1 आमोस तकोआ शईरो रा एक ग्वाल़ा था। एती से दर्शण ए जो तिने इस्राएलो रे बारे दे देखेया था। ये दर्शण तेसखे भूकम्पो ते दो साल पईले मिलेया था। तेस बखते यहूदा रा राजा उज्जियाह था। योआशो रा पाऊ यारोबाम इस्राएलो रा राजा था। यो आमोसे रे शब्द ए; 2 तिने बोलोआ, "परमेशर सिय्योनो ते शेरो जेड़े गरजोआ। तेसरी आवाज यरूशलेमो ते गरजणे जेड़ी आओई। ग्वाल़ेया री चराईया सूकी जाओईया। कर्मेल पाह्ड़ो री चूँडी सूकी जाओई।"

3 यहोवा बोलोआ, "दमिश्को रे लोके बार-बार पाप करी राखे, इजी बजा ते मां तिना खे सजा देणी। कऊँकि तिना गिलाद लोए रे अल़े की केसणा। 4 इजी री खातर मां राजा हजाएलो रे मईलो खे नाश करने खे आग पेजणी। एसा आगी तेसरे पाऊ बेन्हददो रा कीला फूकी देणा। 5 मां दमिश्को रे फाटक बी तोड़ी देणे ओर ओवन नाओं री काअटिया दे रणे वाल़े ओर बेतादेनो रे कअरे रणे वाल़े राजदण्डधारी नाश करने ओर अरामो रे लोक बन्दी ऊई की कीर शईरो खे जाणे, परमेशरो रा येई वचन ए।" 6 परमेशर ईंयाँ बी बोलोआ, "गाजा शईरो रे लोके बार-बार पाप करी राखेया ए। ओर मां सेयो बिना सजा दित्ते नि छाडणे! तिने सारे गाँवो खाली कराईते दे ए, ओर सेयो एदोमो रे लोका खे गुलाम बणाई की बेचीते दे ए। 7 इजी बजा ते मां गाजा री दवाला दे आग लगाणी ओर तिजी ते तेथो रे मईल फूखी जाणे। 8 मां अशदोद रे रणे वाल़े ओर अश्कलोन रे राजदण्डाधिकारी बी नाश करने, मां एक्रोनो खे सजा देणी ओर बाकी सब पलिश्ती लोक मरी जाणे" परमेशर यहोवे रा येई वचन ए।

9 परमेशर ईंयाँ बी बोलोआ, "सोरो रे लोके बार-बार पाप करी राखेया ए। इजी री खातर मां तिना रा न्याय करना। तिने सबी जातिया पाँदे कब्जा करी ला दा ए। तिने सेयो एदोमो खे बेचीते दे। तिने आपणा वादा याद नि कित्तेया। 10 इजी बजा ते मां सोरो री दवाला दे आग लगाणी ओर तिजी ते तेथो रे मईल फूखी जाणे।"*

11 परमेशर फेर बोलोआ, "एदोमो रे लोके बार-बार पाप करी राखेया। इजी री खातर मां तिना रा न्याय करना। तिने तलवारा लई की इस्राएलो रा पीछा कित्तेया जो तिना खे काणे खे त्यार थिया। तिने देशो री जवाणसा काई तिया। सेयो हर बखत गुस्से दे रओ थे। तिना रा गुस्सा एक एड़िया आगी जेड़ा था जो पड़की जाओ थी। एतेखे रोकी नि सको थे। 12 इजी बजा ते मां तेमान शईरो री दवाला दे आग लगाणी ओर तिजी ते बोस्रा रे मईल फूखी जाणे।"

13 परमेशर फेर बोलोआ, "अम्मोनो रे लोके बार-बार पाप करी राखेया ए। इजी री खातर मां तिना रा न्याय करना। तिने गिलादो दे गर्भवती जवाणसा चीरी तिया। सेयो तेसा जगा खे आपणे इस्से दे जोड़ना चाओ थे। 14 इजी बजा ते मां रब्बा री दवाल रे आग लगाणी ओर तिजी ते तेथो रे मईल फूखी जाणे। लड़ाईया रे तेस दिने लड़ाईया री आवाज सुणनी। से दिन तेज पऊण-चूखाने वाल़ा ऊणा। 15 ओर तिना रा राजा आपणे परदाना समेत गुलामिया दे जाणा, परमेशरो रा येई वचन ए।"