1 राजे रा मन नईरा रे पाणिए जेड़ा यहोवे रे आथो रे रओआ,

जेथो खे से चाओआ, तेथो खे तिजी खे फेरी देओआ।

2 माणूंए रा सारा चाल-चलण तेसरिया आपणियां नजरा रे तो ठीक ए,

पर यहोवा तेसरे मनो खे परखोआ।

3 जो सई ओर न्याय ए, से करना परमेशरो खे बलिदान करने ते जादा खरा लगोआ।

4 बुरे लोक आपणे कमण्ड ओर अकड़ा रे जरिये हांडोए,

ओर ये पाप ए।

5 काम करने वाल़े री इच्छा ते बस फायदा ई ओआ,

पर जल्दबाजी करने वाल़े खे बस काअटा ओआ।

6 जो माणूं दूजेया ते चूठ बोली कि पैसा कमाओए, सेओ चट ई कोहरे जेड़े राची जाणे,

ओर एड़ा करने ते चट ई तिना री मौत ऊई जाणी।

7 जो लड़ाई-चगड़ा दुष्ट लोक करोए,

तिजी ते तिना रा ई नाश ओआ, कऊँकि सेयो न्याय रा काम करने ते ना करोए।

8 दुष्ट लोक बुरे काम करोए,

पर सीदे लोक सेई करोए जो ठीक ए।

9 लाम्बे-चौड़े कअरो रे चगड़ा करने वाल़ी लाड़िया साथे रणे ते,

छतो रे कूणे रे रणा खरा ए।

10 दुष्ट माणूं बुराईया री इच्छा जियूए ते करोआ,

तिना खे केसी पाँदे बी दया नि आऊँदी।

11 जेबे मजाक करने वाल़े खे सजा देओए, तेबे शरीफ अक्लमंद ऊई जाओआ,

ओर जेबे अक्लमंदो खे उपदेश दित्तेया जाओआ,

तेबे तेसखे ज्ञान मिलोआ।

12 तर्मी परमेशर दुष्टो रे कराने पाँदे अक्ला साथे सोचोआ,

ओर यहोवा बुरेया लोका खे बुराईया रे पाई देओआ।

13 जे तुसे गरीबा री पुकार नि सुणदे,

तो जेबे तुसा आपणियां मतादा खे पुकारना तेबे तुसा री पनि सुणी जाणी।

14 गुप्तो रे दित्ती री पेंटा साथे गुस्सा ठण्डा ओआ,

ओर चोरिए दित्ती री रिश्वता ते बड़ी जल़न बी कम ऊई जाओई।

15 जेबे न्याय रा काम ओआ तो खरेया माणूंआ खे खुशी मिलोई,

पर अनर्थ करने वाल़ेया खे से बुरा लगोआ।

16 जो माणूं समजा रिया बाटा ते पटकी जाओआ,

तेसरा ठकाणा मरेया रे बीचे ऊणा।

17 जो अईयाशी करने ते प्यार राखोआ, से गरीब ऊई जाओआ;

ओर जो अंगूरा रा रस पीणे ओर तेल लगाणे ते प्यार राखोआ, से अमीर नि ऊँदा।

18 दुष्ट माणूं आपू पाँदे ई दु:ख ल्याओए, जो सेओ तर्मिया माणूंआ पाँदे ल्याऊणा चाओ थे,

ओर विश्वासघाती सीदे लोका रे बदले सजा पुगतोए।

19 लड़ाकू ओर चिड़चिड़े सबाओ री लाड़िया साथे रणे ते,

सुनसाण जगा रे रणा खरा ए।

20 अक्लमंद माणूंए रे कअरे बऊत पैसा ओर जादा चीजा मिलोईया,

पर मूर्ख तिना खे डवाई देओआ।

21 दयालु ओर ईमानदार बणो ओर तुसा री उम्र बढ़नी,

दूजेया तुसा री महिमा करनी ओर तुसा साथे सई बर्ताओ करना।

22 अक्लमंद माणूं शूरवीरा रे शईरो रे चढ़ी की, तिना रे किले खे,

जेते पाँदे सेयो परोसा राखोए, नाश करोआ।

23 जो आपणियां जबानी खे वशो रे राखोआ,

से आपणे प्राणो खे मुसीबता ते बचाओआ।

24 एक कमण्डी माणूं सोचोआ की से दूजेया माणूंआ ते खरा ए, ओर सिर्फ आपणे ई बारे दे सोचोआ।

ओर से ज्ञानो रिया गल्ला रा मजाक उडाओआ।

25 आल़सी माणूं सोचदे ऊए ई मरी जाओआ,

कऊँकि से आपणे आथा ते कोई काम नि करदा।

26 कोई एड़ा ए* जो पूरा दिन सोचेया ई करोआ,

पर तार्मिक माणूं दूजेया खे बऊत चीजा देणे खे त्यार रओआ।

27 जेबे बुरे लोक बलिदान चढ़ाओए, तेबे यहोवा तिजी ते नफरत करोआ;

खास करी की जेबे सेयो बुरिया इच्छा ते ल्याओए।

28 चूठ बोल़णे वाल़ा गवाह् नाश ऊई जाओआ,

जिने जो सुणी राखेया, सेई बोलोआ, से स्थिर रणा।

29 दुष्ट माणूं सोचोए कि सेओ सब कुछ जाणोए,

पर तर्मी माणूं आपणे चाल-चलणो पाँदे त्यान देओआ कि से क्या करोए।

30 जे यहोवा तुसा रे खलाफ ए, तो माणूंआ री अक्ल, समज ओर तरकीबा रा कोई फाईदा नि आ।

31 युद्धो रे दिने कोड़ा तो त्यार ओआ,

पर जीत यहोवा ई देओआ।