1 Samuel 15

शाऊलो रा दूजी बार परमेशरो री आज्ञा ना मानणा

1 एक दिन सेमुएल नबीए शाऊलो खे बोलेया, "यहोवे आपणी प्रजा इस्राएलो पाँदे राज करने खे तेरा अभिषेक करने खे आऊँ पेजी राखेया था, इजी री खातर एबे यहोवे रिया गल्ला सुणी लो। 2 सेना रा यहोवा ईंयाँ बोलोआ ‘कि माखे याद आओआ कि अमालेकिये इस्राएली लोका साथे केड़ा बुरा बर्ताओ कित्तेया था ओर जेबे इस्राएली मिस्रो ते आऊणे लगी रे थे, तेबे तिने बाटा दे तिना पाँदे अमला कित्तेया।’ 3 इजी री खातर एबे तूँ जाई की अमालेकिया खे काईदे ओर जो कुछ तिना राए तिजी खे बिना दया करी की सत्यानाश करी दे, तिना रे मर्द, जवाणस, बच्चे, दूद पींदे बच्चे, गाय-बल़द, पेडा-बाकरिया, ऊँट, गह्दे, सबी खे काईदे।"

4 तेबे शाऊले इस्राएली लोक बुलाई की कट्ठे कित्ते ओर सेयो तलाईम शईरो दे गिणे ओर सेयो 200,000 पैदल चलणे वाल़े सिपाई ओर 10,000 यहूदा गोत्रो रे सिपाई थे। 5 तेबे शाऊले अमालेक शईरो गे जाई की एकी नाल़े दे घात लगाई की सिपाई बठयाल़े। 6 तेबे शाऊले केनी लोका खे चतौणी देई की बोलेया, "अमालेकिया बीचा ते बारे निकल़ी जाओ केथी एड़ा नि ओ कि आऊँ तिना साथे तुसा रा बी अन्त करी देऊँ, कऊँकि तुसे सबी इस्राएली लोका पाँदे, जेबे सेयो मिस्रो ते आए थे, दया कित्ती थी।" ओर केनी लोक अमालेकिया बिचा ते बारे निकल़ी गे। 7 इजी ते बाद शाऊले मिस्र देशो रे पूर्बा दे हवीला शईरो ते लई की शूर शईरो तक अमालेकी लोका पाँदे अमला कित्तेया ओर सेयो काईते। 8 ओर अमालेकिया रा राजा अगाग जिऊँदा पकड़ेया*15:8 राजा अगाग जिऊँदा पकड़ेया अगागो खे जिऊँदा पकड़ना सत्यानाशो रा सीदा उल्लंघन था। ओर तेसरी सारी प्रजा तलवारी साथे सत्यानाश करी ती। 9 पर राजा अगागो पाँदे ओर अच्छी-अच्छी पेडा-बाकरिया पाँदे, गाय-बल़द, मोटे डांगर, मिन्टू ओर जो कुछ अच्छा था, तिना पाँदे शाऊले ओर तेसरिये प्रजे दया कित्ती ओर सेयो नाश नि कित्ते, पर जो कुछ बेकार ओर नबाग था सेयो तिने नाश करीते।

शाऊलो रा राजे रे रूपो दे ना मानणा

10 तेबे यहोवे सेमुएलो खे बोलेया, 11 "आऊँ शाऊलो खे राजा बणाई की पछताणे लगी रा, कऊँकि तिने मां पीछे चलणा छाडीता रा ओर मेरी आज्ञा रा पाल़न नि कित्तेया।" तेबे सेमुएलो रा रोष पड़केया ओर से पूरी रात यहोवे री दुहाई देंदा रया। 12 दूजे दिने सेमुएल प्यागा उठेया ओर शाऊलो ते मिलणे खे गया। पर किनी माणूंए सेमुएलो गे ये दशेया कि शाऊल कर्मेल शईरो दे आया था ओर आपणिया तँईं एक नशाणी खड़ी कित्ती ओर कूमी की गिलगालो खे चली गा रा।

13 फेर सेमुएल शाऊलो गे गया ओर शाऊले तेसखे बोलेया, "ताखे यहोवे रिया तरफा ते आशीष मिलो, जो यहोवे माखे करने खे बोलेया था से सब मैं पूरा करी राखेया।"

14 सेमुएले ज्वाब दित्तेया, "तेबे पेडा-बाकरिया रा मैं-मैं करना ओर गायी-बल़दा रा रांबणा जो माखे सुणने लगी रा, ये कऊँ ऊणे लगी रा?"

15 शाऊले बोलेया, "सेयो तो अमालेकिया गे ते आई रिया, मतलब सिपाई अच्छी-अच्छी पेडा-बाकरिया ओर गाय-बल़द तेरे परमेशर यहोवे खे बलि करने खे जिऊँदे छाडी ते रे ओर बाकी सारे तो आसे सत्यानाश करीते रे।"

16 तेबे सेमुएले शाऊलो खे बोलेया, "चुप रओ! जो गल्ल यहोवे पिछलिया राती मांगे बोली राखी से आऊँ ताखे बताऊँआ।" तिने बोलेया, "बोलो।"

17 सेमुएले बोलेया, "जेबे तूँ आपणी नजरा दे छोटा था, तेबे इस्राएलो रे परमेशरे तूँ इस्राएलो रे सबी गोत्रा रा परदान बणाया। ओर यहोवे इस्राएलो पाँदे राज करने खे तेरा अभिषेक कित्तेया।" 18 यहोवे ताखे खास काम करने री आज्ञा दित्ती ओर बोलेया, "जाई की तिना पापी अमालेकी लोका रा सत्यानाश कर ओर जदुओ तक सेयो नाश नि जाओ, तदुओ तक तिना साथे लड़दा रओ। 19 तेबे तैं कऊँ यहोवे री गल्ल नि मानी, तैं लूटा रिया चीजा आपू गे राखी की से काम कऊँ कित्तेया जो यहोवे रिया नजरा दे बुरा ए?"

20 शाऊले सेमुएलो खे बोलेया, "बिना कोई शक मैं यहोवे री गल्ल मानी ओर जेती यहोवे बोलेया तेथी गया ओर अमालेकी लोका रा सत्यानाश करी अमालेकिया रे राजा अगागो खे पकड़ी की ल्याई राखेया ए। 21 पर मेरे सिपाई लूटा बीचा ते पेडा-बाकरिया ओर गाय-बल़द, मतलब सत्यानाश ऊणे वाल़िया चीजा बीचा ते सब खरिया चीजा गिलगालो दे तेरे परमेशर यहोवे खे बलि चढ़ाणे खे लई की आई रे।" 22 सेमुएले बोलेया,

"यहोवा होमबलि ओर मेलबलिया ते इतणा खुश नि ऊँदा,

जितणा कि से आपणी गल्ल मानणे वाल़ेया ते खुश ओआ।

सुण, गल्ल मानणा तो बलि चढ़ाणे ते,

ओर सुणना खाडूआ रिया चर्बिया ते खरा ए।

23 देख, बगावत करना ओर भविष्यबाणी करने वाल़े ते पूछणा एक ई जेड़े पाप ए,

ओर टीठ बणना मूर्ति ओर कअरो रे देवतेया री आराधना करने जेड़ा ए।"

तैं जो यहोवे री गल्ल बेकार जाणी, इजी री खातर तिने तूँ राजा ऊणे खे बेकार जाणी राखेया।

24 शाऊले सेमुएलो खे बोलेया, "आ, मैं पाप करी राखेया, मैं आपणी सेना रा डर मानी की ओर तिना री गल्ल सुणी की यहोवे री आज्ञा ओर तेरी गल्ल नि मानी। 25 पर एबे मेरे पाप माफ कर ओर मां साथे वापस आओ, ताकि आऊँ यहोवे गे माथा टेकूँ।"

26 पर सेमुएले शाऊलो खे बोलेया, "मां तां साथे वापस नि आऊणा, कऊँकि तैं यहोवे री गल्ल बेकार जाणी राखी ओर इजी बजा ते यहोवे तूँ इस्राएलो रा राजा ऊणे खे बेकार जाणी राखेया।" 27 जिंयाँ ई सेमुएल जाणे खे कूमेया, तिंयाँ ई शाऊले तेसरे चोगे रा कुणा पकड़ेया ओर से फटीगा।

28 तेबे सेमुएले तेसखे बोलेया, "जिंयाँ तैं मेरा चोगा फाड़ेया तिंयाँ ई आज यहोवे इस्राएलो रा राज्य फाड़ी की तांते लई ला ओर तेरे एक पड़ोसिये खे जो तांते अच्छा ए, देईता रा। 29 जो इस्राएलो रा प्रतापी परमेशर ए, से ना तो चूठ बोलदा ओर ना बदलदा ए, कऊँकि से माणूं नि ए जो आपणा मन बदलो।" 30 तेबे शाऊले बोलेया, "मैं पाप तो करी राखेया, तेबे बी मेरी प्रजा रे बुजुर्गा सामणे ओर इस्राएलो सामणे मेरा आदर कर ओर मां साथे वापस आओ, ताकि आऊँ तेरे परमेशर यहोवे री आराधना करुँ।" 31 तेबे सेमुएल वापस ऊई की शाऊलो पीछे गया ओर शाऊले यहोवे री आराधना कित्ती।

32 तेबे सेमुएले बोलेया, "अमालेकिया रे राजा अगागो खे मांगे लई की आओ।" तेबे आगाग एसा उम्मीदा साथे आया कि आऊँ तड़फाई की नि काया जाणा। 33 सेमुएले आगागो खे बोलेया, "जिंयाँ तैं आपणिया तलवारी ते बऊत माया रे माठे काये, तिंयाँ ई तेरी माये बी बिना ल्वादा ते ऊई ऊणी।" तेबे सेमुएले यहोवे रे सामणे गिलगालो दे राजा अगागो रे टुकड़े-टुकड़े करीते।

34 तेते ते बाद सेमुएल आपणे कअरो खे रामा खे चली गा ओर शाऊल आपणे शईर गिबा खे आपणे कअरे गया। 35 सेमुएल आपणी पूरी जिन्दगी फेर शाऊलो साथे नि मिलेया, कऊँकि सेमुएल शाऊलो रिया तँईं दु:ख करदा रया ओर यहोवा शाऊलो खे इस्राएलो रा राजा बणाई की पछताओ था।