Lucas 7

एकी सूबेदारो रा विश्वास

1 जेबे यीशु लोका खे इना सबी गल्ला बताई चुके, तेबे सेयो कफरनहूम नगरो रे आए। 2 तेबे केसी सूबेदारो रा दास, जो तेसखे बऊत प्यारा था, बमारिया ते मरने वाल़ा था। 3 तिने यीशुए रे बारे रे सुणी की कई यहूदिया रे बुजुर्ग तिना गे ये बिनती करने पेजे कि आयी की मेरे दासो खे बचा। 4 सेयो यीशुए गे आयी की तिना ते बड़ी बिनती करी की बोलणे लगे, "से एते जोगा आए कि तुसे तेसखे ठीक करी सको। 5 कऊँकि से म्हारी जातिया खे प्यार करोआ और तिने ई आसा रा प्रार्थना रा कअर बणाई राखेया।" 6 यीशु तिना साथे चलणे लगे, जेबे सेयो कअरो रे नेड़े पऊँछणे वाल़े थे, तेबे तिने सूबेदारे तिना खे आपणे कई दोस्ता रे जरिए सन्देशा पेजेया, "ओ प्रभु कष्ट नि कर कऊँकि आऊँ एते जोगा निए कि तुसे मेरे कअरे आयी सको। 7 इजी बजअ ते आऊँ आपू खे एते जोगा पनि समजदा कि तुसा गे आऊँ, पर तुसे आपणे मुंओ तेई बोली देओ, तो से मेरा दास ठीक ऊई जाणा। 8 आऊँ बी पराधीन माणूं ए और सिपाई मेरे आथो रे ए। जेबे एकी खे बोलूँआ, ‘जा,’ तो से जाओआ और दूजे खे बोलूँ, ‘आओ,’ तो से आओआ। आपणे दासा खे बोलूँ, ‘ये कर,’ तो से करोआ।" 9 ये सुणी की यीशु हैरान ऊईगे, तेबे तिने मूँ फेरी की तेसा पीड़ा खे जो तिना पीछे आऊणे लगी री थी बोलेया, "आऊँ तुसा खे सच्च लगी रा बोलणे कि मैं इस्राएलो रे बी एड़ा विश्वास नि देखेया।" 10 तेबे जो दोस्त सूबेदारे पेजी राखे थे तिने कअरे जाई की से दास ठीक देखेया।

बिदुआ रे पाऊए खे जीवन-दान

11 थोड़े दिन बाद सेयो नाईन नाओं रे एक नगरो रे गये और तिना रे चेले और बऊत बड़ी पीड़ तिना साथे चली री थी। 12 जेबे सेयो नगरो रे फाटको गे पऊँचे, तेबे लोक एक मुड़दे खे बारे निणे लगी रे थे। जो जवान मरी रा था से आपणी बिदुआ माया रा इकलौता पाऊ था। नगरो रे बऊत सारे लोक तेसा साथे थे। 13 तेसा बिदुआ माया खे देखी की यीशुए खे तरस आया और तेसा खे बोलेया, "रोओ नि।" 14 तेबे तिने नेड़े जाई की सीढ़ छुँईं और सीढ़ चकणे वाल़े रूकी गे, तेबे तिने बोलेया, "ओ जवान आऊँ ताखे बोलूँए कि उठ।" 15 तेबे से मुड़दा उठी गा और बोलणे लगेया, तेबे यीशुए से तेसरी माया गे सम्बाल़ी ता। 16 तेबे सब डरी गे और सेयो परमेशरो री तारीफ करदे ऊए बोलणे लगे, "आसा बीचे एक बऊत बड़ा भविष्यबक्ता आईगा रा और परमेशरे आसा लोका पाँदे कृपा दृष्टि करी राखी।" 17 और तिना रे बारे रे ये गल्ल सारे रे यहूदिया प्रदेशो और नेड़े-तेड़े सारे देशो रे फैली गी।

यूहन्ना बपतिस्मा देणे वाल़े रा सवाल

18 यूहन्ने खे तेसरे चेलेया इना सबी गल्ला रा समाचार सुणाया। 19 तेबे यूहन्ने आपणे चेलेया बीचा ते दो जणे बुलाई की यीशुए गे ये पूछणे पेजे, "क्या आऊणे वाल़े तुसे ईए या आसे केसी ओरी री बाट देखिये?" 20 तिने यीशुए गे आयी की बोलेया, "यूहन्ने बपतिस्मे देणे वाल़े आसे ये पूछणे पेजी राखे कि क्या आऊणे वाल़ा तूँ ई ये या आसे केसी ओरी री बाट देखिये?" 21 तेसी बखते तिने बऊत जणे बमार और पीड़ा ते ठीक कित्ते और दुष्टात्मा ते छुड़ाए और बऊत जणेया अन्देया खे आखी दित्तिया। 22 यीशुए तिना खे बोलेया, "जो कुछ तुसे देखेया और सुणेया, जाई की यूहन्ने खे बताओ कि अन्दे देखोए, लंगड़े चलोए, कोढ़ी शुद्ध ऊई जाओए, टऊणे सुणोए और मुड़दे जिऊँदे ऊई जाओए और कंगाल़ा खे सुसमाचार सुणाया जाओआ। 23 धन्य ए सेयो, जो मेरी बजअ ते आपणा विश्वास नि छाडदे।"

24 जेबे यूहन्ने रे पेजे रे चेले चली गे, तेबे यीशु यूहन्ने रे बारे रे लोका खे बोलणे लगे, "तुसे जंगल़ो रे क्या देखणे गये थे? क्या अवा साथे ईलदे ऊए काओ जेड़े नगल़ो खे? 25 तो तुसे तेबे क्या देखणे गये थे? क्या नरम टाल्ले पईने रे माणूंए खे? देखो जो भड़किले टाल्ले पईनोए और सुख-विलासो रे रओए, सेयो राजभवनो रे रओए। 26 तो तेबे क्या देखणे गए थे? क्या केसी भविष्यबक्ते खे? आ, आऊँ तुसा खे बोलूँआ कि भविष्यबक्ते ते बी बड़े खे।" 27 से येई, जेसरे बारे रे लिखी राखेया कि,

"देख, आऊँ आपणे दूतो खे तांते आगे-आगे पेजुँआ,

जेस तांते आगे जाई की बाट ठीक करनी।

28 "आऊँ तुसा खे बोलूँआ कि जो जवाणसा ते जम्मी रे तिना बीचा ते यूहन्ने ते बड़ा कोई निए पर जो परमेशरो रे राज्य रे छोटे ते बी छोटा ए, से तेसते बी बड़ा ए।" 29 तेबे सबी आम माणूंए सुणी की और कर लणे वाल़ेया बी यूहन्ने रा बपतिस्मा लयी की परमेशरो खे सच्चा मानी ला। 30 पर फरीसिये और धर्मशास्त्री तेसते बपतिस्मा ना लयी की परमेशरो री इच्छा आपणे बारे रे टाल़ी ती।

31 यीशुए फेर बोलेया, "आऊँ आजकाल के लोका री उपमा किजी साथे करुँ? 32 सेयो तिना बच्चेया जेड़े ए, जो बजारो रे बैठी की एकी-दूजे खे आक्का पाई की बोलोए, ‘आसे तुसा खे बांसल़ी बजाई, पर तुसे नि नाचे; आसे शोग कित्तेया, पर तुसे छाती नि बजाई।’ 33 कऊँकि यूहन्ना बपतिस्मा देणे वाल़ा न तो रोटी खांदा आया और ना अँगूरा रा रस पींदा आया और तुसे बोलोए कि तेसरे दुष्टात्मा ए? 34 पर आँऊ माणूं रा पुत्र खांदा-पींदा ऊआ आया और तुसे बोलोए कि, ‘देखो, पेटू और पियक्कड़ माणूं कर लणे वाल़ेया रा और पापिया रा दोस्त ए।’ 35 पर ज्ञान आपणी ल्वादा ते सच्चा ठराई राखेया।"

फरीसिये रे कअरे पापी जवाणसा खे माफी

36 तेबे किने फरीसिये तिना ते बिनती कित्ती कि मां साथे रोटी खाओ; तेबे सेयो तेसरे कअरे जाई की रोटी खाणे लगे। 37 तेस नगरो री एक पापी जवाणस ये जाणी की कि यीशु एक फरीसियो रे कअरे रोटी खाणे बैठी रा, संगमरमरो रे पांडे (सुराई) रे इत्र ल्याई 38 और तेबे तिना रे पैरा गे पीछे खड़ी ऊई की रोणे लगी और आपणे आसूआ साथे तिना रे पैर तोए और आपणे सिरो रे बाल़ो साथे साफ कित्ते और तिना रे पैर बार-बार चूम्मी की तिना पाँदे इत्र मल़ेया। 39 ये देखी की से फरीसी, जिने यीशु बुलाए थे, आपणे मनो रे सोचणे लगेया, "जे ये भविष्यबक्ता ऊँदा तो जाणी लंदा कि ये जो जवाणस एसखे छूणे लगी री, ये कूणे और केड़ी जवाणस ए? कऊँकि से तो पापी ए?" 40 ये जाणी की यीशुए बोलेया, "ओ शमौन मां ताखे कुछ बोलणा," शमौने बोलेया, "ओ गुरू बोलो।" 41 तेबे यीशुए बोलेया, "केसी साऊकारो रे दो देणदार थे, एक पाँज सौ चाँदिए रे सिक्के और दूजा पंजा चाँदिए रे सिक्केया रा देणदार था। 42 जेबे तिना गे वापस करने खे कुछ नि था, तो तेबे तिने दुँईं जणेया रा कर्ज माफ करी ता, तो बता तिना बीचा ते केस तेसखे जादा प्यार करना।"

43 शमौने ज्वाब दित्तेया, "मेरी समजा ते तेस, जेसरा तिने जादा कर्ज माफ कित्तेया।" यीशुए तेसखे बोलेया, "तैं ठीक उतर देई राखेया।" 44 तेबे तेसा जवाणसा कनारे फिरी की तिने शमौनो खे बोलेया, "क्या तूँ एसा जवाणसा खे देखणे लगी रा? आऊँ तेरे कअरे आया, पर तैं माखे पैर तोणे खे पाणी नि दित्तेया पर एसे मेरे पैर आपणे आसूआ साथे तोए और आपणे बाल़ा साथे साफ कित्ते। 45 तैं मेरे गल़े लगी की मेरा स्वागत नि कित्तेया, पर जदुओ ते आऊँ आयी रा, तदुओ ते एसे मेरे पैर चूमणे नि छाडी राखे। 46 तैं मेरे सिरो रे तेल नि मल़ेया, पर एसे मेरे पैरो रे इत्र मल़ेया। 47 तेबेई तो आऊँ ताखे बोलूँआ कि एसा रे जो बी पाप थे, सेयो माफ ऊईगे कऊँकि एसे बऊत प्यार कित्तेया, पर जेसरा थोड़ा माफ ऊआ, से थोड़ा ई प्यार करोआ।" 48 तेबे यीशुए तेसा जवाणसा खे बोलेया, "तेरे पाप माफ ऊईगे।" 49 तेबे जो लोक तिना साथे रोटी खाणे बैठी रे थे, सेयो आपणे-आपणे मनो रे सोचणे लगे, "ये कूणे जो पाप बी माफ करी देओआ? जेते खे सिर्फ परमेशर ई माफ करी सकोआ।" 50 पर तिने तेसा जवाणसा खे बोलेया, "तेरे विश्वासे तूँ बचाई ली, बेफिकर ऊई की चली जा।"