आमोस 8

फला ते परी री टोकरिया रा दर्शण

1 परमेशर यहोवा माखे दर्शणो दे दखाया कि गर्मिया रे फल़ा साथे परी री एक टोकरी ए। 2 तिने माखे बोलेया, "ओ आमोस, ताखे क्या दिशणे लगी रा?" मैं बोलेया, "गर्मिया रे पके रे फल़ा साथे परी री एक टोकरी ए।" तेबे परमेशरे माखे बोलेया, "इजी ते पता चलोआ कि मेरी इस्राएल प्रजा रा अन्त आई गा रा ए। मां तिना खे सजा देणे रे बारे दे आपणा मन फेर नि बदल़णा।" 3 परमेशर यहोवे री बाणी ए, "से दिन आऊणे लगी रा जेबे मन्दरो रे गाणे रोणे दे बदली जाणे। ओर सेयो लाशा चुपचाप हर जगा दे सेटी देणियां।" 4 ये सुणो, तुसे जो गरीबा खे निगल़ना ओर देशो रे नम्र लोका खे बर्बाद करना चाओए।

5 तुसे बोलोए, "नया चाँदो रा त्योआर कदी खत्म ऊणा, ताकि आसे आपणा नज्ज बेची सकिये। रामो रा दिन कदी खत्म ऊणा, तेबे लोका आसा रा नज्ज खरीदी सकणा।" पर तुसे सई नापो ते नि नापदे। तुसे आपणे समानो रिया कीमता बढ़ाई देओए। तुसे बेईमानिया ते ताकड़िया रा इस्तेमाल करी की दूजेया खे तोखा देओए। 6 आसा कंगाल़ा खे पैसे देई की ओर गरीबा खे एक जोड़ी जोड़े देई की खरीदी लओए, ओर कटिया नज्ज बेचूँ।

7 याकूबो रे लोको, तुसे कमण्ड करोए कि यहोवा तुसा रा परमेशर ए। पर तिने आपणे नाओं ते वादा करी राखेया। से बोलोआ, "मां इस्राएलो रे जरीये कित्ते दे केसी बी कामो खे कदी नि पूलणा।" 8 जो कुछ बी कटणा ऊणी, तिजी ते तरती काँबी जाणी। इजी दे रणे वाल़े सारे लोक रोणे लगणे। इजी री खातर जमीन नील नदिया जेड़ी ऊबो खे ऊई जाणी। ये ऊफणनी। फेर ये मिस्रो री तेसा नदिया जेड़ी फेर शांत ऊई जाणी। 9 परमेशर यहोवे री ये बाणी ए, "तेस बखते मां सूरज त्याड़िया रे बखते अस्त करना ओर एस देशो दे दिन-दपईरे अन्दकूप न्हेरा करी देणा। 10 मां तुसा रे त्योआरो री खुशी, शोगो दे बदली देणी; गाणे रे बजाये हर कोई रोणे लगणा। मां जो करना, तेतेरिया बजा ते तुसा सबी टाट पईनणी ओर आपणे सिर गँजे करी की दखाणे कि तुसे शोग करने लगी रे। मां से बखत तेड़ा ई बणाई देणा जेड़े लोक आपणे एकलौते पाऊए रे मरने पाँदे शोग मनाओए। तुसे सब तेस दिने बऊत दु:खी रणे।"

11 परमेशर यहोवे री ये बाणी ए, "देखो, एड़े दिन आओए, जेबे मां एस देशो दे पूखमरी फलाणी। पर लोक नज्जो रिया तँईं पूखे नि ऊणे। सेयो पाणिए खे त्याये नि ऊणे। इजी रे बजाये, सेयो मांते सन्देश पाणे खे पूखे ऊणे। 12 लोक खारे समुद्रो ते बड़े समुद्रो तक रूड़दे ऊए जाणे, ओर उत्तरा ते पूर्बा खे पटकदे ऊए मां यहोवे ते सन्देश पाणे री टोल़ा दे जाणे, पर तिना खे कोई सन्देश नि मिलणा। 13 तेस बखते सुन्दर कुआँरिया ओर जवान माठे दोनो त्यायी रे मारे बेओश ऊई जाणे। 14 जो लोक सामरिया रे दोष देवते री कसम खाओए ओर जो बोलोए, ‘दानो रे देवते री जिन्दगिया री कसम’, ओर बेर्शेबा रे देवते री कसम, सेयो सारे रूड़ी जाणे ओर फेर नि उठणे।"