1 Nu escu mini liber? Nu escu mini apostul? Nu lu am vidzut mini Isusul, Domnul a nostru? Nu hits voi faptul a meu tu Domnul? 2 Macã trã altsãlji nu escu apostul, trã voi fãrã di altã cã escu, cã voi hits vula a apostuliiljei a mea tu Domnul.

3 Aestã easti apãrarea a mea cãtrã atselji tsi mi giudicã: 4 Nu avem noi ndriptati s-mãcãm shi s-bem? 5 Nacã nu avem ndreptul sh-noi s-lom ti muljeari unã sorã, ashã ca alantsã apostulji sh-fratslji a Domnului, sh Chefa? 6 Icã mash mini sh-Barnaba nu avem ndreptul s-nu lucrãm?

7 Cai s-dutsi vãrãoarã suldat cu pãradzãlji a lui? Cai seaminã unã ayinji sh-nu mãcã carpolu a ljei? Cai pashti unã cupii sh-nu bea di laptili a ljei? 8 Nacã ma li dzãc aesti ca om. Nu li dzãtsi sh-Legea ashã? 9 Cã tu Legea al Moisiu easti scriatã: "Nu lji ncljidã gura a boului cãndu alunseashti."* Nacã s-angulceashti Dumnidzãlu trã boilji? 10 Nacã greashti trã noi, dealihea? Ti noi suntu scriati, cã atsel cai bagã pluglu sh-atsel cai alunseashti prindi s-lucreadzã cu nãdii tra s-ljea birichetea. 11 Macã noi avem siminat namisa di voi simintsa duhuroasã, easti aestu lucru ahãntu mari, macã sitsirãm noi bunili a voastri materiali di la voi? 12 Macã altsã au parti la aestu ndreptu pri voi, nu avem sh-noi niheamã ma multu ndreptu? Ma noi nu avem ufilisit atsel ndreptu. Din contra, noi li arãvdãm tuti cu nãeti tra s-nu bãgãm vãrã ncheadic la evanghelu al Hristos. 13 Nu shtits cã atselji cai facã huzmitipsiri tu templu, mãcã dit hrana a templui sh-atselji cai lj-huzmitipsescu a altarlui, s-facã pãrtashi a altarlui? 14 Ashãtsi sh-Domnul ordinã atselji cai dimãndu evanghelul, s-bãneadzã di la evanghelu.

15 Ma mini nu am ufilisit vãrã di aesti ndrepturi sh-nu li scriai aesti tra si s-facã ashã cu mini, cã easti ma ghini ti mini s-mor, dicãt vãrã s-nji-u aleapid alãvdarea a mea. 16 Cã, macã dimãndu evanghelul, nu ari ti mini motiv ti alãvdari, cã easti ananghioasã tsi nji easti ngãrcatã sh-meti, cavai di mini, ma nu-lu predicai evanghelul! 17 Macã aestã u-facã cu bunã-vreari, am unã arãsplatã, ma macã u-facã nu cu bunã-vreari, atumtsea aestã armãni sartsinã cai nji easti pistipsitã. 18 Cai easti arãsplata a mea? Easti cã, dimãndãnda evanghelul s-lu fac fãrã platã sh-ashãtsi s-nu ufilisescu ndreptul a meu trã evanghelul.

19 Cã, cu tutã cã escu liber di tuti, mi feciu sclavlu a tutulor, cu nãeti tra s-amintã cãt ma multsã. 20 Ashãtsi mi feciu ca Iudeu cu Iudeilji tra s-amintam Iudei. Atsilor di sum lege, mi feciu ca di sum lege (cu tutã cã nu escu di sum lege), tra s-amintam atselji di sum lege. 21 Nãintea atsilor tsi suntu fãrã di lege, mi feciu ca fãrã di lege (cu tutã cã nu escu fãrã di legea al Dumnidzãu, ma escu sum legea al Hristos), tsi s-amintam atselji fãrã di lege. 22 Cu atselji slaghi mi feciu slab, tra s-amintam slaghilji, a tutulor mi feciu itsido, tra s-ascãpam fãrã di altã niscãntsã. 23 Tuti aesti li fac trã itia al evanghelu, tra s-mi fac pãrtash tu nãsu.

24 Nu shtits cã atselji tsi alagã tu arenã, dealihea tuts alagã, ma unul va ljea premiul. Alãgats tra s-lu loats. 25 Caitsido tsi ljea parti tu alãgari, si nfãrneadzã la tuti sh-elji u-facã aestã trã amintari unã curunã cai s-aspardzi, iarã noi va amintãm curuna cai nu s-aspardzi. 26 Ashãtsi mini alagã, ma nu fãrã nãeti, alumtã, ma nu ca pi vimtu. 27 Meti, lu nvets truplu a meu cu aspru sh-lu sclãvuescu, tsi dupã tsi am predicat altsilor s-nu armãnã nafoarã di garã discalificat.