखूँए कि रामो रे दिने तेसखे ये ठीक करोआ की नयी। तिने सूके रे आथो वाल़े माणूंए खे बोलेया, "बीचे जे खड़ा ऊई जा।" तेबे यीशुए फरीसिया खे बोलेया, "रामो रे दिने बिधानो रे मुताबिक खरा करना ठीक ए या बुरा करना, प्राण बचाणा या मारना।" पर सेयो चुप रए। तेबे यीशुए तिना रे मनो रे जिद्दी सबाओ ते उदास ऊई की तिना खे रोषो रे चऊँ कनारो खे देखेया और तेस माणूंए खे बोलेया, "आपणा आथ आगे कर" तिने आगे कित्तेया और तेसरा आथ ठीक ऊईगा।
कोढ़ो रे रोगिए खे ठीक करना
जेबे सेयो नगरो रे थे, तेबे तिना खे तेती एक कोढ़ी मिलेया और से प्रभुए खे देखी की तिना रे पैरो पाँदे पड़ी गा और बिनती कित्ती, "ओ प्रभु! जे तुसे चाओ तो माखे ठीक करी सकोए।" यीशुए आपणा आथ आगे कित्तेया और से छूँयां और तेसखे बोलेया, "आऊँ चाऊँआ कि तूँ ठीक ऊई जाए" और तेबुई तेसरा कोढ़ चली गा।
तेबे कई लोक एक माणूंए खे, जो अदरंगो रा रोगी था, माँजे पाँदे ल्याए और सेयो तेसखे पीतरे लयी जाणे खे और यीशुए सामणे राखणे रा तरीका टोल़ने लगी रे थे। जेबे पीड़ा री बजअ ते सेयो तेसखे पीतरे नि लयी जाई सके, तेबे तिने छतो पाँदे चढ़ी की और खेप्रे टाई की, से माँजे समेत बीचे यीशुए रे सामणे त्वारेया। यीशुए तिना रा विश्वास देखी की तेस अदरंगो रे रोगिए खे बोलेया, "ओ माणूं! तेरे पाप माफ ऊईगे।" तेबे शास्त्री और फरीसी बईस करने लगे, "ये कूणे, जो परमेशरो री निन्दा करने लगी रा? परमेशरो खे छाडी की ओर कुण पाप माफ करी सकोआ?" यीशुए तिना रे मनो री गल्ल जाणी की तिना खे बोलेया, "तुसे आपणे मनो रे क्या सोचणे लगी रे? ये बोलणा बऊत आसान ए कि तेरे पाप माफ ऊईगे पर ये बोलणा बऊत कठण ए कि आपणा मांजा चकी की चल फिर। पर इजी री खातर कि तुसे जाणी लओ कि माणूं रे पुत्रो खे तरतिया पाँदे पाप माफ करने रा बी अक्क ए।" यीशुए तेस अदरंगो रे रोगिए खे बोलेया, "आऊँ ताखे बोलूँआ कि उठ और आपणा मांजा चकी की आपणे कअरो खे चली जा।" से तेबु आपणा मांजा चकी की तिना सामणे उठेया और परमेशरो री तारीफ करदा ऊआ आपणे कअरो खे चली गा।
सूके रे आथो वाल़े माणूंए खे ठीक करना
तेबे एड़ा ऊआ कि केसी ओरी रामो रे दिने सेयो प्रार्थना रे कअरो रे उपदेश देणे लगी रे थे, तेबे तेती एक माणूं आया, जेसरा आथ सूकेया रा था। शास्त्री और फरीसी यीशुए पाँदे दोष लगाणे री ताका रे थे कि देखूँए कि रामो रे दिने तेसखे ये ठीक करोआ की नयी। पर यीशु तिना रे बिचार जाणो थे, तेबे तिने सूके रे आथो रे माणूंए खे बोलेया, "उठ और बीचे खड़े ऊई जा।" से उठेया और खड़ा ऊईगा। यीशुए तिना खे बोलेया, "आऊँ तुसा ते पुछूँआ कि बिधानो रे मुताबिक रामो रे दिने क्या ठीक ए, पला करना या बुरा करना, प्राणो खे बचाणा या नाश करना?" तेबे तिने चऊँ कनारे तिना सबी खे देखी की तेस सूके रे आथो वाल़े माणूंए खे बोलेया, "आपणा आथ आगे कर।" तिने आगे कित्तेया और तेसरा आथ ठीक ऊईगा।
एकी सूबेदारो रा विश्वास
जेबे यीशु लोका खे इना सबी गल्ला बताई चुके, तेबे सेयो कफरनहूम नगरो रे आए। तेबे केसी सूबेदारो रा दास, जो तेसखे बऊत प्यारा था, बमारिया ते मरने वाल़ा था। तिने यीशुए रे बारे रे सुणी की कई यहूदिया रे बुजुर्ग तिना गे ये बिनती करने पेजे कि आयी की मेरे दासो खे बचा। सेयो यीशुए गे आयी की तिना ते बड़ी बिनती करी की बोलणे लगे, "से एते जोगा आए कि तुसे तेसखे ठीक करी सको। कऊँकि से म्हारी जातिया खे प्यार करोआ और तिने ई आसा रा प्रार्थना रा कअर बणाई राखेया।" यीशु तिना साथे चलणे लगे, जेबे सेयो कअरो रे नेड़े पऊँछणे वाल़े थे, तेबे तिने सूबेदारे तिना खे आपणे कई दोस्ता रे जरिए सन्देशा पेजेया, "ओ प्रभु कष्ट नि कर कऊँकि आऊँ एते जोगा निए कि तुसे मेरे कअरे आयी सको। इजी बजअ ते आऊँ आपू खे एते जोगा पनि समजदा कि तुसा गे आऊँ, पर तुसे आपणे मुंओ तेई बोली देओ, तो से मेरा दास ठीक ऊई जाणा। आऊँ बी पराधीन माणूं ए और सिपाई मेरे आथो रे ए। जेबे एकी खे बोलूँआ, ‘जा,’ तो से जाओआ और दूजे खे बोलूँ, ‘आओ,’ तो से आओआ। आपणे दासा खे बोलूँ, ‘ये कर,’ तो से करोआ।" ये सुणी की यीशु हैरान ऊईगे, तेबे तिने मूँ फेरी की तेसा पीड़ा खे जो तिना पीछे आऊणे लगी री थी बोलेया, "आऊँ तुसा खे सच्च लगी रा बोलणे कि मैं इस्राएलो रे बी एड़ा विश्वास नि देखेया।" तेबे जो दोस्त सूबेदारे पेजी राखे थे तिने कअरे जाई की से दास ठीक देखेया।
तेबे एक जवाणस आयी, जेसा रे ठारा साला ते, कमजोर करने वाल़ी दुष्टात्मा थी और से कुबड़ी ऊईगी थी और किंयाँ बी सीदी नि ऊई सको थी। यीशुए से देखी की बुलाई और तेसा खे बोलेया, "ओ जवाणसे! तूँ आपणी कमजोरिया ते छूटी गी।" तेबे तिने तेसा पाँदे आथ राखे और से फटाफट सीदी ऊईगी और परमेशरो री तारीफ करने लगी।
फरीसिये रे कअरे यीशु
तेबे यीशु रामो रे दिने फरीसिया रे अधिकारिया बीचा ते केसी एकी रे कअरे रोटी खाणे गये और सेयो तिना रे कोई गल़ती टोल़ने री ताका रे थे, ताकि तिना पाँदे कोई दोष लगाई सको। तेती एक माणूं था जेसरे आथो रे और पैरा रे सोजा था तेबे यीशुए धर्मशास्त्री खे और फरीसिया खे बोलेया, "क्या रामो रे दिने अच्छा करना बिधानो रे मुताबिक ठीक ए कि गल़त?" पर सेयो चुप-चाप रये। तेबे यीशुए से आथ लगाई की ठीक कित्तेया और जाणे दित्तेया
कोढ़ो रे दस रोगिया खे ठीक करना
और तेबे एड़ा ऊआ कि यीशु और तिना रे चेले यरूशलेमो खे जांदे ऊए सामरिया और गलीलो प्रदेशो रिये जाणे लगी रे थे। तेबे केसी गांव रे जांदे ऊए तिना खे दस कोढ़ी मिले। तेबे तिने दूर खड़ी की जोरे की आक्का पाई की बोलेया, "ओ यीशु! ओ स्वामी! आसा पाँदे दया कर।" यीशुए तिना खे देखी की बोलेया, "यरूशलेमो रे मन्दरो रे जाओ और आपू खे पुरोईतो गे बताओ।" सेयो जांदे-जांदे ई ठीक ऊईगे। तेबे तिना बीचा ते एक ये देखी की कि आऊँ ठीक ऊईगा, जोरे-जोरे साथे परमेशरो री तारीफ करदा ऊआ वापस यीशुए गे आया और यीशुए रे पैरा पाँदे मुंओ रे पारे पड़ी की तिना रा धन्यवाद करने लगेया और से सामरी था। तेबे यीशुए बोलेया, "क्या दस के दस माणूं ठीक नि ऊए, तेबे सेयो नौ माणूं केयी ए? क्या एस परदेशिया खे छाडी की ओर कोई नि निकल़ेया, जो परमेशरो री तारीफ करो?" तेबे यीशुए तेसखे बोलेया, "उठी की चली जा, तेरे विश्वासे तूँ बचाईता।"
ठतीया साला ते बमार रोगिए खे ठीक करना
इना गल्ला ते बाद यहूदिया रा एक त्योआर ऊआ और यीशु यरूशलेमो खे गये। यरूशलेमो रे पेडा रे फाटको (प्रवेश द्वार) रे नेड़े एक कुण्ड ए, जेतेखे इब्रानी पाषा रे बैतसैदा बोलोए और तिदे पाँज बरंडे ए। इना रे बऊत लंगड़े, बमार, अन्दे और सूके रे अंग वाल़े पाणिए रे ईलणे री उम्मीदा दे पड़े रे रओ थे। कऊँकि ठराए रे बखतो रे परमेशरो रे स्वर्गदूत कुण्डो रे उतरी की पाणिए खे ईलाया करो थे, पाणी ईलदे ई जो कोई पईले उतरो था, से ठीक ऊई जाओ था, चाए तेसरी कोई बी बमारी कऊँ नि ओ। तेती एक माणूं था, जो ठती साला ते बमार था। यीशुए तेसखे पड़ेया रा देखी की और ये जाणी की कि से बऊत दिना ते एड़िया ई दशा रे ए, तेसते पूछेया, "क्या तूँ ठीक ऊणा चाएया?" तिने बमारे बोलेया, "ओ प्रभु! मेरी मताद करने खे कोई माणूं निए कि जेबे पाणी ईलाया जाओ, तो माखे कुण्डो रे उतारो, पर मेरे पऊँछणे ते पईले ई कोई दूजा मांते पईले ई उतरी जाओआ।" यीशुए तेसखे बोलेया, "उठ और आपणा मांजा चकी की चल-फिर।" से माणूं तेबुई ठीक ऊईगा और आपणा मांजा चकी की चलणे-फिरने लगेया। से रामो रा दिन था।
राजे गे काम करने वाल़े रे पाऊए खे ठीक करना
तेबे यीशु फेर गलील प्रदेशो रे काना गांव रे आए, जेती तिने पाणी अँगूरा रा रस बणाई ता था। तेती राजे रा एक कर्मचारी था, जेसरा पाऊ कफरनहूम नगरो रे बमार था। जेबे तिने ये सुणेया कि यीशु यहूदिया ते गलीलो खे आईगा रा, तेबे से तिना गे गया और तिना ते बिनती करने लगेया कि चली की मेरे पाऊए खे ठीक करी दे, कऊँकि से मरने वाल़ा ए। यीशुए तेसखे बोलेया, "जदुओ तक तुसे चिह्न् और अचम्बे काम नि देखी लओगे, तदुओ तक कदी बी विश्वास नि करी सकदे।" राजे रे कर्मचारिये तिना खे बोलेया, "ओ प्रभु! मेरे पाऊए रे मरने ते पईले चलो।"
यीशुए तेसखे बोलेया, "जा, तेरा पाऊ जिऊँदा ए।" तिने माणूंए यीशुए री बोली री गल्ला पाँदे विश्वास कित्तेया और चली गा। से जेबे बाटा रेई था कि तदुओ खे तेसरे दास तेसखे मिली गे और बोलणे लगे, "तेरा पाऊ जिऊँदा और तन्दरूस्त ए।" तिने तेसते पूछेया, "कुण जी कअड़िया से ठीक ऊणे लगेया था?" तिने तेसखे बोलेया, "काल तकरीबन दोपईरो रे एक बजे रे करीब तेसरा बुखार उतरी गा था।" तेबे से पिता समजी गा कि ये तेस बखते ई ऊआ, जेस बखते यीशुए तेसखे बोलेया था, "तेरा पाऊ जिऊँदा ए।" और तिने और तेसरे सारे कराने यीशुए पाँदे विश्वास कित्तेया। ये दूजा सामर्था रा काम था, जो यीशुए यहूदिया प्रदेशो ते आई कि गलील प्रदेशो रे दखाया।
A mulher com fluxo de sangue
Uma mulher que sofria há doze anos tocou a orla do manto de Jesus e foi curada instantaneamente pela sua fé.
तेबे एक जवाणस आयी, तेसा खे बारा साला ते खून बइणे री बमारी थी, से पीछे ते आयी और तेसे यीशुए रे टाल्लेया रा कनारा छूँयां। कऊँकि से आपणे मनो रे बोलो थी, "जे आऊँ तिना रे टाल्ले ई छुँईं लऊँगी, तो ठीक ऊई जाणी।" यीशुए तेसा खे मुड़ी की बोलेया, "बेटिये! याओ राख, तेरे विश्वासे तूँ बचाईती।" तेबे से जवाणस तेबुई ठीक ऊईगी।
तेबे एक जवाणस जो तेसा पीड़ा रे थी, जेसा खे बारा साला ते खून बइणे री बमारी थी और से आपू खे ठीक ऊणे री तँईं कई बैदा गे गई और आपणा सब कुछ खर्च करी ता, पर से ओर बी बमार ऊईगी और कुछ फाईदा नि ऊआ। यीशुए रे बारे रे सुणी की से पीड़ा ते पीछे ते आई और तिना रे टाल्ले छूँएं। कऊँकि से बोलो थी, "जे आऊँ तिना रे टाल्ले ई छुँईं लऊँगी, तो ठीक ऊई जाणी।" और तेबुई तेसा रा खून बइणा बंद ऊईगा और तेसे आपणे शरीरो ते जाणी ला कि मेरी बमारी ठीक ऊईगी।
तेबे एक जवाणस जेसा खे बारा साला ते खून बइणे री बमारी थी और से आपणी सारी सम्पति बैदा खे देई चूकी थी पर तेबे बी से केसी रे आथो की ठीक नि ऊई। तेबे तेसे पीछे ते आयी की यीशुए रे टाल्ले छूँएं और तेबुई तेसा रा खून बईणा बन्द ऊईगा। तेबे यीशुए बोलेया, "आऊँ किने छूँयां?" जेबे सब मुकरी गे, तेबे पतरसे और तेसरे साथिये बोलेया, "ओ स्वामी! तुसे तो पीड़े जिक्की ते और ये तो तुसा पाँदे ई पड़ी गी।" पर यीशुए बोलेया, "आऊँ किने तो छुँईं राखेया।" कऊँकि माखे पता लगी गा रा कि मांते सामर्थ निकल़ी री। जेबे जवाणसे देखेया कि आऊँ छिपी नि सकदी, तेबे से बऊत डरदे-डरदे आयी और तिना रे पैरा पाँदे पड़ी की तेसे सबी लोका सामणे बताया कि मैं किजी री बजअ ते तुसे छूँएं और किंयाँ फटाफट ठीक ऊईगी। यीशुए तेसा खे बोलेया, "बेटिये! तेरे विश्वासे तूँ बचाईती, बेफिकर ऊई की चली जा।"
Ressurreições
Jesus ressuscitou mortos — a filha de Jairo, o filho da viúva de Naim e Lázaro. Ele é Senhor sobre a morte.
मरी री मुन्नी और बमार जवाणस
जेबे यीशु इना गल्ला तिना खे बोलणे ई लगी रे थे, तेबे एक अधिकारी तिना गे आया और तिना गे माथा टेकेया और बोलेया, "मेरी बेटी एबु-एबु मरी गी, पर जे तुसे चलो और आपणा आथ राखो तो से जिऊँदी ऊई जाणी।" यीशु उठे और आपणे चेलेया लयी की तेस पीछे चली गे।
जेबे यीशु तेस अधिकारिए रे कअरे पऊँचे, तेबे तिने बांसल़ी बजाणे वाल़े और पीड़ आल्ला-गोल्ला करदे ऊए देखी। तेबे यीशुए बोलेया, "आटी जाओ, मुन्नी मरी नि रई, पर सऊणे लगी री।" ये सुणी की सेयो तिना रा मजाक लगे ऊड़ाणे। पर जेबे पीड़ तेथा निकयाल़ी ती, तेबे तिने पीतरे जाई की तेसा मुन्निया रा आथ पकड़ेया और से ठीक ऊईगी।
तेबे याईर नाओं रे प्रार्थना रे कअरो रे सरदारा बीचा ते एक तेती आया और यीशुए खे देखी की तिना रे पैरो पाँदे पड़ी गा। तेबे तिने बिनती कित्ती और बोलेया, "मेरी छोटी बेटी मरने वाल़ी ए, तुसे मेरे कअरे आई की तेसा पाँदे आथ राखो, ताकि से ठीक ऊई जाओ और जिऊँदी रओ।" तेबे यीशु तेस साथे चली गे, और एक बड़ी पारी पीड़ बी तिना साथे आईगी, एथो तक की लोक तिना पाँदे रूड़ी जाओ थे।
तेबे प्रार्थना रे कअरो रे सरदारो रे कअरे पऊँची की तिने लोक रोंदे ऊए और राड़िया देंदे ऊए देखे। तेबे यीशुए पीतरे जाई की तिना खे बोलेया, "तुसे रोणे और राड़िया कऊँ लगी रे देणे? तेरी मुन्नी मरी नि रई, पर सऊणे लगी री।" सेयो ये गल्ल सुणी की यीशुए रा मजाक लगे ऊड़ाणे, पर तिने सब जणे बारे निकयाल़ी की मुन्निया रे माए-बाओ और आपणे तीनो चेलेया साथे पीतरे गया, जेती मुन्नी थी पड़ी री। तेबे तिने मुन्निया रा आथ पकड़ी की तेसा खे बोलेया, "तलीता कूमी!" मतलब "ओ मुन्निए आऊँ ताखे बोलूँआ कि उठ।" तेबे मुन्नी उठी और फटाफट चलणे-फिरने लगी। से बारा साला री थी। ये देखी की सारे लोक बऊत हैरान रई गे।
यीशुए फेर बोलेया, "आऊँ आजकाल के लोका री उपमा किजी साथे करुँ? सेयो तिना बच्चेया जेड़े ए, जो बजारो रे बैठी की एकी-दूजे खे आक्का पाई की बोलोए, ‘आसे तुसा खे बांसल़ी बजाई, पर तुसे नि नाचे; आसे शोग कित्तेया, पर तुसे छाती नि बजाई।’ कऊँकि यूहन्ना बपतिस्मा देणे वाल़ा न तो रोटी खांदा आया और ना अँगूरा रा रस पींदा आया और तुसे बोलोए कि तेसरे दुष्टात्मा ए? पर आँऊ माणूं रा पुत्र खांदा-पींदा ऊआ आया और तुसे बोलोए कि, ‘देखो, पेटू और पियक्कड़ माणूं कर लणे वाल़ेया रा और पापिया रा दोस्त ए।’ पर ज्ञान आपणी ल्वादा ते सच्चा ठराई राखेया।"
फरीसिये रे कअरे पापी जवाणसा खे माफी
तेबे किने फरीसिये तिना ते बिनती कित्ती कि मां साथे रोटी खाओ; तेबे सेयो तेसरे कअरे जाई की रोटी खाणे लगे। तेस नगरो री एक पापी जवाणस ये जाणी की कि यीशु एक फरीसियो रे कअरे रोटी खाणे बैठी रा, संगमरमरो रे पांडे (सुराई) रे इत्र ल्याई
तेबे याईर नाओं रा एक माणूं, जो प्रार्थना रे कअरो रा अधिकारी था, यीशुए गे आया और तिना रे पैरो पाँदे पड़ी की प्रार्थना करने लगेया कि मेरे कअरे चलो। कऊँकि तेसरी बारा साला री इकलौती बेटी मरने वाल़ी थी; जेबे सेयो जाणे लगी रे थे, तेबे लोक तिना पाँदे रूड़ी जाओ थे।
सेयो ये बोलणे ई लगी रे थे कि किने प्रार्थना रे कअरो रे सरदारो रे कअरो ते आयी की बोलेया, "तेरी बेटी तो मरी गी और गुरूओ खे कष्ट नि दे।" यीशुए ये सुणी की बोलेया, "डर नि; बस विश्वास राख तो से बची जाणी।" सरदारो रे कअरे जाई की यीशुए पतरस, यूहन्ना याकूब और तेसा बेटिया रे माए-बाओ खे छाडी की ओर कोई बी पीतरे नि आऊणे दित्ते। सब तेसा खे रोणे-पीटणे लगी रे थे, पर यीशुए बोलेया, "रोओ नि; कऊँकि ये मरी नि रई, पर सयी री।" सेयो ये जाणी की कि ये तो मरी गी री, तिना रा मजाक ऊड़ाणे लगे। पर यीशुए तेसा रा आथ पकड़ेया और बोलेया, "ओ बेटिये उठ!" तेबे तेसा रे प्राण आईगे और तेबे से फटाफट उठी गी। तेबे यीशुए तिना खे आज्ञा दित्ती कि एसा खे कुछ खाणे खे देयो। तेसा रे माए-बाओ हैरान ऊईगे, पर यीशुए तिना खे सावधान करी की बोलेया, "एती जो कुछ ऊआ, से केसी गे नि बताणा।"
लाजरो री मौत
मरियम और तेसा री बईण मार्था रे गांव बैतनिय्याहो रे लाजर नाओं रा एक माणूं बमार था। ये सेई मरियम थी, जेसे यीशुए रे पैरा पाँदे इत्र मल़ी की आपणे बाल़ो साथे टूसे थे। एसा रा ई पाई लाजर बमार था। तेबे तेसा री बईणे तिना खे संदेशा पेजेया, "ओ प्रभु! देख, जेस साथे तुसे प्यार राखोए, से बमार ऊई रा।" ये सुणी की यीशुए बोलेया, "ये बमारी मरने जोगी निए, बल्कि परमेशरो री महिमा खे ए, ताकि तेसरी बजअ ते परमेशरो रे पुत्रो री महिमा ओ।"
यीशु मार्था और तेसा री बईण और तिना रे पाई लाजरो खे प्यार करो थे। तो जेबे तिने सुणेया कि से बमार ए, तेबे जेती सेयो थे, तेती दो दिन ओर रूकी गे। तेबे दो दिनो ते बाद तिने आपणे चेलेया खे बोलेया, "आओ, आसे फेर यहूदिया प्रदेशो खे चलूँए।" चेलेया तिना खे बोलेया, "ओ गुरू! एबु तो यहूदी अगुवे तुसा पाँदे पत्थराव करना चाओ थे और क्या तुसे फेर बी तेथी जाणा चाओए।" यीशुए बोलेया, "क्या दिनो रे बारा कंटे नि ऊँदे? जे कोई दिने चलो तो कोई ठोकर नि खांदा कऊँकि से एसा दुनिया रा प्रयासा देखोआ। पर जे कोई राथियो खे चलोआ, तो से ठोकर खाओआ, कऊँकि तेसरे प्रयासा निए।" तिने यो गल्ला बोलिया और इजी ते बाद तिना खे बोलणे लगे, "आसा रा दोस्त लाजर सयी गा रा, पर आऊँ तेसखे जगाणे चली रा।"
तेबे चेलेया तिना खे बोलेया, "ओ प्रभु! जे से सयी रा तो से बची जाणा।" यीशुए तो तेसरी मौता रे बारे रे बोलेया था, पर सेयो समजे कि तिने तेसरी नींजा ते सऊणे रे बारे रे बोलेया। तेबे यीशुए तिना खे साफ बोली ता, "लाजर मरी गा रा
Domínio sobre a natureza
Jesus acalmou a tempestade, andou sobre as águas e multiplicou pães. A natureza obedece à voz do seu Criador.
तूफानो खे शान्त करना
जेबे यीशु किस्तिया रे चढ़े, तो तिना रे चेले तिना पीछे आईगे। तेबे देखो, समुद्रो रे बऊत बड़ा तूफान आया जेते की किस्ती पाणिए साथे टखी गी और यीशु सये रे थे। तेबे चेलेया नेड़े आयी की यीशु जगाए और तिना खे बोलेया, "ओ प्रभु! आसा खे बचा, आसे डूबणे वाल़े ए।" यीशुए आपणे चेलेया खे बोलेया, "ओ कम विश्वास करने वाल़ेयो! कऊँ डरोए?" तेबे यीशु उठे और तूफान और पाणिए खे बकणे लगे और तेबे सब शान्त ऊईगा। तेबे लोक हैरान ऊई की बोलणे लगे, "ये केड़ा माणूंए? तूफान और पाणी बी एसरी आज्ञा खे मानोए।"
जेबे साँज ऊई, तेबे तिना रे चेले तिना गे आए और बोलणे लगे, "एती तो सुनसाण जगा ए और देर लगी री ऊणे, तुसे लोका खे बिदा करो, ताकि सेयो जाई की बस्तिया रे आपू खे रोटी खरीदी सको।"
यीशुए तिना खे बोलेया, "तिना रा जाणा जरूरी निए, तुसेई इना खे खाणे खे देयो।" तिने बोलेया, "एती तो आसा गे पाँज रोटिया और दो मछलिया छाडी की कुछ निए।" यीशुए बोलेया, "तिना खे मांगे ली आओ।" तेबे तिने लोका खे काओ पाँदे बैठणे खे बोलेया, तेबे तिने सेयो पाँज रोटिया और दो मछलिया लईया और स्वर्गो खे देखेया और धन्यवाद कित्तेया और रोटिया तोड़ी-तोड़ी की चेलेया खे दित्तिया और चेलेया लोका खे। जेबे सब खाई की रजी गे, तेबे चेलेया जो टुकड़े थे बचे रे तिना रिया बारा टोकरिया परिया और चकिया। खाणे वाल़े जवाणसा और बच्चेया खे छाडी की तकरीबन पाँज ह्जार मर्द थे।
तेबे यीशु राथियो रे चौथे पइरो रे समुद्रो रे चली की तिना गे आए।
चार ह्जार लोका खे खुलाणा
यीशुए आपणे चेले बुलाए और तिना खे बोलेया, "माखे एसा पीड़ा पाँदे तरस आओए, कऊँकि ये तीन दिना ते मां साथे ए और इना गे कुछ बी खाणे खे निए। आऊँ तिना खे पूखे नि पेजणा चांदा, केथी एड़ा नि ओ कि यो बाटा रे थकी जाओ।" चेलेया तिना खे बोलेया, "आसा खे जंगल़ो रे इतणिया सारिया रोटिया केथा ते मिलणिया कि आसे इतणी बड़ी पीड़ा खे रजाई सकिए?" यीशुए तिना ते पूछेया, "तुसा गे कितणी रोटिया ए?" तिने बोलेया, "सात, और कुछ छोटिया मछलिया ए।" तेबे तिने लोका खे जमीना पाँदे बैठणे री आज्ञा दित्ती। और तिने सेयो सात रोटिया और मछलिया लईया और धन्यवाद करी की तोड़िया और आपणे चेलेया खे दित्तिया और चेलेया लोका खे। तेबे सब तिना खाई की रज्जी गे और चेलेया बचे रे टुकड़ेया ते परे रे सात टोकरे चके। खाणे वाल़े, जवाणसा और बच्चेया खे छाडी की चार ह्जार मर्द थे
मन्दरो रा कर
जेबे सेयो कफरनहूम पऊँचे तेबे मन्दरो रा कर लणे वाल़ेया, पतरसो गे आयी की पूछेया, "क्या तुसा रा गुरू मन्दरो रा कर नि देंदा?" तिने बोलेया, "आ, देओआ।" जेबे सेयो कअरे आये तेबे यीशुए तेसरे पूछणे ते पईले ई तेसखे बोलेया, "ओ शमौन! तूँ क्या समजेया? तरतिया रे राजे कर केस ते लओए? आपणे बच्चेया ते या पराया ते?" पतरसे तिना खे बोलेया, "पराया ते।" यीशुए तेसखे बोलेया, "तेबे पाऊ तो बची गे। पर तेबे बी आसे तिना खे ठोकर नि देणा चांदे। तूँ समुद्रो रे कनारे जा और बंसी पाणिए रे पा, जो मछली पईले निकल़ो, तेसा खे लओ और तेसा रा मूँ खोली की ताखे एक सिक्का मिलणा। तेस लओ और आपणे और मेरे बदले तिना खे देई दे।"
बिना फलो ते दाऊगल़े रा डाल़
प्यागा जेबे सेयो नगरो खे आऊणे लगी रे थे, तो तिना खे पूख लगी। तेबे तिने सड़का रे कनारे दाऊगल़े रा एक डाल़ देखी की तेसगे चली गे, पर तिदे पत्तेया खे छाडी की ओर कुछ नि था, तेबे तिने बोलेया, "आजो ते तांदे कोई फल नि लगणा!" और दाऊगल़े रा डाल़ तेबुई सूकीगा। ये देखी की चेले हैरान ऊईगे और पूछणे लगे, "ये दाऊगल़े रा डाल़ एबु ई किंयाँ सूकीगा?" यीशुए तिना खे ज्वाब दित्तेया, "आऊँ तुसा खे सच्च लगी रा बोलणे कि जे तुसे विश्वास राखो और शक नि करो तो, तुसा इतणा ई नि करना, जो एस दाऊगल़े रे डाल़ो साथे ऊआ; पर जे एस पाह्ड़ो खे बी बोलोगे, कि ‘पट्ठी जा, और समुद्रो रे पड़ी जा,’ तो ऊई जाणा। और जो कुछ तुसे प्रार्थना रे विश्वासो साथे मांगोगे, तो से सब तुसा खे मिली जाणा।"
तेबे बऊत बड़ा पारी तूफान आया और लईरा एड़िया आईया कि किस्ती पाणिए साथे परने वाल़ी थी। यीशु पीछे गद्दिया पाँदे सऊणे लगी रे थे, तेबे चेलेया यीशुए खे जगाई की बोलेया, "ओ गुरू! क्या तुसा खे फिकर निए कि आसे डूबणे वाल़े ए?" तेबे यीशु उठी की तूफानो खे बके और पाणिए खे बोलेया, "शान्त रओ और रूकी जा!" और तूफान रूकी गा, तेबे बड़ी शांति ऊईगी। तेबे यीशुए चेलेया खे बोलेया, "तुसे कऊँ डरोए? क्या तुसा खे एबुए तक विश्वास निए?" तेबे चेले बऊत डरी गे और आपू बीचे बोलणे लगे, "ये कूणे, जो न केवल दुष्टात्मा बल्कि तूफान और पाणी बी एसरी आज्ञा खे मानोए?"
जेबे साँज ऊणे वाल़ी थी, तेबे तिना रे चेले तिना खे बोलणे लगे, "ये सुनसाण जगा ए और दिन बऊत चढ़ीगा रा। एबे इना खे बिदा करी देयो, ताकि यो गांव, और बस्तिया रे जाई की आपू खे खाणे खे कुछ खरीदी सको।" यीशुए तिना खे बोलेया, "तुसेई इना खे खाणे खे देयो।" चेलेया बोलेया, "क्या आसे इना खे दो सौ चाँदिए रे सिक्केया रे मोलो रे बराबर (मतलब दो सौ दिनो री मजदूरिया रे बराबर ए) रोटिया खरीदी लईये और इना खे खुल़ाईए?" यीशुए तिना खे बोलेया, "जाओ और देखो तुसा गे कितणिया रोटिया ए?" तिने पता करी की बोलेया, "पाँज रोटिया और दो मछलिया ए।"
तेबे यीशुए चेलेया खे आज्ञा दित्ती कि सबी खे अरे काओ पाँदे बांईठी रे बठयाल़ी देओ। सेयो सौ-सौ और पंजा-पंजा, बांईठी रे बैठीगे। तेबे यीशुए सेयो दो मछलिया और पाँज रोटिया लईया और स्वर्गो खे देखी की धन्यवाद कित्तेया और रोटिया तोड़ी-तोड़ी की आपणे चेलेया खे दित्तिया कि लोका खे बांडी देओ और सेयो मछलिया बी बांडिया। तेबे सब खाई की रजी गे। और तेबे तिने बचे रे टुकड़ेया रिया बारा टोकरिया परी की चकिया और कुछ मछलिया बी थिया। जिने रोटिया खाईया, तिना बीचे जादातर पाँज ह्जार तो मर्द थे।
यीशुए देखेया कि तिना रे चेले बड़ी मुश्किला साथे चप्पू चलांदे-चलांदे ऊए कबराणे लगी रे, कऊँकि अवा तिना रे खलाफ थी, तेबे सेयो राथियो रे चौथे पइरो रे नेड़े, समुद्रो रे पाणिए पाँदे चली की तिना गे आए और सेयो तिना ते आगे निकल़ना चाओ थे। पर जिंयाँ ई चेलेया यीशुए खे समुद्रो रे पाणिए पाँदे चलदे ऊए देखी की सोचेया कि ये तो पूत ए और सब डरो रे मारे चींगणे लगे। कऊँकि सब तिना खे देखी की कबराई गे थे, पर यीशुए फटाफट तिना साथे गल्ल कित्ती और बोलेया, "याओ राखो। आऊँ ए। डरो नि।" तेबे सेयो तिना साथे किस्तिया रे आए और अवा रूकी गी, तिना रे चेले ये देखी की हैरान ऊईगे।
चार ह्जार लोका खे खुलाणा
तिना दिना रे जेबे बड़ी पीड़ कट्ठी ऊई और तिना गे कुछ खाणे खे नि था, तेबे तिने आपणे चेलेया खे आपू गे बुलाई की बोलेया, "माखे एसा पीड़ा पाँदे तरस आओआ, कऊँकि ये तीन दिना ते बराबर मां साथे ए और इना गे कुछ बी एबे खाणे खे निए। जे आऊँ इना खे पूखा कअरो खे पेजुँगा, तो यो बाटा रेई थकी जाणे, कऊँकि इना बीचा ते कोई-कोई बड़ी दूरो ते आई रे।" तिना रे चेलेया तिना खे बोलेया, "एती सुनसाण जगा रे इतणिया सारिया रोटिया केथा ते ल्याईए, ताकि यो रज्जी जाओ?" यीशुए तिना ते पूछेया, "तुसा गे कितणी रोटिया ए?" तिने बोलेया, "सात।"
तेबे यीशुए तिना खे बोलेया, "जमीना पाँदे बैठी जाओ।" तिने सेयो सात रोटिया लईया और परमेशरो रा धन्यवाद करी की तोड़िया और आपणे चेलेया खे देंदे गए कि इना लोका खे देओ, और सेयो लोका खे देंदे गए। तिना गे थोड़ी जिया छोटिया मछलिया बी थिया और यीशुए सेयो बी धन्यवाद करी की लोका खे देणे खे बोलेया। तेबे सेयो खाई की रज्जी गे और जो टुकड़े बची रे थे तिना रे सात बड़े टोकरू परी की चके। खाणे वाल़े तकरीबन चार ह्जार लोक थे; तेबे तिने सेयो बिदा करी ते।
फलो ते बगैर दाऊगल़े रा डाल़
दूजे दिने जेबे सेयो बैतनिय्याहो गांव ते निकल़े, तेबे यीशुए खे पूख लगी। तेबे तिने दूरो ते एक दाऊगल़े रा अरा डाल़ देखेया और तेस डाल़ो रे नेड़े आए कि क्या पता इदे कुछ लगी रा ओगा, पर पत्तेया खे छाडी की ओर कुछ नि मिलेया, कऊँकि फल लगणे रा बखत नि था। तेबे यीशुए तेस डाल़ो खे बोलेया, "आजो ते बाद तेरा फल केसी नि खाणा" और तिना रे चेले सुणने लगी रे थे।
सूके दाऊगल़े रे डाल़ो ते शिक्षा
तेबे प्यागा सेयो तिसिये गए और चेलेया से दाऊगल़े रा डाल़ जड़ा ते सूकेया रा देखेया। पतरसो खे से गल्ल याद आई और तिने यीशुए खे बोलेया, "ओ गुरू! देख, ये दाऊगल़े रा डाल़, जेसखे तुसे स्राप दित्तेया था, सूकीगा रा।" यीशुए ज्वाब दित्तेया, "परमेशरो पाँदे विश्वास राखो। आऊँ तुसा खे सच्च बोलूँआ कि जे कोई एस पाह्ड़ो खे बोलो, ‘तूँ पट्ठी जा और समुद्रो रे पड़ी जा,’ और आपणे मनो रे शक नि करो, बल्कि विश्वास राखो कि जो बोलूँआ, से ऊई जाणा, तो तेसखे से ऊई जाणा। तेबेई तो आऊँ तुसा खे बोलूँआ कि जो कुछ तुसे प्रार्थना करी की मांगोगे, तो विश्वास राखो कि तुसा खे मिली गा और तुसा खे ऊई जाणा। जेबे कदी तुसे खड़े ऊई की प्रार्थना करोए और तुसा रे मनो रे केसी रे खलाफ कोई गल्ल ओ, तो तेसखे माफ करी देओ। तुसा रा स्वर्गिय पिता बी तुसा रे पाप माफ करोआ।
शुरूओ रे चेलेया खे बुलाणा
जेबे पीड़ यीशुए पाँदे पड़ो थी और परमेशरो रे वचन सुणो थी और सेयो गन्नेसरतो री झीला रे कनारे थे खड़े रे, तेबे एड़ा ऊआ कि तिने झीला रे कनारे दो किस्तिया खड़ी रिया देखिया और मच्छुआरे तिना पाँदो ते उतरी की आपणे जाल़ लगी रे थे तोणे। तिना किस्तिया बीचा ते एक किस्ती जो शमौनो री थी, चढ़ी की यीशुए तेसखे बोलेया, "थोड़ी जी कनारे जे लई चल।" तेबे सेयो किस्तिया पाँदे बैठी की लोका खे उपदेश देणे लगे। जेबे सेयो लोका साथे गल्ला करी चुके, तेबे तिने शमौनो खे बोलेया, "डूगे पाणिए रे लयी चल और मछलिया पकड़ने खे आपणे जाल़ पाओ।" शमौने बोलेया, "स्वामी! आसे सारी रात मईणत कित्ती पर कुछ नि पकड़ेया, पर तेबे बी तेरे बोलणे ते जाल़ पाई देऊँआ।" जेबे पतरस और तिना रे साथिये जाल़ पाईता तेबे बऊत सारिया मछलिया केरिया और तिना रे जाल़ फटणे लगे। तेबे तिने आपणे साथिया खे, जो दूजी किस्तिया रे थे, तिना खे साअरा कित्तेया, "आयी की म्हारी मताद करो।" तिने आयी की आपणियां दोनो किस्तिया मच्छल़िया ते इतणिया परी तिया कि सेयो डूबणे लगिया। ये देखी की शमौन पतरस यीशुए रे पैरा पाँदे पड़ी गा और बोलणे लगेया, "ओ प्रभु! मांगा गे ते चली जा, कऊँकि आऊँ पापी माणूं ए।" कऊँकि इतणिया सारिया मछलिया पकड़ी की देखी की से और तेसरे साथी हैरान ऊईगे। तिंयाँ ई जब्दी और तेसरे पाऊ याकूब और यूहन्ने खे बी, जो शमौनो साथे थे, सेयो बी हैरान ऊईगे, तेबे यीशुए शमौनो खे बोलेया, "डर नि, आजो ते तां माणूं परमेशरो री तरफा खे फेरने।" तेबे सेयो किस्तिया खे कनारे पाँदे ली आए और सब कुछ छाडी की यीशुए पीछे चली पड़े।
तूफानो खे शान्त करना
तेबे एक दिन यीशु और तिना रे चेले किस्तिया रे चढ़े और तिने तिना खे बोलेया, "आओ, गलीली समुद्रो ते पार चलूँए।" तेबे तिने किस्ती खोली ती। पर जेबे किस्ती चली री थी, तेबे यीशु सयी गे और समुद्रो रे तूफान आया और किस्तिया रे पाणी परने लगेया और सेयो मुसीबता रे थे। तेबे चेलेया नेड़े आयी की यीशु जगाए और बोलेया, "ओ स्वामी! स्वामी! आसे डूबणे वाल़े ए।" तेबे यीशु उठी की तूफानो खे, पाणिए खे और लईरा खे बकणे लगे और सेयो रूकी गे और चैन ऊईगा। तेबे यीशुए चेलेया खे बोलेया, "तुसा रा विश्वास केयी था?" पर सेयो डरी गे और हैरान ऊई की आपू बीचे बोलणे लगे, "ये कूणे, जो तूफान और पाणिए खे आज्ञा देओआ और सेयो एसरी आज्ञा खे मानोए?"
तूफानो खे शान्त करना
तेबे एक दिन यीशु और तिना रे चेले किस्तिया रे चढ़े और तिने तिना खे बोलेया, "आओ, गलीली समुद्रो ते पार चलूँए।" तेबे तिने किस्ती खोली ती। पर जेबे किस्ती चली री थी, तेबे यीशु सयी गे और समुद्रो रे तूफान आया और किस्तिया रे पाणी परने लगेया और सेयो मुसीबता रे थे। तेबे चेलेया नेड़े आयी की यीशु जगाए और बोलेया, "ओ स्वामी! स्वामी! आसे डूबणे वाल़े ए।" तेबे यीशु उठी की तूफानो खे, पाणिए खे और लईरा खे बकणे लगे और सेयो रूकी गे और चैन ऊईगा। तेबे यीशुए चेलेया खे बोलेया, "तुसा रा विश्वास केयी था?" पर सेयो डरी गे और हैरान ऊई की आपू बीचे बोलणे लगे, "ये कूणे, जो तूफान और पाणिए खे आज्ञा देओआ और सेयो एसरी आज्ञा खे मानोए?"
दुष्टात्मा ते किरे रे माणूंए खे ठीक करना
तेबे सेयो गिरासेनियो रे देशो रे पऊँचे जो गलीलो ते पार, सामणे ए।
जेबे साँज ऊणे वाल़ी थी, तेबे बारा चेलेया तिना गे आयी की बोलेया, "पीड़ा खे बिदा करो, ताकि चऊँ कनारे रे गांव और बस्तिया रे जाई की रओ और रोटिया रा उपाय करो, कऊँकि आसे एती सुनसाण जगा रे ए।" यीशुए तिना खे बोलेया, "तुसेई तिना खे खाणे खे देयो।" चेलेया बोलेया, "आसा गे तो पाँज रोटिया और दो मछलिया खे छाडी की ओर कुछ निए, पर आ, जे आसे जाई की इना सबी लोका खे रोटी खरीदी लईए, तो ऊई सकोआ।" सेयो लोक पाँज ह्जार मर्दा रे तकरीबन थे। तेबे यीशुए चेलेया खे बोलेया, "तिना खे पंजा-पंजा करी की बांईठी रे बठयाल़ी देओ।" तिने तेड़ा ई कित्तेया और सब बठयाल़ी ते। तेबे यीशुए सेयो पाँज रोटिया और दो मछलिया लईया और स्वर्गो रे कनारे देखी की धन्यवाद कित्तेया और रोटिया तोड़ी-तोड़ी की चेलेया खे देंदे गये कि लोका खे देओ। तेबे सब खाई की रज्जी गे और बचे रे टुकड़ेया रिया बारा टोकरिया परी की चकिया।
गलीलो रे काना रे पईला नऊखा काम
तीजे दिने गलील प्रदेशो रे काना नगरो रे केसी रा ब्या था और यीशुए री आम्मा बी तेती थी। यीशु और तिना रे चेले बी तेती ब्याओ खे बुलाई राखे थे। जेबे अँगूरा रा रस कम ऊईगा, तेबे यीशुए री आम्मे तिना खे बोलेया, "तिना गे अँगूरा रा रस नि रया।" यीशुए तेसा खे बोलेया, "ओ जवाणसे! ताखे मांते क्या काम ए? एबु मेरा आपणे आपू खे प्रकट करने रा बखत नि आयी रा।" पर तिना री आम्मे दासा खे बोलेया, "जो कुछ ये तुसा खे बोलोगा, सेई करना।" तेती यहूदिया री शुद्ध करने री रवाजा रे मुताबिक, पात्थरा रे छे बड़े कअड़े राखे रे थे, जिना रे दो-दो और तीन-तीन मण आओ था। यीशुए दासा खे बोलेया, "कअड़ेया रे पाणी परी देओ।" तिने परी-परी करी ते। यीशुए तेस दासो खे बोलेया, "एबे इजी बीचा ते थोड़ा पाणी निकयाल़ी की पाट्टिया (भोज) रे प्रदानो गे लयी जाओ और तिने दासे एड़ा ई कित्तेया।" जेबे पाट्टिया रे प्रदाने से पाणी चाखेया, जो अँगूरा रा रस बणीगा था, पर ये नि जाणो था कि केथा ते आया (पर जिने दासे पाणी निकयाल़ेया था, सेयो जाणो थे) तेबे पाट्टिया रे प्रदाने लाड़े खे बुलाई की तेसखे बोलेया, "हर एक माणूं पईले बढ़िया अँगूरा रा रस देओआ और जेबे लोक पी की थकी जाओए, तेबे आदा देओआ, पर तैं बढ़िया अँगूरा रा रस एबुए तक राखी राखेया।" यीशुए गलील प्रदेशो रे काना नगरो रे आपणा ये पईला चिह्न् दखाई की आपणी महिमा प्रगट कित्ती और तिना रे चेलेया तिना पाँदे विश्वास कित्तेया कि सच्ची येई ई मसीह ए।
पर तिने ये गल्ल तेसखे परखणे खे बोली, कऊँकि सेयो आपू जाणो थे कि मां क्या करना। फिलिपुसे तिना खे बोलेया, "दो सौ चाँदिए रे सिक्केया रे मोलो री रोटी तिना खे थोड़ी-थोड़ी करी की बी पूरी नि ऊणी।" तिना रे चेलेया बीचा ते शमौन पतरसो रे पाईए अन्द्रियासे तिना खे बोलेया, "एती एक पाऊ ए, जेसगे पाँज जौ रिया रोटिया और दो मछलिया ए, पर इतणे लोका खे यो केयी ऊणिया?"
यीशुए बोलेया, "लोका खे बठयाल़ी देओ।" तेते जगा रे बऊत काआ था, तेबे लोक, जिना रे मर्दा री संख्या तकरीबन पाँज ह्जारा री थी, तेती बैठीगे। तेबे यीशुए सेयो रोटिया लईया और धन्यवाद करी की बैठणे वाल़ेया खे बांडी तिया और तिंयाँ ई मछलिया बी जितणिया सेयो चाओ थे, तिना खे बांडी तिया। जेबे सेयो खाई की रज्जी गे, तेबे तिने आपणे चेलेया खे बोलेया, "बचे रे टुकड़े कट्ठे करी देओ, कुछ बी सेटणा नि।" तेबे तिने कट्ठे करी ते और बारा टोकरिया परी तिया, जबकि सेयो पांजा रोटिया रे टुकड़े थे, जो खाणे वाल़ेया ते बाद बची रिया थिया।
जेबे सेयो किस्तिया रे सैर करदे ऊए तकरीबन पाँज-छ: किलोमीटर निकल़ी गे, तेबे तिने यीशु समुद्रो रे चलदे ऊए और किस्तिया रे नेड़े आऊँदे ऊए देखे और सेयो डरी गे। पर तिने तिना खे बोलेया, "आऊँ ए, डरो नि।" तेबे सेयो तिना खे किस्तिया दे चढ़ाणे खे त्यार ऊए ई थे कि से किस्ती फटाफट तेती कनारे पाँदे पऊँची गी, जेती सेयो जाणा चाओ थे।
तिबिरियास समुद्रो रे कनारे चेलेया पाँदे प्रगट ऊणा
इना गल्ला ते बाद यीशु तिबिरियास समुद्रो रे कनारे आपणे चेलेया सामणे आए और ईंयां सामणे आए, शमौन पतरस और थोमा, जेसखे दिदुमुस बी बोलोए और गलीलो रे काना नगरो रा नतनएल और जब्दिए रे पाऊ और यीशुए रे चेलेया बीचा ते दो ओर जणे कट्ठे थे। शमौन पतरसे तिना खे बोलेया, "आऊँ मछलिया पकड़ने जाऊँआ।" तिने बोलेया, "आसे बी तां साथे चलूँए।" तेबे सेयो निकल़ी की किस्तिया रे चढ़े, पर तेसा राती कुछ नि पकड़ेया।
आगले दिने प्याग ऊँदे ई यीशु कनारे पाँदे थे खड़े रे, पर चेलेया नि पछयाणे कि यीशु ए। तेबे यीशुए तिना खे बोलेया, "ओ बाल़को! क्या तुसा गे कुछ खाणे खे आए?" तिने बोलेया, "ना।" तिने तिना खे बोलेया, "किस्तिया रे दाँणी तरफा खे जाल़ पाओ, तो मिलणा।" तेबे तिने जाल़ पाया और एबे बऊत मछलिया ऊणे री बजअ ते जाल़ खिंजी नि सके। तेबे तिने चेले जेस साथे यीशु प्यार राखो थे, पतरसो खे बोलेया, "ये तो प्रभु ए।" शमौन पतरसे ये सुणी की कि यीशु ए, लको रे टाल्ला बानी ला, कऊँकि से नांगा था और समुद्रो रे छवाल़ खाई ती। कऊँकि से यीशु खे मिलणे खे बड़ा उताऊल़ा था पर ओर चेले डोंगिया पाँदे मछलिया रा फरेया रा जाल़ खींजदे ऊए आए, कऊँकि सेयो कनारे ते बऊत दूर नि थे, पर दो सौ की आथ दूर थे।
जेबे सेयो कनारे पाँदे पऊँचे, तेबे तिने सुल़गे रे फेऊओ पाँदे मछली देखी और रोटी देखी। यीशुए तिना खे बोलेया, "जो मछलिया तुसे एबु पकड़ी राखिया, तिना बीचा ते कुछ ल्याओ।" शमौन पतरसे डोंगिया पाँदे चढ़ी की एक सौ तिरेपन बड़िया मछलिया रा परेया रा जाल़ कनारे पाँदे खींजेया और इतणिया मछलिया ऊँदे ऊए बी जाल़ नि फटेया।
Libertações
Jesus expulsou demônios com autoridade. Os espíritos impuros não resistiam à sua palavra e saíam imediatamente.
एकी सूबेदारो रा विश्वास
जेबे यीशु कफरनहूम नगरो रे आए, तो एकी सूबेदारे तिना गे आयी की तिना ते बिनती कित्ती, "ओ प्रभु! मेरा दास कअरे अदरंगो ते दु:खी पड़ी रा।" यीशुए तेसखे बोलेया, "आऊँ आयी की तेसखे ठीक करूँगा।" सूबेदारे ज्वाब दित्तेया, "ओ प्रभु! आऊँ एते जोगा निए कि तुसे मेरे कअरे आयी सको, पर जे तुसे आपणे मुंओ तेई बोली देओ, तो से मेरा दास ठीक ऊई जाणा। कऊँकि आऊँ बी पराधीन माणूं ए और सिपाई मेरे आथो रे ए। जेबे एकी खे बोलूँआ, ‘जा,’ तो से जाओआ और दूजे खे बोलूँ, ‘आओ,’ तो से आओआ। आपणे दासा खे बोलूँ, ‘ये कर,’ तो से करोए।"
ये सुणी की यीशु हैरान ऊईगे और जो तिना पीछे आऊणे लगी रे थे, तिने तिना खे बोलेया, "आऊँ तुसा खे सच्च लगी रा बोलणे कि मैं इस्राएलो रे बी एड़ा विश्वास नि देखेया। आऊँ तुसा खे बोलूँआ कि बऊत सारे दूजिया जातिया रे लोक पूर्वो और पच्छमो ते आयी की अब्राहम, इसहाक और याकूबो साथे स्वर्गो रे राज्य रे रोटी खाणे बैठणे। पर बऊत सारे इस्राएली जिना खे स्वर्गो रा राज्य त्यार कित्तेया राए, बारे न्हेरे रे पाई देणा, तेती रोणा और दाँदा रा किरड़ना ई ऊणा।" तेबे यीशुए सूबेदारो खे बोलेया, "कअरे जा, जेड़ा तेरा विश्वास ए, तेड़ा ई ताखे ओ।" और तेबुई तेसरा दास ठीक ऊईगा।
दुष्टात्मा रे पकड़े रे माणूंआ खे ठीक करना
जेबे सेयो पार गदरेनिया रे देशो रे पऊँचे, तेबे दो माणूं जिना रे दुष्टात्मा थिया कब्रा ते निकल़दे ऊए तिना खे मिले। सेयो इतणे प्रचण्ड थे कि कोई बी तेसा बाटा रिये जाई नि सको था। तेबे तिने चींगी की बोलेया, "ओ परमेशरो रे पुत्र! आसा रा तां साथे क्या काम? क्या तूँ बखतो ते पईले ई आसा खे एती दु:ख देणे आयी रा?" तिना ते थोड़ी जी दूर सूंअरो रा एक चूण्ड चरने लगी रा था। दुष्टात्मे तिना ते ये बोली की बिनती कित्ती, "जे तूँ आसा खे निकयाल़ने ई लगी रा तो सूंअरा रे चूण्डो रे पेजी दे।" तिने तिना खे बोलेया, "जाओ!" सेयो निकल़ी की सूंअरा रे बैठी गिया और सारा चूण्ड काअड़ी ते छवाल़ लयी की डूबी गा और मरी गा। तिना खे चराणे वाल़े नठे और नगरो रे गए और जिना रे दुष्टात्मा थिया तिना रा सारा आल सुणाया। तेबे सारे नगरो रे लोक यीशुए खे मिलणे आए, और तिना खे देखी की बिनती कित्ती कि म्हारे बन्ने ते निकल़ी जाओ।
एकी गूँगे खे ठीक करना
जेबे सेयो बारे लगी रे थे जाणे, तेबे लोक एक गूँगे खे जेसरे दुष्टात्मा थी, यीशुए गे ल्याए। जेबे यीशुए दुष्टात्मा निकयाल़ी ती, तेबे गूँगा बोलणे लगेया और लोके हैरान ऊई की बोलेया, "इस्राएलो रे एड़ा कदी नि देखेया।"
यीशु और दुष्टात्मा रा सरदार
तेबे लोक एक माणूंए खे तिना गे ल्याए, जो अन्दा और गूँगा था, तिने से ठीक कित्तेया और से देखणे और बोलणे लगेया।
कनानी जातिया री जवाणसा रा विश्वास
यीशु तेथा ते निकल़ी की सूर और सैदा रे नगरो खे चली गे। तेबे तेस देशो ते एक कनानी जवाणस निकल़ी, और से चींगी की बोलणे लगी, "ओ प्रभु दाऊदो री ल्वाद! मां पाँदे दया कर, मेरी मुन्निया खे दुष्टात्मा बऊत तंग लगी री करने।" पर तिने तेसा खे कोई बी ज्वाब नि दित्तेया, तेबे तिना रे चेलेया बोलेया, "एसा खे एथा ते पेजी दे, कऊँकि ये तो आसा पीछे आल्ला पाँदी ऊई आऊणे लगी री।" तिने बोलेया, "इस्राएलो रे कराने रिया राची रिया पेडा खे छाडी की आऊँ केसी गे निए पेजेया रा।" पर से आयी और तिना गे माथा टेकी की बोलणे लगी, "ओ प्रभु! मेरी मताद करो।" प्रभुए तेसा खे बोलेया, "बच्चेया री रोटी कुत्तेया रे आगे देणे ते कोई फाईदा निए।" जवाणसे बोलेया, "सच्च ए प्रभु, पर कुत्ते बी तेस चुरा-चूरा खाओए, जो तिना रे मालका री मेजा ते छुटोआ।" ये सुणी की यीशुए तेसा खे बोलेया, "ओ जवाणसे! तेरा विश्वास बड़ा ए, जेड़ा तूँ चाए ई तेड़ा ई ओ" और तेसा री मुन्नी तेबुई ठीक ऊईगी।
दुष्टात्मा ते किरे रे बाल़को खे ठीक करना
जेबे यीशु पीड़ा रे नेड़े आए, तेबे एक माणूं तिना गे आया और कुटणे टेकी की बोलणे लगेया, "ओ प्रभु! मेरे पाऊए पाँदे दया कर, कऊँकि तेसखे मिर्गी ए और तेसखे बऊत दु:ख ओआ, से बार-बार पाणिए रे और बार-बार आगी रे पड़ी जाओआ। आऊँ तेसखे तुसा रे चेलेया गे ल्याया था, पर तिना रे बोले से ठीक नि ऊआ।" यीशुए ज्वाब दित्तेया, "ओ अविश्वास करने वाल़ेयो और टीठ लोको! मां कदुओ तक तुसा साथे रणा? कदुओ तक तुसा खे सईन करुँ? तेसखे ओरे ल्याओ मांगे।" तेबे यीशु दुष्टात्मा खे बके और तेबे दुष्टात्मा बारे निकल़ी गी और से पाऊ तेसी बखते ठीक ऊईगा।
तेबे तेस बखते तिना रे प्रार्थना रे कअरो रे एक एड़ा माणूं था, जेसरे दुष्टात्मा थी। तिने चींगी की बोलेया, "ओ यीशु नासरी! आसा खे तांते क्या काम ए? क्या तूँ आसा खे नाश करने आई रा? आऊँ ताखे जाणूंआ कि तूँ कुण ए? तूँ परमेशरो रा पवित्र पुत्र ए।" यीशु तेसखे बक्के और बोलेया, "चुप रओ और एसते निकल़ी जा।" तेबे दुष्टात्मा तेसखे मकरेड़ी की और जोरे की चींगदी ऊई, तेसते निकल़ी गी।
दुष्टात्मा ते किरे रे माणूंए खे ठीक करना
तेबे यीशु और तिना रे चेले गलीली समुद्रो ते पार गिरासेनियो रे प्रदेशो रे पऊँची गे। जेबे यीशु किस्तिया ते उतरे, तेबे तेबुई एक माणूं, जेसरे दुष्टात्मा थी, कब्रा ते निकल़ी की तिना खे मिलेया। से कब्रिस्तानो रे रओ था और बऊत ई हुड़दंग मचाणे वाल़ा था। तेसखे कोई बी एबुए तक साँगल़ो रे बानी की नि राखी सको था। कऊँकि से कई बार बेड़िये की और साँगल़ो साथे बानेया, पर तिने साँगल़ तोड़ी ते और बेड़िया रे टुकड़े-टुकड़े करी ते, तेसखे कोई बी वशो रे नि करी सको था। से रात-दिन कब्रिस्तानो रे और पाह्ड़ो रे चींगदा रओ था और आपू खे पात्थरो साथे काईल करदा रओ था।
से यीशुए खे देखी की दूरो तेई दौड़ी गा और तिने तिना गे माथा टेकेया। तेबे तिने ऊच्ची आवाजा रे चींगी की बोलेया, "ओ यीशु परमप्रदान परमेशरो रे पुत्र! माखे तांते क्या काम? आऊँ ताखे परमेशरो री कसम देऊँआ कि माखे दुःखी न कर।" कऊँकि तिने तेसखे बोलेया था, "ओ दुष्टात्मा, एस माणूंए ते निकल़ी जा।" यीशुए तेसते पूछेया, "तेरा नाओं क्या ए?" दुष्टात्मे बोलेया, "सेना कऊँकि आसे बऊत सारे ए।" तेबे तिने तिना ते बऊत बिनती कित्ती, "आसा खे एसा जगा ते बारे नि पेज।"
तेती पाह्ड़ो पाँदे सूंअरो रा एक चूण्ड चरने लगी रा था। तेबे दुष्टात्मा यीशुए ते बिनती कित्ती, "आसा खे इना सूंअरा बीचे पेजी दे, ताकि आसे इना रे पीतरे चली जाऊँ।" तेबे यीशुए तिना खे आज्ञा दित्ती, और दुष्टात्मा निकल़ी और सूंअरा रे चूण्डा रे समाई गी। जो दो ह्जारा रा था। तेबे से काअड़ी पाँदो ते छवाल़ खाई की समुद्रो रे पड़ी गा और डूबी की मरी गा।
तेबे तिना खे चराणे वाल़ेया दौड़ी की गांव और शईरो रे खबर दित्ती और जो ऊआ था लोक तेस देखणे आए।
पर तुसे बोलोए कि जे कोई आपणे माया-बावा खे बोलो, ‘जो कुछ तुसा खे मांते फाईदा ऊई सकोआ, से कुरबान ए, सब कुछ परमेशरो खे।’ क्या एड़ा बोलणा ठीक ए? तो तेबे तुसे तेसखे आपणे माया-बावा री कुछ बी सेवा करने नि देंदे। ईंयां ई तुसे आपणी रवाजा ते, जो तुसे बणाई राखिया, परमेशरो रा वचन टाल़ी देओए और एड़े-एड़े ई बऊत बुरे काम करोए।"
माणूंआ खे अशुद्ध करने वाल़ी गल्ला
तेबे यीशुए लोका खे आपू गे बुलाई की बोलेया, "तुसे सब मेरी सुणो और समजो। एड़ी कोई बी चीज निए जो माणूंआ खे बाअरा ते अशुद्ध करोई, पर जो गल्ला माणूंए रे पीतरो ते निकल़ोई, से माणूंए खे अशुद्ध करोई।
सुरूफिनीकी जातिया री जवाणस रा विश्वास
तेबे यीशु और तिना रे चेले गलील प्रदेशो ते उठी की सूर और सैदा रे नगरो खे आए और एक कअरो रे गए और सेयो चाओ थे कि कोई बी तिना रे बारे रे नि जाणो, पर सेयो लूकी नि सके। तेबे एक जवाणस थी, जेसा री छोटी मुन्निया रे दुष्टात्मा आत्मा थी, तेसे यीशुए रे बारे रे सुणेया और तेबे से तिना गे आई और तिना रे पैरो पाँदे पड़ी गी। ये यूनानी और सूरूफिनीकी जातिया री थी, तेसे यीशुए ते बिनती कित्ती, "मेरी मुन्निया ते दुष्टात्मा निकयाल़ी दे।" तिने तेसा खे बोलेया, "पईले बच्चेया खे रजणे दे, कऊँकि बच्चेया री रोटी कुत्तेया रे आगे राखणा खरी गल्ल निए।" तेसे जवाणसे बोलेया, "सच्च ए प्रभु, पर तेबे बी तो छोटे कुत्ते बी बच्चेया री रोटिया ते बचे रे टुकड़ेया रा चूरा खाई लओए।" यीशुए तेसा खे बोलेया, "जे एड़ी गल्ल ए, तेबे तो तूँ चली जा; दुष्टात्मा तेरी मुन्निया ते निकल़ी गी री।" तेबे से आपणे कअरे आई और तेसे देखेया कि तेसा री मुन्नी माँजे पाँदे ए और दुष्टात्मा निकल़ी गी री।
पीड़ा बीचा ते एकी जणे बोलेया, "ओ गुरू! आऊँ आपणे पाऊए खे तुसा गे ल्याई राखेया, जेसे दुष्टात्मे ये गूँगा करी राखेया। जेती-केथी से तेसखे पकड़ोई, तेथी पटकी देओई और एसरे मुंओ ते जगुड़ निकल़ने लगी जाओआ और से दाँद किरड़दा रओआ और सूकदा रओआ। मैं तुसा रे चेलेया खे बोलेया, ‘तुसे एसा खे निकयाल़ी देओ, पर सेयो निकयाल़ी नि सके।’ "
ये सुणी की यीशुए तिना खे ज्वाब दित्तेया, "ओ अविश्वासी लोको! मां कदुओ तक तुसा साथे रणा? और कदुओ तक तुसा खे सईन करुँ? बच्चे खे मांगे ल्याओ।" तेबे सेयो बच्चे खे यीशुए गे ल्याए; और जेबे दुष्टात्मे यीशुए खे देखेया, तो तेबे दुष्टात्मे बच्चा फटाफट मकरेड़ी ता और बच्चा जमीना पाँदे पड़ी गा, और से मुंओ ते जगुड़ निकयाल़दे ऊए कजणे लगेया। यीशुए तेसरे बाओ ते पूछेया, "एसरी ये आलत कदुओ ते ए?" तिने बोलेया, "बचपनो ते। दुष्टात्मा एसरा नाश करने री तँईं, कदी ये आगी रे और कदी पाणिए रे रुड़ाया। पर जे तुसे कुछ करी सकोए तो आसा पाँदे तरस खाई की एसखे ठीक करी देयो।" यीशुए तेसखे बोलेया, "जे तुसे करी सकोए तो, ये क्या गल्ल ऊई? विश्वास करने वाल़ेया खे सब कुछ ऊई सकोआ।" तेस पाऊए रे बाओ फटाफट गिड़गिड़ाई की बोलेया, "ओ प्रभु! आऊँ विश्वास करूँआ। मेरे विश्वासो खे और बड़ाई देओ।"
जेबे यीशुए देखेया कि लोक दौड़ी की पीड़ लगी रे लगाणे, तो सेयो दुष्टात्मा खे बके कि ओ "गूँगा और टौणा करने वाल़ी दुष्टात्मा, आऊँ ताखे आज्ञा देऊँआ कि एस बच्चे ते निकल़ी जा; और एसरे कदी दुबारा नि आऊणा।" तेबे से चींगी की और तेसखे मकरेड़ी की निकल़ी गी और पाऊ मरे रे जेड़ा ऊईगा। एथो तक बऊत लोक बोलणे लगे, "ये तो मरी गा रा।" पर यीशुए तेसरा आथ पकड़ी की से ठवाल़ेया और से खड़ा ऊईगा।
पतरसो री सासुआ और ओरी लोका खे ठीक करना
यीशु प्रार्थना रे कअरो ते उठी की शमौनो रे कअरो खे गये और शमौनो री सासुआ खे बुखार था और तिने तेसा री खातर, यीशुए ते प्रार्थना कित्ती। सेयो तेसा रे नेड़े जाई की बुखारो खे बके और तेसा रा बुखार उतरी गा और से फटाफट उठी की तिना री सेवा करने लगी।
जेबे यीशु कनारे पाँदे उतरे, तेबे तिना खे तेस नगरो रा एक माणूं मिलेया, जेसरे दुष्टात्मा थी और कई दिना ते ना टाल्ले पईनो था और ना कअरे जाओ था, पर कब्रा रे रओ था। से यीशुए खे देखी की चींगेया और तिना सामणे रूड़ी की जोरे की बोलणे लगेया, "ओ परमप्रदान परमेशरो रे पुत्र यीशु! माखे तांते क्या काम? मेरी तांते बिनती ये कि माखे कष्ट नि दे।" कऊँकि यीशु तेस माणूंए रे जो अशुद्ध आत्मा थी तेसा खे निकल़ने री आज्ञा लगी रे थे देणे, कऊँकि से बार-बार तेसखे कष्ट देओ थी। लोक तेसखे साँगल़ो और बेड़िये की बानी की राखो थे, पर से तिना खे तोड़ी की बणो खे नठी जाओ था और दुष्टात्मा तेसरे बैठी गी थी। यीशुए तेसते पूछेया कि तेरा नाओं क्या ए? तिने बोलेया सेना। कऊँकि मुखती सारिया दुष्टात्मा तेसरे बैठी गी थिया। और तिने यीशुए ते प्रार्थना कित्ती कि माखे डूगे गड्डे रे सेटणे री आज्ञा नि दे। तेती पाह्ड़ो पाँदे सूंअरो रा एक चूण्ड चरने लगी रा था, तो तेबे तिने तिना ते बिनती कित्ती, "आसा खे एते चूण्डो रे बैठणे दे।" तो तिने सेयो जाणे दित्तिया। तेबे दुष्टात्मा तेस माणूंए ते निकल़ी की सूंअरो रे चली गिया और से चूण्ड काअड़ी पाँदो ते छवाल़ लयी की समुद्रो रे डूबी की मरी गा।
गवाल़े जो ऊआ था तेस देखी की नठीगे। और नगरो और गांव रे जाई की सारा आल सुणाया। तेबे लोक जो ऊआ था, तेस देखणे खे आए, तेबे तिने से माणूं, जेसरे दुष्टात्मा थिया, से यीशुए रे पैरा पाँदे पड़े रा और टाल्ले पईनी की ओशा रे बैठे रा देखेया और डरी गे।
आऊँ तुसा खे सच्च लगी रा बोलणे कि जो एती खड़ी रे, तिना बीचा ते कई एड़े ए कि जदुओ तक परमेशरो रा राज्य नि देखी लओगे, तदुओ तक नि मरने।"
यीशुए री शक्ल बदलणी
इना गल्ला ते कोई आठ दिन बाद यीशु, पतरस, याकूब और यूहन्ने खे लयी की प्रार्थना करने खे पाह्ड़ो पाँदे गये। जेबे सेयो प्रार्थना करने ई लगी रे थे, तो तिना रे मुंओ री शक्ल बदली गी और तिना रे टाल्ले सफेद ऊई की चमकणे लगे। तेबे देखो, मूसा और एलिय्याह, यो दोनो मर्द यीशुए साथे गल्ला करने लगी रे थे। यो महिमा साथे दिखे और यीशुए रे मरने री चर्चा करने लगी रे थे, जो यरूशलेमो रे ऊणे वाल़ा था।
पतरस और तेसरे साथी नींजा रे थे और जेबे ठीक टंगो रे ओश आयी, तेबे यीशुए री महिमा और तिना दुँईं मर्दा खे, जो तिना साथे खड़ी रे थे, देखेया। जेबे सेयो यीशुए गे ते जाणे लगे, तेबे पतरसे यीशुए खे बोलेया, "ओ मालक! आसा रा एती रणा ठीक ए, तो आसे तीन तम्बू बणाऊँए, एक तुसा खे, एक मूसे खे और एक एलिय्याह खे।" तेसखे पता नि था कि से क्या बोलणे लगी रा।
देखो, पीड़ा बीचा ते माणूंए चींगी की बोलेया, "ओ गुरू! आऊँ तुसा ते बिनती करूँआ कि मेरे पाऊए पाँदे कृपा करो, कऊँकि से मेरा एकलौता ए। देख, एक दुष्टात्मा तेसखे पकड़ोई, ये एकदम चींगणे लगी जाओआ और से एसखे एड़ा मरोड़ोई कि एसरे मुंओ ते जगुड़ निकल़ने लगी जाओआ और एसखे माण्डी की, मुश्किला साथे छाडोई। मैं तुसा रे चेलेया ते बिनती कित्ती कि दुष्टात्मा खे निकयाल़ी देओ, पर सेयो नि निकयाल़ी सके।" यीशुए ज्वाब दित्तेया, "ओ अविश्वास करने वाल़ेयो और टीठ लोको! मां कदुओ तक तुसा साथे रणा? कदुओ तक तुसा खे सईन करुँ? तेसखे ओरे ल्याओ मांगे।" से आऊणे ई लगी रा था कि दुष्टात्मे से पटकी की मकरेड़ेया, पर यीशु दुष्टात्मा खे बके और पाऊए खे ठीक करी की तेसरे पिते गे सम्बाल़ी ता।
आपणी मौता रे बारे रे यीशुए री दुबारा भविष्यबाणी
तेबे सारे लोक परमेशरो री महान् सामर्था ते हैरान ऊईगे। पर जेबे सब लोक तिना सबी कामा ते जो से करो था, अचम्बा करने लगी रे थे, तो तिने आपणे चेलेया खे बोलेया,
यीशु और बालजबूल (शैताना रा सरदार)
तेबे तिने एक गूँगी दुष्टात्मा निकयाल़ी, जेबे दुष्टात्मा निकल़ी गी, तेबे गूँगा बोलणे लगेया और लोक हैरान ऊईगे।
तेबे तिना बीचा ते एकी जणे प्रदान पुरोईतो रे दासो पाँदे तलवार चलाई की तेसरा दाँणा कान ऊड़ाई ता। तेबे यीशुए बोलेया, "एबे बस करो" और तेसरा कान छुँईं की से ठीक करी ता।
जेबे यूहन्ने रे पेजे रे चेले चली गे, तेबे यीशु यूहन्ने रे बारे रे लोका खे बोलणे लगे, "तुसे जंगल़ो रे क्या देखणे गये थे? क्या अवा साथे ईलदे ऊए काओ जेड़े नगल़ो खे? तो तुसे तेबे क्या देखणे गये थे? क्या नरम टाल्ले पईने रे माणूंए खे? देखो जो भड़किले टाल्ले पईनोए और सुख-विलासो रे रओए, सेयो राजभवनो रे रओए। तो तेबे क्या देखणे गए थे? क्या केसी भविष्यबक्ते खे? आ, आऊँ तुसा खे बोलूँआ कि भविष्यबक्ते ते बी बड़े खे।" से येई, जेसरे बारे रे लिखी राखेया कि,
"देख, आऊँ आपणे दूतो खे तांते आगे-आगे पेजुँआ,
जेस तांते आगे जाई की बाट ठीक करनी।
"आऊँ तुसा खे बोलूँआ कि जो जवाणसा ते जम्मी रे तिना बीचा ते यूहन्ने ते बड़ा कोई निए पर जो परमेशरो रे राज्य रे छोटे ते बी छोटा ए, से तेसते बी बड़ा ए।" तेबे सबी आम माणूंए सुणी की और कर लणे वाल़ेया बी यूहन्ने रा बपतिस्मा लयी की परमेशरो खे सच्चा मानी ला। पर फरीसिये और धर्मशास्त्री तेसते बपतिस्मा ना लयी की परमेशरो री इच्छा आपणे बारे रे टाल़ी ती।