आमोस 5

परमेशरो रिया तरफा खे मुड़ना

1 ओ इस्राएलो रे लोको, परमेशरो रा सन्देश सुणो। तुसा रे बारे दे मेरा शोगो वाल़ा गीत सुणो; 2 तुसे इस्राएलो री एकी जवान जवाणसा जेड़े ए, पर तेबे बी तुसे पक्का काये जाणे ओर तुसे फेर कदी नि उठी सकणे! तुसे जमीना पाँदे छाडे दे पड़े दे रणे, ओर कोई बी तुसा खे खड़े ऊणे दे मताद नि करी सकणा। 3 कऊँकि परमेशर यहोवा ईंयाँ बोलोआ, "जेबे कोई शईर लड़ाईया खे 1,000 सिपाईया खे पेजोआ, तो सिर्फ इस्राएलो रे 100 ई सिपाई वापस आओए। जेबे कोई शईर 100 सिपाईया खे पेजोआ, तो सिर्फ दस ई जिऊँदे वापस आओए।"

4 परमेशर इस्राएलो रे लोका खे ईंयाँ बोलोआ, "माखे टोल़दे रओ, तेबे जिऊँदे रणे। 5 मेरी मताद मांगणे खे बेतेलो दे नि जाओ; आराधना करने खे गिलगालो खे नि जाओ; एथो तक कि बेर्शेबा दे पनि जाओ, कऊँकि तुसा रे दुश्मणा गिलगालो रे लोक दूजे देशा दे लई जाणे, ओर बेतेल पापो रिया बजा ते पूरी तरआ ते नाश ऊई जाणा।" 6 तो परमेशरो गे आओ, तेबे जिऊँदे रणे, नई तो से यूसुफो रे कराने पाँदे आगी जेड़ा पड़कणा ओर तेस से फूकी देणा ओर बेतेलो दे तेसा आगी खे बजयाणे वाल़ा कोई नि ऊणा। 7 तुसा बीचे कुछ एड़े लोक बी ए जो पले कामा खे बी बुरा बणाई देओए। सेयो सई कामा खे बी माट्टिया रे मलाई देओए। 8 जिने कचपचिया ओर मृगशिरा खे बणाया, जो अन्दकूप न्हेरे खे प्यागा रा प्रयासा बणाओआ, जो दिनो खे रात बणाई देओआ। से समुद्रो ते पाणी खींजो आ ओर तेसखे जमीना पाँदे बर्खा रे रूपो दे बरसाओआ, तेसरा नाओं यहोवा ए। 9 ते चट ई तागतवरो खे बर्बाद करी देयोआ ओर गढ़ो रा बी सत्यानाश करी देयोआ।

10 तुसे ईमानदार ओर न्यायिया ते कृणा करोए। तुसे तिना सबी पाँदे आसोए जो निर्दोष ए ओर सच्च बोलोए। 11 तुसे जो कंगाल़ा पाँदे अत्याचार करोए ओर पेंट बोली की तिना ते नज्ज छुड़ाई लओए, इजी री खातर जो कअर तुसे कअड़े रे पात्थरा साथे बणाई राखे, तिदे रयी नि सकणे ओर जो कीमती अंगूरा रे बगीचे तुसे लगाई राखे, तिना रा शराब नि पी सकणे। 12 कऊँकि आऊँ तुसा रे सबी तरआ रे पापा खे जाणूंआ। कि तुसा रे पाप बऊत पारी ए। तुसे तर्मिया खे सताओए ओर रिश्वत लओए ओर तुसे कचरिया रे द्वारो ते गरीब लोका खे नठाई देओए। 13 इजी बजा ते जो अक्लमंद ओ, से एड़े बखते चुप रओ, कऊँकि बखत बुरा ए। 14 ओ लोको, बुराईया खे नि, खराईया खे टोल़ो, ताकि तुसे जिऊँदे रओ ओर तुसा रा ये बोलणा सच्च ओ कि सेना रा परमेशर यहोवा तुसा साथे ए। 15 बुराईया साथे बैर ओर पलाईया साथे प्यार राखो ओर फाटको दे न्याय खे पक्का करो, क्या पता सेना रा परमेशर यहोवा यूसुफो रे बचे रे वंशो पाँदे दया करो। 16 इजी बजा ते सेना रे परमेशर, परमेशर यहोवा ईंयाँ बोलोआ, "सबी चौका रे रोणा-पीटणा ऊणा ओर लोका सबी सड़का रे हाय, हाय करनी! सेयो जिम्मीदारा खे आपू साथे रोणे खे बुलाओ, ओर जो रोणे रा ई काम करोए तिना खे बी रोणे खे बुलाओ।"

17 सबी अंगूरा रे बगीचेया दे रोणा-पीटणा ऊणा, कऊँकि परमेशर ईंयाँ बोलोआ, "कऊँकि मां सेयो सब नाश करी देणे।" 18 तुसा पाँदे लाणत ए, जो परमेशरो रे दिनो री इच्छा करोए! काश, परमेशरो रा दिन आई जांदा! तुसा खे नि पता कि तुसे क्या इच्छा करने लगी रे। तेस दिनो न्हेरा ल्याऊणा प्रयासा नि। 19 जेड़ा कोई शेर रे डरो ते नठोआ ओर तेसखे पालू मिलो या जेबे से बचणे खे आपणे कअरे जाओआ, तो से कांदा दे आपणा आथ राखोआ ओर एक साप तेसखे डसी लओआ। 20 आ, यहोवे रा से दिन न्हेरे रा ओर निराशा वाल़ा ऊणा, बिना खुशी ओर बिना उम्मीदा वाल़ा। 21 आऊँ तुसा रे त्योआरो ते बैर राखूँआ ओर तिना खे नबाग जाणूंआ ओर तुसा री बड़ी सभा ते आऊँ खुश नि ए। 22 चाए तुसे माखे नज्जो री बलि ओर होमबलि चढ़ाओ, तेबे बी मां मेलबलिया रे रूपो दे चढ़ाए दे तुसा रे मोटे-मोटे बाच्छूआ रे मासो खे देखणा पनि ए।

23 आपणे गाणे रे आल्ले खे मांते दूर करो, तुसा री सारंगिया रे सुर मां नि सुणने। 24 पर न्याय खे नदिया जेड़े ओर तर्मो खे समुद्रो रे पाणिए जेड़े बह्ईणे देयो। 25 ओ इस्राएलो रे लोको, तुसे बणो दे चाल़ी साल तक डांगरा री बलि ओर नज्जो री बलि क्या माखे ई चढ़ांदे रये? 26 तुसा गे मूर्तिया ए जो तुसे आपणियां तँईं बणाई राखिया। तुसा गे तुसा रे राजा सक्कुथो री मूर्ति ए। तुसा गे तुसा रे तारेया रे देवता कैवानो री मूर्ति ए। एबे तुसा खे सेयो आपू साथे लई जाणिया पड़निया। 27 इजी बजा ते मां तुसे दमिश्को ते पार गुलामिया दे पेजी देणे, सेना रे परमेशर यहोवे रा येई वचन ए।