1 फेर मैं दर्शणो दे देखेया कि परमेशर बेदिया गे खड़ी रा। तिने बोलेया, "मन्दरो रे द्वारा रे खम्बेया रे सिरे पाँदे बायी देयो, ताकि निऊँ ईल्ली जाओ, ओर तिना रे सिर टूटी जाओ। जो लोक थाले ए तिना पाँदे छत टाल़ी देयो, ओर जो बची जाणे सेयो लोक मां लड़ाईया दे तलवारी ते कायी देणे। फेर जो बची जाणे, सेयो बी बची नि सकणे। 2 कऊँकि चाए सेयो खणी की पताल़ो दे उतरी जाओ, तेबे बी मां सेयो पकड़ी की तेथा ते ल्याऊणे, चाए सेयो सर्गो दे चढ़ी जाओगे, मां सेयो तेथा ते बी थाले उतारी की ल्याऊणे। 3 चाए सेयो कर्मेलो रे पाह्ड़ो पाँदे लूकी जाओगे, पर मां सेयो तेती बी टोल़ी की पकड़ी लणे ओर चाए सेयो समुद्रो बीचे मेरी नजरा ते लूकी जाओ, तेती बी मां सापो खे तिना खे डसणे री आज्ञा देणी। 4 चाए दुश्मण तिना खे जबरदस्ती गुलामिया दे लई जाओ, तेती बी मां आज्ञा देई की सेयो तलवारी साथे कुल़वाणे ओर मेरी नजर तिना पाँदे पलायी करने खे नि पर बुराई करने खे ई पड़नी।"

5 सेना रे परमेशर यहोवे रे छूँणे ते तरती गल़ोई ओर तेते पाँदे रणे वाल़े सारे शोग करोए, से सारी की सारी मिस्रो री नील नदिया जेड़ी जाओई, जो बढ़ोई, तेबे लईरा उठोईया ओर थाले बी ऊई जाओई। 6 यहोवा आपणा मन्दर स्वर्गो दे बणाओआ, जेतेरी निऊँ तरतिया पाँदे राखी जाओई। से समुद्रो ते पाणी चकोआ, ओर तिजी खे बर्खा रे रूपो दे तरतिया पाँदे बरसाओआ। तेसरा नाओं ई यहोवा ए। 7 ओर परमेशर बोलोआ, "ओ इस्राएलो रे लोको, तुसे एबे माखे कूशो रे लोका ते जादा जरूरी नि ए। मैं तुसा रे बुजुर्ग मिस्र देशो ते एती ल्याये, पर आऊँ पलिश्तिया खे कप्तोर द्वीपो ते बी ल्याया, ओर मैं सामरिया रे लोक कीर जगा ते ल्याये। 8 देखो, परमेशर यहोवे री नजर एस पापो ते परे रे देशो पाँदे लगी री ओर मां ये तरतिया पाँदा ते नाश करना, तेबे बी मां पूरी तरअ ते याकूब नाश नि करना", परमेशरो री येई बाणी ए। 9 जेबे मां एसखे आज्ञा देणी, तो ये एड़ा ऊणा मानो आऊँ तुसा इस्राएली लोका खे जो लग-लग देशा दे रओए, ईलाई देणे, जेड़े कोई जिम्मीदार छानणिया खे ईलाई की नज्जो ते पात्थर लग करी देओआ, ताकि से साफ नज्ज जमीना दे नि पड़ो। 10 मेरी प्रजा रे सारे पापी लोक जो बोलोए, "आसा पाँदे मुसीबत नि पड़नी ओर ना आसे केरने", सेयो सारे लड़ाई दे तलवारी साथे मरने।

11 तेस बखते मां दाऊदो री टल़ी की चूँगड़ी खड़ी करनी ओर तेसरे बाड़े रे नाके सुदारने ओर तेसरे खण्डहर फेर बनाणे ओर जेड़ा से पुराणे बखतो दे था, से तेड़ा ई बणाई देणा। 12 तेबे मेरी प्रजा रे लोका एदोमो रे बचे रे लोका पाँदे राज करना। मेरिया प्रजा तिना सबी जातिया पाँदे बी राज करना जो मेरिया ए, तेस यो सब काम करने, यहोवे री येई बाणी ए। 13 परमेशरो री ये बी बाणी ए, "से बखत आऊणा जेबे तुसारे डोरूआ दे नज्ज बऊत अच्छी तरआ ते जमणा। लोका खे आपणी फसला छोड़ बाडणियां पड़निया, तेते ते बाद ई सेयो फेर दुबारा अल़ चलाई सकोए। तुसा रिया बेली दे बऊत सारे अंगूर जमणे। लोका नवींया बेली लगाणे ते पईले अंगूरा ते शराब बनाणे रा काम छोड़ करना। अंगूरा ते इतणा रस निकल़ना कि से पाह्ड़िया ते थाले बह्ईणे लगणा। 14 मां आपणे इस्राएली लोक गुलामिया ते वापस ली आऊणे। तिना सेयो उजड़े दे शईर फेर बनाणे ओर तिना दे बसणे। तिना अंगूरा रे बगीचे लगाणे ओर तिना रे फल़ा रा रस पीणा। तिना साग-सब्बजिया रे बगीचे लगाणे, ओर तिना रे फल़ खाणे। 15 मां इस्राएल तिना रे आपणे देशो देई बसाणा। सेयो तेस देशो ते फेर कदी नि निकाल़ने जो मैं तिना खे देई राखेया ए," तुसा रे परमेशर यहोवे री येई बाणी ए।