आमोस 2

मोआबो रा न्याय

1 यहोवा ईंयाँ बोलोआ, "मोआबो रे लोके बार-बार पाप करी राखेया। इजी री खातर मां तिना रा न्याय करना। तिने एदोमो रे राजे री आड्डिया फूकी की स्वा बणाई ती दी। 2 इजी री खातर मां मोआबो दे आग लगाणी ओर तिजी ते करिय्योत शईरो रे मईल फूखी जाणे ओर मोआबो रे लोक लड़ाईया रे शोरो दे मरी जाणे जेबे कि सिपाई जोरे की ललकारने लगी रे ऊणे ओर रड़सिंगा बजणे लगी रा ऊणा। 3 मां तिना बीचा ते न्यायी नाश करी देणा ओर साथे-साथे तेसरे परदान बी काई देणे।" परमेशरो रा येई वचन ए।

यहूदा रा न्याय

4 परमेशर फेर बोलोआ, "यहूदा रे लोके बार-बार पाप करी राखेया। इजी री खातर मां तिना रा न्याय करना। तिने मेरिया बिदिया खे मानणे ते ना करी राखी। तिने मेरी बिदिया नि मानिया ए। दूजे देवतेया सेयो पटकाईते दे ए। बऊत पईले तिना रे लोक तिना देवतेया री पूजा करो थे। 5 इजी री खातर मां यहूदा दे आग लगाणी ओर तिजी ते यरूशलेमो रे मईल फूखी जाणे।"

इस्राएलो रा न्याय

6 परमेशर फेर बोलोआ, "इस्राएलो रे लोके बार-बार पाप करी राखेया। इजी री खातर मां तिना रा न्याय करना। सेयो तिना लोका खे चाँदिए रे सिक्केया खे गुलाम बनाणे खे बेचो ए जो पुरिया तरआ ते निर्दोष ए। सेयो जरूरतमंद लोका खे एक जोड़ी जोड़ेया रे बदले बेची देओए। 7 सेयो जमीना री तूड़ा पाँदे गरीबो रा सिर रगड़ोए; सेयो सीदे-सादे लोका खे तिना रिया बाटा ते फेरी देओए। बाओ ओर माठा, दोनो एकी ई छोट्टिया साथे गल़त काम करोए। ईंयाँ तिने मेरे पवित्र नाओं खे अपवित्र करिता दा ए। 8 सेयो बन्दनो रे टाल्लेया खे वेदिया गे बछाओए, ओर आपू तिना पाँदे लेटोए। सेयो आपणे परमेशरो रे मन्दरो दे जुर्माने रे पैसेया री शराब पियोए। 9 मैं कनान देशो दे बसाणे ते पईले एमोरी लोक नाश कित्ते थे; जिना रा कद देवदारो रे डाल़ा जेड़ा ऊच्चा था, जो बड़े डाल़ो जेड़े मजबूत थे। मैं ऊबा ते तिना रे फल़ ओर थाला ते तिना रिया जड़ी नाश कित्तिया थिया। 10 इस्राएलो रे लोको, आऊँ तुसा खे मिस्र देशो ते बारे ल्याया। मैं तुसे चाल़ी साल तक रेगिस्तानो दे चलाए। मैं तुसा खे एमोरिया रे देशो पाँदे अधिकार दित्तेया। 11 मैं तुसा रे माठेया बीचा ते नबी ऊणे खे ओर तुसा रे कुछ जवाना बीचा ते नाजीर ऊणे खे ठराए। ओ इस्राएलो रे लोको, क्या ये सब कुछ सच्च नि ए?" परमेशरो री येई बाणी ए।

12 पर तुसे नाज़ीरा खे शराब पल़्याया ओर नबिया खे आज्ञा दित्ती कि भविष्यबाणी नि करो। 13 देखो, मां तुसे एड़े दबाणे, जेड़े पूल़ेया रे बजनो ते गड्डी थाले दबी जाओई। 14 इजी री खातर तेज दौड़ने वाल़ेया खे नठणे खे जगा नि मिलणी ओर ना शक्तिशाली माणूं आपणा प्राण बचायी सकणा। 15 धनुष चलाणे वाल़े नि रयी सकणे ओर तेज दौड़ने वाल़े नि बचणे, कोड़ेया रे सवार बी आपणा प्राण नि बचायी सकणे। 16 एथो तक कि शूरवीरा बीचे जो जादा तागतबर ए, से बी तेस दिने नांगा ऊई की नठी जाणा। परमेशरो री येई बाणी ए।