Milagres de Jesus

Vindicarea a Orghilor sh-a Mutlui

27 Cãndu Isusul ma fudzea di aclo, doi orghi lu urma aurlãnda sh-dzãcãnda: "Njiluia-nã noi, Hiljiu al David!" 28 Cãndu Isusul agiumsi la casã, orghilji s-apruchearã sh-elu lã dzãsi a lor: "Pistipsits voi cã mini pot s-u fac aestã?" Elji apãndisirã: "Ie, Doamne." 29 Atumtsea elu bãgã mãna la ocljilji a lor, dzãcãnda: "Si s-facã dupã pistea a voastrã." 30 Deapoea a lor lã si discljisirã ocljilji. Sh-Isusul lã ordinã dzãcãnda: "Videts s-nu shtibã vãrã om." 31 Ma elji macãt ishirã u arãspãndirã anamea a lui tu tut loclu.

Doi Orghi di Ierico

29 Cãndu elji ma ishea di Ierico, un multsãmi mari ma njidzea dupã Isusul. 30 Sh-ia, doi orghi eara apunats ningã cali. Cãndu avdzãrã cã ma tritsea Isusul, apãrnjirã s-aurlã: "Njiluia-nã noi, Doamne, Hiljiu al David!" 31 Multsãmea lji vãrghea tra s-pãpsea, ma elji aurla ma multu: "Njiluia-nã noi, Doamne, Hiljiu al David!" 32 Atumtsea Isusul chindrui lji acljimã sh-lã ntribã: "Tsi vrets s-fac trã voi?" 33 Elji dzãsirã: "Doamne, s-nã si discljidã ocljilji." 34 Sh-Isusul aspusi njilã trã nãshi, bãgã mãna pri ocljilji a lor, sh-tu atsea oarã a lor lã vini videarea a ocljilor sh-elji lu urmarã.

Vindicarea a Orbului dit Betsaida

22 Deapoea agiumsi tu Betsaida sh-lji adusirã un orbu sh-lji si rugarã s-bagã mãna. 23 Atumtsea lo di mãnã orbul, lu scoasi nafoarã dit hoarã, shi dupã tsi lji-scuche tu oclji shi bãgã mãnjili pri nãsu, lu-ntribã macã videa tsiva. 24 Sh-elu, discljisi ocljilji sh-dzãsi: "Ma ved oaminji ca ponji tsi imnã." 25 Sh-Isusul lã bãgã mãnjili napoi pristi ocljilji a lui sh-lji dzãsi s-veadã cãtrã nsus, shi atsilui lji si turnã videarea sh-videa ghini itsido. 26 Sh-Isusul lu-pitricu s-ducã la-casa a lui dzãcãnda: "Nu intrã tu hoarã sh-nu lji aspunã a vãrui tsiva."

Vindicarea a unui Surd-Mut di Decapolis

31 Dupã tsi s-nchisi nãpoi dit locurili a Tirlui shi s-dusi cãtrã Sidon, Isusul agiumsi la amarea a Galileiljei, namisa di loclu di Decapolis. 32 Sh-lji adusirã un mut tsi cu zori grea, shi lji si rugarã s-bagã mãnjili pri nãsu s-lu vindica.

33 Cum lu lo, diparti dit multsãmea, lj-bãgã dzeaditli tu urecljili a lui, shi dupã tsi scuche dzeaditlu, lj-acãtsã limba. 34 Deapoea sculã ocljilji cãtrã tser, suschirã shi-lj dzãsi: "Effatha", tsi va s-dzãcã: "Discljidi-ti!" 35 Shi trãoarã s-discljisirã urecljili shi s-dizligã gura sh-elu grãi cum prindi.

36 Sh-Isusul lã-ursi atselji tsi s-nu lji aspunea a vãrui. Ma cu cãt ma multu lã ursea ahtãt ma multu elji lu scurpisea zborlu. 37 Sh-multu ciudisits, dzãtsea: "Elu itsido lu ari faptã ghini, tsi surdzãlji s-avdã sh-mutsilji s-greascã!"

Orbul al Ierico

46 Ashãtsi agiumsirã tu Ierico. Cãndu elu ma isha di Ierico cu ucenitsilji a lui sh-cu unã multsãmi mari, hiljilu al Timaeu, Bartimeul orbu, eara apunat mardzina di cali sh-cãfta. 47 Cãndu elu avdzã cã atsel tsi ma tritsea eara Isusul Nazareas, apãrnji s-aurlã shi s-dzãcã: "Isuse, Hiljilu al David, njiluia-mi!" 48 Multsã lji-aurla s-pãpsea, ma elu aurla sh-ma multã: "Hiljlu al David, njiluia-mi!" 49 Sh-Isusul dãnãsi sh-ordinã tra s-lu acljeamã. Elji lu acljimarã orbul, dzãcãnda: "Curaiu, scoalã-ti, elu ma ti acljeami!" 50 Atumtsea elu lu-arcã nclo mantolu a lui, si-sculã sh-vini la Isus. 51 Sh-Isusul lji-dzãsi: "Tsi vrei s-tsã fac mini!" Orbul lji-dzãsi: "Rabboni, s-nji-si toarnã videarea!" 52 Sh-Isusul lji-dzãsi: "Imnã, pistea a ta ti vindicã!" Sh-trãoarã atsilui lji si-turnã videarea shi s-nchisi pri cali dupã Isusul.

Un Orbu Dicunjar Amintã Videarea

35 Iarã Isusul ma s-apruchea di Ierico, sh-un orbu shidea ningã cali cu mãna teas. 36 Cãndu avdzã cã ma tritsea unã multsãmi, ntribã cã tsi eara. 37 Elji lj-apãndisirã cã ma treatsi Isus Nazareanlu. 38 Atumtsea orbul aurlã dzãcãnda: "Isus, Hiljilu al David, s-ai njilã ti mini!" 39 Atselji tsi imna nãinti lu vãrghirã s-tãtsea, ma elu aurlã sh-ma multu: "Hiljilu al David, s-ai njilã ti mini!" 40 Atumtsea Isusul dãnãsi sh-ursi s-lj-adutsea orbulu. Cãndu elu s-apruche, Isusul lu ntribã: 41 "Tsi vrei s-fac ti tini?" Sh-elu apãndisi: "Doamne, s-ved nãpoi!" 42 Sh-Isusul lj-dzãsi: "Vedz nãpoi! Pistea a ta ti vindicã." 43 Tu atsea oarã lji si turnã videarea nãpoi sh-urmãnda Isusul multumãrea Dumnidzãlu, sh-tut populu, cãndu vidzu aestã, alãvda Dumnidzãlu.

Isusul Vindicã un Om Amintat Orbu

1 Cãndu Isusul ma tritsea, elu vidzu un om tsi eara orbu di cãndu eara amintat. 2 Ucenitsilji a lui lu ntribarã: "Rabbi, cai ari amãrtisit, aestu icã pãrintsãlji a lui, tsi elu s-ari amintat orbu?" 3 Isusul apãndisi: "Nitsi aestu nu ari amãrtisit, nitsi pãrintsãlji a lui, ma aestã s-featsi tsi la elu si aspunã faptili a Dumnidzãlui. 4 Noi prindi s-fãtsem faptili atsilui tsi mi ari pitricut pãnã cãndu easti dzuã. Noaptea ma yini, sh-vãrã nu poati s-lucreadzã. 5 Pãnã cãndu mini escu tu lumi, escu lunjina trã lumea." 6 Dupã tsi li avea dzãsã aesti, scuche mpadi sh-featsi muzgã sh-deapoea aumsi ocljilji a orbului cu muzgã. 7 Deapoea lji dzãsi: "Du-ti, aspeal-ti la ascãldãtoarea al Shiloam" (tsi va s-dzãc "Pitricut"). Elu s-dusi, s-aspilã shi s-turnã vidzãnda.

2 Sh-ia, un lepros vini sh-si ncljinã, dzãcãnda: "Doamne, ma s-vrei tini pots s-mi curi." 3 Sh-Isusul teasi mãna, deadi di nãsu sh-lji-dzãsi: "Ie, mini voi, curã-ti!" Sh-tu atsea oarã s-vindicã di lepra a lui. 4 Atumtsea Isusul lji dzãsi: "Vedzi, s-nu lj-spunji a vãrui, ma duti nãintea a preftului, sh-dã doara tsi ari ursitã Moisiul tsi aestã s-hibã mãrtirii trã caitsido."

2 Sh-ia, lji adusirã un om paralizat tu pat, sh-Isusul cãndu vidzu pistea tsi avea elji, lji dzãsi a paralizatlui: "S-ai curaiu, hilje, amãrtiili a tali suntu ljirtati!" 3 Atumtsea niscantsã scribi dzãsirã cu mintea a lor: "Aestu ma blastimã!" 4 Ma Isusul cunuscãnda minduirili a lor lã dzãsi: "Cãtse minduits lucri arali tu ininjli a voastri? 5 Tsi easti ma lishor trã dzãtseari: ‘Amãrtiili a tali suntu ljirtati,’ icã: ‘Scoalã-ti sh-imnã’? 6 Ma tora tra si shtits cã Hiljiu a Omlui ari puteari pri loc s-ljeartã amãrtiili," lji dzãsi a paralizatlui: "Scoalã-ti, ljea patlu sh-duti la casã a ta." 7 Sh-elu si sculã shi s-dusi la casã a lui.

10 sh-ia, aclo eara un bãrbat a cui s-eara uscatã mãna. Elji lu ntribarã Isusul, cu nãeti tsi s-lu acuza ma napoi: "Easti volje tsi tsiniva s-vindicã dzua di sãmbãtã?" 11 Sh-elu lã dzãsi a lor: "Easti vãrã di voi tsi ari unã oai, shi aestã lji cadi tu groapã dzua di Sãmbãtã, sh-elu nu va u-acatsã shi s-u-scoatã afoarã? 12 Ia ashã, cãt ma multu custeadzi omlu di oaia! Trã atsea, easti volje s-fatsã ghini Sãmbãta" 13 Atumtsea elu lji dzãsi a Omlui: "Tindi mãna a ta!" Elu u-timsi sh-mãna a lui s-featsi sãnãtoasã ca alanta.

30 Soacra al Simon eara bãgatã cu hevri, sh-trãoarã elji lji-aspusirã ti nãsã. 31 Atumtsea elu s-apruche, u-acãtsã di mãnã sh-u sculã. Trãoarã hevrili u-alãsarã shi ea ahurhi s-lã huzmitipseascã.

40 Sh-vini la elu un lepros, tsi rugãnda lj-cãdzu pri dzinuclji sh-lji dzãsi: "Ma s-vrei tini, pots s-mi curi." 41 Sh-Isusul simtsãnda njilã, timsi mãna pri nãsu sh-lji dzãsi: "Ie, voi, s-hii curat!" 42 Macãt dzãsi aesti, trãoarã lepra u-alãsã shi s-vindicã.

3 Atumtsea vinirã niscãntsã, tsi adusirã un om paralizat tsi lu-purta patru ishi. 4 Ma niputãnda s-apruchea di itia a multsãmiljei, dizvãlirã plocili a citiiljei iu eara Isusul, sh-dupã tsi disfeatsirã unã guvã lu-dipusirã patlu pi cai stãtea paralizatlu. 5 Isusul vidzãnda pistea a lor lji-dzãsi a paralizatlui: "Hilje, amãrtiili a tali tsã suntu ljirtati!" 6 Ma atsia shidea niscãntsã scribi tsi tu ininjli a lor minduea: 7 "Cãtse vahi aestu ma blastimã? Cai poati s-ljeartã amãrtiili, dicãt mash unlu, Dumnidzãlu?" 8 Ma Isusul tsi trãoarã aduchi tu suflitlu a lui cã elji ma minduea aesti lucri cu mintea-a lor, lã dzãsi: "Cãtse li minduits aesti lucri tu ininjli a voastri? 9 Tsi easti ma lishor s-lji dzãts a paralizatlui: ‘Amãrtiili a tali tsã-suntu ljirtati’, ama s-lji dzãts: ‘Scoalã-ti, ljea patlu a tãu sh-imnã!’? 10 Ma tra si-shtits cã Hiljiu-a Omlui ari puteari s-ljeartã amãrtiili pri loc, 11 mini ma lj-dzãc: ‘Scoalã-ti, ljea patlu sh-imnã la casa a ta!’" 12 Sh-elu si sculã trãoarã, lo patlu a lui, sh-ishi afoarã dininti a tutulor, sh-ashã tuts s-ciudisirã sh-alãvdarã Dumnidzãlu dzãcãnda: "Unã ahtari thavmã nu u-avem vidzut pute!"

Omlu cu Mãna Uscatã

1 Deapoea elu intrã tu sinagogã, sh-aclo eara un om cu mãna uscatã. 2 Niscãntsã lu vigljea Isusul macã va vindica dzua di Sãmbãtã, sh-deapoea s-lu vãrghea. 3 Elu lji-dzãsi a omlui cu mãna uscatã: "Scoalã-ti namisa a tutulor!" 4 Deapoea lã dzãsi a lor: "Tsi easti ndreptu dzua di Sãmbãtã, s-fats ghini icã s-fats arãu, s-ascachi un suflit icã su-vatsãnji?" Ma elji tãtsea. 5 Atumtsea elu, cum vidzu anvãrliga cu inati, shi nvirinat cã ininjli a lor eara nchitriti, lji dzãsi a omlui: "Tindi mãna!" Elu u teasi sh-mãna a lui s-featsi ca alanta sãnãtoasã.

Isusul Vindicã Leprosul

12 Iarã Isusul eara tu un di atseli cãsãbadz, vini un om umplut cu leprã. Cãndu lu vidzu Isusul, elu cãdzu pri dintsi sh-lji si rugã dzãcãnda: "Doamne, ma s-vrei tini, pots s-mi curi." 13 Atumtsea Isusul timsi mãna sh-lu pusputi dzãcãnda: "Ie, voi, curã-ti." Shi trãoarã lepra lu-alãsã.

18 Sh-ia, niscãntsã oaminji ma adutsea pri un pat un om paralizat sh-cãfta s-lu dutsea nãuntru shi s-lu bãga nãintea al Isus. 19 Ma, niaflãnda pri iu s-intra nãuntru trã itia a multsãmiljei, s-alinarã pri citia a casãljei shi lu dipunarã di citii cu tut patul namisa di oaminji nãintea al Isus. 20 Vidzãnda pistea a lor, elu lji dzãsi a paralizatlui: "Om, amãrtiili a tali tsã suntu ljirtati." 21 Atumtsea scriblji sh-Fariseilji apãrnjirã s-mindueascã: "Cai easti aestu tsi dzãtsi blãsteami? Cai poati s-li ljeartã amãrtiili, dicãt mash un, Dumnidzãlu?" 22 Ma Isusul, cunuscãnda minduirili a lor, lo zborlu sh-ntribã: "Tsi minduits tu ininjli a voastri? 23 Tsi easti ma lishor s-dzãts: ‘Amãrtiili a voastri suntu ljirtati,’ icã s-dzãts: ‘Scoalã-ti sh-imnã’? 24 Ghini-ma, mini voi si shtits cã Hiljilu a Omlui ari autoritati pri loc s-ljeartã amãrtiili." Ashã elu lj-dzãsi a paralizatlui: "Mini ts-dzãc, scoalã-ti, ljea patlu a tãu sh-duti la casa a ta!" 25 Sh-trãoarã atsel om si sculã nãintea a lor, lo patlu iu eara ashtirnat shi s-dusi la casa a lui, alãvdãnda Dumnidzãlu.

6 Una altã Sãmbãtã Isusul intrã tu sinagogã sh-ma nvitsa. Aclo eara un om tsi avea mãna atsea ndreapta uscatã. 7 Scriblji sh-Fariseilji ma lu vigljea, macã elu va lu vindica Sãmbãta, tsi deapoea s-lu vãrghea. 8 Ma elu li cunushtea minduirili a lor shi lji dzãsi a omlui cu mãna uscatã: "Scoalã-ti shi shedz aoa tu mesi." Sh-elu si sculã pri cicioari shi stãtu aclo. 9 Deapoea Isusul lã dzãsi a lor: "Mini ma vã ntreb: Easti volje tu dzua di Sãmbãtã, s-fatsi ghini icã s-fatsi arãu, s-ascachi un om icã s-lu cheri?" 10 Sh-cum lj-mutri tuts di anvãrliga, lj-dzãsi a omlui: "Tindi mãna a ta!" Elu u teasi mãna sh-mãna a lui s-featsi sãnãtoasã.

Pistea a Tsenturionlu

1 Dupã tsi bitisi trã dzãtseari tuti aesti zboari trã populu cai lu asculta, Isusul intrã tu Capernaum. 2 Aclo un tsenturion avea un huzmichear tsi lu axiusea multu, eara niputut sh-greu trã moarti. 3 Tsenturionlu, cãndu avdzã trã Isusul, lj-pitricu niscãntsã di aushlji a Iudeilor si lj-ruga s-yinea s-vindica huzmichearlu a lui. 4 Cum agiumsirã la Isusul, elji lji si rugarã multu dzãcãnda: "Elu easti axiu tsi tini s-lji fats aestã ghineatsã, 5 cã elu lu va populu a nostru sh-elu u adrã sinagoga ti noi." 6 Atumtsea Isusul s-dusi cu nãshi. Cãndu nu eara multu diparti di casã, tsenturionlu pitricu niscãntsã oaspits s-lji dzãtsea: "Doamne, nu ti cãrtea cã mini nu escu axiu tsi tini s-intsrã tu citia a mea. 7 Tr-atsea nu mi lugursii ti axiu s-yin la tini. Ma tini dzã mash un zbor sh-huzmichearlu a meu va s-vindicã. 8 Cã sh-mini escu un om sum cumanda altui sh-am sum mini suldats. Cãndu lj-dzãc a unui: ‘Duti,’ elu s-dutsi, sh-cãndu lj-dzãc a altui: ‘Haidi,’ elu yini. Cãndu lj-dzãc a huzmichearlui a meu: ‘Fã aestã,’ elu u-fatsi." 9 Cãndu Isusul li avdzã aesti zboari, s-thãvmãtisi cu nãsu, s-turnã cãtrã multsãmea tsi lu urma sh-dzãsi: "Mini ma vã dzãc cã nitsi tu Israel nu am aflatã ahãntã mari pisti." 10 Sh-cãndu pitricutslji s-turnarã la casã, aflarã vindicatã huzmichearlu tsi eara niputut.

11 Shi ia, aclo eara unã muljeari, tsi di optusprãdzatsi di anji eara putut di un duh, sh-ea eara cãmburã sh-nu putea cu tsiva s-ndripta truplu. 12 Isusul u vidzu, u acljima ningã nãsu sh-lji dzãsi: "Muljeari eshti vindicatã di lãngoarea a ta." 13 Apoea bãgã mãnjili pristi nãsã, sh-ea trãoarã si ndriptã sh-alãvdã Dumnidzãlu.

Isusul la Casa a Fariseului

1 Unã Sãmbãtã, cãndu Isusul s-dusi la casa a unui di mãrlji a Fariseilor tra s-mãcã, elji ma lu vigljea. 2 Aclo nãintea al Isus eara un om lãndzit cu idropizii. 3 Isusul lji ntribã nvitsãtorlji a legiljei sh-Fariseilji: "Easti volje trã vindicari dzua di Sãmbãtã?" 4 Ma elji tãcurã. Atumtsea Isusul lo di mãnã nipututlu, lu vindicã sh-lu alãsã s-fugã.

Isusul Vindicã Dzatsi Leproshi

11 Cãndu ma njidzea cãtrã Ierusalem, Isusul tricu namisa di Samaria sh-di Galilea. 12 Cãndu ma intra tu unã hoarã, lj-ishirã nãinti dzatsi leproshi. Elji stãturã diparti. 13 Anãltsãndã boatsea dzãsirã: "Isuse, Nvitsãtore, s-ai njilã trã noi!" 14 Elu lji vidzu sh-lã dzãsi: "Dutsets-vã sh-aspunets-vã la preftsãlji." Sh-undzi tsi cãndu ma njidzea, s-curarã. 15 Deapoea un di atselji, anda vidzu cã s-vindicã, s-turnã sh-alãvda Dumnidzãlu cu boatsi analtã. 16 Elu cãdzu pri dintsi la cicioarili al Isus sh-lu hãristisea. Elu eara Samaritan. 17 Isusul atumtsea lu ntribã: "Nu s-vindicarã di dzatsilji? Iu suntu atselji noaulji? 18 Nu s-aflã nitsiunu di nãshi tsi si s-turna shi s-lji dãdea alãvdari a Dumnidzãlui, dicãt mash aestu xenlu?" 19 Deapoea lj-dzãsi a lui: "Scoalã-ti sh-imnã! Pistea a ta ti vindicã."

Vindicarea la Hãmami

1 Dupã aestã eara unã sãrbãtoari a Iudeilor sh-Isusul s-alinã tu Ierusalem 2 Tu Ierusalem, ningã Poarta a oilor, easti unã hãmami tsi pi uvreieshti s-acljeami Betesda, sh-ari tsintsi purtitsi. 3 Tu aesti s-afla unã multsãmi mari di lãndzits; orghi, shcljiochi sh-paralizatsi,* Cã un anghil, cãtã vãrãoarã dipuna tu hãmami sh-mintea apa, sh-protlu tsi intra, dupã tsi apa eara mintit, s-vindica di tuti lãngoarili. 5 Aclo eara un om niputut di treidzãtsioptu di anji. 6 Isusul, vidzãnda atsel ashtirnut shi shtinda cã di multu chiro eara lãndzit, lji-dzãsi: "Vrei s-ti fats sãnãtos?" 7 Lãndzitlu lj-apãndisi: "Doamne, mini nu am om tsi cãndu s-minteashti apa, s-mi bagã tu hãmami. Sh-pãnã mi duc mini, un altã dipuni nãinti di mini." 8 Isusul lji dzãsi: "Scoalã-ti, ljea patlu a tãu sh-imnã!" 9 Omlu s-vindicã tu oara atsea, lo patlu a lui sh-imnã. (Atsea dzuã eara Sãmbãtã.)

46 Ashãtsi Isusul vini napoi tu Cana a Galileiljei, iu u-avea turnatã apa tu yin. Sh-aclo eara un administrator a amirãlui, sh-hiljilu a lui eara lãndzit tu Capernaum. 47 Aestu, cãndu avdzã cã Isusul avea vinit dit Iudea tu Galilea s-dusi la nãsu sh-lji-si rugã tsi s-dipuna shi s-vindica hiljilu a lui, cã eara ningã moarti. 48 Atumtsea Isusul lji-dzãsi: "Ma s-nu videts seamni sh-thavmati, voi nu va pistipsits." 49 Administratorlu a amirãlui lji-dzãsi: "Doamne, dipunã ma nãinti tsi s-moarã ficiorlu!" 50 Isusul lji-dzãsi: "Du-ti, hiljilu a tãu bãneadzã!" Sh-omlu lji pistipsi a zborlui tsi lji-dzãsi Isusul shi s-dusi. 51 Cãndu elu ma dipuna, lj-ishirã nãinti huzmichearlji a lui shi lji dzãsirã: "Hiljilu a tãu bãneadzã!" 52 Sh-elu lji ntribã tu tsi oarã s-featsi ma ghini. Sh-elji lji-dzãsirã: "Aieri pi unã dupã prãndzu u alãsarã hevrili." 53 Atumtsea tatãl aduchi cã eara tu atsea oarã tsi Isusul lji-avea dzãsã: "Hiljilu a tãu bãneadzã." Sh-pistipsi elu sh-tutã casa a lui. 54 Isusul featsi sh-aestã a doaua thavmã, cãndu vini dit Iudea tu Galilea.

20 Sh-ia, unã muljeari tsi di doisprãdzatsi di anji lj-cura sãndzili, lji s-apruche di nãpoi sh-bãgã mãna tu mardzina a stranjilui a lui. 21 Cã dzãtsea cu mintea a ljei: "Ma s-bagã mãna la stranjiu a lui, va mi vindicã." 22 Isusul s-turnã, lu vidzu sh-lji dzãsi: "S-ai curaiu hiljea a mea, pistea a ta ti vindicã." Shi tu ora atsea muljearea s-vindicã.

25 Namisa di nãshi eara unã muljeari tsi lj-cura sãndzili di doisprãdzatsi di anji. 26 Sh-avea traptã multi di partea a doctorlor sh-avea chirutã tutã avearea a ljei ni fãrã di ufelii, sh-ma s-fãtsea ma arãu. 27 Cãndu avdzã si zbura di Isusul, intrã la multsãmea sh-di pri dupã plãtãri timsi mãna la stranjilu al Isus. 28 Ea dzãtsea: "Macã va bagã mãna la stranjili a lui, va mi vindicã." 29 Sh-trãoarã curarea a sãndzilui pãpsi shi ea sãmtsã tu truplu a ljei cã s-vindicã di atsea lãngoari.

43 Unã muljeari tsi di doisprãdzatsi di anji lj-cura sãndzi, avea hãrgiuitã cu doctorlji tutã avearea a ljei, ni putut s-vindicã. 44 Ea lji s-apruche di dinãpoi sh-bãgã mãna tu mardzina a stranjilui a lui sh-trãoarã dãnãsi curarea a sãndzilui. 45 Atumtsea Isusul ntribã: "Cai deadi di mini?" Dupã tsi tuts lu alipidarã, Petrul lj-dzãsi: "Nvitsãtore, multsãnjili ma s-pingã sh-ti anvãrligheadzã." 46 Ma Isusul dzãsi: "Tsiniva deadi di mini sh-aduchii cã unã puteari ishi di la mini." 47 Atumtsea muljearea, vidzãnda cã nu putea s-ascundea, vini cu trimurari sh-cãdzu la cicioarili a lui. Ea dzãsi nãintea a tut popului, trã tse deadi di nãsu sh-cum eara vindicat trãoarã. 48 Sh-Isusul lji dzãsi: "Hilje, pistea a ta ti vindicã. Duti tu pace!"

Isusul Vindicã unã Muljeari sh-Nyeadzi unã Featã

18 Cãndu Isusul lj-dzãtsea aestã, s-apruche un di mãrlji a sinagogãljei, cãdzu pri dintsã nãintea a lui sh-lji-dzãsi: "Macãt nj-muri hiljea, haidi sh-bagã mãna pri nãsã sh-ea va bãneadzã." 19 Isusul si sculã shi s-dusi dupã nãsu deadun cu ucenitsilji a lui.

23 Cãndu Isusul agiumsi la casa a marlui a sinagogãljei sh-vidzu fluerãtorlji sh-multsãmea tulburatã, 24 lã-dzãsi a-lor: "Dipãrtats-vã cã feata nu ari murit, ma doarmi." Sh-elji arãsir cu nãsu. 25 Deapoea, cãndu multsãmea u-scoasirã nafoarã, elu intrã, u-acãtsã di mãnã sh-ea si sculã.

22 Deapoea vini un di ma mãrlji a sinagogãljei, cu numa Iair, tsi cãndu lu vidzu, lj-cãdzu la cicioari. 23 Sh-multu lji-si ruga dzãcãnda: "Hiljea a mea ma moari, haidi shi bagã mãnjili pri nãsã, tra s-vindicã shi s-bãneadzã." 24 Sh-elu s-dusi cu nãsu, sh-unã multsãmi mari njidzea dupã nãsu shi s-pindzea anvãrliga di nãsu.

38 Shi dupã cum agiumsi la casa a primarlui a sinagogãljei, vidzu unã mintiturã mari shi oaminji tsi plãndzea shi vãita cu boatsi. 39 Intrã sh-lã dzãsi a lor: "Cãtse aurlats shi plãndzets? Feata nu muri, ma doarmi." 40 Elji s-pizuirã, ma elu dupã tsi lji scoasi tuts nafoarã, lo cu nãsu tat-su shi mã-sa ali feati sh-atselji tsi eara cu nãsã, sh-intrã aclo iu eara feata. 41 Elu u lo feata di mãnã sh-lji dzãsi: "Talitha cumi", tsi va s-dzãcã: "Featã, a tsãia ma tsã-dzãc: Scoalã-ti!" 42 Trãoarã feata si sculã sh-imnã singur. Ea eara di doisprãdzatsi di anji. Sh-elji s-ciudisirã multu.

31 Atumtsea Isusul dzãsi: "Cu tsi s-lji undzescu, oaminjlji a aishtei gheneratsi? Sh-a cui lj-undzescu? 32 Lji undzescu a cilimenjilor tsi sta pri pãdzi sh-aurlã a sotsilor dzãcãnda:

‘Noi avem bãtutã flueara ti voi

sh-voi nu avets giucat.

Noi avem vãitat di voi,

sh-voi nu avets plãmsit.’

33 Vini Ioan Pãtidzãtorlu, tsi nu mãca pãni sh-nitsi nu bea yin sh-voi dzãtsets: ‘Elu ari un demon.’ 34 Vini Hiljilu a Omlui tsi mãca sh-bea, sh-voi dzãtsets: ‘Ia, mãcãtorlu sh-biutorlu, oaspilu a taxidarilor shi a amãrtioshilor.’ 35 Ma a mintimeniljei al Dumnidzã lji da ndriptati tuts hiljilji a ljei."

Muljearea Amãrtioasã Aumsi Isusul

36 Un di Fariseilji acljimã Isusul s-mãca deadun cu nãsu. Elu intrã tu casa a Fariseului shi s-apunã la measã. 37 Sh-ia, unã muljeari di atsel cãsãbã, tsi eara unã amãrtioasã, cãndu lo di hãbari cã Isusul eara la measa a un Fariseu, adusi unã vasã di alabastru mplin cu untulem cu bunã njurizmã.

41 Atumtsea vini un om cu numa Iair, tsi eara ma mari a sinagogãljei. Elu lji cãdzu la cicioari a Isusului sh-lji featsi rigeai s-njidzea la casa a lui. 42 Elu avea mash unã featã di vãrã doisprãdzatsi di anji, tsi eara trã moarti. Cãndu Isusul ma njidzea aclo, multsãmea ma s-pindzea anvãrliga di nãsu.

49 Iarã Isusul ninga zbura, vini un di la casa al Iair, marli a sinagogãljei sh-lji dzãsi: "Hiljea a ta muri. Nu lu cãrtea ma Nvitsãtorlu." 50 Ma Isusul, dupã tsi avdzã aesti, lj-dzãsi: "Nu ti aspari! Tini mash pistipsea sh-ea va s-ascapã." 51 Cãndu agiumsi la casã, nu alãsã vãrã s-intrã, dicãt mash Petrul, Ioanul, Iacovul, tat-su sh-muma a featiljei. 52 Tuts plãndzea sh-vãita. Ma elu dzãsi: "Nu plãndzets! Ea nu ari moartã, ma doarmi." 53 Ma elji arãdea, shtinda cã avea muritã. 54 Atumtsea Isusul u acãtsã di mãnã sh-lji gri: "Featã, scoalã-ti!" 55 A ljei lji si turnã suflitlu sh-trãoarã si sculã. Apoea Isusul ursi s-lji da di mãcari. 56 Sh-pãrintsãlji a ljei armasirã ciudisits. Iarã Isusul lã dimãndã si nu lj-dzãtsea a vãrui cã tsi avea undzitã.

Nyearea al Lazar

1 Vãrãoarã eara un lãndzit, Lazarul di Betania, di hoara ali Marii sh-ali Marti, sora a ljei. 2 Maria eara atsea tsi aumsi cu njir Domnul shi lji-ashtearsi cicioarili a lui cu perlji a ljei di cap, iarã fratili a ljei, Lazaru eara lãndzit. 3 Trã atsea surãrili lji pitricurã zbor al Isus dzãcãnda: "Doamne, ia, atsel tsi tini lu vrei, easti niputut." 4 Sh-Isusul, cum avdzã aesti, dzãsi: "Atsea lãngoari nu easti ti moarti, ma ti mãrirea a Dumnidzãlui, tsi prit ea s-multumãreascã Hiljilu a Dumnidzãlui." 5 Isusul u vrea Marta, sora a ljei Maria sh-Lazarul. 6 Cãndu avdzã cã Lazarul eara lãndzit, armasi ninga doauã dzãli tu loclu iu eara. 7 Deapoea, dupã aestã, lã dzãsi a ucenitsilor: "S-nã turnãm napoi tu Iudea." 8 Ucenitsilji lji-dzãsirã: "Rabbi, deaneavra ti cãfta Iudeilji s-ti vãtãma cu chetri sh-tini ma ti duts nãpoi aclo?" 9 Isusul apãndisi: "Nu suntu vahi doisprãdzatsi orili a dzuãljei? Macã vãrã imnã dzua, nu s-ncheadicã, cã veadi prit lunjina aishtei lumi. 10 Ma macã vãrã imnã noaptea, s-ncheadicã, cã lunjina nu easti tu nãsu." 11 Dupã tsi li dzãsi aesti zboari, adãvgã: "Oaspili a nostru, Lazaru lu ari acãtsat somnu, ma mini ma mi duc s-lu dishteptu." 12 Atumtsea ucenitsilji a lui lji dzãsirã: "Doamne, ma s-doarmã, va s-vindicã." 13 Ma Isusul lã-avea zburãtã trã moartea a lui, iarã elji minduirã cã Isusul avea zburãtã trã durnjirea. 14 Atumtsea Isusul lã dzãsi a lor discljis: "Lazarul muri.

Isusul Muljeadzi Furtuna

23 Dupã tsi elu s-alinã tu varcã, ucenitsilji a lui lu-urmarã. 24 Sh-ia, tu amari si sculã unã furtunã mari, sh-vãljurili ma anvãlea varca, ma Isusul durnjea. 25 S-apruchearã la nãsu ucenitsilji a lui, lu dishtiptarã shi lji dzãsirã: "Doamne, ascapã-nã, cã noi ma nã nicãm." 26 Isusul lã dzãsi a lor: "Cãtse avets fricã, voi oaminj cu pisti-putsãnã?" Cum si sculã, aurlã a vimturilor sh-a amariljei shi s-featsi tãtseari mari. 27 Atumtsea oaminjlji s-thãvmãtisirã sh-dzãsirã: "Cai easti aestu, tsi ma lu ascultã vimturili shi amarea?"

15 Deapoea cãtrã seara ucenitsilji a lui s-apruchearã di nãsu sh-lji dzãsirã: "Aestu loc easti ermu sh-oara tricu. Alasã multsãmea s-ducã prit hoari shi s-acumpãrã trã mãcari." 16 Isusul lã dzãsi a lor: "Nu easti ananghi s-ducã. Dats-lã voi s-mãcã!" 17 Sh-elji lji dzãsirã: "Noi aoa nu avem altã tsiva dicãt tsintsi pãnji sh-doi peshti." 18 Sh-elu lã dzãsi: "Adutsets-li aoa la mini." 19 Atumtsea lã ordinã multsãnjili s-sheadã mpadi pri iarbã. Deapoea lo tsintsi pãnjili sh-doi peshtili sh-dupã tsi sculã ocljilji cãtrã tser, li ghinicuvãntã, li frãmsi pãnjili sh-li deadi a ucenitsilor, sh-ucenitsilji a multsãnjilor. 20 Sh-tuts mãcarã shi s-fãnãtirã. Deapoea ucenitsilji adunarã bucãtsili tsi armasirã sh-umplurã doisprãdzatsi di coshuri mplini. 21 Sh-atselji tsi mãcarã eara anvãrliga di tsintsi njilji di bãrbats, ni misurat muljerili sh-cilimenjlji.

25 Cãtrã apiritã, Isusul s-dusi aproapi di nãshi, imnãnda pri amari.

32 Sh-Isusul lj-acljimã ucenitsilji a lui ningã nãsu sh-lã dzãsi: "Mini am njilã di multsãmea, cã s-featsirã trei dzãli tsi sta cu mini shi nu ari tsiva ti mãcari. Nu voi s-lji nchisescu aĝiunji, s-nu lishineadzã n-cali." 33 Sh-ucenitsilji a lui lji dzãsirã: "Ma iu va s-aflã tu aestu loc ermu ahãnti pãnji tra s-fãnãteascã unã multsãmi ahãntã mari?" 34 Sh-Isusul lã dzãsi a lor: "Cãti pãnji avets?" Elji dzãsirã: "Shapti shi ndoi peshti njitsi." 35 Atumtsea elu ordinã multsãnjili s-sheadã mpadi. 36 Deapoea lo atseali shapti pãnji sh-peshtilji, shi hãristisi Dumnidzãlu, li pãrtsã, sh-li deadi a ucenitsilor a lui sh-elji a multsãmiljei. 37 Sh-tuts mãcarã shi s-fãnãtirã, sh-cu bucãtsili tsi armasirã umplurã shapti coshuri mplini. 38 Sh-atselji tsi mãcarã eara patru njilji di bãrbats, ni misurat muljerili sh-cilimenjlji.

Plãtirea a Taxiljei

24 Cãndu agiumsirã tu Capernaum, taxidarlji di doauã dhrahmadzi a templui lji s-apruchearã a Petrului, sh-lji dzãsirã: "Nvitsãtorlu a vostru nu u plãteashti taxa a templui?" 25 Sh-elu dzãsi: "Ie!" Sh-cãndu intrã n-casã, Isusul lu ashtiptã protlu sh-lji dzãsi: "Cum mindueshti tini Simon? Di la cai ljea taxili icã hãracili amirãrilji a loclui? Di la hiljilji a lor icã di la xenjilji?" 26 Petrul lji dzãsi: "Di la xenjilji." Isusul dzãsi: "Hiljilji atumtsea nu prindi s-plãtescu. 27 Cu tut atsea tsi s-nu lji cicãrdisim atselji, du-ti la amari, arucã greplu sh-ljea protlu pescu tsi va yinã nsus, ljea-lu, discljid-lji gura, sh-va s-aflji un statiru. Ljea-lu sh-plãtea taxa a lor ti tini sh-ti mini."

Hiclu atsel Uscat

18 Dimineatsa curund, cãndu ma s-turna tu cãsãbã, lu lo foama. 19 Pri cali vidzu un hic sh-lji si-apruche, ma nu aflã tsiva, dicãt mash frãndzãli sh-dzãsi: "S-nu s-leagã frut pute la tini di totãna!" Sh-hiclu s-uscã trãoarã. 20 Sh-cãndu vidzurã aestã ucenitsilji s-ciudisirã sh-dzãsirã: "Cum s-uscã hiclu trãoarã!" 21 Sh-Isusul apãndisi: "Dealihea vã dzãc, ma s-avets pisti shi s-nu vã ndoits, va s-fãtsets nu mash atsea tsi mini lji-feciu a hiclui, ma sh-canda s-lji dzãtsets aishtui munti: ‘Scoal-ti di aclo sh-arucã-ti tu amari’, aestã va si s-facã. 22 Sh-itsido tsi s-cãftats tu rugãciuni, pistipsinda, va u-loats."

37 Tu oarã aestã s-featsi unã furtunã mari shi vãljurili s-plãscãnea pri varcã ahãntã multã cãt ea ma s-umplea. 38 Iarã elu durnjea tu varcã pri un cãpitinj, elji lu dishtiptarã shi lji dzãsirã: "Nvitsãtore nu ai mirachi trã noi cã ma ni nicãm?" 39 Sh-elu cum si dishtiptã lji aurlã a vimtului sh-lji gãri ali amari: "Tãtsi shi pãpsea!" Shi vimtul pãpsi shi s-featsi tãtseari mari. 40 Sh-lã dzãsi a lor: "Cãtse hits fricoshi? Cum nu avets pisti?" 41 Sh-elji lji acãtsã unã fricã mari shi dzãtsea cu un-alantu: "Cai easti aestu tsi lu ascultã sh-vimtul sh-amarea?"

35 Shi cum tricu multu chiro, ucenitsilji a lui s-apruchearã sh-lji-dzãsirã: "Aestu loc easti ermu sh-tora easti amãnatã. 36 Dã-lã cali aishtor oaminji si s-ducã tu cãmpurili sh-hoarili di anvãrliga tsi s-acumpãrã pãni, cã nu au tsiva ti mãcari." 37 Iarã elu apãndisinda lã dzãsi a lor: "Dats-lã voi s-mãcã!" Sh-elji lji-dzãsirã: "Prindi s-nidzem noi s-acumpãrãm doauã sutã di denari* pãni shi s-lã dãm ti mãcari?" 38 Elu lã dzãsi a lor: "Cãti pãnji avets? Imnats sh-mutrits!" Dupã tsi vidzurã dzãsirã: "Tsintsi pãnji sh-doi peshti." 39 Atumtsea elu deadi ordin a lor tsi s-lji ndreagã tuts, apunats grupi-grupi pri veardea iarbã. 40 Ashã atselji s-apunarã tu grupi cãti unã sutã sh-cãti tsindzãtsi. 41 Apoea elu lo tsintsi pãnjili sh-doi peshtilji, sculã ocljilji cãtrã tser, ghinicuvãntãnda, pãrtsã pãnjili sh-li deadi a ucenitsilor a lui, tra s-li pãrtsa a lor, tutashã lji pãrtsã a lor sh-peshtilji. 42 Tuts mãcarã shi s-fãnãtirã 43 Sh-adunarã doisprãdzatsi di cãneastri cu sãrmi di pãnji shi cu armãsãturi di peshti. 44 Atselji tsi mãcarã pãnjili eara tsintsi njilji di bãrbats.

48 Cãndu lji vidzu ucenitsilji, elji ma s-cupãsea nãftãnda, cã vimtul eara contra lor. Tu a patrul vigljitor a noaptiljei Isusul s-nchisi cãtrã nãshi imnãnda pri amari sh-elu vrea s-lji tritsea. 49 Ma elji, cãndu lu-vidzurã cã ma tritsea pri amari, minduirã cã eara unã fantazmã shi ahurhirã s-aurlã. 50 Tuts lu vidzurã shi s-lãhtãrsirã, ma elu trãoarã ahurhi s-greascã cu nãshi, sh-dzãsi: "Curaiu! Mini escu, nu vã-aspãrats!" 51 Deapoea s-alinã tu varcã cu nãshi sh-vimtul pãpsi. Sh-atselji armasirã ciudisits shi si thãvmãtisirã.

Multsirea a Doaua a Pãnjilor

1 Tu atseali dzãli, s-adunã unã multsãmi multu mari sh-nu avea tsi s-mãca, Isusul lã-grãi a ucenitsilor sh-lã dzãsi a lor: 2 "Nj-easti njilã di aestã multsãmi, cã s-featsirã trei dzãli tsi sta cu mini, sh-nu ari tsi s-mãcã. 3 Sh-ma s-lji pitrecu la casã ni mãcat, va-s armãnã pi cali, cã niscãntsã di elji au vinit di diparti."

4 Sh-ucenitsilji a lui lj-apãndisirã: "Cum va lji fãntea vãrã cu pãni aeshti aoa tu irnjii?" 5 Sh-elu lji-ntribã: "Cãti pãnji avets?" Elji dzãsirã: "Shapti."

6 Atumtsea elu lã-deadi ordin ali multsãmi s-apunã mpadi. Sh-lo shapti pãnjili, hãristisi, li-frãmsi shi li-deadi a ucenitsilor a-lui tsi s-li mpãrtsa ali multsãmi, sh-elji li pãrtsarã. 7 Avea sh-niscãnti peshti njitsi. Dupã tsi li-ghinicuvãntã, ordinã tsi sh-atselji s-lji mpãrtsa la multsãmea. 8 Ashã elji mãcarã shi s-fãnãtirã, sh-adunarã shapti coshuri cu bucãtsili tsi armasirã. 9 Atselji tsi mãcarã eara vãrã patru njilji di oaminji, deapoea lji sãlãghi tra s-fugã.

Hiclu Uscat

12 Alantã dzuã, cãndu ishirã di Betania elu avea foami. 13 Sh-vidzãnda di diparti un hic tsi avea frãndzi, elu s-dusi di videari nacã putea s-afla tsiva aclo. Ma cãndu s-apruche nu aflã tsiva, dicãt mash frãndzi, cã nu eara chirolu a hitsilor. 14 Sh-Isusul lji gri a hiclui, dzãcãnda: "Vãrã s-nu mãcã pute frut di la tini." Sh-ucenitsilji a lui lu-avdzãrã.

Pistipsirea Alihioasã

20 Tu alantã dzuã dimineatsa, tricãnda vidzurã cã hiclu eara uscat dit arãdãtsinã. 21 Sh-Petrul adusi a-minti shi lj-dzãsi: "Nvitsãtore, ia, hiclu tsi tini blãstimash easti uscat." 22 Sh-Isusul apãndisinda lã dzãsi a lor: "Avets pistipsirea al Dumnidzãu! 23 Dealihea vã-dzãc, macã vãrã va lji dzãc aishtui munti: ‘Scoalã-ti shi arucã-ti tu amari’, sh-nu va aibã shubei tu inima a lui, ma va s-pistipseascã cã atsea tsi ma dzãtsi va s-facã, itsido va s-lji si-adarã. 24 Trã atsea ma vã dzãc cã tuti atseali tsi voi cãftats rugãnda, pistipsits cã va li-loats sh-va-vã si da a voauã. 25 Sh-cãndu ahurhits s-vã rugats, macã avets tsiva contra a vãrui, ljirtats-lu tsi sh-Tatãl a vostru tsi easti tu tseruri, s-vã ljeartã amãrtiili a voastri.

Isusul Acljeami Protslji Ucenitsi

1 Cãndu Isusul s-aflã ningã laclu di Ghenezaret, multsãmea ma s-pindzea anvãrliga di nãsu trã avdzãri zborlu a Dumnidzãlui. 2 Elu vidzu doauã vãrtsi ligati tu mardzina a laclui, di la cai avea ishitã piscarlji sh-ma aspila plãsili. 3 Atumtsea s-alinã tu unã di atseali vãrtsi, tu atsea tsi eara a Simonlui, sh-lji si pãrãcãlsi s-u dipãrteadzã niheamã di meal. Deapoea shidzu tu varcã sh-nvitsa oaminjlji. 4 Sh-cãndu ascãpã si zburãscã, lj-dzãsi a Simonlui: "Duti iu easti ma ahãndoasã, sh-arucats plãsili a voastri trã piscuiri." 5 Sh-Simonul lj-apãndisi: "Masture, nã munduim tutã noaptea sh-nu acãtsãm tsiva, ma ti hãtãrea-a zborlui a tãu, va u-aruc plasa." 6 Sh-cum featsirã ashãtsi, acãtsarã ahãntu multã peshti, cãt ma s-arupea plasa. 7 Atumtsea featsirã semnu a sotsilor a lor tsi eara tu alantã varcã s-yinea s-lji agiuta. Sh-elji vinirã sh-li umplurã doauli vãrtsi ahãntu multu cãt ma s-fundusea. 8 Cãndu Simon Petrul vidzu aestã, lj-cãdzu la dzinuclji a Isusului shi lj-dzãsi: "Doamne, dipãrteadzã-ti di mini, cã escu om amãrtios!" 9 Petrul sh-tuts atselji tsi eara cu nãsu, s-ciudisea di cãt multi peshti avea acãtsatã. 10 Ashã undzi sh-cu Iacovul sh-cu Ioanul, hiljilji al Zebedeu, tsi eara sotslji al Simon. Atumtsea Isusul lj-dzãsi a Simonlui: "Nu ti-aspari, di tora sh-nclo tini va s-hii piscar di oaminji." 11 Deapoea elji, trãgãnda vãrtsili tu meal, alãsarã itsido shi s-dusirã dupã nãsu.

Isusul Acumtãni Vimtul

22 Tu unã di atseali dzãli Isusul intrã tu unã varcã cu ucenitsilji a lui sh-lã-dzãsi: "S-tritsem di napãrti a laclui." Sh-elji s-dipãrtarã di aclo. 23 Tu chirolu tsi ma nãftea, Isusul lu acãtsã somnu. Un vimtu mari apãrnji pri lac, sh-varca ma s-umplea, sh-eara tu piricljiu. 24 Atumtsea elji lji s-apruchearã, lu dishtiptarã sh-lji dzãsirã: "Nvitsãtore, nvitsãtore ma nã nicãm!" Sh-elu s-dishtiptã, lji vãrghi a vimtului sh-a vãljiurilor turbati, sh-aesti tãcurã shi s-featsi buneatsã. 25 Apoea Isusul lã dzãsi a ucenitsilor a lui: "Iu easti pistea a voastrã?" Sh-elji lãhtãrsits sh-thãvmãtisits dzãtsea cu un-alantu: "Cai va hibã aestu, tsi ordinã vimtul sh-apa sh-aesti lu ascultarã?"

Isusul Acumtãni Vimtul

22 Tu unã di atseali dzãli Isusul intrã tu unã varcã cu ucenitsilji a lui sh-lã-dzãsi: "S-tritsem di napãrti a laclui." Sh-elji s-dipãrtarã di aclo. 23 Tu chirolu tsi ma nãftea, Isusul lu acãtsã somnu. Un vimtu mari apãrnji pri lac, sh-varca ma s-umplea, sh-eara tu piricljiu. 24 Atumtsea elji lji s-apruchearã, lu dishtiptarã sh-lji dzãsirã: "Nvitsãtore, nvitsãtore ma nã nicãm!" Sh-elu s-dishtiptã, lji vãrghi a vimtului sh-a vãljiurilor turbati, sh-aesti tãcurã shi s-featsi buneatsã. 25 Apoea Isusul lã dzãsi a ucenitsilor a lui: "Iu easti pistea a voastrã?" Sh-elji lãhtãrsits sh-thãvmãtisits dzãtsea cu un-alantu: "Cai va hibã aestu, tsi ordinã vimtul sh-apa sh-aesti lu ascultarã?"

Isusul Vindicã Un Om Demonizat

26 Deapoea nãftãsirã cãtrã loclu a Gherasenjilor, tsi easti agnanghea a Galileiljei.

12 Cãndu dzua ma ascãpa, di doisprãdzatsi lji s-apruchearã al Isus sh-lji dzãsirã: "Nchisea multsãmea, tra s-neagã prit hoari sh-prit cãmpurili di anvãrliga, s-aflã streahã sh-hranã, cã aoa him tu un loc ermu." 13 Ma elu lã dzãsi a lor: "Dats-lã voi s-mãcã." Elji apãndisirã: "Noi nu avem altã dicãt tsintsi pãnji sh-doi peshti, mash macã nidzem noi s-acumpãrãm hranã trã tuts aeshti oaminji." 14 Aclo eara vãrã tsintsi njilji di bãrbatsi. Ma elu lã dzãsi a ucenitsilor a lui: "Bãgats-lji s-sheadã mpadi tu buluchi cãti tsindzãtsi." 15 Elji featsirã ashã sh-lji-apunarã tuts. 16 Atumtsea Isusul lo tsintsi pãnjili sh-doi peshtilji, sh-dupã tsi sculã ocljilji cãtrã tser, li ghinicuvãntã, li pãrtsã sh-li deadi a ucenitsilor a lui s-li dãdea a multsãmiljei. 17 Tuts mãcarã shi s-fãnãtirã, sh-di bucãtsili tsi armasirã adunarã doisprãdzatsi di coshuri.